Colosu 1 - ꞌRe Ihâimana Uꞌâsi Mono Zadawa Wasuꞌu

^1-2 Wa hã Paulu, Cristu Zezusihi zadawa wasu'u'wa, wa 're ĩhâimana, 'Re ihâimana u'âsi mono te te sima ĩwẽzéb zarina. Tahawa, wa ãma aima rob'ui'éré za'ra wa'wa, Colosu na 'ri nho'õmo nhisi ãma 'Re ihâimana u'âsi mono nhib'a'uwẽ 're aihâimana za'ra wa'aba mono norĩ ma. Wasisãnawã Timotiu te duré ãma asawi za'ra wa'wa. A norĩ wa'wa hã te oto wasiré wasisãnawãi wa, 're anomro wẽ wa'aba mo Cristuhu ãma si, tiwi 're aipizari za'ra wa'aba mono ãna. Wamama ma, wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da hã.

Paulu hã 'Re ihâimana u'âsi mono ãma iwatazé wasu'u

³ 'Re ihâimana u'âsi mono ma, ai'ãma 're wamreme zusi aba mono sidâpâsi, wa ãma 're wawata u'âsi za'ra, Wanhib'apito Zezu Cristuhu mama ãma hã.

⁴ Cristu Zezusihi si asina 're i'umnhasi za'ra wa'aba mono zé wasu'u hã, duré uburé 'Re ihâimana u'âsi mono nhib'a'uwẽ 're isawi pese za'ra wa'aba mono zé wasu'u hã wa te 're wapari za'ra mono wa, wa ãma 're wawata u'âsi za'ra, 'Re ihâimana u'âsi mono ãma, ãne na oto 're aihâimana wẽ za'ra wa'aba mono wa.

⁵ Cristuhu wasu'uwẽ hã tô sena uptabi hã imorĩ'rata na da te atẽme ãwisi za'ra wa'aba wamhã, tame ma tô iwapari na'rata za'ra wa'wa, iwẽ uptabi hã hâiwa ãma dazô 're isimi'wara mono zé wasu'u hã, duré taha zô si 're idanhimipari u'âsi za'ra mono zé wasu'u zama. Taha zô asina 're asimipari za'ra wa'aba mono zéb zarina, ma tô Cristuhu si asina 're i'umnhasi pese za'ra wa'aba mo. Taha zarina ma tô duré 'Re ihâimana u'âsi mono nhib'a'uwẽ norĩ hã 're isawi pese za'ra wa'aba mo. Hâiwa ãma, wẽ uptabi na asô 're isimi'wara aba mono hã, te tô 'Re ihâimana u'âsi mono hã te te asô 're 'madâ'â pese za'ra wa'wa. Taha zô si te tô asina 're asimipari u'âsi za'ra wa'aba mo.

⁶ Cristuhu wasu'uwẽ hã ma tô da te ãma ropé oto, ropâ. Tahawa, ma tô isazei'wa norĩ hã dasina tahâ'â ni oto. Tahawa, ma tô duré dahâimanazém na da te 're saprĩ za'ra, iwẽ u hã. Tane ma tô duré iwasu'uwẽ hã aima 're hâimana za'ra wa'wa, iwapari na'rata za'ra wa'aba zém hawimhã. Tame ma tô oto iwaihu'u za'ra wa'wa, tô sena na 'Re ihâimana u'âsi mono te te 're ida'azawi pese mono zém na hã.

⁷ Epafrasihi nhimirowasu'u zarina, ma tô ãma iwaihu'u za'ra wa'wa. Ta hã Cristuhu ma wasiré romhuri'wa, wama isawi pe hã. Simi'ẽ na te Cristuhu ma, te te ai'ãma 're romhuri pese za'ra wa'wa, wa'upana.

⁸ Ta hã ma tô wama aiwasu'u wẽ za'ra wa'wa, 'Re ihâimana u'âsi mono pẽ'ẽzani te te 're aipawaptob za'ra wa'aba mono zéb zarina, asimizawi pese zé hã oto iwaihu'u za'ra wa'aba na hã.

⁹ Tahawa, aiwasu'u wẽ hã wa te iwapari na'rata za'ra wa'aba zém hawim haré, wa tô õne u'âsi ai'ãma 're wamreme zusi u'âsi 'wa, 'Re ihâimana u'âsi mono ma. Ta hã te te sima 're aiwẽ za'ra wa'aba mono zéb uwaibaba, niha oto ãma 're aihâimana za'ra wa'aba mono da, duré te te aima 're waihu'u za'ra wa'aba mono da, wa tô wa te tiwi aima 're rowaptẽrẽ u'âsi za'ra wa'wa. Ipẽ'ẽzani hã te za tô te te 're aipawaptob u'âsi za'ra wa'wa, hâiwa hawi dahâimanazém na rowaihu iwẽ uptabi hã oto ãma waihu'u za'ra wa'aba da, taha zarina 'Re ihâimana u'âsi mono te te sima 're aiwẽ za'ra wa'aba mono zé hã asina 're waihu'u za'ra wa'aba mono da oto, 'râwi.

¹⁰ Tawapsi, te za Wanhib'apito zazei'wa hâimanazéb zarina 're anomro wẽ wa'aba mono zém na, tãma ãma asina 're i'uwaimrami za'ra wa'aba mo. Marĩ iwẽ si 're 'manharĩ za'ra wa'aba mono wamhã, Wanhib'apito hã te za toi uptabi na aihâimanazém na te te 're ai'uzei pese za'ra wa'wa. Tawamhã 're aihâimana wẽ za'ra wa'aba mono zém hawi, te za tô marĩ 're i'manharĩ wẽ za'ra wa'aba mono zém na asima 're isa'ẽtẽ za'ra wa'aba mo. Tawamhã 'Re ihâimana u'âsi mono hã iwaihu'u za'ra wa'aba zém na te za duré asima 're isa'ẽtẽ za'ra wa'aba mo, asi'uihâ na.

¹¹ Wa duré wa te tiwi aima 're rowaptẽrẽ u'âsi za'ra wa'wa, 'Re ihâimana u'âsi mono wi hã, tiwaihu'u pese na iwẽ uptabi na si te te 're aipawaptob za'ra wa'aba mono da, asiptete u'âsi ãma 're anomro aba mono da, taha na si. Ãne wamhã, te za tô ato sina asiptete sina ãma 're anomro aba mo. Duré ãne wamhã, uburé marĩ na 're robzépata za'ra wa'aba mono nherẽ, asa dama ãma 're wa'rãmi za'ra wa'aba mono õ di za.

¹² Ãne wamhã, Wamama ãma te za duré ãma 're aiwata u'âsi za'ra wa'aba mo. Ta hã ma tô aima pisutu za'ra wa'wa, hâiwa ãma tinhib'a'uwẽ norĩ ma, iwẽ uptabi hã te te sô 're i'apisutu mono hã aima za'ra wa'aba zama aima 're hâimana mono da dasine, da'ãma 're isib'a'uwẽ mono zéb ãma hã rowa'a za'ẽne 're isa'wari u'âsi mono ãma hã.

¹³ Ta hã ma tô wa'anho'reptu tô, robra hawi, Satanasihi nhiptetezém hawi. Ta hawi ma tô te te 're wa'awaibu, i'ra nhimi'madâ'â si oto tãma 're wahâimana za'ra mono da, tãma isawi uptabi nhimi'madâ'â si.

¹⁴ Ti'ra dâ'âzém na ma tô wa'awa'â, marĩ wa te 're i'manharĩ wasété za'ra mono zé hã te te wama 're apari mono da, taha zarina wawasédé hã te te wa'ãma 're ab'madâ'â tõ mono da oto.

Cristu hã 're ihâimana mono zé wasu'u

¹⁵ Cristu hã 'Re ihâimana u'âsi mono ne, te tô 're mo, aiwa wa. Tane nherẽ, 'Re ihâimana u'âsi mono hã datõmo na da te dasiwi 're 'madâ'â waihu'u za'ra mono õ di. I'ra si ma tô da te dasiwi 're 'madâ'â za'ra datõmo na hã, ti'a 're morĩ ré. Ta hã duréihã marĩ õ uptabi ré hã, te tô 're hâimana u'âsi, i'ra hã. Uburé ropoto nhipai u, te ta hã pire uptabi na 're hâimana.

¹⁶ Õhõ si ma tô Timama zadawa para uburé marĩ hã te te apoto, hâiwa ãma, duré ti'ai ãma zama, datõmo na da te 're i'madâ'â za'ra mono hã, duré da te 're i'madâ'â waihu'u za'ra mono õ zama. Uburé hâiwa nho're ãma dapo're'õ norĩ ma simiroti pire na 're ihâimana za'ra mono norĩ zama ma tô te te apoto, ihâiba'õ norĩ hã. Uburé marĩ hã taha ma si 're hâimana za'ra mono da, ma tô te te apoto tô, Timama zadawa para.

¹⁷ Cristu hã õne u'âsi te tô 're hâimana, marĩ õ uptabi ré hã. Ta hã te uburé marĩ hã tinhimipoto mono bâ te te 're atété tiwaihu'u pese na, si'wa'rutu na tiwi 're hâimana za'ra mono ãna, tãma 're hâimana za'ra mono da, simisutu.

¹⁸ Ta hã uburé tizazei'wa norĩ 'madâ'â'wa te 're hâimana, pire uptabi na. Ta hã dapisutu'wa duré, 're idapoto téb za'ra mono na 're idanomro mono da hã. Dâ'â nherẽ, apâ hâiwa'utu wa, te oto dama pire na 're hâimana u'âsi, uburé za idahâiwa'utu za'ra norĩ nhipai u. Tahawa, te oto danhipai u pire uptabi na 're hâimana tô.

¹⁹ 'Re ihâimana u'âsi mono hã te te sima iwẽzéb zarina, ma tô ti'ra hã pisutu, isine uptabi 're hâimana mono da, aiwa.

²⁰ Ma tô duré sima ãma roti siro, i'ra hã wedepo'o nhonhi'rãmi na dazada idâ'âzém na oto da'ãma 're siwadi mono da, uburé hâiwa ãma 're idahâimana za'ra mono norĩ ãma hã, duré uburé ti'ai ãma 're idahâimana za'ra mono norĩ ãma zama.

²¹ A norĩ wa'wa hã ma tô aré 'Re ihâimana u'âsi mono nhiti si 're anomro aba mo, aipẽ'ẽ 're wa'aba hã. Asitob'ru na ma tô ãma 're irosa'rata za'ra wa'aba mo aré, aipẽ'ẽ 're marĩ iwasété na si asima 're rosa'rata za'ra wa'aba mono wa. Duré marĩ iwasété si 're 'manharĩ za'ra wa'aba mono wa, ma tô aré isiti 're aihâimana za'ra wa'aba mo.

²² Tane nherẽ, i'ra hã dasiré a'uwẽ hâiba na dazada idâ'âzéb zarina, te oto ai'ãma 're siwadi za'ra wa'wa, romhutu'õmhã sisõ're te te asõré wa'aba da, aiwasédé hã da te ai'ãma sa'ra waihu'u aba õ wa za tamemhã oto, Cristu hã tidâ'âzém na aiwasédé te te aima 're i'apari aba mono zéb zarina.

²³ Tahawa, õne haré te za Cristuhu wasu'uwẽ si asina 're i'umnhasi za'ra wa'aba mo asiptete sina, 'ri hã ẽtẽ nhisiwi siptete na 're sa mono wa, simei waihu'u õ na 're isa mono ne. Te za tô ãma 're aihâimana u'âsi za'ra wa'aba mo, tiwi asina 're aipahâ za'ra wa'aba mono ãna. Imorĩ'rata na Cristuhu wasu'uwẽ hã wapari na'rata za'ra wa'aba wamhã, iwẽ uptabi hã hâiwa ãma asô 're isimi'wara aba mono wasu'u wi, tiwi asina 're ai'ré za'ra wa'aba mono õ di za, sô 're asimipari za'ra wa'aba mono wasu'u wi hã. Ãhã wasu'uwẽ hã ropâ ma tô da te dasima 're wasu'u za'ra, da te 're waihu'u za'ra mono da. Duré wa hã Paulu, wa ãhã wasu'uwẽ na te dama 're romhuri u'âsi.

Paulu hã isazei'wa norĩ te te 're ipawaptob za'ra mono zé wasu'u

²⁴ Wa hã ai'udâna za'ra wa'aba, te ai'ãma 're robzépata za'ra wa'aba mono nherẽ, wa ĩto sina 're ĩhâimana. Cristuhu ma si, te 're romhuri mono wa, wa tô te 're robzépata za'ẽtẽ tô, ta hã ti'ai ãma 're morĩ ré, dazada te te irobzépata ne. Tane nherẽ, Cristuhu nhib'a'uwẽ norĩ ma, ĩnhimiromhuri na te tãma ãma 're uwaimrami mono da, wa za tô taha na te 're robzépata u'âsi.

²⁵ 'Re ihâimana u'âsi mono hã ma tô ĩpisutu, isib'a'uwẽ norĩ te tãma 're apawapto mono da. Ai'udâna za'ra wa'aba te 're romhuri mono da, ma tô romhuri hã ĩma tisõ, uburé isadawa wasu'uwẽ na te aima 're rowasu'u za'ra wa'aba mono da.

²⁶ Ãhã wasu'u hã 'Re ihâimana u'âsi mono, isãna'rata hawimhã te te aré dama 're i'awaihu'u mono õ hã ma tô oto sõ'awi dama upsibi nhamra, tinhib'a'uwẽ norĩ ma si.

²⁷ 'Re ihâimana u'âsi mono hã ma tô sima ãma roti, ãhã wasu'u hã iwẽ uptabi hã aré da te 're iwaihu'u za'ra mono õ hã te te oto dama awasu'u hâi'ré da sõ'awi, dapoto mono bâ da te oto 're waihu'u za'ra mono da, zudeu'õ norĩ zama. Ãhã wasu'u hã aré da te 're iwaihu'u za'ra mono õ hã, ãne: Cristu hã te oto aipẽ'ẽ 're, 're sãmra za'ra wa'wa. Tahawa, te za tô taha zô si 're asimipari za'ra wa'aba mo, 'Re ihâimana u'âsi mono, iwẽ uptabi hã za te te wama 're i'apisutu mono zô si. Ãne 'Re ihâimana u'âsi mono wasu'u hã, ã hã aré da te 're iwaihu'u za'ra mono õ.

²⁸ Tahawa, Cristuhu si wa oto wa te dama 're wasu'u za'ra. Hâiwa hawi dahâimanazém na rowaihu iwẽ hã wa te 're iwaihu'u za'ra mono zéb zarina, wa tô duré wa te 're da'uwati wẽ za'ra dahâiba mono bâ, marĩ hã da te 're 'manharĩ wasété za'ra mono tõ da oto. Wa tô duré wa te dama 're roti za'ra, marĩ da te 're 'manharĩ wẽ za'ra mono da, i'uwaibaba si. Ni'wam norĩ hã Cristuhu ãma prédup sina 're inomro mono norĩ hã 'Re ihâimana u'âsi mono nho're u, wa te 're simroi mono da, wa tô ãne hã wa te dama 're roti za'ra, rosa'rata wẽ hã wa te oto 're iwaihu'u za'ra mono zém hawimhã.

²⁹ Ãne da, wa tô 're ĩsi'wapéi u'âsi, ĩnhiptete sina te tãma 're romhuri mono da. Cristu hã tinhiptetezé te te ĩma 're sõmri mono wa, wa iré te ãma 're romhuri pese, taha na si 're ĩnhiptete uptabi mono wa.