Apocalipsi 12 - ꞌRe Ihâimana Uꞌâsi Mono Zadawa Wasuꞌu

Pi'õi wasu'u, Satanasihi wasu'u me

¹ Tawamhã wa tô duré 'madâ. Te 'madâ'â wamhã, marĩ hã ma tô hâiwa nho're na sihâi'ré, dama isa'rese'õ hã, ãma 're idatob'uzu za'ra mono hã. Ta hã dama iwaihu'u'õ hã wa tô 'madâ, pi'õ isa hã. Bâtâ ro'o ne na i'uza hã. Ipara 'rowimhã a'amo te za. Duré 'rãzaza ré te za. I'rãzaza na hã wasi te aimasa, 12 na.

² I'ra te duré ãma sépu, pi'õi ãma. Ãma sépu'u wa, te hâzé te, 're sadari.

³ Tawamhã ma duré marĩ hã sihâi'ré, hâiwa nho're na, marĩ isa'rese'õ hã. Ho'orã hâiba ne ropoto siwamnarĩ hâiba za'ẽne hã te za. Ihâiba hã ihâiba pré. Duré 7 na i'rã hã. 10 na duré i'u hã. Powawẽ õmo ne, i'õmo za'ra hã. Duré 7 na i'rãi mono bâ i'rãzaza hã, danhib'apito 'rãzaza ne hã. I'rãzaza si'ubuzi na i'rãzaza za'ra hã.

⁴ Tawamhã tizamo na ma tô wasi hã waibu, hâiwa ãma 're isimasa mono hã. Ahâ uptabi prã na ma tô waibu, isa'ratazé wãiwa prã na. Tawamhã te te waibui wamhã, ti'ai u ma tô sa'ẽtẽ sãmra. Tawamhã pi'õ nho're te za, ho'orã hâiba ne ropoto siwamnarĩ hã. Pi'õ te sapa i'ra zô, waptã'ã wi te te 'rẽne da.

⁵ Tawamhã ma tô tãma waptãrã aibâ na, simiwada'uri nhiptete na za daro mono bâ te te 're ida'awada'uri mono da hã. Tawamhã ma tô tiwi âri ni, 'Re ihâimana u'âsi mono u, danhib'apito simasisizém na 're isãmra mono u, isiré danhib'apito na 're hâimana mono da.

⁶ Tawamhã ho'orã hâiba ne ropoto siwamnarĩ wi, te pi'õ wara, a'ubuni u, 'Re ihâimana u'âsi mono te te tãma iropese siromo zéb u, te te tãma ipisutuzéb u. Tame hâimana mono ré, te za 1.260 na bâdâ ihâimana u te te 'madâ'â, 'Re ihâimana u'âsi mono hã.

⁷ Tawamhã dasi'wapé, hâiwa nho're ãma ma tô watobro. Hâiwa ãma romhuri'wa hã Migueu na isisi hã, duré hâiwa ãma isiré tãma iromhuri'wa norĩ hã, te ho'orã hâiba ne ropoto siwamnarĩ hâiba za'ẽne hã siwi 'wapé. Tawamhã ho'orã hâiba ne ropoto siwamnarĩ hã ma tô sina ana, hâiwa ãma tãma iromhuri'wa norĩ me.

⁸ Tane nherẽ, ma tô Migueu norĩ hã ãma ai'uté za'ra. Tahawa, hâiwa ãma 're hâimana waihu'u za'ra mono õ di za oto.

⁹ Tawamhã ho'orã hâiba ne ropoto siwamnarĩ hã ma tô siwi time ti'ai u, apâ morĩ tõ da. Ta hã Satanasi, wanhitob'ru. Ta hã duréihã wahi na isihâiba. Uburé tizadawa nhipese na te te 're ida'a'rãmi mono, 'Re ihâimana u'âsi mono zadawa para newa, ti'ai ãma daro mono bâ. Tawamhã wa'uburé norĩ zama isib'a'uwẽ zama ma tô isiré siwi sãmra ti'ai u, apâ si'aba'ré tõ da.

¹⁰ Tawamhã wa tô duré ni'wai mreme hã wapa. Mreme 'rãihâ na te tinha: — 'Re ihâimana u'âsi mono hã ma tô oto wa'anho'reptuzém na wama ãma uwaimra, wanhitob'rui wi. Danhib'apito na siptete na te te 're ida'ab'madâ'â mono zé hã ma tô duré dama hâi'ré oto. Duré Danho'reptui'wa da, te te ipisudu hã te duré isiré te te 're da'ab'madâ'â oto, waihu'u pese na. Wasiré isazei'wai ãma, awẽ sidâpâsi simizazâri ãna iwasédé hã te te ãma 're i'aza'ra mono hã ma tô oto 'Re ihâimana u'âsi mono hã sihawi time hâiwa hawi, ti'ai u, Wa'uburé hã.

¹¹ Pone'ẽrebâ hã dazada idâ'âzéb zarina, ma tô wasiré isazei'wa norĩ hã ãma ai'uté za'ra, Satanasihi ãma. Iwasu'uwẽ hã sena na te te dama 're isadawa wasu'u za'ra mono zém na zama, ma tô ãma ai'uté za'ra. Duré da te 're 'ruiwapari za'ra mono wa, dawi 're sihâiba zawi za'ra mono õ di, 're dâ'â tõ za'ra mono da. Tahawa, 'Re ihâimana u'âsi mono wi sipizari ãna, ma tô duré Satanasihi ãma ai'uté za'ra.

¹² Tahawa, ma'ãpé 're ato za'ra wa'aba mono, hâiwa ãma 're aihâimana za'ra wa'aba mono norĩ hã. Tane nherẽ, ti'ai ãma 're aihâimana za'ra wa'aba mono norĩ hã aima 're ropipa uptabi za'ra wa'aba mono di za, â poré na 're aihâimana za'ra wa'aba mono norĩ ma zama. E marĩ wa. Wa'uburé hã sahi uptabi na atẽme morĩ aba na dâ'âsina, ti'ai u. Ti'ai ãma te te aima 're rob'manharĩ wasété za'ra wa'aba mono da, za 're ihâimana hutu mono zém na te te sina waihu'u wa, ma tô tizahi pese. Tahawa, aima 're ropipa uptabi za'ra wa'aba mono di za.

¹³ Tawamhã ho'orã hâiba ne ropoto siwamnarĩ hâiba za'ẽne hã hâiwa hawi da te ime na siwaihu'u wamhã, ma tô pi'õ zarina 're mo, aibâ na i'ra tãma iwaptã'ã zarina.

¹⁴ Tane nherẽ, ma tô si'õmo wawẽ paihi hã isaripi ré hã pi'õi ma za ni, a'ubuni u 're isãmra mono zéb u, ãma wara da, tô õme, 'Re ihâimana u'âsi mono te te tãma iropese siromo zéb u. Tame te za 'Re ihâimana u'âsi mono hã te te 're 'madâ'â, si'ubdatõ wahum nhipai u wãiwa, ho'orã hâiba ne ropoto siwamnarĩ wi.

¹⁵ Tawamhã ho'orã ne hã ma tô â hã tizadai'ré hawi sa'wa pi'õ zarina, â pré da, â te te 'mapraba da.

¹⁶ Tane nherẽ, ti'a hã ma tô pi'õi ãma aime. Ti'a hã ma tô si'ridawa, â zô, â hã iwa a'a da. Tawamhã ma tô â hã iwa ti'a'a tô, ho'orã hâiba ne tizadai'ré hawi pi'õ zarina te te isa'wari hã.

¹⁷ Tawamhã ho'orã hâiba ne ropoto siwamnarĩ hã ma tô pi'õ da tizahi pese, tiwi simani wa. Tahawa, ma tô isihudu norĩ zô mo, te te 'wapé za'ra da. E 'wam norĩ hã te wasu'u, isihudu norĩ hã. Ta norĩ hã 'Re ihâimana u'âsi mono nhimiroti te te 're iwapari pese za'ra mono, duré tô sena na Zezusihi zazei'wa na 're isiwasu'u za'ra mono, te wasu'u. Ta norĩ zô te mo, ho'orã hâiba ne ropoto siwamnarĩ hã te te 'wapé za'ra da.

¹⁸ Tawamhã te oto ta hã â poré zaihâ na za, supara'ré wa.