Apocalipsi 18 - ꞌRe Ihâimana Uꞌâsi Mono Zadawa Wasuꞌu

Babilonia hã 'Re ihâimana u'âsi mono te te i'uprosizé wasu'u

¹ Taha pari, wa tô duré 'madâ, hâiwa ãma 'Re ihâimana u'âsi mono ma romhuri'wa aimawi hã. Hâiwa hawi te wei mo, isimiwada'uri pire hã. Ihâiba hã te rowa'a za'ẽtẽ, ti'ai mono bâ.

² Tawamhã mreme 'rãihâ na te 'mahâ. Ãne te 'mahâ: — Babilonia hã dahu nho'u dama isa'rese za'ẽne hã ma tô daré ai'utõ. Ma tô uprosi ni. Ahâ uptabi na te oto iwasété norĩ hã iwa 're hâimana za'ra, wa'uburé norĩ hã. Sipahutu norĩ zama, duré si'õmo norĩ zama te oto ahâ uptabi na iwa 're hâimana za'ra, uburé pese si iwasété norĩ hã.

³ Uburé dapoto wamri mono bâ ma tô uwa nho'u isé nhimi'rãiwamnarĩ ne, dawasété si da te iwa 're 'manharĩ za'ra. Ma tô duré daro mono bâ danhib'apito norĩ hã dama ipire za'ra hã siré 're wasété uptabi za'ra. Aibâ hã timro upana pi'õ aimawi zô si te te 're irowasutu za'ra mono ne, ma tô 'Re ihâimana u'âsi mono upana, marĩ iwasété zô si da te 're rob'ruiwapari za'ra. Duré Babilonia ãma marĩ zô si, da te 're irob'ruiwapari za'ẽtẽ uptabi za'ra mono zarina, ma tô marĩ hã da te 're uipra za'ẽtẽ uptabi za'ra, siwa'ru. Taha na da te tiwi 're irob'uipra za'ra mono zém na, ma tô daro mono bâ dama rowede'wa norĩ hã 're sisibro pese uptabi za'ra. Ãne wa, ma oto Babilonia hã ai'utõ.

⁴ Tawamhã wa tô duré wapa, damreme hâiba amo hã hâiwa hawi te te inharĩ hã. Ãne te tinha: — Ĩnhib'a'uwẽ norĩ, ma'ãpé ta hawi aiwairébé aba, 'ri nho'õmo za'ẽtẽ hawi, dasine 're aiwasété tõ za'ra wa'aba mono da, duré dawasété norĩ hã za te te 're irobzépata za'ra mono norĩ zu, 're robzépata tõ za'ra wa'aba mono da.

⁵ Marĩ hã da te 're isibu 'rãihâ za'ra mono ne, ma tô Babilonia ãma 're idawasété za'ra mono zé hã tinhibu 'rãihâ pese, hâiwa u. Tawamhã 'Re ihâimana u'âsi mono hã ma tô ãma sipo're pu'u, Babilonia ãma 're idawasété uptabi za'ra mono zéb ãma.

⁶ Ma'ãpé Babilonia ãma 're idahâimana za'ra mono norĩ ma, tãma ãma wa'rãmi za'ra wa'aba asa, aiwab da, ĩnhib'a'uwẽ norĩ ma, te te 're irob'manharĩ za'ra mono ne. Ta norĩ nhimirob'manharĩzéb zarina ma tô ĩnhib'a'uwẽ norĩ hã te te 're robzépata za'ẽtẽ za'ra. Tahawa, ĩnhib'a'uwẽ norĩ ma, te te tãma 're irob'manharĩ za'ra mono zém nhipai u, te za tãma ãma iwa'rãmi za'ra wa'wa, Babilonia ãma 're idahâimana za'ra mono norĩ ma, isipai u te te 're robzépata za'ẽtẽ za'ra mono da.

⁷ Ta norĩ hã ma tô sina 're wata pese za'ra. Tinhimirosa'rata wasété zarina ma tô sina 're hâimana wasété uptabi za'ra. 'Re ihâimana wasété za'ra mono zarina, te za aiwab da, tãma 're irob'manharĩ wasété za'ra wa'aba mo, te te 're robzépata za'ẽtẽ za'ra mono da, duré tiwi 're robzei'õ pese za'ra mono da. Tawamhã pi'õ te nasi si'ãma tinha, ãne: Wa hã dama ĩpire na, wa 're ĩnhamra. Duré imrotõ hã timro zô 're isiwa'õ za'ra mono ne, 're ĩhâimana mono õ di. Ĩsiré norĩ hã ahâ uptabi di. Niwamhã ĩwi robzei'õ waihu'u õ di za. Ãne te pi'õ hã si'ãma nasi tinha, Babilonia ãma 're idahâimana za'ra mono norĩ ãma isimiré'é na.

⁸ Ãne te te nasi si'ãma nharĩ wa, te za niwapsi rob'manharĩ pipa hã bâtâ na õne haré sô watobro, dahâzé hã, duré dadâ'âzé hã, duré mra hã. Tawamhã uburé Danhib'apito uptabi, 'Re ihâimana u'âsi mono hã iwasédé te te ãma ihiri hã waihu'u pese uptabi wa, te za uprosi unhama na, pi'õ hã.

⁹ Tawamhã daro mono bâ danhib'apito norĩ hã dama ipire za'ra norĩ hã ã pi'õ na 're ihâimana wasété za'ra mono norĩ hã pi'õ izata nhizé te te sãmri za'ra wamhã, te za ãma aiwa'õ za'ra.

¹⁰ Tawamhã pi'õ te te irobzépata pipa te, te za romhâ na aimasa. Ãne te za ipibu ma 're sadari za'ra: — Ropipa uptabi hã ma tô asô tiwatobro 'wa, Babilonia ãma 're i'aihâimana za'ra wa'aba mono norĩ zô hã. Ropipa uptabi di. Misi bâtâ na ma ropipa uptabi hã õne haré asô tiwatobro 'wa, 'ri nho'õmo za'ẽtẽ ãma 're i'aihâimana za'ra wa'aba mono norĩ zô. Taha na ma tô irobzépata za'ẽtẽ za'ra wa'wa.

¹¹ Tawamhã daro mono bâ roptede'wa norĩ hã dama rowede'wa norĩ hã te za duré sô ti'ru'ru. Te za sô aiwa'õ za'ra, ni'wa hã za oto te te tiwi 're rob'uipra za'ra mono dai õ wa.

¹² Ãne aré rowede'wa norĩ wi, da te 're i'uipra za'ra mono hã; ẽtẽ waipo pré oru hã, duré ẽtẽ waipo prã prata hã, duré ẽtẽ'ubuzi iwa'âbâ za'ẽtẽ upsãtã mono bâ, duré a'é tõmo wawẽ ne itob'a 'manharĩ hã, iwa'âbâ za'ẽne hã. Ãne duré, aré rowede'wa norĩ wi, da te 're i'uipra za'ra mono hã; zazahâ ihâi wẽ uptabi 'manharĩ hã, ihâ prépe hã duré ihâ uzétâ iwa'âbâ za'ẽne hã. Duré wede hã iwa'âbâ za'ẽtẽ upsãtã mono bâ, te te dama 're wede za'ra aré, duré wede wa'âbâ za'ẽtẽ 'manharĩ mono hã, duré uhâ nhisi'reti 'wa'ratahi 'manharĩ mono hã, duré ẽtẽ topsada brõzi 'manharĩ mono hã, duré isi'uwazi tete 'manharĩ mono hã, duré ẽtẽ su'u rã 'manharĩ mono hã.

¹³ Ãne duré, rowede'wa norĩ wi, aré da te 're i'uipra za'ra mono hã; wedewa'u zadaze upsãtã mono bâ, dasai warĩrĩzéb da hã, duré 'ri 're zadazezéb da hã, duré dasihâiba'u'rézéb da hã, wedewa'u zadaze iwa'âbâ za'ẽtẽ mono hã. Ã hã rowede'wa norĩ wi, aré da te 're i'uipra za'ra mono hã; uwa 'rãi wa'u isé hã, duré azeitona 'rãi wa'ui wa hã, duré trigu i'rãi ré hã, duré isu pese uptabi hã, duré powawẽ hã, duré pone'ẽrebâ hã, duré awaru hã, duré wede na wedewara hã, duré dapawa'âbâ ãna da te dama 're iromhuri za'ra mono hã. Ãne te uburé marĩ hã da te 're uipra za'ra aré, rowede'wa norĩ wi hã.

¹⁴ Tawamhã rowede'wa norĩ hã te za 'ri nho'õmo ma nharĩ za'ra, ãne: — Uburé pese marĩ iwẽ hã sô 're irob'ruiwapari za'ra wa'aba mono hã ma si'utõrĩ. Uburé asibro hã ma tô isimini pese za'ra wa'wa. Oto sõpẽtẽ zahu za'ra wa'aba õ di za.

¹⁵ Tawamhã roptede'wa norĩ dama rowede'wa norĩ hã danhibro pese na da te tiwi 're irob'uipra za'ra mono zém na 're isisibro pese uptabi za'ra mono norĩ hã te za duré romhâ na aimasa, 'ri nho'õmo nhiti. Babilonia ãma da te irobzépata za'ra pipa te, te za romhâ na aimasa. Te za duré sô aiwa'õ za'ra.

¹⁶ Sô siwa'õ za'ra sina, te za ãne sima ãma nharĩ za'ra: — Ropipa uptabi hã ma tô dazô watobro, 'ri nho'õmo za'ẽtẽ ãma 're idahâimana za'ra mono norĩ zô hã. Da'uza ihâiwẽ uptabi na te aré 're dasi'uza za'ra, ihâpré pese na duré ihâpré dâ'â na iwa'âbâ za'ẽtẽ na si. Dasipesezém na iwa'âbâ za'ẽtẽ na ma tô aré 're dasipese za'ra, oru 'manharĩ na, duré ẽtẽ'ubuzi iwa'âbâ za'ẽtẽ na, duré a'é tõmo wawẽ ne itob'a 'manharĩ na. Ãne aré marĩ na 're idasipese za'ra mono zé hã.

¹⁷ Tane nherẽ, ma tô õne haré ropsi'utõrĩ, si'aba'réi waré na danhibro hã. Tawamhã â poré mono bâ uba're na 're idahâimana za'ra mono hã te za duré romhâ na aimasam ni, uba're na roti'wa norĩ hã, duré ãma iromhuri'wa norĩ hã, duré uba're na 're idanomro mono dama rowede'wa norĩ hã.

¹⁸ Tawamhã ã norĩ hã 'ri nho'õmo nhizé, te te sãmri za'ra wamhã, te za duré 're sadari za'ra. 'Re sadari za'ra mono sina, te za ãne sima nharĩ za'ra: — Õ hã 'ri nho'u hã iwẽ uptabi aré. Isine hã 'ri nho'u hã i'maihâimana waihu'u õ.

¹⁹ Tawamhã rob'ru te, te za duré robzapru hã ti'rã nhisiwi sa'wari za'ra. Siwa'õ za'ra sina, te za duré ãne sima nharĩ za'ra: — Ropipa uptabi hã ma tô sô tiwatobro za'ra, 'ri nho'õmo za'ẽtẽ ãma 're idahâimana za'ra mono zô hã. Ropipa uptabi di. Danhibro pese na iwa da te wawi 're irob'uipra za'ra mono zém na, wa tô aré 're wasisibro pese za'ra, uba're na 're iwahâimana za'ra mono hã. Tane nherẽ, ma tô si'aba'réi waré na ropsi'utõrĩ õne haré.

²⁰ Ãne te i'awapari mono hã, ĩnhotõ 'rowim ne, ĩpo're na. Tahawa, ma'ãpé hâiwa ãma 're aihâimana za'ra wa'aba mono hã ãma 're atoi u'âsi za'ra wa'aba mono, 'ri nho'õmo za'ẽne hã isi'utõrĩzém na. Duré 'Re ihâimana u'âsi mono nhib'a'uwẽ norĩ, ma'ãpé 're atoi u'âsi za'ra wa'aba mono, isadawa wasu'u'wa norĩ zama, duré Cristuhu zadawa wasu'u'wa norĩ zama. E marĩ wa. Babilonia ãma da te aima 're rob'manharĩ wasété za'ra wa'aba mono wa, 'Re ihâimana u'âsi mono hã te te da'uprosi wa oto. Tahawa, te za ãma 're atoi u'âsi za'ra wa'aba mo.

²¹ Tawamhã ãne, wa tô duré te azabu. Hâiwa ãma romhuri'wa isimiwada'uri pire hã ma tô ẽtẽ tõmo wawẽ uptabi hã sarõtõ. Te te sarõtõ wamhã, ma tô âi ba time, â poré ãma. Te te me sina, te ãne tinha: — Ãne te za Babilonia hã 'ri nho'õmo za'ẽne hã sa'ẽtẽ uptabi daré uprosi, si'utõrĩ da. Tawamhã ropsi hã te za oto sô nomro.

²² Tawamhã rowamreme õ di za oto. Duré danhimnhihârâzé hã baba di za oto. Duré danhimnhihârâzé isurure hã robaba di za oto. Duré rowamreme'wai õ di za oto, duré isõ're'wai õ di za oto, da te aré 're iwapari za'ra mono hã. Rob'é'é uptabi di za. Duré romhuri nhipese'wa norĩ hã robaba uptabi di za. Duré ẽtẽ tõmo wawẽ 'manharĩ na amnho, da te 're isub za'ra mono zé ruru hã da te 're wapari za'ra mono õ di za. Rob'é'é uptabi di za.

²³ Duré rob'uiwẽzé hã te te oto dama 're rob'uiwẽ za'ra mono õ di za, Babilonia ãma hã. Duré dasina 're damro za'ra mono õ di za oto. Babilonia ãma dama rowede'wa norĩ hã ma tô aré danhipai u sibro pese na 're hâimana za'ra, dama pire na. Iwa 're idahâimana za'ra mono norĩ hã ma tô simi'â na te te da'ãma 're romhuri za'ra, 'Re ihâimana u'âsi mono upana, isine marĩ zô si da te 're rob'ruiwapari pese za'ra mono da, õhõ na dama 're rowẽ za'ra mono da newa.

²⁴ Babilonia ãma iwa 're idahâimana wasété za'ra mono norĩ hã ma tô 'Re ihâimana u'âsi mono nhib'a'uwẽ te te 're simro, isadawa wasu'u'wa norĩ zama. Babilonia norĩ zadawa para, ma tô duré daro mono bâ dasiwazari da te 're danhimro. Tahawa, ma tô Babilonia hã daré uprosi ni.