Apocalipsi 5 - ꞌRe Ihâimana Uꞌâsi Mono Zadawa Wasuꞌu

Pone'ẽrebâ hã, 'Re ihâimana u'âsi mono wi, ibaihâ isinhai ré te te i'ârizé wasu'u

¹ Tawamhã wa tô duré 'madâ, ibaihâ isinhai ré hã. Danhib'apito simasisizém na isãmra hã te tinhib'rata nhimire niwĩ tété. Ibaihâ nhinha hã, i'ui'éré si'uiwa ré hã. Duré 7 na ihâiba hã i'uptob ré hã siwasihu tõ da, ni'wa te te duré sõré tõ da hã.

² Tawamhã wa tô duré 'madâ, hâiwa ãma 'Re ihâimana u'âsi mono ma romhuri'wa, isimiwada'uri pire hã. Ãne te nasi anha ta hã, mreme 'rãihâ na: — E 'wa hã danhipai u iwẽ uptabi, duré iwaihu'u pese uptabi hã te za 7 na ibaihâ nhinha uptobzé hã prub za'ra, ibaihâ te te sõ'a da. E 'wa hã te ãhã da hã sada tihâiba.

³ Tane nherẽ, ni'wa hã sada hâimana õ di hâiwa ãma hã, ipru'wa da hã, te te pru wa, ibaihâ nho'a'wa da hã, duré te te isõré da hã. Duré ti'ai ãma 're idahâimana za'ra mono hã sada da'maihâimana õ di. Duré ti'ai 'rowi adâ 're ihâimana za'ra mono hã ni'wai õ di, sada hã.

⁴ Tahawa, wa tô sa'ẽtẽ aiwa'õ, 're idahâimana za'ra mono hã sada da'maihâimana õ wa, ipru'wa da hã, duré te te isabu da hã.

⁵ Tawamhã 24 na dama ipire norĩ te misi ĩma tinha, ãne: — Aiwa'õ tõ. Ma'ãpé 'madâ'â. Õhõta te za, hu'u zérépa, Zudaha nhihudu. Ta hã apito Dawihi nhihudu, za isine pire na te te 're ida'ab'madâ'â mono da hã. Ta hã uburé dama waihu'u pese uptabi di. Ta hã tinhitob'ru norĩ nhimiromhuri wasété nhiptetezé hã ma tô tiwi uprosi za'ra. Tahawa, te õhõ si sada tihâiba, 7 na i'uptobzé hã te te i'aprub da hã, duré ibaihâ isinhai ré te te isõ'a da hã.

⁶ Tawamhã wa tô 'madâ, Pone'ẽrebâ hã. Danhib'apito simasisizéb 'rata te za, maparane si'uiwa na ropoto na ihâiba norĩ wa'wab zama, duré 24 na dama ipire norĩ wa'wab zama. Da te dasiwi wĩrĩ wa, da te iwa'rézéb ré te za. 7 na i'õmo ré hã, Pone'ẽrebâ hã. Duré 7 na itõmo ré hã. 'Re ihâimana u'âsi mono pẽ'ẽzani hã danhipai u uburé marĩ na iwaihu'u pese zé, te wasu'u, itõmo za'ra hã.

⁷ Tawamhã Pone'ẽrebâ hã ma tô ai'ré, danhib'apito simasisizém na isãmra u, ibaihâ nhinha hã te te âri da, tinhimire niwĩ te te itédé hã. Tawamhã Pone'ẽrebâ hã ma tô ti'â, ibaihâ nhinha hã.

⁸ Te te âri wamhã, ma tô maparane si'uiwa na ropoto na ihâiba norĩ hã Pone'ẽrebâi ma, hi'rãtitõ ana. 24 na dama ipire norĩ zama, ma te duré tãma ana. Rowamremezéb ré ma tô tãma aiwẽ'ẽ za'ra, ẽtẽ waipo pré oru 'manharĩ u'awi ne ré zama. U'awi 'remhã wedewa'u isadaze, te i're tiro'o za'ra. Taha nhizé hã hâimo haré wahu na, ta hã 'Re ihâimana u'âsi mono nhib'a'uwẽ norĩ, tãma 're imreme zusi mono zé, te wasu'u.

⁹ Tawamhã ta norĩ hã te Pone'ẽrebâi ma tinho're za'ra, tinho're itém na. Ãne te tãma tinho're za'ra: “A hã ma tô dasiwi aiwĩrĩ ni. Ma tô dazada hã atâ. Dazada atâ'âzém na ma tô ida'awa'â, dawasédé hã dama 're apari mono da ãma, 'Re ihâimana u'âsi mono nhib'a'uwẽ oto 're danomro mono da. Dapoto mono bâ a hã ma tô ida'awa'â, damreme sipo'o mono bâ 're idahâimana za'ra mono hã. Danhipai u aiwẽ uptabi di, a hã. Aiwaihu'u pese uptabi di duré. Tahawa, te aiwétési sada hã aihâiba, ibaihâ isinhai ré i'âri da hã, duré i'uptobzé hã aprub da.

¹⁰ A hã ma tô duré Wanhib'apito 'Re ihâimana u'âsi mono te te 're i'awa'âbâ mono norĩ hã 're i'apisutu mo, sasedoti na te te tãma da'ãma 're romhuri u'âsi za'ra mono da, duré ti'ai ãma pire na za dama 're hâimana za'ra mono da.”

¹¹ Tawamhã wa tô duré 'madâ. Te 'madâ'â wamhã, hâiwa ãma romhuri'wa norĩ hã te nemo tizadawa'a'a, ahâ uptabi na. Da te sa'rata waihu'u za'ra õ di ta norĩ hã. Danhib'apito simasisizé hã ma siwi uirĩ. Duré maparane si'uiwa na ropoto na ihâiba norĩ mana wawi te asõré, 24 na dama ipire za'ra norĩ hã isisõré mana wawib zama.

¹² Ãne te sõ're 'rãihâ na ta norĩ hã tizadawa'a'a: “Pone'ẽrebâ hã da te dasiwi iwĩrĩ hã, õ hã danhipai u wẽ uptabi di. Õhõ si wẽ uptabi wa, õhõ ãma si 're wawata u'âsi za'ra wa'aba mono. Õ hã uburé Roptede'wa. Tô sena waihu'u pese uptabi di. Waihu'u pese uptabi wa, ãma 're wawata u'âsi za'ra wa'aba mono. Wama pire uptabi wab zama, ãma 're wawata u'âsi za'ra wa'aba mono.”

¹³ Tawamhã wa tô duré wapa, uburé pese 'Re ihâimana u'âsi mono te te ida'apoto mono bâ, duré te te i'apoto mono bâ, ihâiba ré mono hã, hâiwa ãma, duré ti'ai ãma, duré ti'ai 'rowi adâ 're ihâimana za'ra mono zéb ãma, duré â 'rowi uburé pese ihâiba ré mono hã. Uburé pese te simisutu dasiwazari tazadawa'a'a ni, 'Re ihâimana u'âsi mono te te ida'apoto mono bâ. Ãne te tazadawa'a'a ni, ta norĩ hã: “Danhib'apito simasisizém na isãmra ãma, 're wawata u'âsi za'ra wa'aba mono. Duré Pone'ẽrebâi ãma, 're wawata u'âsi za'ra wa'aba mono. Wẽ uptabi zahuré wa ta norĩ hã, duré waihu'u pese uptabi zahuré wa, wa za ãma 're wawata u'âsi za'ra, õ norĩ ãma.”

¹⁴ Tawamhã maparane si'uiwa na ropoto na ihâiba norĩ hã te ãma sõ're uze pese za'ra: — Tô sena, tô sena. Duré 24 na dama ipire za'ra norĩ hã ma tô hi'rãtitõ tãma ana, ãma wata za'ra da.