Apocalipsi 14 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, iwasété hawi te te iwa'âbâ za'ra norĩ nho're wasu'u

¹ Tawamhã wa tô duré 'madâ. Te 'madâ'â wamhã, Pone'ẽrebâ hã wa tô 'madâ tô, da te dasiwi iwĩrĩ hã. Siã na ẽtẽ 'rãihâ nhisiwi te ta hã za. Duré 144 miu na dahâiba hã te isiré aimasam ni, isisi na i'uihâ ui'éré ré mono hã, duré Imama nhisi na zama i'uihâ ui'éré mono hã.

² Tawamhã wa tô duré wapa, hâiwa hawi ni'wai mreme hã. Â'a'a 'rãihâ ruru'u ne, imreme hã. Duré tãiwapsa'a za'ẽtẽ rãrã'ã ruru'u ne, imreme hã. Rowamreme'wa, tinhimirowamremezém na te te 're irowamreme za'ra mono ne, imreme hã.

³ Tawamhã 144 miu na ihâiba za'ra norĩ hã te danhib'apito simasisizém nho're asõré, maparane si'uiwa na ropoto na ihâiba norĩ nho'reb zama, duré dama ipire za'ra norĩ nho'reb zama. Tinho're itém na te tinho're za'ra, dama isa'rese'õ na. Ã norĩ si 're idanomro wasété mono zém hawi, 'Re ihâimana u'âsi mono te te iwa'âbâ za'ra norĩ si te te waihu'u pese za'ra di, isõ're hã.

⁴ Ã norĩ hã ma tô 're si'madâ'â pese za'ra, 're siwasété tõ za'ra mono da hã, pi'õ na 're idanhimisaihuri za'ra mono õ ne. Duré pi'õ za'rese'õ'wa 're ihâimana za'ra mono ne, ma tô 're si'madâ'â pese za'ra. Pone'ẽrebâ nhirã zarina si ma tô 're nomro. Ta norĩ si ma tô 're idanomro wasété mono zém hawi wa'âbâ za'ra. Ta norĩ hã ma tô 'Re ihâimana u'âsi mono ma sisõmri na'rata za'ra, Pone'ẽrebâi ma zama.

⁵ Duré 're sadawa nhipese za'ra mono õ di. Duré iwasédé hã sena na da te ãma 're sa'ra waihu'u mono õ di, iwẽ na si 're hâimana za'ra mono wa.

Si'ubdatõ hâiwa ãma romhuri'wa norĩ nhimirowasu'uzé wasu'u

⁶ Tawamhã wa tô duré 'madâ, hâiwa ãma 'Re ihâimana u'âsi mono ma, romhuri'wa hã. Hâimo uptabi te 're wara. Iwasu'uwẽ hã te dama 'mahâ, isi'utõrĩ'õ hã, dapoto mono bâ 're idahâimana za'ra mono norĩ ma, duré damreme sipo'o mono bâ 're idahâimana za'ra mono norĩ ma zama.

⁷ Ãne te mreme 'rãihâ na te te dama 'mahârâ: — 'Re ihâimana u'âsi mono nhimiroti hã 're wazé pese za'ra wa'aba mono. Duré wẽ uptabi wa, ãma 're aiwata pese u'âsi za'ra wa'aba mono. Ma tô iwa waptãrã, 'Re ihâimana u'âsi mono te te da'ãma i'arowairébézéb u da hã, uburé pese. Tahawa, te za Ropoto'wai ãma 're aiwata u'âsi za'ra wa'aba mo, hâiwa 'manharĩ'wai ãma, duré ti'ai 'manharĩ'wai ãma, duré â poré 'manharĩ'wai ãma, duré ub're 'manharĩ'wai ãma.

⁸ Tawamhã te duré isãna'remhã 're wara, hâiwa ãma romhuri'wa hã ihâiba amo hã. Ãne te duré ta hã te te rob'mahârâ: — Ma tô daré ai'utõ. 'Ri nho'õmo za'ẽne hã ma tô daré ai'utõ, Babilonia hã. Ma tô uprosi ni. Âsipãrĩ na si pi'õ hã 're isai mono hã te za tihâiba amo norĩ ma ti'ru, isiré te te âhuri wa, si'rã idi'iti pese za'ra da, isiré. Tane ma tô Babilonia ãma 're idahâimana wasété za'ra mono norĩ hã te te 're dawada'uri za'ra daro mono bâ, da'rã idi'iti wa, siwa'ru 're idanomro mono ne, isine 're danomro wasété mono da. Tahawa, ma tô daré ai'utõ, Babilonia hã.

^9-10 Tawamhã si'ubdatõ ãma hâiwa ãma romhuri'wa hã te duré 're wara, hâimo uptabi, maparane nhana're iwatobro hã. Ãne te duré ta hã mreme 'rãihâ na te te rob'mahârâ: — Ni'wa hã â hawi ropoto siwamnarĩ ãma 're wata mono wamhã, duré ihâiba 'manharĩ na romhâiba ãma 're wata mono wamhã, duré isisi na uihâ ui'éré ré 're morĩ wamhã, duré sib'rata ui'éré ré 're morĩ wamhã, 'Re ihâimana u'âsi mono nhimihâzé ipire uptabi hã te za te te 're sépata. Ni'wa hã âzé te za dama ti'ru, â na iwazari'õ hã isé pire uptabi hã te te hâ'rẽne da. Te te hâ'rẽne wamhã, ti'uihâ idi'iti hã te za sépata. Tane, ropoto siwamnarĩ ãma 're iwata za'ra mono norĩ hã 'Re ihâimana u'âsi mono nhimihâzé ipipa uptabi hã te za te te 're sépata za'ẽtẽ uptabi za'ra, tãma wẽ'õ pese za'ra wa, 'Re ihâimana u'âsi mono ma hã. Unhama ro'o na te za te te 're robzépata za'ra, ẽtẽ ro'o nhizédé uzé pire na, isi'utõrĩ'õ na. 'Re ihâimana u'âsi mono ma, hâiwa ãma romhuri'wa norĩ nho'a, te za te te 're robzépata za'ẽtẽ za'ra, Pone'ẽrebâ nho'a zama.

¹¹ Tawamhã unhama ro'o nhizé hã te te ãma 're irobzépata za'ra mono nhizé hã te õne u'âsi 're sizédé 'rãti u'âsi, hâimo. Unhama ro hã ro'o nhimizazâri waihu'u õ di, â hawi ropoto siwamnarĩ ãma 're iwata za'ra mono norĩ ma hã, duré ihâiba 'manharĩ na romhâiba ãma 're iwata za'ra mono norĩ ma hã, duré isisi na i'ui'éré za'ra norĩ ma hã. Õne u'âsi te ã norĩ hã robzépata wi 're wairébé waihu'u mono ãna, te te 're robzépata u'âsi za'ra.

¹² Ãne hã za 're romhâimana mono na dâ'âsina, te za 'Re ihâimana u'âsi mono nhib'a'uwẽ hã sipizari ãna 're hâimana nhiptete za'ra, isimiroti te te 're iwapari pese za'ra mono hã, Zezusihi ãma si duré 're inomro mono norĩ hã.

¹³ Tawamhã wa tô duré wapa, hâiwa hawi ni'wai mreme hã. Ãne te ĩma ti'ru: — Ma'ãpé, ãne ãma rob'ui'éré: “Ãhã na te iwaihu'uzém hawi, ni'wam norĩ hã Wanhib'apito ma, te te 're romhuri pese za'ra mono zawéré ré, 're dâ'â za'ra mono wamhã, tãma 're rowẽ uptabi za'ra mono di za.” Tawamhã 'Re ihâimana u'âsi mono pẽ'ẽzani hã ma ãma saze, timreme na. Ãne ma ãma saze: “Tane tô. Tãma 're rowẽ uptabi za'ra mono di za tô. Simi'ẽ na tinhimiromhuri wẽ ré, te za hâiwa u iré 're sisisi. Tahawa, te za oto romhuri na tisiwasudu hã te te 're sahâri za'ra.” Ãne 'Re ihâimana u'âsi mono pẽ'ẽzani te te ãma isazezé hã. Ãne te za ãma irob'ui'é.

Ti'ai ãma roptehârizém na, ãma isimiré'ézé wasu'u

¹⁴ Tawamhã wa tô duré 'madâ. Te 'madâ'â wamhã, hâiwa'a hã te za. Isisiwimhã aibâ hã te nhamra, ti'ai ãma dasiré ipodo hã ẽtẽ waipo pré oru 'manharĩ na 'rãzaza ré. Roptehârizéb ré zama te nhamra, i'wa pese ré.

¹⁵ Tawamhã hâiwa ãma romhuri'wa ihâiba amo hã ma tô hâiwa ãma 'Re ihâimana u'âsi mono 're isãmra mono zém hawi watobro, 'ri hawi. Watobro wamhã, te mreme 'rãihâ na 'mahâ, hâiwa'a na isãmra hã. Ãne te 'mahâ: — Ti'ai ãma daro mono bâ hã ma tô amnho 'rãi'ré pese mono. Tahawa, ma tô oto iwa waptãrã, iroptehâri mono zéb da hã, bâdâ. Tahawa, ma'ãpé roptehâri mono, asimiroptehârizém na.

¹⁶ Tawamhã hâiwa'a na isãmra hã ma tô te te roptehâri tô, daro mono bâ tinhimiroptehârizém na.

¹⁷ Tawamhã wa tô duré 'madâ, hâiwa ãma romhuri'wa aimawi hã. Hâiwa ãma 'Re ihâimana u'âsi mono 're isãmra mono zém hawi ma duré watobro, 'ri hawi. Roptehârizé hã te duré ta hã 're ti'â, tinhib'rata.

¹⁸ Tawamhã ma tô duré hâiwa ãma romhuri'wa aimawi hã watobro, wedeza ne hawi, 'Re ihâimana u'âsi mono ma, danhoprubzé nomrizém hawi. Ta hã wedeza ne na unhama 'madâ'â'wa. Ta hã roptehârizé te te 're i'râ'âri hã te 'mahâ. Ãne te 'mahâ: — Ma'ãpé, uwa 'ru 'rã hã anhimizuhâri mono, daro mono bâ 're isimnhatã mono hã. Asimiroptehârizém na te za oto i'anhimizuhâri mo, 'rãi prédu mono wa.

¹⁹ Tawamhã hâiwa ãma romhuri'wa hã ma tô te te anhimizuhâri tô, uwa 'ru 'rã hã daro mono bâ, ti'ai ãma hã. Te te anhimizuhâri mono wamhã, ma tô te te anhamra ẽtẽ're 're, iwa'u zô, dapara na da te 're iwati za'ra mono zéb 're.

²⁰ Tawamhã uwa 'ru 'rã, ẽtẽ're 're te te anhamra mono wamhã, ma tô a'rãiwati, iwa'u zô. 'Ri nho'õmo nhiti da te 're iwati za'ra mono zéb 're, ma tô a'rãiwati. Te te awati wamhã, dawapru na iwa'u hã tawamhã, ma tô puru, ẽtẽzapu'u hawi. Pu'u wamhã, â wara tete ne te tipraba, dawapru na iwa'u hã. 300 na ti'ai pibuzéb zarina te tipraba, dawapru hã. Duré misi ipibuzé wãiwa, ma ti'â'masisi hâimo, â 'rehâ prã na.