Apocalipsi 8 - ꞌRe Ihâimana Uꞌâsi Mono Zadawa Wasuꞌu

Pone'ẽrebâ hã 7 ãma ibaihâ nhinha uptobzé te te iprubzé wasu'u

¹ Tawamhã 7 ãma hã ibaihâ nhinha uptobzé, ma tô Pone'ẽrebâ hã 'ridawa. Te te 'ridawa wi, ma tô duré oto rowarõtârâ. Ma tô duré tirob'é'é pese, hâiwa ãma hã. Bâtâ pibuzé za'ratazém na aiwa ma tô ãma aipo'o, ãma ronomro ré hã, rowarõtâ'â ré.

² Tawamhã wa tô duré 'madâ'â za'ra, 7 na hâiwa ãma romhuri'wa norĩ hã 'Re ihâimana u'âsi mono nho're, isimasam norĩ hã. Ta norĩ ma, ma tô 7 na danhimnhihârâzé hã sõmri za'ra ni.

^3-4 Tawamhã hâiwa ãma 'Re ihâimana u'âsi mono ma romhuri'wa hã ma tô wei mo, misi aimawi hã. Wedeza ne 'rata te za, 'Re ihâimana u'âsi mono ma, danhoprubzéb da, wedewati isadaze hã da te tãma 're izata za'ra mono zéb 'rata. U'awire ne hã ẽtẽ waipo pré oru 'manharĩ te 're ti'â, wedewati isadaze nhemezéb da hã. Tawamhã wedewati isadaze hã ma tô ahâ na tãma sõmri za'ra ni, 'Re ihâimana u'âsi mono ma, te te zata za'ra da. Tawamhã wedeza ne oru 'manharĩ ãma ma tô zata za'ra, danhib'apito simasisizém nho're. 'Re ihâimana u'âsi mono hã isadaze hã te te hã da, ma tô zata za'ra, wedewati isadaze hã. Te te zata za'ra wamhã, ma tô isizé hã si'ré hâimo, 'Re ihâimana u'âsi mono nhib'a'uwẽ 're imreme zusi mono mreme siré. Hâiwa ãma romhuri'wa nhib'rata hawi, te isizé hã si'ré hâimo, 'Re ihâimana u'âsi mono nho're isam nhib'rata hawi.

⁵ Tawamhã hâiwa ãma romhuri'wa hã ma tô pré'a 'manhe, u'awire ne hã oru 'manharĩ 're, wedewati isadaze nhemezéb 're. Wedeza ne na, wedewati zadaze hã da te 're izata za'ra mono zém hawi ma tô pré'a 'masisi. Te te 'masisi wamhã, ma tô õne haré ti'ai u sa'wa, uzâ hã. Te te sa'wari wamhã, ma tô tãiwapsa hã watobro, duré tãirãrã'ã hã. Tãsi'ubuzi zama, ma tô duré watobro. Ma tô duré ti'ai popo hã watobro.

Hâiwa ãma romhuri'wa norĩ, tinhimnhihârâzém na isimnhihãsizé wasu'u

⁶ Tawamhã 7 na hâiwa ãma romhuri'wa norĩ hã ma tô oto asõré pese, tinhimnhihârâzém na simnhihãsi da.

⁷ Tawamhã imorĩ'rada hã ma tô tinhimnhihârâzém na amnhihârâ. Simnhihârâ wi, ma tô tãzâ hã rere ti'ai u, unhama zama. Dawaprui wazari, ma rere uzâ hã, duré tãzâ hã. Ti'ai u rere'e wamhã, daro mono bâ ma tô ti'a hã zada, iwãiwa prã na. Wede hã 're isimasa mono hã ma tô duré si'uzâ, isa'ratazé wãiwa prã na. Du zama hã ma tô uburé sihõmo, daro mono bâ.

⁸ Tawamhã isãna'remhã hâiwa ãma romhuri'wa hã ma tô duré amnhihârâ, tinhimnhihârâzém na. Simnhihârâ wi, ma tô marĩ hã ẽtẽ 'rãihâ ne hã âi ba waptãrã, unhama ro'o ré. Waptã'ã wamhã, â poré mono bâ ma tô â wãiwa prã na hã te te âwapru.

⁹ Tepe norĩ hã â 'rowi 're ihâimana za'ra mono hã ma tô duré si'utõrĩ, ahâ prã na, isa'ratazé wãiwa prã na. Ma tô duré uba're hã ahâ prã na si'utõrĩ, â nhisi baba 're isisa'rei mono hã. Isa'ratazé wãiwa prã na hã ma tô si'utõrĩ.

¹⁰ Tawamhã hâiwa ãma romhuri'wa hã si'ubdatõ ãma hã ma tô duré tinhimnhihârâzém na amnhihârâ. Simnhihârâ wi, ma tô wasi isa'ẽne hã waptãrã, hâiwa hawimhã. 'Rãsitõ ro'o ne, te ro'o'a'a. Waptã'ã wamhã, nima niwĩ panho'õmo norĩ nhisiwip si, ma tô waptãrã. Isa'ratazé wãiwa prã na panho'õmo nhisiwi, ma tô waptãrã, ub're nhisiwib zama.

¹¹ Tawamhã pa nho'õmo norĩ nhisiwi iwaptã'ãzéb ãma hã ma tô dawi âwazari zé hâza'õtõ pese. Tahawa duré oto âzé uptabi di. Tawamhã da te âhuri wamhã, ma tô da'ahâ na dasi'utõrĩ, âzé pire uptabi wa. Wasi isa'ẽtẽ nhisi hã Âzé pese 'wa na isisi hã.

¹² Tawamhã hâiwa ãma romhuri'wa hã maparane si'uiwa na ãma hã ma tô duré tinhimnhihârâzém na amnhihârâ. Simnhihârâ wi, ma tô bâdâ hã itõmo wãiwa prã na titobra. A'amo zama ma duré itõmo wãiwa prã na titobra. Wasi norĩ zama, ma duré itõmo wãiwa prã na tobra. Tahawa, te te rob'uiwẽ prã za'ra di wasi norĩ hã, bâtâ norĩ me, duré a'amo norĩ me.

¹³ Taha pari, wa tô duré 'madâ, si'u hã, hâimo uptabi 're iwara hã. Ta hã te wara sina, mreme 'rãihâ na dama rob'mahâ, ãne: — Ni'ãpé, ni'ãpé, ni'ãpé. Ti'ai ãma uburé pese 're i'aihâimana za'ra wa'aba mono norĩ ma, aima ropipa uptabi za'ra wa'aba di za. Hâiwa ãma romhuri'wa norĩ si'ubdatõ isimnhihãsi õ, tinhimnhihârâzém na oto simnhihãsi wamhã, isimnhihãsi sidâpâsi te za ropipa uptabi hã asô wairébé 'wa. Ãne ĩnhotõ 'rowim ne, te i'azabui mono hã, duré ĩpo're na te i'awapari mono hã.