Apocalipsi 21 - ꞌRe Ihâimana Uꞌâsi Mono Zadawa Wasuꞌu

Hâiwa ité wasu'u, ti'a ité wasu'u me

¹ Tawamhã wa tô duré 'madâ hâiwa ité hã, duré ti'a ité hã. Hâiwa i'rada hã ma tô ai'utõrĩ pese. Duré ti'a i'rata zama hã ma tô ai'utõrĩ pese. Â zama hã ma tô duré ai'utõrĩ pese.

² Tawamhã wa tô duré 'madâ, 'ri nho'u hã, iwasédé iwa 're ihâimana mono õ hã, Zeruzalẽ itém na isisi hã. Ta hã te hâiwa hawi wei mo, 'Re ihâimana u'âsi mono hawi. Pi'õ hã oto mro da, 're isi'uza wẽ uptabi za'ra mono ne, ma we si'ra, 'ri nho'u iwẽ uptabi hã.

³ Tawamhã damreme 'rãihâ hã wa tô duré wapa, danhib'apito simasisizém hawi we te te inharĩ hã. Ãne te we ĩma tinha: — Ma'ãpé, waihu'u. 'Re ihâimana u'âsi mono hã te za oto dasiré 're hâimana u'âsi, 'râwi. Isib'a'uwẽ te za oto 're dahâimana u'âsi za'ra. Te za tô oto duré dasiré 're hâimana u'âsi. Isib'apito za'ra te za oto 're hâimana, 'Re ihâimana u'âsi mono hã.

⁴ Te za duré oto da'atõmo u'õ, dapẽ'ẽzé õ u'âsi 're dahâimana u'âsi za'ra mono da. Tawamhã duré oto 'Re dadâ'â za'ra mono õ di za. Duré 're dasiwa'õ za'ra mono õ di za oto. Duré dahâzé, da te 're sépata za'ra mono õ di za oto. E marĩ wa. Uburé 're iromhâimana 'rata mono zé hã si'utõrĩ pese wa oto.

⁵ Tawamhã 'Re ihâimana u'âsi mono hã danhib'apito simasisizém na isãmra hã te ĩma tinha, ãne: — Ma'ãpé waihu'u. Wa hã wa za tô marĩ ité hã te ab'manharĩ, ãhã na hã. Tawamhã te duré ĩma ti'ru: — Ma'ãpé ãne ãma arob'ui'éré mono. Ãhã wasu'u hã uburé marĩ ité hã za te i'ab'manharĩ mono na hã, tô sena. Tô sena wa, ãhã na da te 're rob'umnhasi za'ra mono sina, da te 're ĩzazei pese za'ra mono da na, te za ãma i'arob'ui'éré mo.

⁶ Tawamhã te duré ĩma tinha, ãne: — Tâibâ oto. Wa tô te ãma a'uwaimrami. Wa hã isãna'rata hawimhã marĩ õ ré hã, wa tô 're ĩhâimana u'âsi. Uburé marĩ hã si'utõrĩ pese nherẽ, wa hã marĩ zarina ĩsi'utõrĩ õ di za. Õne u'âsi, wa za 're ĩhâimana. Tawamhã ni'wam norĩ hã te te 're 'rubu za'ra mono wamhã, wa za â u'â hã te tãma 're õb za'ra, wa'âbâ ãna, da te 're âhuri mono wa, ĩsiré rowẽ na 're idanomro u'âsi mono zéb da hã.

⁷ Ni'wam norĩ hã tidâ'âzéb u ĩwi sipizari ãna, Satanasihi ãma te te i'ai'uté za'ra norĩ hã ta norĩ ma, wa za Isib'apito za'ra na 're ĩhâimana. Ĩnhib'a'uwẽ si te za oto ta norĩ hã 're hâimana za'ra.

⁸ Tane nherẽ, ni'wam norĩ hã te za unhama ro'o u'âsi wa'wa 're hâimana u'âsi za'ra, aré da te 're simroi mono pipa te, ĩwi 're isipizari za'ra mono norĩ hã, duré te te 're ĩzazei utõrĩ za'ra mono norĩ hã, duré marĩ iwasété uptabi na 're ihâimana wasété za'ra mono norĩ hã, duré dapãrĩ'wa norĩ hã, duré dahâiba na 're ihâimana wasété za'ra mono norĩ hã, duré simi'â na 're ihâimana za'ra mono norĩ hã, duré romhâiba 'manharĩ ãma ĩ'upana 're iwata za'ra mono norĩ hã, duré sadawa nhipese na 're ihâimana za'ra mono norĩ hã. Uburé pese, te za ẽtẽ ro'o nhizédé uzé pire wa'wa 're dahâimana u'âsi za'ra, 're idahâimana wasété za'ra mono norĩ hã, unhama ro'o u'âsi wa'wa. Unhama ro'o u'â hã maparane ãma 're idadâ'â zahu za'ra mono zé, te wasu'u.

Zeruzalẽ ité wasu'u

⁹ Tawamhã 7 na hâiwa ãma romhuri'wa norĩ siré hã ma tô misi we ĩtẽme 'maimo, 7 na u'awi ré ihâimana za'ra norĩ siré hã, rob'manharĩ pipa na te te dama 're irob'manharĩ wasété za'ra mono norĩ siré hã. Tawamhã ta hã te ãne ĩzatõ: — Ma'ãpé we ĩsiré aimorĩ, Pone'ẽrebâ mro da hã, za te aima ihâi'ré hã sabu da.

¹⁰ Tawamhã 'Re ihâimana u'âsi mono pẽ'ẽzani hã ma tô duré aimawi ĩ'uihâ pi'ra. Te te ĩ'uihâ pi'rai wa, wa tô duré aimawi ĩhâiba. Taha pari, ma tô hâiwa ãma romhuri'wa hã ĩzaprõ, ẽtẽ 'rãihâ za'ẽtẽ uptabi u, i'rãihâ uptabi u. Te te ĩzaprõni wamhã, Zeruzalẽ ité hã wa tô 'madâ, marĩ iwasédé hã iwa 're ihâimana mono õ hã, hâiwa hawi we te te isi'ra hã, 'Re ihâimana u'âsi mono hawi.

¹¹ 'Re ihâimana u'âsi mono nhimirowa'a na, te 'ri nho'u hã tirowa'a za'ẽtẽ. Ẽtẽ'ubuzi zarob'a si'ubuzi ne, ma ai'ubuzi, 'ri nho'u hã.

^12-13 Duré 'ri nho'õmo 'wawi wa'ra hã 'rãihâ uptabi di. 'Ridawa isa'ẽne hã 12 na ihâiba hã. Bâtâ pusizém niwĩmhã si'ubdatõ 'ridawa isa'ẽne hã, duré bâtâ zasizém niwĩmhã, duré tô si'ubdatõ 'ridawa isa'ẽne hã. Duré hâiwa nhimire niwĩmhã, duré tô si'ubdatõ. Duré hâiwa nhimi'e niwĩmhã, duré tô si'ubdatõ, 'ridawa isa'ẽne hã. Uburé hã 12 na ihâiba hã. Duré 'ridawa za'ẽtẽ mono bâ te hâiwa ãma 'Re ihâimana u'âsi mono ma romhuri'wa norĩ hã misi si simasa, 'ridawa 'madâ'â'wa norĩ hã. Duré 'ridawa za'ẽtẽ mono bâ rob'ui'éré mono hã misi si, 12 na Izaraéu 'ra nhisi mono na.

¹⁴ Duré wa'ra nhana'rata uparizé mono hã ẽtẽ tõmo wawẽ topa hã 12 na ihâiba hã. Taha na 12 na Pone'ẽrebâ zadawa wasu'u'wa norĩ nhisi mono hã. Misi si ãma isisi ui'éré mono hã.

¹⁵ Tawamhã hâiwa ãma romhuri'wa hã te te ĩma inharĩ hã te wedehu waré ne hã 're ti'â, marĩ pibuzé hã, ẽtẽ waipo pré oru 'manharĩ hã. 'Ri nho'õmo zada'ré te te ãma ipibuzéb da hã te 're ti'â, duré 'ridawa isa'ẽtẽ mono pibuzéb da zama, duré 'ri nho'õmo 'wawi wa'ra pibuzéb da zama.

¹⁶ Tawamhã 'ri nho'õmo zada'ré te te pibui mono wamhã, isasé're mono hã aiwapsi ma wairébé, ti'ai pibuzém na ipibuzé mono hã. Ina're pibuzé mono hã duré aiwapsi ma wairébé. Duré i'a're mono pibuzé hã aiwapsi ma te duré wairébé, duré isihâi mono hã. Uburé pese aiwapsi ipibuzé mono hã. Tawamhã ãne ipibuzé mono hã, 2.200 na ti'ai pibuzém na ina're pibuzé mono hã duré i'a're pibuzé mono hã, duré isihâi pibuzé mono hã.

¹⁷ Tawamhã ma tô duré pibu, wa'ra nhimi'rãmi hã hâza'õtõ zô. Te te pibui wamhã, 64 na ipibuzé hã. Ti'ai ãma da te 're iropibu za'ra mono zéb za'ratazéb zarina, ipibuzé hã.

¹⁸ Duré 'ri nho'õmo 'wawi wa'ra hã ẽtẽ'ubuzi zarob'a na i'manharĩ hã. Duré 'ri nho'u hã oru uptabi na si 'ri 'manharĩ mono hã, aimawi na wazari ãna. Aiwa simhi ne hã isarob'a uptabi.

^19-20 Duré 'ri nho'õmo 'wawi wa'ra nhana'rata uparizé mono wazarimhã, misi si ẽtẽ'ubuzi wa'âbâ za'ẽtẽ mono hã iwamri mono bâ. 12 na ẽtẽ'ubuzi wa'âbâ za'ẽtẽ mono hã, iwamri mono bâ, duré ito pré wamri mono bâ, duré itob'uzé wamri mono bâ.

²¹ Duré 12 na 'ri nho'õmo 'wawi wa'ra 'ridawa za'ẽtẽ mono hã, a'é tõmo wawẽ ne itob'a 'manharĩ mono hã, misi si. Duré 'ri nho'õmo 'ri wa'wa 'ri nhi'riti wawẽ hã ẽtẽ waipo pré oru uptabi na i'manharĩ hã, iwazari õ na. Aiwa simhi rã ne sarob'a uptabi di.

²² Tawamhã 'ri nho'õmo ãma 'Re ihâimana u'âsi mono nhorõwa 'ri hã iwa ihâimana hã sãmri õ di. Robaba di. Uburé Danhib'apito uptabi hã, 'Re ihâimana u'âsi mono iwaihu'u pe hã, duré Pone'ẽrebâi me oto 'râwi da'rata 're hâimana u'âsi zahuré mono na dâ'âsina, isõrõwa hã oto hâimana õ di.

²³ Duré 'ri nho'õmo na hã bâdâ te te 're rob'uiwẽ mono õ di za oto, duré a'amo zama hã. 'Re ihâimana u'âsi mono nhimirowa'a si te za oto te te 're rowa'a, Pone'ẽrebâ nhimirowa'a zama.

²⁴ Tawamhã daro mono bâ 're idahâimana za'ra mono norĩ hã te za isimirowa'a na 're dahâimana za'ra. Duré dama ipire za'ra norĩ hã te te 're ida'madâ'â za'ra mono norĩ hã te za tinhibro hã ahâ uptabi na 'wasa, 'ri nho'u itéb u.

²⁵ Tawamhã duré 'ridawa za'ẽtẽ mono hã 'ri nho'õmo 'wawi wa'ra 'ridawa za'ẽtẽ mono hã te za 'ridawa haré 're simasab u'âsi, õne u'âsi sitob ãna. Tame oto 're mara waihu'u mono õ wa, te za 'ridawa haré 're simasab u'âsi.

²⁶ Tawamhã daro mono bâ te za danhibro hã 'wasari ni, 'ri nho'u itéb u hã. Uburé dawaihu'u pese na romhuri pese zéb ré, te za asisi ni.

²⁷ Tawamhã marĩ iwasédé hã da te 'mazasi za'ra õ di za. Duré 're idahâimana wasété za'ra mono norĩ hã, duré 're idazadawa nhipese za'ra mono norĩ hã itẽme 're danhisisi waihu'u mono õ di za oto. Ibaihâ na 're idahâimana u'âsi za'ra mono norĩ nhisi 're isimi'wara mono zém na, isisi, 're isimi'wara mono norĩ si, te za itẽme 're sisisi, Pone'ẽrebâ te na isisi ui'éré ré mono norĩ si hã.