Apocalipsi 17 - ꞌRe Ihâimana Uꞌâsi Mono Zadawa Wasuꞌu

Pi'õi wasété wasu'u

¹ Tawamhã 7 na hâiwa ãma romhuri'wa norĩ siré hã ma tô we ĩtẽme 'maimo, u'awi ré ihâimana za'ra norĩ siré hã. Tawamhã te ĩzatõ, ãne: — We ĩsiré aimorĩ, Babilonia na 'ri nho'õmo za'ẽtẽ nhisi ãma 're idahâimana wasété za'ra mono norĩ ma, 'Re ihâimana u'âsi mono te te irob'manharĩ pipa zé hã sabu da. Panho'õmo si'rutu 'rata, te 'ri nho'õmo za'ẽne hã 're hâimana. Pi'õi wasédé iwa'âbâ zô aibâ ma, 're isisõmri mono ne, te Babilonia ãma hã 're dahâimana wasété uptabi za'ra.

² Aibâ hã pi'õi hâimana wasété na 're ihâimana wasété mono ne, ma tô daro mono bâ danhib'apito norĩ dama ipire za'ra hã Babilonia ãma 're idahâimana wasété za'ra mono norĩ siré 're wasété uptabi za'ra. Âzé nhipãrĩ para da'uihâ idi'iti zarina, da te 're irobzanhamri za'ra mono ne, ma tô daro mono bâ Babilonia ãma 're idahâimana wasété za'ra mono norĩ siré, 're dahâimana to za'ra, dawasété na hã. Pi'õ iwasédé hã timro upana aibâ aimawi zô si, te te 're irowasutu mono hã, Babilonia ãma 're idahâimana za'ra mono norĩ marĩ iwasété zô si da te dasima 're irob'ruiwapari za'ra mono, te wasu'u.

³ Tawamhã 'Re ihâimana u'âsi mono pẽ'ẽzani hã ma tô duré ĩ'uihâ pi'ra. Te te ĩ'uihâ pi'rai wa, wa tô duré aimawi ĩhâiba. Tawamhã hâiwa ãma romhuri'wa hã ma tô ĩzaprõ, a'ubuni u, supara'ré u. Tame pi'õ hã wa tô 'madâ'â, ropoto siwamnarĩ ipré nhisiwi, isãmra hã. Ropoto siwamnarĩ hâiba hã ma te rob'ui'éré hã hâiba'utõ. Aiwa 'Re ihâimana u'âsi mono wamri sine na, isiwaptẽrẽ ui'éré wasédé hã. Duré 7 na i'rã hã, ta hã. Duré i'u hã 10 na. Taha hâiba nhisiwi, te pi'õ hã nhamra.

⁴ Pi'õi uza hã ihâpré warõ tâ'â na, duré ihâpré pese na i'uza hã, duré uburé da'uza wamri nhipai u, iwa'âbâ za'ẽne ta hã. Uburé marĩ hã tisipesezé hã iwa'âbâ za'ẽtẽ mono bâ te te si'ãma i'aza'ra mono ré, te nhamra, ẽtẽ waipo pré oru 'manharĩ ré, duré ẽtẽ'ubuzi 'manharĩ ré, duré a'é tõmo wawẽ ne itob'a 'manharĩ ré, iwa'âbâ za'ẽtẽ ré. Hâsizé hã oru 'manharĩ na i'manharĩ hã te duré 're ti'â tinhib'rata, uwa 'rãi wa'u isé pire ré hã. Uwa 'rãi wa'u isé hã pi'õ ipo're'õ siwamnarĩ hâimanazé, te wasu'u. Aibâ na 're ihâimana siwamnarĩ u'âsi mono zé, te duré wasu'u ta hã.

⁵ Duré pi'õi uihâ na rob'ui'éré hã dama iwaihu'u'õ na, ãma isimiré'ézém na hã iwamri. Ãne iwamrizé, imorĩ'rada hã: Babilonia na 'ri nho'õmo za'ẽtẽ na. Duré daro mono bâ dawasété 'ru na'rata 'wa na, iwamrizéb amo hã. Duré iwamrizéb amo hã pi'õi wasété norĩ na na, iwamrizéb amo hã, isine aibâ na 're hâimana wasété za'ra mono da, pi'õ norĩ te te 're wada'uri za'ra mono wa, ta hã.

⁶ Tawamhã ã pi'õ hã wa duré 'madâ, apâ. Da'uihâ idi'iti wa, dato sina da te 're irobzanhamri za'ra mono ne, te pi'õ hã robzanha. 'Re ihâimana u'âsi mono nhib'a'uwẽ, isadawa para, da te 're simroi mono wẽ te, te 're to, pi'õ hã. Duré Zezusihi zazei'wa norĩ sipizari ãna, Zezusi te te 're sazei pese za'ra mono 'ru te, da te 're simroi mono wẽ te, te pi'õ hã 're to. Tawamhã pi'õ hã te 'madâ'â wamhã, wa ãma ĩtob'uzu, ĩma sa'rese õ wa.

⁷ Tawamhã hâiwa ãma 'Re ihâimana u'âsi mono ma romhuri'wa hã te ĩzadanha, ãne: — E marĩ da, ma tô ãma atob'uzu. E waihu'u ã bâ. Waihu'u õ wa, wa za tô oto aima hâi'ré, pi'õi hâimanazé hã dama isa'rese'õ hã. Duré â hawi ropoto siwamnarĩ hâimanazé hã wa za duré aima hâi'ré, isisiwi pi'õ isãmra hâimanazé hã, 7 na i'rã hã, duré 10 na i'u hã.

⁸ Ã hã â hawi ropoto siwamnarĩ i'madâ hã ihâiba ré hã aré. Tane nherẽ, ãhã na hâiba ré, hâimana õ di a'â. Tane nherẽ, te za romhutu na hâiba ré watobro, ab're 'rehâ hawi. Watobro wamhã, niwapsi te za 'Re ihâimana u'âsi mono hã uprosi. Taha õ ré hã, aré dâ'â nherẽ, hâiba ré ab're 'rehâ hawi watobro wa, te za da te 'madâ'â za'ra sina ãma tatob'uzu za'ra ni, ti'ai ãma daro mono bâ 're idahâimana za'ra mono hã. Ropoto na'rata hawimhã, ma tô 'Re ihâimana u'âsi mono hã danhisi hã a'ui'éré ibaihâ na, za i'rata rowẽ na 're idahâimana u'âsi za'ra mono norĩ nhisi hã. Tawamhã ibaihâ na isisi ui'éré ihâimana za'ra õ norĩ hã te za ãma tatob'uzu za'ra ni, ropoto siwamnarĩ ãma hã.

⁹ — Ã hã te aima ihâi'ré hã ni'wa hã tinhimirosa'rata na te te ãma romhõsi wapsi hã, te za waihu'u. Ã hã 7 na i'rã za'ra hã 7 na ẽtẽ 'rãihâ mono hã te wasu'u, pi'õ, ihâiba nhisiwi isãmra za'ra hã. Duré 7 na dama roti'wa norĩ hã te wasu'u za'ra.

¹⁰ 7 na ihâiba za'ra hã ma tô imrotõ na siparabâsi nasi ai'ré za'ra, da'madâ'â hawi. Ta norĩ za'u hã te oto misi te te 're da'ab'madâ'â. Duré ihâiba amo, da'rãsutu'wa hã zahadu sébré õ di, da'madâ'â'wa da hã. Sébré wamhã, tô sena te za te te 're da'ab'madâ'â hutu.

¹¹ Da'madâ'â'wa norĩ hã uburé sisarina wairébé parip si, te za ropoto siwamnarĩ â hawi iwatobro hã ãzé, te te 're da'madâ'â mono da, aré hâiba ré nherẽ, idâ hã. 8 ãma te za ãzé daza'u, te te 're da'madâ'â mono da. Ta hã te za niwapsi 'Re ihâimana u'âsi mono hã uprosi.

¹² — Tawamhã duré â hawi ropoto siwamnarĩ u hã 10 na i'madâ'â za'ra hã, 10 na dama ipire za'ra norĩ te wasu'u, da'madâ'â'wa na zahadu te te ãma isãna'rata za'ra õ hã. Niwapsi te za tãma waprosi za'ra ni, â hawi ropoto siwamnarĩ siré te te 're da'madâ'â hutu za'ra mono da.

¹³ Ã norĩ hã misi haré simisutu isimiroti za'ra hã za, marĩ 'manharĩ wasété da hã. Tahawa, te za simisutu tãma sisõmri za'ra, â hawi ropoto siwamnarĩ ma hã, isadawa para te te 're da'madâ'â za'ra mono da, duré tinhiptetezém na te te 're pawaptob za'ra mono da.

¹⁴ Te za duré ropoto siwamnarĩ siré siwi 'wapé, Pone'ẽrebâ hã. Tane nherẽ, te za Pone'ẽrebâ hã ãma ai'uté za'ra. Ta hã Pone'ẽrebâ danhipai u Uburé Danhib'apito uptabi na 're hâimana mono wa, duré danhipai u dama pire na 're hâimana mono wa, te za ãma ai'uté za'ra. Ni'wam norĩ hã isirã zarina si 're nomro mono da, Pone'ẽrebâ te te 're i'apisutu mono norĩ hã, duré simi'ẽ na õhõ ãma si 're inomro mono norĩ hã, te za Pone'ẽrebâ siré ãma ai'uté za'ra, ropoto siwamnarĩ norĩ ãma hã.

¹⁵ Tawamhã hâiwa ãma romhuri'wa hã te duré ĩma tinha, ãne: — Ã pa nho'õmo si'rudu hã i'madâ hã pi'õi wasédé iwa'âbâ zô 're isisõmri mono isisiwi isãmra hã, daro mono bâ damreme sipo'o mono bâ 're idahâimana za'ra mono, te wasu'u, ã pa nho'u hã.

^16-17 'Re ihâimana u'âsi mono hã te za pisutu za'ra, 10 na dama ipire za'ra norĩ hã, 'Re ihâimana u'âsi mono te te sima ipisutuzéb zarina, misi haré simisutu te te 're rosa'rata za'ra mono da, duré ropoto siwamnarĩ ma sisõmri za'ra wa, isapari te te 're romhuri za'ra mono da, tinhiptetezém na te te 're pawaptob za'ra mono da. 'Re ihâimana u'âsi mono hã tinhimiropisudu hã romnhowa te te i'aza'ra mono hã za te te ãma i'a'uwaimrami mono zéb u, te za ropoto siwamnarĩ zapari te te 're da'madâ'â 'rãsutu za'ra. Tahawa, ropoto siwamnarĩ i'madâ hã i'õmo norĩ me hã te za ã pi'õi wasédé hã siwi 'ruiwapa. Tawamhã pi'õi wi, te za rob'ubumro za'ra, ai'uréiwi hâimana da. Te za duré inhi hã siwi ti'rẽ. Te za duré siwi uprosi, unhama na. Ãne te za Babilonia ãma hã dasi'utõrĩ.

¹⁸ — Duré ã pi'õ i'madâ hã ã 'ri nho'õmo za'ẽne hã te wasu'u, dama isa'rese za'ẽne hã. Ã 'ri nho'õmo ãma danhib'apito hã dama ipire hã, daro mono bâ dama ipire norĩ nhipai u 're ihâimana mono. Õ norĩ hã te te 're i'awada'uri mono.