Apocalipsi 22 - ꞌRe Ihâimana Uꞌâsi Mono Zadawa Wasuꞌu

¹ Tawamhã hâiwa ãma 'Re ihâimana u'âsi mono ma romhuri'wa hã, tô õ hã ma tô duré ĩzaprõ, â u'â hã te 'madâ'â da. Â u'â hã da te 're âhuri mono wa, dato sina 're idanomro u'âsi mono zé hã. Simhi zarob'a uptabi ne â zarob'a uptabi di, â u'â hã. Panho'u 're ipraba za'ra mono ne, te 'Re ihâimana u'âsi mono norĩ simasisizéb zahâpâ hawi tipraba, Pone'ẽrebâ simasisizéb zahâpâ hawi me.

² 'Ri nho'õmo wa'wa, 'ri nhi'ridi inomro wa'wa, te tipraba. Duré wede hã â praba zada'ré si'uiwa na isãna'rata si'uiwa sisa'ridi hã te tame 're sa, i'rã hã da te 're huri mono wa, 'Re ihâimana u'âsi mono 'rata, dato sina 're idanomro u'âsi mono zé hã. A'amo sidâpâsi i'rãzé ta hã. Duré wahub sidâpâsi te 're 'rãi u'âsi. Duré isu hã daro mono bâ apâ ãma 're idazéptâ'â za'ra mono zéb da hã te 're hâimana za'ra.

³ Duré marĩ iwasédé hã 'Re ihâimana u'âsi mono te te 're i'awẽ'õ pese mono hã, iwa 're hâimana za'ra mono õ di za, 'ri nho'õmo ãma hã. Duré te te 're ida'awẽ'õ pese mono hã iwa 're dahâimana za'ra mono õ di za. Taha 're te za 'Re ihâimana u'âsi mono norĩ simasisizé hã 're hâimana, Pone'ẽrebâi me iwa 're isimasisi zahuré mono zéb da hã, danhib'apito simasisizém ne hã, te te ãma 're ida'ab'madâ'â u'âsi zahuré mono zéb da hã. Tahawa, te za isib'a'uwẽ norĩ hã ãma 're wata u'âsi za'ra.

⁴ Te za duré i'ubu hã te te siwi 're 'madâ'â u'âsi za'ra. Duré isisi na uihâ ui'éré ré, te za 're hâimana za'ra.

⁵ Tamemhã 're mara waihu'u mono õ di za. 'Re robra waihu'u mono õ na dâ'âsina, rob'uiwẽzém na da te 're rob'uiwẽ za'ra mono õ di za oto. Duré bâdâ hã te te 're rob'uiwẽ mono õ di za oto. Uburé Danhib'apito uptabi, 'Re ihâimana u'âsi mono si te za te te dama 're rowa'a. Tawamhã isib'a'uwẽ norĩ hã te za isadawa para pire na 're hâimana u'âsi za'ra, õne u'âsi.

Zezusi apâ we timorĩzém na te te sina idapo're pu'uzé wasu'u

⁶ Tawamhã hâiwa ãma romhuri'wa hã tô õ hã te duré ĩma tinha, ãne: — Ãhã wasu'u hã tô sena. Tô sena wa, te za rob'umnhasi sina da te 're sazei pese za'ra, da te 're wawã za'ra mono ãna. 'Re ihâimana u'âsi mono hã te tizadawa wasu'u'wa norĩ ma, Tipẽ'ẽzani hã te te tãma 're anhomri, taha na te te dama 're sadawa wasu'u za'ra mono da. Ta hã 'Re ihâimana u'âsi mono ma tô hâiwa ãma tãma iromhuri'wa hã we ĩzatõ, tô sena za iromhâimana mono zém na te aima awaihu'u siromo mono da, duré ĩnhipai u isib'a'uwẽ norĩ ma, te aima i'awaihu'u mono zéb zarina tãma 're awaihu'u mono da.

⁷ Tawamhã Zezusihi mreme hã wa tô wapa, tizazei'wa norĩ te te ipo're pu'u za'ra zém na hã. Ãne te tinha: — Ma'ãpé, waihu'u pese za'ra wa'aba. Wa za wei morĩ su za apâ hã. Ãhã wasu'u hã tô sena, ibaihâ na za iromhâimana mono zém na ãma irob'ui'éré hã ni'wa ta hã te te 're wapari pese mono wamhã, tãma 're rowẽ u'âsi mono di za.

⁸ Wa hã Zuwã hã wa tô ãne uburé marĩ hã te awapari. Wa tô duré uburé marĩ hã te ab'madâ'â. Tawamhã ãne te awapari mono pari, duré ãne marĩ te ab'madâ'â mono pari, wa tô hâiwa ãma romhuri'wai papara aime, ãma ĩwata da, za iromhâimana mono zém na te te ĩma i'awaihu'u mono ãma.

⁹ Tane nherẽ, te si'ãma ĩma tinha, ãma ĩwata tõ da. Ãne te tawamhã ĩma tinha: — Tô'ã. Ãne hã 'manharĩ tõ. Wa hã asine, 'Re ihâimana u'âsi mono ma romhuri'wa, wa 're ĩhâimana, duré asisãnawã norĩ ne hã, duré isadawa wasu'u'wa mono norĩ ne hã. Duré ãhã wasu'u na i'arob'ui'éré mono wapari pese 'wa norĩ ne hã wa hã, 'Re ihâimana u'âsi mono ma romhuri'wa. Tahawa, ma'ãpé 'Re ihâimana u'âsi mono ãma si 're aiwata u'âsi mono.

¹⁰ Tawamhã te duré ĩma tinha, ãne: — Ãhã wasu'u hã za iromhâimana mono zém na i'arob'ui'éré mono hã asima sawi õ di za. Sõ'awi te za dama ãma 're i'arowasu'u mo, iromhâimanazéb da hã za ãma ronomro õ wa.

¹¹ Ãne na za romhutu na iromhâimana mono zém na dama 're awaihu'u mono nherẽ, ni'wam norĩ hã tiwasété si õne haré te te 're 'manharĩ u'âsi za'ra mono wamhã, õhõ na si tô ãma 're hâimana za'ra mono, wẽ te bâ. Duré ni'wam norĩ hã tihâiba na 're hâimana siwamnarĩ u'âsi za'ra mono wamhã, õhõ na si tô duré 're hâimana za'ra mono tinhimi'manharĩzém na, te te ãma 're i'uzusi za'ra mono zém na hã wẽ te bâ, rob'rãsutu u hã. Duré ni'wam norĩ hã te te 're 'manharĩ wẽ u'âsi za'ra mono wamhã, wẽ u'âsi ãma 're hâimana u'âsi za'ra mono. Duré ni'wam norĩ hã 'Re ihâimana u'âsi mono ãma si 're nomro u'âsi mono wamhã, tô õhõ na si 're nomro u'âsi mono tô, rob'rãsutu u hã.

¹² Tawamhã Zezusihi mreme hã wa tô duré wapa, tizazei'wa norĩ te te ipo're pu'u za'ra zém na hã. Ãne te tinha: — Ma'ãpé waihu'u pese za'ra wa'aba. Wa za wei morĩ su za apâ hã. We ĩmorĩ wamhã, ĩnhimipawa'âbâzéb da hã wa za we ĩsiré âri siro za, da te ĩma 're iromhuri wẽ za'ra mono zéb zarina te ãma ida'apawa'âbâ mono zéb da hã.

¹³ Wa hã duréihã marĩ õ ré hã wa tô 're ĩhâimana. Uburé marĩ hã si'utõrĩ pese nherẽ, marĩ norĩ zarina ĩsi'utõrĩ õ di za wa hã. Õne u'âsi, wa za 're ĩhâimana u'âsi.

¹⁴ Duré, ni'wam norĩ hã ti'uzazé hâirã da, te te 're i'upsõi pese za'ra mono norĩ ma si hã tãma 're rowẽ uptabi za'ra mono di za. Tane tiwasété wi, 're isipizari za'ra mono hã, 'Re ihâimana u'âsi mono, iwasédé te te tãma 're i'a'upsõi mono zé, te wasu'u, i'uza hâirã hã. Ta norĩ si te za rob'rãi u'â hã te te 're huri, da te 're huri mono wa, 'Re ihâimana u'âsi mono 'rata ãma 're idanomro u'âsi mono zé hã. Ta norĩ si te za duré õne haré 'ri nho'õmo u 're sisisi, 'ridawa za'ẽtẽ na, ni'wa te te tiwi sitob za'ra ãna.

¹⁵ Ni'wam norĩ si 'ri nho'õmo u 're sisisi waihu'u mono õ di za, marĩ iwasété uptabi na 're idahâimana wasété uptabi za'ra mono norĩ hã, duré simi'â na 're idahâimana za'ra mono norĩ hã, duré dahâiba na 're idahâimana wasété za'ra mono norĩ hã, duré dapãrĩ'wa norĩ hã, duré romhâiba 'manharĩ ãma, 'Re ihâimana u'âsi mono upana 're idawata za'ra mono norĩ hã, duré sadawa nhipese ze te, uburé dama 're isadawa nhipese za'ra mono norĩ hã. Ta norĩ hã 're sisisi waihu'u mono õ di za, 'ri nho'õmo u hã.

¹⁶ Tawamhã Zezusihi mreme hã wa tô duré wapa. Ãne te ĩma tinha: — Wa hã Zezusi, wa tô hâiwa ãma ĩma romhuri'wa hã we atẽme satõ, ã hã te i'awaihu'u mono hã te te aima awaihu'u mono da, 'ri nho'õmo mono bâ ĩzazei'wa norĩ, siré 're isi'rã'õtõ u'âsi mono norĩ ma, awaihu'u mono da, isipai u. Wa hã apito Dawihi nhihudu, za isine ĩpire na te 're ida'ab'madâ'â mono. Wa hã awẽ u, wasi wawẽ 're ro'o pese mono ré, da'ãma 're i'awẽ za'ra mono ne, wa za romhâimanazép té, te dama 're apisutu, Ĩmama nhib'a'uwẽ norĩ ma.

¹⁷ 'Re ihâimana u'âsi mono pẽ'ẽzani hã te Pone'ẽrebâi mro da me, dazô 're hârâ u'âsi zahuré, ãne: — We 're anomro aba mono, â u'âsi u. Tawamhã ni'wam norĩ hã ãne hã te te 're wapari za'ra mono wa, â u'âsi u 're nomro mono wamhã, te za duré ihârâ zahuré na dazô 're hãsi u'âsi. Da te 're 'rubu za'ra mono wa, da te 're i'âhuri mono ne, ni'wam norĩ hã te te sima 're wẽ za'ra mono wamhã, te za tô â u'âsi u 're nomro, te te 're âhuri u'âsi mono da, wa'âbâ ãna. Â u'â hã da te 're âhuri mono wa, 'Re ihâimana u'âsi mono 'rata 're idanomro u'âsi mono zé.

Zuwã, te te dama ãma irob'ui'éré 'rãsutu zé wasu'u

¹⁸ Wa hã Zuwã hã, wa za oto ãma aipo're pu'u siromo za'ra wa'wa ĩmreme pire na, ãhã wasu'u na, ã ibaihâ na, za iromhâimana mono zém na te ãma i'arob'ui'éré mono, 're iwapari za'ra wa'aba mono norĩ hã. Ni'wam norĩ hã ãhã wasu'u hã siwa'ru sihawim na te te ãma 're sa'ẽtẽ za'ra mono wamhã, te za 'Re ihâimana u'âsi mono hã te te 're hâ za'ra, ã ibaihâ na te te dama 're irob'manharĩ pipa mono zé isimi'wara mono zarina. Taha na, te za te te tãma ãma 're sisiwi za'ra, i'ahâri na hã.

¹⁹ Duré ni'wam norĩ hã ãhã wasu'u hã za iromhâimana mono zém na te i'arob'ui'éré mono hawimhã tô senai õ newa, te te 're sani za'ra mono wamhã, te za 'Re ihâimana u'âsi mono hã rob'rãi u'â hã te te tiwi 're sawi za'ra, te te dame 're huri tõ mono da, 'Re ihâimana u'âsi mono 'ratamhã rowẽ na 're danomro u'âsi tõ mono da. Te za duré 'ri nho'u ité hã iwẽ uptabi hã te te tiwi 're sawi za'ra, iwasédé hã iwa 're ihâimana mono õ hã. Ãhã na, wa tô ã ibaihâ na ãma rob'ui'éré pa, ã 'ri nho'õmo na hã, duré ã rob'rãi u'âsi na hã.

²⁰ Tawamhã Zezusi hã te duré irẽme ma siwasu'u, ã te ãma i'arob'ui'éré mono na te te ĩma i'awaihu'u mono 'wa hã. Ãne te siwasu'u: — Tô sena, wa za wei morĩ su za apâ. Tane tô. Wanhib'apito Zezusi apâ we aimorĩ su'u za tô.

²¹ Wa hã Zuwã hã wa za oto asawi za'ra wa'wa, irẽme ma. Wa ĩsima te 're aiwẽ u'âsi za'ra wa'wa, Wanhib'apito Zezusi te te 're asawi pese za'ra wa'aba mono da, duré te te 're aipawaptob u'âsi za'ra wa'aba mono da.