Apocalipsi 19 - ꞌRe Ihâimana Uꞌâsi Mono Zadawa Wasuꞌu

¹ Taha pari, wa tô duré wapa, hâiwa ãma da'ahâ uptabi na damreme 'rãihâ na da te inharĩ za'ra ne hã. Ãne te damreme 'rãihâ na nharĩ za'ra ni: — Wanhib'apito 'Re ihâimana u'âsi mono ãma 're wawata u'âsi za'ra wa'aba mono. Ta hã Danho'reptui'wa. Danhipai u wẽ uptabi di, duré waihu'u pese uptabi di.

² Marĩ na te te upai ãna, te i'uwaibaba si te te dama 're arowairébé, sena na. Pi'õ siwa'âbâ zô 're isisõmri mono 're ihâimana wasété mono zéb zarina, isine daro mono bâ 're dahâimana wasété za'ra mono wa, ma tô 'Re ihâimana u'âsi mono hã iwasédé hã ãma tihi. Ma tô wẽ'õ pese. Isib'a'uwẽ norĩ te te 're simroi mono wa, ma tô 'Re ihâimana u'âsi mono hã uprosi, pi'õ hã.

³ Tawamhã te duré damreme 'rãihâ na nharĩ za'ra ni, ãne: — 'Re ihâimana u'âsi mono ãma 're wawata u'âsi za'ra wa'aba mono. 'Ri nho'õmo za'ẽtẽ ro'o nhizé hã õne u'âsi hâimo 're sizédé si'réi mono wẽ te, ãma 're wawata u'âsi za'ra wa'aba mono.

⁴ Tawamhã 24 na dama ipire za'ra norĩ hã duré maparane si'uiwa na ropoto na ihâiba norĩ hã ma tô hi'rãtitõ ana, 'Re ihâimana u'âsi mono ãma wata za'ra da, danhib'apito simasisizém na isãmra ãma. Ãne te ãma tiwata za'ra: — Tane tô. 'Re ihâimana u'âsi mono ãma si 're wawata u'âsi za'ra wa'aba mono.

Pone'ẽrebâ imrozém na datozé wasu'u, ãma isimiré'ézém na hã

⁵ Tawamhã danhib'apito simasisizém hawi te ni'wa hã tinha, ãne: — Ma'ãpé, Wanhib'apito 'Re ihâimana u'âsi mono ãma si 're aiwata u'âsi za'ra wa'aba mono, uburé isib'a'uwẽ norĩ hã, duré dama aipire za'ra wa'aba norĩ hã, duré dama aiwapu na 're i'aihâimana za'ra wa'aba norĩ hã, duré uburé 'Re ihâimana u'âsi mono 're ihâimana wazéb za'ra wa'aba mono norĩ zama hã.

⁶ Tawamhã wa tô duré wapa, da'ahâ uptabi na 're idamreme zusi mono mreme hã. Â'a'a 'rãihâ ruru'u ne, damreme hã. Duré tãiwapsa'a za'ẽtẽ rãrã'ã ruru'u ne, damreme hã. Ãne te damreme 'rãihâ na nharĩ za'ra ni: — Uburé Danhib'apito uptabi, iwaihu'u pese uptabi hã ta hã danhipai u, pire uptabi na te 're hâimana, 'Re ihâimana u'âsi mono hã. Tahawa, ãma 're wawata u'âsi za'ra wa'aba mono za.

⁷ Bâdâ hã ma tô iwa waptãrã, Pone'ẽrebâ imrozéb da hã. Duré ãma imro da hã ma tô sima apese. Tahawa, ãma 're watoi u'âsi za'ra wa'aba mono. Duré 'Re ihâimana u'âsi mono hã wẽ uptabi wa, ãma 're wawata u'âsi za'ra wa'aba mono.

⁸ Za ãma imro ma hã, ma tô 'Re ihâimana u'âsi mono hã tãma tisõ, i'uzazé hâirã wẽ uptabi hã, ãma isi'uza da hã. Ãma imro da uzazé hã 'Re ihâimana u'âsi mono nhib'a'uwẽ te te 're iromhuri wẽ za'ra mono zé, te wasu'u.

⁹ Tawamhã hâiwa ãma 'Re ihâimana u'âsi mono ma romhuri'wa hã te ĩma tinha, ãne: — Ma'ãpé, ãne na ãma rob'ui'éré: “Pone'ẽrebâ imrozém na da te dasima ãma iromhu'u za'ra zéb u sihutu da, 'Re ihâimana u'âsi mono hã sô ihârâ za'ra norĩ ma, tãma 're rowẽ uptabi za'ra mono di za.” Ãne te duré ĩma tinha: — Ã hã 'Re ihâimana u'âsi mono mreme hã tô sena uptabi.

¹⁰ Tawamhã tô õ hã hâiwa ãma romhuri'wa papara, wa tô ĩhi'rãtitõ aime, ãma ĩwata da aré. Tane nherẽ, te ĩma tinha, ãne: — Tô'ã. Ãne hã 'manharĩ tõ. Wa hã asine hã, 'Re ihâimana u'âsi mono ma romhuri'wa, wa 're ĩhâimana, duré asisãnawã norĩ ne hã, duré asiré isazei'wa norĩ ne hã. Ta norĩ hã roti tô sena uptabi hã, Zezusi te te dama 're i'awaihu'u mono hã te te 're iwapari pese za'ra mono. Ta norĩ ne hã, wa 're ĩhâimana, wa hã. Ma'ãpé 'Re ihâimana u'âsi mono ãma si 're aiwata mono. 'Re ihâimana u'âsi mono zadawa 'mahârâ 'rata 'wa norĩ hã, Ipẽ'ẽzani te te tãma 're iwaihu'u za'ra mono zéb zarina si, te ta norĩ hã te te dama 're sadawa wasu'u za'ra. E marĩ na te bété te te dama 're sadawa wasu'u za'ra. Tô õhõ na, Zezusi, ti'ab ré uburé te te dama 're i'awaihu'u mono na si, te ta norĩ hã te te dama 're sadawa wasu'u za'ra, 'Re ihâimana u'âsi mono hã.

Awaru irã nhisi isãmra hã â hawi ropoto siwamnarĩ ãma te te i'ai'utézé wasu'u

¹¹ Taha pari, wa tô duré 'madâ. Te 'madâ'â wamhã, ma tô ĩma si'ridawa, hâiwa hã. Tawamhã awaru irã hã wa tô 'madâ. I'mapraba'wa nhisi hã, sena na Dama i'umnhasi na. Duré isisi amo hã, Tô sena uptabi na, isisi hã. Ta hã dawasédé hã da te 're i'manharĩ za'ra mono zéb zarina te te 're da'awẽ'õ mono wamhã, tô i'uwaibaba si te te 're da'awẽ'õ. Tô isarina si te duré te te 're da'ahâ za'ra, te te ãma 're upai mono ãna. Duré dawasété na 're idanomro mono norĩ hã te te 're 'wapé za'ra mono wamhã, tô isarina si te te tãma 're rob'manharĩ za'ra, te te ãma 're upai mono ãna.

¹² Duré ito hã aiwa unhama ro'o ne. Duré i'rã na hã i'rãzaza si'ubuzi hã, ahâ uptabi di. Danhib'apito 'rãzaza si'ubuzi ne, i'rãzaza mono hã. Duré ihâiba na danhisi na rob'ui'éré hã, dama isa'rese'õ na. Õhõ ma si waihu'u pese di, ãma isimiré'ézé hã.

¹³ Duré i'uza hã dawapru na hâzapré di. Taha nhisi hã 'Re ihâimana u'âsi mono mreme na, isisi hã.

¹⁴ Tawamhã hâiwa ãma da'wapéi'wa norĩ hã te duré isarina sisa're, awaru irã na uza hâirã wẽ uptabi na.

¹⁵ Duré awaru irã na isãmra zadai'ré hawimhã, te sib'ézé 'wa si'uiwa i'wa pe hã aipra. Taha na, te za da'ãma ai'uté, daro mono bâ 're idahâimana wasété za'ra mono norĩ ãma hã. Simiwada'uri nhiptete na te za duré te te 're da'awada'uri. Uwa 'ru 'rã hã ẽtẽ're 're, iwa'u zô da te 're wati za'ra mono wamhã, te za iwa'u hã 're pu'u za'ra. Tane te za dawapru hã dawi 're pu'u za'ra, 'Re ihâimana u'âsi mono isiptete uptabi hã sa'ẽtẽ te te 're da'ahâ za'ra mono wamhã.

¹⁶ Tawamhã duré i'uza hâpa na isisi na rob'ui'éré, duré izada'õtõ na zama. Ãne isisi na rob'ui'éré hã, uburé danhipai u Danhib'apito. Duré isisi amo na rob'ui'éré hã, Danhipai u dama ipire.

¹⁷ Tawamhã wa tô duré 'madâ hâiwa ãma romhuri'wa hã, aimawi hã. Bâtâ nhisiwi te za. Tawamhã te hârâ 'rãihâ na uburé si norĩ zô hã hâ, hâimo uptabi 're isisa'rei mono norĩ zô. Ãne te sô tihârâ za'ra: — We asina ubumroi wa'aba. 'Re ihâimana u'âsi mono hã te za oto aima a za'ra wa'wa, sa'ẽtẽ na asaihuri aba da.

¹⁸ Tawamhã daro mono bâ da'upsãtã mono nhi na te za asaihuri 'wa, adâ'â norĩ nhi na, duré ti'ai ãma danhib'apito norĩ nhi na, duré da'wapéi'wa norĩ nhib'apito nhi na, duré da'wapéi'wa norĩ nhi na, duré awaru nhi na, duré awaru 'mapraba'wa norĩ nhi na, duré dapawa'âbâ ãna dawada'uri zarina si da te dama 're iromhuri za'ra mono norĩ nhi na, duré dawada'uri ãna dasi'uihâ na 're idahâimana za'ra mono norĩ nhi na, duré dama ipire norĩ nhi na, duré dama iwapu norĩ nhi na zama. Uburé pese daro mono bâ 're idahâimana wasété za'ra mono norĩ dâ'â nhi na te za asaihuri 'wa.

¹⁹ Tawamhã â hawi ropoto siwamnarĩ hã wa tô 'madâ, ti'ai ãma dama ipire za'ra mono norĩ me. Ta norĩ hã ma tô tite da'wapéi'wai mono bâ te te 'rã'õtõ, awaru irã 'mapraba'wa hã te te siwi 'wapé da, duré isiré da'wapéi'wa norĩ zama te te siwi 'wapé za'ra da.

²⁰ Tawamhã â hawi ropoto siwamnarĩ hã ma tô âri ni. Awaru irã 'mapraba'wa ma tô ti'â. 'Re ihâimana u'âsi mono zadawa wasu'u uptabi õ 'wa, 'Re ihâimana u'âsi mono nhimipisutu newa, romhõsi na dama 're isadawa nhipese mono, ma tô duré isiré hã ti'â. Ta hã ma tô aré â hawi ropoto siwamnarĩ nho'a te te 're romhõsi, dama isa'rese'õ na. Te te 're iromhõsi mono zém na ma tô dama 're sadawa nhipese aré, â hawi ropoto siwamnarĩ nhisi na ihâiba ui'éré mono hã, ihâiba 'manharĩ na romhâiba ãma 're idawata za'ra mono hã. Tawamhã awaru irã 'mapraba'wa hã ma tô â hawi ropoto siwamnarĩ norĩ hã, dama 're isadawa nhipese mono me wabzu. Unhama ro'o u'âsi u, ma tô hâiba ré wabzu, ẽtẽ ro'o nhizédé uzé pire u.

²¹ Tawamhã awaru irã na isãmra hã tizadai'ré hawi sib'ézé 'wapa i'wa pese si'uiwa zahuré na ma tô uprosi, uburé pese da'wapéi'wa norĩ hã. Uburé ma sõ'rebzâri pese. Tawamhã si norĩ hã danhi na saihuri mono wa, ma tô te te 'mahâpãrĩ pese.