Apocalipsi 9 - ꞌRe Ihâimana Uꞌâsi Mono Zadawa Wasuꞌu

¹ Taha pari, ma tô imrotõ ãma hã amnhihârâ duré, hâiwa ãma romhuri'wa hã, tinhimnhihârâzém na. Simnhihârâ wi, wa tô 'madâ wasi hã, hâiwa hawi ti'ai u iwaptã hã. 'Ridawazé hã ma tô wasi ma sõmri ni, ab're 'rehâ 'ridawazé hã. (Ab're 'rehâ hã, wa'uburé norĩ 're ihâimana za'ra mono zé).

² Tawamhã wasi hã ma tô ab're 'rehâ hã 'ridawa. Te te 'ridawa wamhã, ma tô isizé hã watobro, ab're 'rehâ hawi. Isizé hã unhama ro'o za'ẽtẽ nhizédé ne hã. Tawamhã watobro wamhã, ma tô bâdâ hã tõmo utõ. Ma tô duré hâiwa'utõ, ab're 'rehâ nhizé hã. Tahawa, ma tô daro mono bâ tirobra.

³ Tawamhã isizédé hawimhã ma tô 'ridi hã wairé, ti'ai u. Tawamhã ta norĩ ma, ma tô pisutu za'ra ni, apa'apa 'wa nhi'oto nhipsari ne isé uptabi ne, te te dama 're rob'manharĩ za'ra mono da, 'Re ihâimana u'âsi mono nhimi'manharĩ waihu'u pese zém na.

⁴ Ãne te ni'wa hã tãma nharĩ za'ra: — Dui ma, 're rob'manharĩ wasété za'ra wa'aba mono õ di za, duré wesuirã ma zama hã, duré wede ma zama hã. Te duré tãma da'ru za'ra, ãne: — 'Re ihâimana u'âsi mono nhib'a'uwẽ'õ, uihâ ui'éré ãna 're inomro mono norĩ ma si, te za 're irob'manharĩ wasété za'ra wa'aba mo.

⁵ Tane nherẽ, 're danhimroi wa'aba mono õ di za. A'amo imrotõ na si te za dama 're irob'manharĩ wasété za'ra wa'aba mo. Apa'apa 'wa nhi'oto nhipsari na ne isé pire na, te za dama 're irob'manharĩ wasété za'ra wa'aba mo, da te ãma 're robzépata za'ẽtẽ uptabi za'ra mono da.

⁶ Tawamhã a'amo imrotõ na da te 're robzépata za'ẽtẽ za'ra mono wa, te za 'râwi da te dasima 're rosa'rata wasété za'ra, dasi'uihâ na 'râwi 're dasisimroi mono da. 'Re dasisimroi mono da nherẽ, 're dasisimroi waihu'u mono õ di za. Te za a'â tô da te 're robzépata hâ za'ra.

⁷ Tawamhã 'ridi hã te asõré, awaru hã dasi'wapé da, da te 're ipese za'ra mono ne. Ẽtẽ waipo pré oru 'manharĩ na da'rãzaza ne ré, te asõré. Duré tawamhã awaru hã, da'ubu ne i'ubu mono hã.

⁸ Duré iséré mono hã aiwa pi'õ zéré ne. Duré i'wa mono hã, aiwa hu'u zérépa 'wa ne.

⁹ Tawamhã isi'uwazi tete 'manharĩ ne ré, te sõ'utu ubu ré aimasa. Duré isaripi ruru hã ruru'u za'ẽtẽ uptabi di. Aiwa awaru na wedewarare tete 'manharĩ ruru'u ne hã, dasi'wapé zô ãma 're idasisa'rei mono ruru'u ne, isaripi ruru hã.

¹⁰ Duré ina're 'wamhi mono hã apa'apa 'wa nhi'oto na're 'wamhi ne. Taha nhipsari ne, sé pire di, isimiwa'rézé hã. Tawamhã tina're 'wamhi na te za tô te te dama 're rob'manharĩ wasété za'ra. A'amo imrotõ ãma te za te te 're dahâzub u'âsi.

¹¹ Duré isib'apito za'ra hã te 're hâimana, ab're 'rehâ 'madâ'â'wa hã. Hebreu norĩ nhiminhisizém na hã, Abadõ na. Duré gregu norĩ nhiminhisizém na hã Apoliã na. Isisi hã Da'uprosi'wa, te wasu'u.

¹² Tawamhã ropipa hã imorĩ'rata na iwatobro hã ma tô ai'utõ. Tane nherẽ, te za duré ropipa hã maparane dazô pu.

¹³ Tawamhã hâiwa ãma 'Re ihâimana u'âsi mono ma romhuri'wa hã imropâ ãma hã ma tô duré tinhimnhihârâzém na amnhihârâ. Simnhihârâ wi, wa tô duré ni'wai mreme hã wapa. Oru 'manharĩ na wedeza ne na 'Re ihâimana u'âsi mono ma, danhoprubzéb da, wedewati isadaze, da te tãma 're izata za'ra mono zé u'rã'wa mono hawi, imreme hã.

¹⁴ Hâiwa ãma romhuri'wai ma, imropâ ãma isimnhihârâ ma, te te inharĩ hã wa tô duré ĩpo're na wapa. Ãne tawamhã imreme hã: — Ma'ãpé, wa'uburé maparane si'uiwa na ipawasisi ré norĩ ma, ipawasisizé hã wasihu za'ra na, Eufrati na pa nho'õmo nhisi ãma 're isi'ubumroi mono norĩ ma.

¹⁵ Tawamhã ãhã wamhã, ma tô oto tãma wasihu za'ra. Duréihã ma tô 'Re ihâimana u'âsi mono hã ãma ropisutu siromo za'ra, niwa bâdâ te te ipisutuzé hã, iwa waptã'ã wapsi, te te da'uprosi mono da. Tô ã bâtâ na iwa waptã'ã wa, ma tô ipawasisizé hã tãma wasihu za'ra. Tawamhã daro mono bâ da'ahâ uptabi prã na te za wa'uburé norĩ hã te te da'uprosi, daza'ratazé wãiwa prã na.

¹⁶ Tawamhã wa tô wapa, daza'ratazé 'mahârâ hã, dasi'wapé zô awaru na idasisa'rei mono norĩ za'ratazé hã. Ãne daza'ratazé 'mahârâ hã, te iwapari hã, 200.000.000 na. Da'ahâ uptabi di.

¹⁷ Tawamhã awaru, wa tô 'madâ'â za'ra, dasi'wapé zô ãma 're idasisa'rei mono zé hã. Ĩnhotõ 'rowim ne, wa tô 'madâ'â za'ra, isisiwi isi'ubumroi mono norĩ zama. Ta norĩ hã isi'uwazi tete 'manharĩ ne ré, te sõ'utu ubu ré isisiwi asimro. Isõ'utu ubu mono hã unhama ro'o pré ne na, iwamnarĩ mono hã. Duré sõté uzé ne na isõ'utu ubu zé wamnarĩ mono hã. Duré 'rẽnhipré nho'utu uzé ne na, isõ'utu ubu zé wamnarĩ mono hã. Duré awaru 'rãi mono hã, aiwa hu'u zérépa 'rã ne. Isadai'ré hawi mono hã te unhama ro'o mono ne hã nasi wairé, duré isizédé hã, ẽtẽ ro'o nhizédé uzé pire zama. Duré isizédé uzé pire hã te duré nasi wairé, dapãrĩzé hã.

¹⁸ Tawamhã ã hã, unhama ro'o ne hã duré isizé hã duré ẽtẽ ro'o nhizédé uzé pire hã ma tô te te da'uprosi, awaru zadai'ré hawi, iwairébé mono hã. Daro mono bâ da'ahâ uptabi prã na ma tô te te da'uprosi, daza'ratazé wãiwa prã na.

¹⁹ Ãne ma tô tizadai'ré ro'o nhipãrĩ na te te da'uprosi, tizamo na zama. Isamo mono hã wahi zamo ne hã. Tô wahi 'rã ne na isamo 'rãsutu mono hã. Taha na ma tô te te dahâzu.

²⁰ Tawamhã dahâiba ré idasi'atarẽme mono hã idadâ'â mono õ hã, 'râwi dasi'uihâ na 're dasisãmri za'ra mono õ di. Zahadu te wa'uburé norĩ ãma si 're dawata za'ra. Te duré zahadu ropoto hâiba 'manharĩ ãma si 're dawata za'ra, danhib'manharĩ nhipese na da te 're irob'manharĩ za'ra mono ãma, ẽtẽ waipo pré oru 'manharĩ ãma, duré ẽtẽ waipo prã prata 'manharĩ ãma, duré ẽtẽ topsada brõzi 'manharĩ ãma, duré ẽtẽ 'manharĩ ãma, duré wede 'manharĩ ãma. Zahadu da te rẽme mono õ di. Ropoto hâiba 'manharĩ hã te te rob'madâ'â õ nherẽ, duré simipari õ nherẽ, duré morĩ õ nherẽ, te zahadu ãma 're dawata za'ra, 'Re ihâimana u'âsi mono upana.

²¹ Duré zahadu danhipãrĩ na hã 're dasiwẽ'õ za'ra mono õ di, duré simi'â na, duré dahâiba na dasina 're danhimisaihuri za'ra mono na hã, duré dasiwi romnhimi'uri na hã. Zahadu dawasété wi 're dasipizari za'ra mono õ di. Õne u'âsi te marĩ iwasété na si 're dahâimana za'ra.