Colosu 2 - ꞌRe Ihâimana Uꞌâsi Mono Zadawa Wasuꞌu

¹ Wa hã wa ĩsima wẽ ãne hã, te ai'ãma 're iromhuri pese za'ra wa'aba mono na asiwi ĩwaihu'u za'ra wa'aba da, ĩhâiba pibu za'ra wa'aba õ nherẽ. Duré Laudiséa na 'ri nho'õmo nhisi ãma isazei'wa norĩ 're isi'ubumroi mono norĩ ãma te 're iromhuri pese mono na asiwi ĩwaihu'u za'ra wa'aba da, wa duré ĩsima wẽ, daro mono bâ ni'wam norĩ ãma te duré 're iromhuri pese mono na zama, uburé te te 're ĩhâiba pibu za'ra mono õ norĩ ãma hã.

² Ta norĩ hã tipẽ'ẽzani wẽ ré, siptete sina 're hâimana za'ra mono da, wa tô te ãma 're romhuri pese za'ra. A norĩ wa'aba ãma zama wa tô duré te 're romhuri pese, aipẽ'ẽzani wẽ ré tô asiptete sina 're aihâimana za'ra wa'aba mono da. Tahawa, te za 'râwi simisutu siré 're hâimana za'ra ta norĩ hã, 're isisawi pese za'ra mono zéb zarina. A norĩ wa'aba zama te za duré ãne zarina simisutu asiré 're aihâimana za'ra wa'aba mo. Tawamhã 'Re ihâimana u'âsi mono wasu'uwẽ hã aré dama iwaihu'u'õ hã te te oto waihu'u pese za'ra wa, te za tô ta norĩ hã oto sena na te te 're waihu'u za'ra. Duré a norĩ wa'aba zama hã te za tô oto sena na 're iwaihu'u za'ra wa'aba mo. 'Re ihâimana u'âsi mono wasu'u hã aré dama iwaihu'u'õ hã, ã hã Cristuhu wasu'uwẽ, te dama wasu'u.

³ Cristu hã rowasu'u dama iwaihu'u'õ na 'Re ihâimana u'âsi mono nhimiroti wẽ wasu'u waihu'u'wa, ta hã. Ẽtẽ'ubuzi iwa'âbâ za'ẽne hã ti'ai 'rowi 're simi'wara mono nherẽ, da te oto 're isõpẽtẽ za'ra mono ne, ma tô Cristu hã te te dama 're wasu'u hâi'ré sõ'awi, 'Re ihâimana u'âsi mono nhimiroti wẽ wasu'u hã.

⁴ Ni'wam norĩ hã roti senai'õ na taré te te aima 're irowasu'u za'ra wa'aba mono hã wapari ze nherẽ, ãma 're saze za'ra wa'aba mono tõ da, wa ãne na aima nharĩ za'ra wa'wa.

⁵ Ai'rata ĩnhamra aba õ nherẽ, ĩpẽ'ẽ na wa tô te ai'ãma 're rosa'rata u'âsi za'ra wa'wa, 'râwi asiré 're ĩhâimana za'ra wa'aba mono ne. Cristu hã asina 're i'umnhasi za'ra wa'aba mono zém na, simisutu asiré 're aihâimana nhiptete za'ra wa'aba mono wa, wa ai'ãma 're ĩtoi u'âsi za'ra wa'wa, romhâ na nherẽ.

Cristuhu ãma 're idanomro mono zé wasu'u

⁶ Tahawa, Cristu Zezusi hã Asib'apito za'ra wa'aba na 're saze za'ra wa'aba mono wa, ma'ãpé simisutu isiré ãma 're aihâimana u'âsi za'ra wa'aba mono za, 'râwi.

⁷ Rowede hã sari pa na 're simasa mono wamhã, 're sina waihu'u mono õ di. Tane duré a norĩ wa'wa hã Cristu te te 're i'aipawaptob za'ra wa'aba mono zéb zarina si, te za aihâimana nhiptete sina ãma 're aihâimana za'ra wa'aba mo. Tawamhã taha si asina 're i'umnhasi za'ra wa'aba mono zéb zarina si te za asima 're isa'ẽtẽ za'ra wa'aba mo, Cristuhu wasu'uwẽ na tô sena da te aima ãma 're irowasu'u za'ra wa'aba mono zéb zarina. Te za duré ãma 're aiwata u'âsi za'ra wa'aba mo, 'Re ihâimana u'âsi mono ãma, Cristuhu nhimipawaptobzéb zarina.

⁸ Tahawa, te za 're asi'madâ'â pese za'ra wa'aba mo, dasi'uihâ na senai'õ na danhimirosa'rata nhipese na da te aima 're roti za'ra wa'aba mono wamhã, ãma 're dazaze za'ra wa'aba mono tõ da, tô sena newa taha ãma si 're aihâimana za'ra wa'aba mono tõ da. Ni'wam norĩ hã danhimiwada'uri zarina pawa'âbâ ãna te te dama 're iromhuri za'ra mono ne, robzei'õ na apâ 're aihâimana za'ra wa'aba mono õ'umnhasite, te za dawi 're asi'madâ'â pese za'ra wa'aba mo. Danhimirosa'rata nhipe hã Cristuhu hawib õ di. Dahi'rata sidâpâsi tô senai'õ na taré da te dasima 're iroti za'ra mono zém hawimhã ta hã, duré ihâiba'õ norĩ hã wasété uptabi na 're ihâimana za'ra mono norĩ hã ropâ siptete sina marĩ te te 're i'madâ'â za'ra mono hawimhã, danhimirosa'rata nhipe hã.

⁹ Cristu hã ti'ai ãma a'uwẽ hâiba na 're morĩ ré, te tô 'Re ihâimana u'âsi mono ne 're hâimana, aiwa uptabi wa. Tahawa, marĩ zô tiwi 're rowaptâ'â mono õ di, Cristuhu wi hã.

¹⁰ Tane duré a norĩ wa'wa hã, Cristuhu ãma 're anomro aba mono wa, marĩ zô aiwi 're rowaptâ'â za'ra wa'aba mono õ di, rowẽ na ãma 're i'anomro u'âsi aba mono zéb da hã. Cristu hã uburé ihâiba'õ norĩ 'madâ'â'wa norĩ nhipai u, te pire uptabi na õhõ si 're hâimana u'âsi, siwaprosi.

¹¹ Zudeu norĩ hã te 're sisihâiwata nhihâri za'ra, 'Re ihâimana u'âsi mono nhib'a'uwẽ 're inomro mono na da te ãma 're iwaihu'u za'ra mono zéb da hã. Tane duré, wa norĩ hã Cristuhu ãma oto 're wanomro mono wa, ta hã ma tô wapẽ'ẽ 're wanhimirosa'rata wasété na 're iwanomro wasété mono zé hã te te wawi 're anhihâri, wawẽ na si oto ãma 're wahâimana za'ra mono da.

¹² Â dawabzuri hã 're 'manharĩ za'ra wa'aba mono wamhã, â da te 're i'asãmra aba mono zé hã, Cristuhu siré 're atâ'â za'ra wa'aba mono zé, te ai'ãma simiré'é za'ra wa'wa. Ab're 're, isiré da te 're i'aséme aba mono zéb zama, te ai'ãma simiré'é za'ra wa'wa. Ta hã 're anomro 'rata aba mono zé hã oto 're irẽme pese za'ra wa'aba mono zé, te aima wasu'u za'ra wa'wa. Duré Cristu hã dâ'â uptabi nherẽ, Imama hã tiwaihu'u pese na te te ihâiwa'utu ne, ma tô duré isiré aihâiwa'utu za'ra wa'wa. Isiré 're aihâiwa'utu za'ra wa'aba mono zé hã 're anomro aba mono zép té, te oto aima wasu'u za'ra wa'wa. 'Re ihâimana u'âsi mono hã iwaihu'u pese na asina 're i'umnhasi za'ra wa'aba mono zéb zarina, ma tô ãne hã aima pisutu za'ra wa'wa, taha ãma si oto 're anomro aba mono zép téb da hã.

¹³ A norĩ wa'wa hã aipẽ'ẽ 're, 're atâ'â za'ra wa'aba mono ne, ma tô aré 're anomro aba mo, aiwasété si 're 'manharĩ u'âsi za'ra wa'aba mono wa, duré 'Re ihâimana u'âsi mono nhiti 're aihâimana u'âsi za'ra wa'aba mono wa aré. Taha ré, ma tô oto 'Re ihâimana u'âsi mono hã te te aima 're pisutu za'ra wa'wa, 're anomro aba mono zép téb da hã, aipẽ'ẽ 're ato sina ãma 're anomro u'âsi aba mono da, Cristu hã dâ'â uptabi nherẽ, apâ te te ihâiwa'utu ne. Tahawa, wawasédé wa te 're i'manharĩ za'ra mono zé hã te te oto wa'ãma 're ab'madâ'â mono õ di za, ta hã.

¹⁴ Wawasédé wa te 're i'manharĩ za'ra mono zém na te te aré wa'ãma sima irob'ui'éré za'ra zé hã ma tô te te wama 're apari, wawasété na wa te aré tãma 're iwa'âbâ za'ra mono õ na wa'ãma rob'ui'éré hã. Isimiroti hã wa te wasina ãma 're i'uwaimrami za'ra mono õ zarina, wawasété na te te wa'ãma 're i'arob'ui'éré mono zé hã ma tô te te wama 're a'uprosi oto. Niha 're idahâimana za'ra mono zéb da, duréihã te te dama 're i'aroti 'rata mono hã ma tô duré te te dama 're a'uprosi oto. Cristu hã wedepo'o nhonhi'rãmi na wazada idâ'âzém na ma tô te te wama 're a'uprosi tô oto.

¹⁵ Uburé hâiwa nho're ãma ihâiba'õ norĩ nhiptetezé hã ma tô tiwi uprosi za'ra 'Re ihâimana u'âsi mono hã, dapo're'õ norĩ ma simiroti pire na tãma 're ihâimana za'ra mono norĩ nhiptetezé hã aré. Da'wapéi'wa norĩ nhib'apito hã tinhitob'ru norĩ ãma te te ai'uté za'ra wẽ te, da'ahâ nho'a sisarina te te isimroi mono ne, ma tô danho'a ta norĩ ãma ai'uté za'ra, wedepo'o nhonhi'rãmi na Cristuhu dâ'âzém na hã, Cristuhu ma wapu na 're ihâimana za'ra mono na, uburé da te oto ãma 're waihu'u za'ra mono da.

¹⁶ Ãté ni'wam norĩ hã te za ãne na te te aima 're roti za'ra wa'wa: “Romnhi hã siwa'ru 're huri aba mono õ di za. Duré uwa 'rãi wa'u isé hã siwa'ru bâtâ na 're âhuri aba mono õ di za. Duré sabadu na romhuri zahârizém na 're romhuri za'ra wa'aba mono õ di za. Duré a'amo hã 're pusi mono sidâpâsi, 'Re ihâimana u'âsi mono ma, dato da te tãma 're 'manharĩ za'ra mono wamhã, te za dame 're i'madâ'â pese za'ra wa'aba mo. Bâdâ ahâ na pire na dama 're ihâimana za'ra mono zama, te za duré dame 're i'madâ'â pese za'ra wa'aba mo, 'Re ihâimana u'âsi mono ãma 're idawata za'ra mono zéb da, dama ipire mono hã. Ãne hã asina tãma ãma 're uwaimrami za'ra wa'aba mono wapsi, te za 'Re ihâimana u'âsi mono hã te te 're aiwẽsãmri za'ra wa'wa.” Ãne na ni'wam norĩ hã te te aima 're roti za'ra wa'aba mono wamhã, ãma 're saze za'ra wa'aba mono õ di za, dasi'uihâ na danhimi'manharĩzém hawi 'Re ihâimana u'âsi mono hã te te 're da'awẽsãmri mono dai õ wa.

¹⁷ Da'awã da te 're 'madâ'â za'ra mono wamhã, dahâiba uptabi hã dama 're ihâimana za'ra mono na te za da te 're waihu'u za'ra. Tane nherẽ, da'awã si hã marĩ ãma 're hâimana mono õ di, ipire hã. Tane duré, danhimiroti zarina uburé danhimi'manharĩzé mono hã. Marĩ i'uptabi hã dama ãma 're hâimana za'ra mono õ di. Iwẽ hã za dama 're ihâimana za'ra mono zép si, te wasu'u. Marĩ iwẽ uptabi hã, ta hã Cristu te tô wama wasu'u za'ra, taha si.

¹⁸ Ãté ni'wam norĩ hã te za sadawa nhipese na dama 're siwasu'u za'ra, dama wapu na 're idahâimana za'ra mono norĩ na, 'râwi 're si'madâ'â ze za'ra mono nherẽ. Ãté te za duré ta norĩ hã hâiwa ãma romhuri'wa norĩ ãma si 're wata za'ra, 'Re ihâimana u'âsi mono upana. Tawamhã ãté ta norĩ hã te za aima roti za'ra wa'wa, ãne: “A norĩ wa'wa hã wasine 're aihâimana za'ra wa'aba mono õ wamhã, 'Re ihâimana u'âsi mono hã iwẽ uptabi hã te te aima 're sõmri za'ra wa'aba mono õ di za. Te za isimini za'ra wa'wa.” Ãne na ta norĩ hã te te aima 're nharĩ za'ra wa'aba mono wamhã, ãma 're saze za'ra wa'aba mono õ di za. Tô'ã. Ta norĩ hã marĩ aimawi hã dama iwaihu'u'õ hã sõtõ 'rowim ne, te te 're isabu za'ra mono na dama 're isiwasu'u za'ra mono na, te 're si'madâ'â ze za'ra, dama pire na 're hâimana za'ra mono newa, 'Re ihâimana u'âsi mono waihu'u'õ'wa norĩ nhimirosa'rata wasété zarina.

¹⁹ Ta norĩ hã Cristuhu wasu'uwẽ si te te sima 're tété za'ra mono õ di. Cristu hã uburé tizazei'wa norĩ 'madâ'â'wa te pire na 're hâimana taha si, da'rã hã dahâiba ma pire na 're ihâimana za'ra mono ne. Dahâiba na danhorõ 're ihâimana za'ra mono hã te dahi hã te te sitẽme 're tété tete za'ra, danhiptete sina ãma 're dahâimana za'ra mono da, dahâiba na hã. Tane duré Cristu hã te za tinhib'a'uwẽ norĩ hã te te 're apawapto, ta norĩ hã 're sipawaptob za'ra mono da, siptete sina ãma 're hâimana u'âsi za'ra mono da. Te za duré te te 're apawapto, prédup sina ãma 're ihâimana za'ra mono zém na te te sima 're sa'ẽtẽ u'âsi za'ra mono da, 'Re ihâimana u'âsi mono te te tãma 're i'awẽ mono zéb zarina.

Cristuhu siré 're idahâiwa'utu za'ra mono zé wasu'u

²⁰ Cristu hã dâ'â wamhã, 're anomro 'rata aba mono zé hã ma tô isiré aiwi ai'utõrĩ za'ra wa'wa. Tahawa, ti'ai ãma danhimiroti zarina 're aihâimana za'ra wa'aba mono õ di za oto, taha zarina 'Re ihâimana u'âsi mono te te 're aiwẽsãmri za'ra wa'aba mono dai õ wa. Ta hã tâibâ oto. Ta hawi ma tô ihawimhã aiwairébé 'wa. E marĩ da, te bété zahadu ãne hã isazei'õ'wa norĩ nhimiroti hã asina 're isazei pese za'ra wa'aba mo, taha na zahadu 're aihâimana za'ra wa'aba mono õ nherẽ.

^21-22 Ni'wam norĩ hã te ãne te te aima 're roti za'ra wa'wa, 'Re ihâimana u'âsi mono nhimiroti zarina newa: “Ã hã dasa hã asib'rata na âri õ di za, wasété wa. Duré ã hã téiwai õ di za, asadawa na. Duré ã hã asib'rata na upi tõ. Wasété uptabi di.” Ãne hã te ni'wam norĩ hã dasa na te te aima 're roti wasété za'ra wa'wa, 're upi za'ra wa'aba mono tõ da. Tane nherẽ, dasai mono bâ dama 're hâimana hutu za'ra mono di. Tahawa, dasa da te dasiwi 're isawi za'ra mono zém na roti hã tarére duré. Marĩ dai õ di ãne hã, 'râwi dasi'uihâ na da te dasima 're irosa'rata za'ra mono zé hã.

²³ Dasa na te te dama 're iroti wasété za'ra mono norĩ hã waihu'u pese newa, te ta norĩ ãma da te 're sasõmri za'ra. Tane nherẽ, ta norĩ hã waihu'u pese na 're hâimana za'ra mono õ di. Ta norĩ hã te ãne te te 're dawada'uri za'ra, hâiwa ãma 'Re ihâimana u'âsi mono ma romhuri'wa norĩ ãma si 're dawata za'ra mono da, 'Re ihâimana u'âsi mono upana. Ta norĩ hã 'râwi sina 're wata u'âsi za'ra mono nherẽ, te dama wapu na 're ihâimana za'ra mono na dama 're siwasu'u za'ra, sadawa nhipese na. Dasa hã te te siwi 're iwẽ'õ za'ra mono na te ta norĩ hã te te 're robzépata za'ra tihâiba na, 'Re ihâimana u'âsi mono hã taha zarina te te 're wẽsãmri za'ra mono da newa. Tane nherẽ, taré uptabi ta hã. Marĩ dai õ di, dasi'uihâ na dasai mono bâ da te dasima 're iroti za'ra mono zé hã. E dasi'uihâ na da te dasima 're iroti za'ra mono na 're wahâimana za'ra mono wa, wa za wa te wasina tãma ãma 're uwaimrami za'ra, wanhimirosa'rata wasété zarina marĩ iwasédé hã wa te 're 'manharĩ za'ra mono tõ da. Mare di. Sib'uware di, marĩ da, wama 're hâimana za'ra mono õ wa, ta hã.