Apocalipsi 15 - ꞌRe Ihâimana Uꞌâsi Mono Zadawa Wasuꞌu

7 na hâiwa ãma romhuri'wa norĩ hã, oru 'manharĩ na u'awi ré isimasabzé wasu'u

¹ Tawamhã wa tô duré marĩ hã 'madâ, hâiwa nhirõtõ na dama isa'rese'õ hã ãma 're idatob'uzu za'ra mono hã. Hâiwa ãma romhuri'wa norĩ hã te 7 na aimasa. Ta norĩ ma, ma tô 'Re ihâimana u'âsi mono hã pisutu, 7 na rob'manharĩ pipa mono na hã, irẽme ma te te taha na dama ãma 're rob'manharĩ za'ra mono da. Ã norĩ hã 'Re ihâimana u'âsi mono nhimi'ahârizéb 'rãsudu, te wasu'u.

² Tawamhã wa tô duré 'madâ, â poré ne hã. Simhi isarob'a uptabi ne â hã, unhama ro'o na iwazari ré hã. Tawamhã wa tô duré 'madâ, â hawi ropoto siwamnarĩ ãma te te ãma i'ai'uté za'ra norĩ hã, tô õhõ ãma 're iwata za'ra mono õ norĩ hã. Taha nhisi hã danhisi za'ratazém na isisi hã. Ihâiba na romhâiba ãma te te i'ai'uté za'ra norĩ hã wa tô duré 'madâ'â za'ra. Ta norĩ hã te aimasa, simhi isarob'a ne â poré zarob'a 'rata. Rowamremezéb ré te duré aimasa, 'Re ihâimana u'âsi mono te te tãma isõmri za'ra ré.

³ Te duré tizadawa'a'a, Mozésihi nho'rezém na, 'Re ihâimana u'âsi mono ma romhuri'wa nho'rezém na, Ezitu hawi isib'a'uwẽ norĩ, 'Re ihâimana u'âsi mono te te dawi isõ'reptu za'ra zém na. Te duré tizadawa'a'a, Pone'ẽrebâ te te 're ida'anho'reptui mono zém na. Ãne te ãma tizadawa'a'a: “Uburé Danhib'apito uptabi, 'Re ihâimana u'âsi mono, aiwaihu'u pese uptabi di. 'Re i'ab'manharĩ mono zé hã wẽ uptabi di. A hã daro mono bâ uburé pese Danhib'apito. Tô sena uptabi na si te dama 're i'aroti wẽ uptabi mo. Upai ãna, te duré 're ida'ab'madâ'â wẽ mo.

⁴ Wanhib'apito, dama aipire uptabi wa, te da te dasiwi 're aiwazé. Uburé pese, te da te 're aiwasu'u wẽ za'ra, danhipai u pese, aiwẽ uptabi wa. Aiwétési tô sena aiwẽ uptabi hã. Daro mono bâ 're idahâimana za'ra mono norĩ hã te za we ai'ãma 're dawata u'âsi za'ra, upai ãna dama 're i'arob'manharĩ wẽ mono zé hã da te 're 'madâ'â za'ra mono wa.”

⁵ Taha parimhã, wa tô duré 'madâ, hâiwa ãma 'Re ihâimana u'âsi mono nhorõwa 'ri hã, duré 'ri paramhã 'ri 're wa'wa ãma, 'Re ihâimana u'âsi mono 're isãmra mono zé hã. Ta hã ni'wa ma tô 'ridawa hã 'ridawa.

⁶ Tawamhã ni'wa te te 'ridawa wamhã, ma tô 7 na hâiwa ãma romhuri'wa norĩ hã tô õ norĩ hã wairé 'ri para hawi, 'Re ihâimana u'âsi mono te te ipisutu za'ra norĩ hã rob'manharĩ pipa na te te dama 're rob'manharĩ za'ra mono da. Uza hâirã ré ihâ si'ubuzi ré ma te wairé, duré ẽtẽ waipo pré oru 'manharĩ na sõ'utu wa'rãmi ré.

⁷ Tawamhã maparane si'uiwa na, ropoto na ihâiba norĩ siré hã misi ma tô 7 na hâiwa ãma romhuri'wa norĩ ma sõmri za'ra, oru 'manharĩ na u'awi hã, 7 na ihâiba za'ra na. U'awi hã uwa 'rãi wa'u isé pire ré hã. Uwa 'rãi wa'u isé pire hã, 'Re ihâimana u'âsi mono nhimihâzé, te wasu'u.

⁸ Tawamhã hâiwa ãma 'Re ihâimana u'âsi mono nhorõwa 'ri 'remhã ma tô romnhizé hã rob'utõ, 'Re ihâimana u'âsi mono nhimirowa'a za'ẽtẽ hawimhã. Tawamhã 'ri para u 're danhisisi waihu'u mono õ di za, a'â. 7 na rob'manharĩ pipa na hâiwa ãma romhuri'wa norĩ te te dama 're rob'manharĩ 'rãsutu za'ra mono parip si, te za 're danhisisi.