Apocalipsi 16 - ꞌRe Ihâimana Uꞌâsi Mono Zadawa Wasuꞌu

U'awi 're, uwa 'rãi wa'u isé na 'Re ihâimana u'âsi mono, 7 na te te dama irob'manharĩ pipa mono zé wasu'u

¹ Tawamhã wa tô duré wapa, 'Re ihâimana u'âsi mono mreme hã, imreme 'rãihâ hã hâiwa ãma, isõrõwa 'ri hawi. 7 na hâiwa ãma tãma iromhuri'wa norĩ ma, te rob'ru za'ra. Ãne te tãma rob'ru za'ra: — Mo oto ai'aba'réi wa'aba ti'ai u, 7 na u'awi hawi ĩnhimihâzé hã sa'wari za'ra wa'aba mono da.

² Tawamhã hâiwa ãma romhuri'wa hã imorĩ'rata uimrehẽne ma tô mo, ti'ai u. Tinhi'u'awi wamhã, ma tô te te sa'wari ti'ai wa, daro mono bâ. Te te sa'wari mono wamhã, ma tô da'wa're iwasété uptabi hã duré isé uptabi hã te te daduri, â hawi ropoto siwamnarĩ nhisi na i'ui'éré ré mono norĩ hã, duré ihâiba 'manharĩ na romhâiba ãma 're iwata za'ra mono norĩ hã.

³ Tawamhã imorĩ'rata nhana'remhã ma tô duré hâiwa ãma romhuri'wa hã tinhi'u'awi wamhã, te te sa'wari âi ba, â poré mono bâ. Te te sa'wari mono wamhã, ma âwapru, â poré mono bâ. Adâ'â wapru si'u'ẽtẽ ne na, ma te te âwapru. Ma tô duré si'utõrĩ, â 'rowi uburé pese 're inomro mono hã.

⁴ Tawamhã si'ubdatõ ãma hâiwa ãma romhuri'wa hã ma tô duré tinhi'u'awi wamhã, te te sa'wari, âi ba, panho'õmo mono bâ, duré ub're mono bâ. Te te sa'wari mono wamhã, ma duré te te âwapru.

⁵ Tawamhã wa tô wapa, hâiwa ãma romhuri'wa hã, â mono bâ, â 'madâ'â'wa hã. 'Re ihâimana u'âsi mono ãma te tiwata, ãne: — A hã tô sena te marĩ na upai ãna i'uwaibaba si dama 're i'arowairébé mo. A hã 're aiwasété mono õ. Marĩ õ ré hã te 're aihâimana u'âsi mo. Ai'utõrĩ waihu'u õ di. Õne u'âsi te 're aihâimana mo.

⁶ 'Re idanomro wasété mono norĩ hã ma tô asib'a'uwẽ norĩ, duré asadawa wasu'u'wa norĩ zama hã te te 're simro. Ma tô te te 're wapru pu'u za'ra. Tahawa, ma tô iwa'rãmi dawapru hã tãma i'anhomri mo, õhõ si da te 're âhuri mono da. Ibâre ma tô oto rowasédé hã sô tiwatobro za'ra tô.

⁷ Tawamhã wa tô duré wapa ni'wai mreme hã, wedeza ne hawi, 'Re ihâimana u'âsi mono ma, danhoprubzé nomrizém hawi. Te duré 'Re ihâimana u'âsi mono ãma tiwata, ãne: — Uburé Danhib'apito uptabi, 'Re ihâimana u'âsi mono, tô sena aiwaihu'u pese uptabi di. Marĩ na upai ãna te i'uwaibaba si dama 're i'arowairébé mo, sena na.

⁸ Taha pari, hâiwa ãma romhuri'wa hã maparane si'uiwa na ãma ma tô duré ta hã tinhi'u'awi wamhã sa'wa, bâtâ nhisiwi. Te te sa'wari wamhã, ma tô titõmo wa'ro pese. Tahawa, ma tô te te dahâiba zata, bâtâ tõmo wa'ro zé pire hã.

⁹ Ma tô duré te te dahâpré pese. Tawamhã ma tô 'Re ihâimana u'âsi mono hã 'ruiwapti za'ra ni, rob'manharĩ pipazém na te te dazada ãma 're rowairébé mono wa. Tane nherẽ, dawasété wi dasipizari za'ra õ di. Duré siptete uptabi nherẽ, 'Re ihâimana u'âsi mono ãma 're dawata za'ra mono õ di.

^10-11 Tawamhã imrotõ ãma hã ma tô hâiwa ãma romhuri'wa hã tinhi'u'awi wamhã sa'wa, ropoto siwamnarĩ â hawi iwatobro simasisizém nhisiwi, danhib'apito simasisizém ne nhisiwi. Te te sa'wari wamhã, ma tô robra hã watobro, ropoto siwamnarĩ nhimi'madâ'â norĩ, 're ihâimana za'ra mono zéb ãma. Tame te dahâzé hã sépata za'ẽtẽ za'ra ni. Dahâzé te, te da'wa na 're dasisoto ubu'iti za'ra. Tawamhã te duré 'Re ihâimana u'âsi mono ãma wasété uptabi za'ra ni, hâiwa ãma 're isãmra mono ãma, dahâzé da te sépata za'ẽtẽ za'ra 'ru te, da'wa're te te duré daduri mono 'ru te zama. Tane nherẽ, dawasété wi 're dasipizari za'ra mono õ di duré.

¹² Tawamhã imropâ ãma hâiwa ãma romhuri'wa hã ma tô duré tinhi'u'awi wamhã sa'wa, Eufrati na panho'õmo za'ẽtẽ nhisi nhisiwi. Te te sa'wari wamhã, ma tô ti'â'ré. Bâtâ pusizém hawi darob amoi hawimhã dama ipire norĩ hã, tisiré da'wapéi'wa norĩ zama â 'ré na te te saprĩ za'ra da hã, ma tô ti'â'ré tô.

¹³ Tawamhã wa tô duré 'madâ, si'ubdatõ wa'uburé norĩ hã, iwasété norĩ hã. Uti hâiba ne ihâiba za'ra hã. Ropoto siwamnarĩ zadai'ré mono hawi, ma tô misi si wairébé, ho'orã hâiba ne ropoto siwamnarĩ hâiba za'ẽtẽ zadai'ré hawi, duré â hawi ropoto siwamnarĩ zadai'ré hawi, duré ti'ai hawi ropoto pipa zadai'ré hawi. Ti'ai hawi ropoto pipa hã, ta hã 'Re ihâimana u'âsi mono zadawa wasu'u uptabi õ 'wa, 'Re ihâimana u'âsi mono nhimipisutu newa sadawa nhipese na hã te te 're ida'a'rãmi mono.

¹⁴ Ta norĩ hã si'ubdatõ wa'uburé norĩ hã simiromhõsi waihu'u pese za'ra di. Ta norĩ hã niwamhã te za te te ropé daro mono bâ, dama ipire za'ra norĩ zô, da'wapéi'wa norĩ zô zama te te ubumroi mono da, 'Re ihâimana u'âsi mono hã te te siwi 'wapé da hã, bâdâ isa'ẽne, 'Re ihâimana u'âsi mono danhipai u isiptete uptabi nhimipisutu na.

¹⁵ Tawamhã ãne danhotõ 'rowim ne, da te 're irosawẽrẽ za'ra mono ne, te azabui mono ré, wa tô Zezusihi mreme hã wapa ĩpo're na, tizazei'wa norĩ te te ipo're pu'uzé hã. Ãne te tinha: “Ma'ãpé, aipo're pu'u za'ra wa'aba. Isimisaihuri zô 're danhimipari za'ra mono õ nherẽ, danhorõwa u 're isisisi mono ne, wa za wei mo apâ. Ãté ni'wa hã tisiwadi zô simipari wamhã, sõtõ ãna te za sô rob'madâ'â u'âsi. Tawamhã i'uza hã te za i'rata nomro 'râwi, isiwadi hã we itẽme wisi wa, si'aba'ré na te te sisada âri da, ãma isi'uzazéb da hã. Tane asimiza'rese sina, ĩzô 're asimipari za'ra wa'aba mono ré, we ĩmorĩ wamhã, aima 're rowẽ uptabi za'ra wa'aba mono di za. Ni'wa hã datõmo nho'a ai'uréiwi 're morĩ wa, 're isisé mono ne, ĩma aséb za'ra wa'aba tõ da, asimiza'rese sina ĩzô 're asimipari za'ra wa'aba mono ré, we ĩmorĩ wamhã, aima 're rowẽ uptabi za'ra wa'aba mono di za.”

¹⁶ Tawamhã wa'uburé norĩ hã ma tô oto ubumro, dama ipire za'ra norĩ hã, dama ipire norĩ siré, da'wapéi'wa norĩ zama. Amazedõ na hebreu norĩ mreme na romnhisi ãma ma ubumro.

¹⁷ Tawamhã da'rãirẽme hã 7 ãma hâiwa ãma romhuri'wa hã ma tô duré tinhi'u'awi wamhã sa'wa, hâiwa nho're 're iromhâimana mono nhisiwi. Te te sa'wari wamhã, hâiwa ãma 'Re ihâimana u'âsi mono nhorõwa 'ri 're, danhib'apito simasisizém hawi te tinha, mreme 'rãihâ na, ãne: — Tâibâ za oto. Ã hã, da'rãsutu'wa.

¹⁸ Tawamhã tãiwapsa hã ma tô watobro, duré tãirãrã'ã zama, duré tãsi'ubuzi zama. Ti'a hã ma tô duré sãsã'ã, sa'ẽtẽ uptabi. Niwamhã ãne hã watobro õ di isine hã, dapoto na'rata hawimhã, ti'a sãsã hã.

¹⁹ Tawamhã Babilonia na 'ri nho'õmo za'ẽtẽ nhisi ãma, ma ti'a sãsã'ã na ti'a sipo'o. Si'ubdatõ iwa'õtõ na ma tô ãma sipo'o. Ãne ma tô 'Re ihâimana u'âsi mono hã tinhimi'ahâri pipa zém na te te dama arob'manharĩ, Babilonia ãma 're idahâimana wasété za'ra mono norĩ ma. 'Re idahâimana wasété za'ra mono zé hã tiwi simani õ di. Tahawa, uwa 'rãi wa'u isé pire hã da te 're huri mono wa, da te 're isépata za'ra mono ne, ma tô 'Re ihâimana u'âsi mono nhimihâzé hã da te 're sépata za'ra. Duré daro mono bâ 'ri nho'õmo mono bâ ma duré ropsisa'wari. Tahawa, ma uburé ropsi'utõrĩ pese, 'ri nho'õmo mono bâ.

²⁰ Rob'ré za'iti zama ma uburé pese sisa'wari. Â si ma tô te te sina sinarĩ. Duré ẽtẽ 'rãihâ 're isimasa mono zama ma rere'e, uburé pese.

²¹ Duré tãzâ hã isa'ẽtẽ uptabi hã ma danhisiwi sisa'wari. Inhama pire pibuzé hã 35 na. Tawamhã 'Re ihâimana u'âsi mono hã tinhimirob'manharĩ pipa uptabi na te te dama rob'manharĩ 'ru te, te ãma wasété za'ra ni.