Apocalipsi 6 - ꞌRe Ihâimana Uꞌâsi Mono Zadawa Wasuꞌu

Pone'ẽrebâ, ibaihâ nhinha uptobzé te te iprub za'ra zé wasu'u

¹ Tawamhã wa tô duré 'madâ. Te 'madâ'â wamhã, Pone'ẽrebâ hã da te dasiwi iwĩrĩ hã ma tô ibaihâ nhinha tob'ratatobzé imorĩ'rada hã pru. Tawamhã maparane si'uiwa na ropoto na ihâiba norĩ hã te imorĩ'rada hã hâ, mreme 'rãihâ na: — We aiwatobro.

² Tawamhã ãne hârâ wi, wa tô marĩ 'madâ, awaru irã hã. I'mapraba'wa hã te umnhi'ãsi ré nhamra. Tawamhã ma tô i'rãzaza hã tãma sẽrẽ ni. I'rãzaza hã za te te da'ãma i'ai'utézé, te wasu'u. Tawamhã ma tô wara ti'ai u, tinhitob'ru norĩ zô, siwamnhasi sina te te ãma ai'uté za'ra da.

³ Tawamhã Pone'ẽrebâ hã ma tô duré ibaihâ nhinha uptobzé hã isãna'remhã pru. Te te pru wi, ropoto na ihâiba norĩ hã ma tô duré isãna'remhã hâ: — We aiwatobro.

⁴ Tawamhã awa'awi awaru ipré uptabi hã ma tô watobro. I'mapraba'wa isisiwi te nhamra. Tawamhã sib'ézé 'wapa ma tô tãma sõmri ni, da'wapézéb da hã. Taha ma, ma tô duré tãma pisutu ni, dasi'wapé hã te te dazada wazere da, dasi'wapé na 're dasisimroi mono da.

⁵ Tawamhã Pone'ẽrebâ hã si'ubdatõ ãma ibaihâ nhinha uptobzé hã ma tô duré pru. Te te pru wi, wa tô duré wapa, si'ubdatõ ãma ropoto na ihâiba norĩ hârâ hã, ãne: — We aiwatobro. Tawamhã awa'awi wa tô awaru tisã, i'rãdâ hã. I'mapraba'wa hã te marĩ pibuzé hã 're ti'â, tinhib'rata, amnho pibuzéb da hã.

⁶ Tawamhã wa tô duré wapa, damreme uptabi ne hã, maparane si'uiwa na ropoto na ihâiba norĩ isimasabzém hawi. Ãne te rowa'âbâzé hã tãma anhoré, awaru 'mapraba'wai ma: — Ãne misi bâtâ na dapawa'â hã, tô misi ipibuzém na aiwa ãma isipo'o na, amnho trigu wa'âbâzéb zarina. Ãne te za dawi isarõ hâimo, rowa'âbâzé hã. Tane nherẽ, azeitona wede hã 're isimasa mono hã, duré uwa 'ru hã 're isimnhatã mono hã u'a za'ra õ di za, azeitona 'rãi wa'ui wabre hã si'utõrĩ tõ da a'â, uwa 'rãi wa'u isé zama.

⁷ Tawamhã Pone'ẽrebâ hã ma duré pru, maparane si'uiwa na ãma ibaihâ nhinha uptobzé hã. Te te pru wi, wa tô duré wapa, ropoto na ihâiba norĩ hã maparane si'uiwa na ãma hã, da'rãsutu'wa hã. Ãne te hâ: — We aiwatobro.

⁸ Tawamhã hârâ wi, wa tô duré 'madâ, dadâ'â wa, dahâiba'a ne awaru ihâiba'a hã. I'mapraba'wa nhisi hã Adâ'â na isisi hã. Duré ihâiba amo, 'râwi te te isa'u mono nhisi hã, Adâ 're ihâimana za'ra mono zém na. Tawamhã ma tô pisutu zahuré ni, te te da'a'uprosi zahuré mono da, daro mono bâ, dasi'wapé na. Duré mram na te te da'uprosi zahuré mono da, ma tô pisutu zahuré ni, dahâzé pire na te te 're idaduri mono na, duré abaze zahi na zama. Tawamhã daza'rata ahâ prã na te za dasi'utõrĩ, daro mono bâ. Maparane si'uiwa na dahâiba wamhã, misi si te za dadâ'â za'ra. Taha zarina te za da'ahâ prã na ai'utõrĩ ni, daro mono bâ.

⁹ Tawamhã Pone'ẽrebâ hã ma tô duré imrotõ hã pru, ibaihâ nhinha uptobzé hã. Tawamhã te te pru wamhã, wa tô duré 'madâ'â za'ra, 'Re ihâimana u'âsi mono nhimiroti te te 're sazei pese za'ra mono 'ru te, da te 're isimroi mono norĩ pẽ'ẽzani hã, tô sena na Zezusihi zazei'wa na pahi ãna dama 're siwasu'u za'ra mono 'ru te, da te 're isimroi mono norĩ pẽ'ẽzani hã. 'Re ihâimana u'âsi mono ma, danhoprubzé nomrizéb 'rowi te ta norĩ hã asimro, wedeza ne 'rowi.

¹⁰ Tawamhã mreme 'rãihâ na te hã: — Wanhib'apito, danhipai u aiwaihu'u pese di. Duré aiwẽ uptabi di. Tô sena, a hã. Tahawa, e nimahã na hã wa'uprosi'wa norĩ ãma iwasédé hã sa'ra õ di za, ti'ai ãma 're ihâimana wasété za'ra mono ãma. E niwamhã wa'ruiwa'âbâ za'ra õ di za, asimi'ahârizém na hã.

¹¹ Tawamhã da'uza hâirã hâpa, ma tô tãma sõmri za'ra ni, tidâ'âzéb u sipizari ãna, Zezusihi ãma 're hâimana za'ra mono wa. Ma tô duré tãma nharĩ za'ra ni: — Ma'ãpé, asimi'ẽ na a'â 're asimipari za'ra wa'aba mono. Da te 're isimroi mono norĩ za'ratazé hã 'Re ihâimana u'âsi mono te te ipisutuzé hã zahadu da te dasina azahutu õ di. Da te ai'uprosi aba ne, asiré isazei'wa norĩ, za da te 're isimroi mono norĩ za'ratazé wab õ wa, te za a'â asimi'ẽ na sô 're asimipari za'ra wa'aba mo.

¹² Tawamhã wa tô duré 'madâ. Te 'madâ'â wamhã, ma tô Pone'ẽrebâ hã duré pru imropâ ãma hã, ibaihâ nhinha uptobzé hã. Te te pru wamhã, awa'awi ma tô ti'a hã sãsã'ã, sa'ẽtẽ uptabi. Bâdâ hã ma tô duré titoptâ'â, zazahâ ihâ 'rãdâ'â uptabi ne. A'amo hã ma tô duré titõmo wapru.

¹³ Wasi hã ma tô duré rere, ti'ai u. Figuera wede 'rã hã rowa'u'u za'ẽne hã te te 're pari za'ra mono wa, 're i'a'a mono ne, ma tô wasi hã rere, ti'ai u.

¹⁴ Tawamhã ma tô duré hâiwa nhirõno hã ai'ub'rã, ibaihâ da te 're i'ub'rã za'ra mono ne. Duré ti'a hã sãsã'ã wamhã, ẽtẽ 'rãihâ, daro mono bâ 're isimasa mono hã ma tô si'ré za'ra, 're isimasa mono zém nhiti. Rob'ré za'iti zama, ma duré uburé sina si'ré za'ra, 're isimi'wara mono zém nhiti.

¹⁵ Tawamhã ti'ai ãma danhib'apito mono bâ dama ipire mono bâ ma tô ẽtẽ 'rãihâ zahâpâ sima'uri, da'madâ'â'wa norĩ hã, duré da'wapéi'wa norĩ nhib'apito norĩ hã. Isibrob ahâ norĩ zama ma tô sima'uri, isibrob'õ norĩ zama, pawa'âbâ ãna iwada'uri zarina si te te dama 're iromhuri za'ra mono norĩ zama, duré wada'uri ãna si'uihâ na 're ihâimana za'ra mono norĩ zama. Uburé ma tô dasima'uri, ẽtẽ 'rãihâ zahâpâ ẽtẽ're 're, duré ẽtẽ nhi'riti 're, dasi'utõrĩ tõ mono da.

¹⁶ Tawamhã ẽtẽ 'rãihâ norĩ ma, te nasi si'mahârâ za'ra, ẽtẽ tõmo wawẽ norĩ ma zama. Ãne te nasi tãma si'mahârâ za'ra: — Ma'ãpé, wanhisiwi we airere'e aba mono, wa'upsibi za'ra wa'aba mono da, hâiwa ãma danhib'apito simasisizém na isãmra hã te te wa'asãmri tõ da. Duré Pone'ẽrebâ nhimihâzé wi, wanhisiwi we asa'wari aba, tiwi wazuwa za'ra wa'aba da.

¹⁷ Bâdâ ipipa hã ma tô oto iwa waptãrã, õ norĩ hã te te iwa'a'uprosi zahuré mono zéb da hã. E 'wa hã hâiba ré tiwi watobro da bâ. Ni'wa hã dâ'â ãna tiwi watobro waihu'u õ di za. Sõ'rata waihu'u zahuré õ di za duré.