Apocalipsi 10 - ꞌRe Ihâimana Uꞌâsi Mono Zadawa Wasuꞌu

Hâiwa ãma romhuri'wa hã ibaihâ nhinha isurure te te 're i'râ'ârizé wasu'u

¹ Tawamhã wa tô duré 'madâ, hâiwa ãma 'Re ihâimana u'âsi mono ma romhuri'wa aimawi hã isimiwada'uri pire hã. Hâiwa hawi ma we si'ra, hâiwa'a na ubu ré. Tãiwaipore te duré i'rã nhisiwimhã za. Duré i'ubu hã aiwa bâtâ ro'o ne. Duré unhama ro'o nhoto pa ne, iza hã.

² Tawamhã ibaihâ nhinha isurure te sõzi haré 're ti'â, tinhib'rata. Tawamhã â poré nhisiwi ma tô tipara nhimire niwĩmhã tipara hã tisã. Ti'a nhisiwi ma tô duré tipara nhimi'e niwĩmhã tipara hã tisã.

³ Tawamhã mreme 'rãihâ na te hâ. Hu'u zérépa wairõ 'rãihâ ne, ihârâ hã. Hârâ wamhã, awa'awi ma tô tãiwapsa hã tiwapsa'a za'ra, wapsa'a 'rãihâ na. 7 na iwapsa'a za'ra hã.

⁴ Wapsa'a za'ra wamhã, damreme ne hã wa tô wapa. Tahawa, wa tô imreme za'ra hã te iwapari na aré rob'ui'éré. Tane nherẽ, te ni'wa hã hâiwa hawimhã ĩma tinha, te rob'ui'éré tõ da. Ãne te ĩma tinha: — Tô'ã. Rob'ui'éré tõ. Taré asi'repsi asima si hã waihu'u, tãiwapsa'a norĩ mreme hã.

⁵ Tawamhã hâiwa ãma romhuri'wa hã â nhisiwi isa hã ti'a nhisiwib zama isa hã te i'madâ hã ta hã ma tô hâiwa nho'õmo tinhib'rada hã wẽ, tinhimire niwĩ hã.

^6-7 Tawamhã simiwẽ sina, ma tô waihu'u: — 'Re ihâimana u'âsi mono hã za te te irob'manharĩzéb da hã sô rowaptâ'â õ di za oto. Tawamhã 7 ãma hâiwa ãma romhuri'wa hã tinhimnhihârâzém na simnhihârâ wamhã, te za 'Re ihâimana u'âsi mono hã ãma uwaimra, duréihã te te da'ãma sima iropisutuzé hã dama iwaihu'u'õ hã. Duréihã tizadawa 'mahârâ'wa norĩ ma, te te iropisutuzém na te za oto dama rob'manha. Ãne, wa tô sena na awaihu'u, 'Re ihâimana u'âsi mono nho'a, isimiropisutuzém na zama. — Ãne ma tô 'Re ihâimana u'âsi mono zadawa para waihu'u, hâiwa ãma romhuri'wa hã, hâiwa nho'õmo tinhib'rada te te iwẽ hã. 'Re ihâimana u'âsi mono hã ta hã hâiwa 'manharĩ'wa, duré ti'ai 'manharĩ'wa, duré â poré 'manharĩ'wa, duré uburé iwa 're idahâimana za'ra mono poto 'wa.

⁸ Tawamhã hâiwa hawi we te te ĩma inharĩ 'rata mreme hã wa tô duré wapa. Ãne te duré ĩma tinha: — Ma'ãpé, sô aimorĩ, ibaihâ nhinha isurure zô, âri da, hâiwa ãma romhuri'wa, sõ'a haré tinhib'rata te te 're i'râ'âri zô. Õ hã hâiwa ãma romhuri'wa, â nhisiwi isa hã, ti'a nhisiwib zama.

⁹ Tawamhã wa tô itẽme sô mo. Sô ĩwisi wamhã, wa tô tiwi waptẽ, ibaihâ nhinha isurure hã. Te tiwi waptẽrẽ wamhã, te ĩma ti'ru, ãne: — Ma'ãpé âri, 'rẽne da. 'Rẽne wamhã, ropĩni ne hã isei uptabi za, asadai'ré 'remhã. Tane nherẽ, oto sõmri wamhã, aipẽ'ẽ 'remhã te za adi'izé.

¹⁰ Tawamhã wa tô oto ti'â, isib'rata hawi ibaihâ nhinha isurure hã. Te âri wamhã, wa tô ti'rẽ. Te 'rẽne wamhã, ropĩni ne hã sei uptabi di, ĩzadai'ré 'remhã. Tane nherẽ, oto te sõmri wamhã, ĩpẽ'ẽ 'remhã, ma ĩdi'izé.

¹¹ Tawamhã ni'wa hã te ĩma tinha: — Te za duré 'Re ihâimana u'âsi mono hã dama 're isadawa wasu'u mo, dapoto mono bâ za dama 're iromhâimana za'ra mono zém na hã, damreme sipo'o mono bâ. Daro mono bâ dama ipire za'ra norĩ ma, za 're iromhâimana mono zém na zama te za duré dama 're isadawa wasu'u mo.