Apocalipsi 11 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono zadawa 'mahârâ'wa norĩ wasu'u

¹ Tawamhã ma tô ĩma sõmri ni, wedehu waré ne hã marĩ pibuzé hã. Tawamhã 'Re ihâimana u'âsi mono hã ma tô ĩzatõ, ãne: — Mo oto aimorĩ ti'ai ãma ĩnhorõwa u, wedehu waré ne na, 'ri hã pibui mono da, duré ĩma danhoprubzé nomrizé hã pibui mono da, wedeza ne hã, danhimizama da te ĩma 're izata za'ra mono zé hã. Ma'ãpé duré ĩnhorõwa ãma, ĩ'ãma 're idawata za'ra mono norĩ hã sa'rata za'ra na.

² Tane nherẽ, 'ri 'wawi wa'ra 're, 'ri nho'remhã pibui mono õ di za. Ta hã wa tô pisutu, ĩnhib'a'uwẽ'õ norĩ si te te iwa 're ubumroi mono da. Ta norĩ hã niwapsi te za Zeruzalẽ ãma hã 'ri nho'u iwẽ uptabi ãma hã da'ãma ai'uté za'ra. Tahawa, te za te te sina dawasi za'ra. 42 na a'amo ihâimana u te za te te da'ãma rowamnarĩ za'ra, 1.260 na bâdâ za da'ãma isi'utõrĩzéb u.

³ Taha ré, wa za ĩzadawa wasu'u'wa norĩ hã satõrĩ zahuré, tô 1.260 na bâdâ isi'utõrĩzéb u simi'ẽ na te te ĩzadawa wasu'u zahuré mono da. Tawamhã pone'ẽrebâ zéré 'manharĩ na uza wasété ré, te za tineb zahuré, pẽ'ẽzé uptabi zahuré wa, da te dasiwi 're ĩwẽ'õ pese za'ra mono wa.

⁴ Ã norĩ hã azeitona wede ne, te duré 're hâimana zahuré, i'rãi wa'ui wabre hã iro'o pese ne, simi'ẽ na te te dama 're sadawa wasu'u zahuré mono wa. Rob'uiwẽzém ne, te duré 're hâimana zahuré, 'Re ihâimana u'âsi mono zadawa wasu'u na te te dama 're rob'uiwẽ zahuré mono wa. Uburé Danhib'apito nho'a te 're sima'wara zahuré.

⁵ Tawamhã ni'wa hã te te tãma rob'manharĩ wasété zahuré da nherẽ, te za tizadai'ré hawi unhama ro'o na wĩrĩ zahuré. Ãne na te za si'utõrĩ isitob'ru norĩ hã, te te tãma 're rob'manharĩ wasété za'ra mono da nherẽ.

⁶ Tawamhã 'Re ihâimana u'âsi mono zadawa 'mahârâ'wa norĩ hã isimipawapto waihu'u pese zém na te za hâiwa pese zahuré, tã ta'a tõ da, te te dama sadawa wasu'u zahuré mono sina. Duré te te waihu'u pese zahuré di, te te i'âwapru zahuré da hã, duré te te sima iwẽ zahuré zéb zarina, ti'ai ma, te te nasi i'arob'manharĩ wasété zahuré da hã. 'Re ihâimana u'âsi mono u, dawasété wi 're dasipizari za'ra mono da, te za ãne te te dama arob'manharĩ zahuré.

⁷ Tawamhã te te sadawa wasu'u zahuré mono pari, te za ropoto siwamnarĩ hã ab're 'rehâ hawi iwatobro hã sô tisusi zahuré, te te 'wapé zahuré da. Tawamhã ropoto siwamnarĩ hã aibâ norĩ ma, siptete zahuré wa, te za pãrĩ zahuré.

⁸ Tawamhã 'ri nhi'riti 're za'ẽtẽ ãma, te za taré ihâiba hâ hã tiza'wari zahuré, 'ri nho'õmo za'ẽtẽ ãma, wede nhonhi'rãmi na Isib'apito za'ra, da te dasiwi iwĩrĩzém nho'õmo ãma, dama isa'rese za'ẽtẽ ãma. Sodoma na 'ri nho'õmo nhisi ãma, 're idahâimana wasété za'ra mono ne, ã 'ri nho'u hã. Duré Ezitu na romnhisi ãma 're idahâimana wasété za'ra mono ne hã, ã 'ri nho'u hã. Ãne 'ri nho'õmo zahuré na ãma isimiré'ézé hã, Zeruzalẽ hã.

⁹ Tawamhã da'ahâ uptabi na te za itẽme ubumro zahuré ni, ihâiba hâ hã da te dasiwi 'madâ'â zahuré da, 'ri nhi'riti sa'wari ré. Si'ubdatõ bâdâ ine wãiwab u, te za dapoto mono bâ dasiwi 'madâ'â zahuré ni, damreme sipo'o mono bâ, 're idahâimana za'ra mono hã. Te za duré ãma tasi'uwati za'ra ni, da te dasiwi za tõ da.

¹⁰ Tawamhã ti'ai ãma daro mono bâ 're idahâimana wasété za'ra mono norĩ ma hã rowẽ za'ra di za, isadawa wasu'u'wa norĩ hã dâ'â zahuré wa. Tahawa, te za 're dato za'ra. Te za duré danhibzari na tasisawi za'ra ni. Isadawa wasu'u'wa norĩ hã dawasété wi 're dasipizari za'ra mono da, te te dama 're ropipa zahuré mono ré, dâ'â zahuré wa, te za 're dato za'ra.

¹¹ Tawamhã si'ubdatõ bâdâ, ãma ineb zahuré zé wãiwa pari, te za 'Re ihâimana u'âsi mono hã ipẽ'ẽzani hã apâ tãma sõmri zahuré, hâiba ré 're neb zahuré da apâ. Taha pari, te za oto hâiwi aima'wara zahuré. Sima'wara zahuré wamhã, te za tãma tapẽ'ẽwara za'ra ni, da te i'madâ'â za'ra norĩ hã.

¹² Tawamhã 'Re ihâimana u'âsi mono zadawa 'mahârâ'wa norĩ hã te za wapari zahuré, hâiwa hawi ni'wai mreme hã. Mreme 'rãihâ na te za sô tihârâ zahuré, ãne: — We ane wa'aba, hâimo. Tawamhã i'ruiwapari'wa norĩ hã te te 'madâ'â za'ra mono ré, te za hâiwa'a na tizasi zahuré, hâiwa u.

¹³ Tawamhã zasi zahuré wi, awa'awi te za sa'ẽtẽ uptabi ti'a sãsã hã watobro. Watobro wamhã, 'ri hã nima norĩ hã te za sina, Zeruzalẽ ãma, 'ri nho'õmo 'remhã 're isimasa mono hã. 10 na 'ri 'maihâimana wamhã, te za misi si dawi rere'e. Te za duré 7 miu na tadâ'â za'ra ni, ti'a sãsã'ã na hã. Tawamhã dadâ'â ãna idasi'atarẽme mono hã te za tapahi uptabi za'ra ni. 'Re ihâimana u'âsi mono ãma te za tawata za'ra ni, hâiwa ãma 're isãmra mono ãma, simi'manharĩ waihu'u pese uptabi wa.

¹⁴ Tawamhã ropipa hã maparane ipu hã tâibâ oto. Tane nherẽ, zahadu si'ubdatõ ãma zô, te rowaptâ. Romhuture di oto, duré ropipa iwatobro da hã. Ma'ãpé ãne waihu'u pese za'ra wa'aba.

7 ãma hâiwa ãma romhuri'wa hã tinhimnhihârâzém na isimnhihârâzé wasu'u

¹⁵ Tawamhã 7 ãma hâiwa ãma romhuri'wa hã ma tô tinhimnhihârâzém na amnhihârâ. Simnhihârâ wi, hâiwa ãma damreme 'rãihâ hã wa tô wapa. Ãne te nharĩ za'ra: — Satanasihi nhimi'madâ, 're danomro mono da, ma tô da te dasima 're wẽ za'ra aré, daro mono bâ. Tane nherẽ, ropâ te za oto 'Re ihâimana u'âsi mono nhimi'madâ'â si 're danomro, Wanhib'apito nhimi'madâ hã. Danho'reptui'wa da, te te ipisutu nhimi'madâ'â zama te za 're dahâimana za'ra oto. Wanhib'apito hã te za tô te te 're da'ab'madâ'â u'âsi oto, õne u'âsi.

¹⁶ Tawamhã 24 na dama ipire za'ra norĩ hã 'Re ihâimana u'âsi mono nho'a tisimasisizém na isi'ubumro norĩ hã ma tô hi'rãtitõ tãma ana, ãma wata za'ra da.

¹⁷ Ãne te ãma tiwata za'ra: “Uburé Danhib'apito uptabi, 'Re ihâimana u'âsi mono, a hã danhipai u asiptete uptabi di. Duréihã marĩ õ ré hã, te 're aihâimana u'âsi mo. Ai'utõrĩ waihu'u õ di. Õne u'âsi te 're aihâimana mo. A hã aiwaihu'u pese zé hã, duré danhipai u asiptetezé hã ma tô oto dama ihâi'ré, da te oto 're 'madâ'â za'ra mono da. Taha zarina ma tô oto danhipai u da'madâ'â pire na ãma isãna'ra, ãhã na hã. Tahawa, wa ai'ãma wawata za'ra ni.

¹⁸ Ai'ãma 're idawata za'ra mono õ norĩ hã ma tô asada tizahi pese za'ra. Tahawa, ma tô oto iwa waptãrã, asiwi ida'awẽ'õ pese zéb zarina, dama irob'manharĩ wasété zéb da hã. Ma tô duré iwa waptãrã, dahâimanazéb zarina dama i'arowairébézéb da hã, uburé adâ'â norĩ ma hã, asimiroti hã te te 're iwapari za'ra mono õ norĩ hã uburé 're ahâ za'ra mono da, duré uburé asimiroti wapari pese 'wa norĩ ma, tãma 're ab'manharĩ wẽ mono da. Ma tô iwa waptãrã, asadawa wasu'u'wa norĩ ma, marĩ iwẽ hã 're anhomri mono da, te te aima 're iromhuri pese za'ra mono zé wa'rãmi. Uburé pese asib'a'uwẽ norĩ ma, marĩ iwẽ hã 're anhomri mono da, ma tô iwa waptãrã, ai'ãma 're iwata za'ra mono norĩ ma, dama ipire norĩ ma, dama iwapu norĩ ma zama. Ma tô duré iwa waptãrã, ti'ai ãma da te 're irowasété za'ra mono norĩ hã uprosi da.”

¹⁹ Tawamhã hâiwa ãma 'Re ihâimana u'âsi mono nhorõwa 'ri ãma hã, ma tô ni'wa hã 'ridawa hã 'ridawa. Te te 'ridawa wamhã, te oto wedehâ're hã sõ'awi 'ri para za. Wedehâ're 're, te ẽtẽpo i'ui'éré ré hã da'wa, duréihã 'Re ihâimana u'âsi mono te te tinhib'a'uwẽ ma iropisutuzéb ui'éré ré hã. Tawamhã ma tô tãiwapsa hã watobro, tãirãrã'ã zama, tãsi'ubuzi zama. Ti'a hã ma tô duré sãsã'ã. Tãzâ hã ma duré asa'wa, ipire hã.