Zezusihi zadawa wasuꞌuꞌwa norĩ nhimiromhuri na robꞌuiꞌéré 28 - ꞌRe Ihâimana Uꞌâsi Mono Zadawa Wasuꞌu

Mauta ãma Paulu norĩ isi'ubumrozé wasu'u

¹ Tawamhã rob u wawairébé wẽ wamhã, wa tô rowaihu'u za'ra ni oto. Mauta na rob'ré za'iti nhisi u wa tô wawairébé ni, rowẽ na.

² Tame 're isi'ubumroi mono norĩ hã ma tô wawaibui wẽ za'ra. Tã hã wawi ta'a za'ra wa, duré rowahâ zé wa, ma tô uzâ hã wama ro'o za'ra, wahâi'ro za'ra da. Tahawa, ma tô wama tirowẽ za'ra oto.

³ Tawamhã Paulu hã ma tô mi hã waibu, unhama nhisiwi te te sa'ra da. Te te sa'ra wamhã, wahi hã ma tô mimi hawi watobro. Watobro wamhã, ma isib'rata wi tisa, unhama wa'ro zé te. Isib'rata na te ãma 're sipra.

⁴ Tawamhã tame 're isi'ubumroi mono norĩ hã, Pauluhu nhib'rata na wahi hã te te 'madâ'â za'ra wamhã, te sima rowasu'u za'ra, ãne: — Õhõta aibâ hã wahi ma te tisa, isib'rata wi. Te za oto dârâ. Ãté tô dapãrĩ'wa. Tahawa, â hawi sisõ'reptu nherẽ, ãté te za oto tô dârâ.

⁵ Tane nherẽ, Paulu hã ma tô wahi ré 're sib'ratai wẽrẽ. 'Re sib'ratai wẽrẽ mono wamhã, unhama wa'wa ma waptãrã, wahi hã. Taha wamhã, ãma sépu'u õ di.

⁶ Te ãma rosa'rata wasété za'ra, sib'rata dupto da newa, duré dâ'â siromo da newa, õne haré. Tane nherẽ, te te siwi 'madâ'â hâ nherẽ, marĩ hã ãma hâimana õ di. Rowẽ na te tihâiba, Paulu hã. Tawamhã Pauluhu ãma dapãrĩ'wa na ãma isimirosa'rata za'ra zé hã ma tô ãma saprĩ za'ra. Tahawa, te ãne sima wasu'u za'ra oto: — Ta hã ihâiba'õ, iwaihu'upe.

⁷ Taha 'rata te Pubriu na 're hâimana, rob'ré za'iti ãma danhib'apito hã. Isipti'a hã romhuture di. Ta hã ma tô wawaibui wẽ, i'rata wasi'ubumro da a'â, isõrõwa ãma. Tawamhã bâdâ si'ubdatõ ma tô wa'ãma ne, tame wasi'ubumroi ré hã.

⁸ Imama hã hâzé ré te nomro, waptâ. Wa'ro za'ẽtẽ di, duré isãnapru hã te ãma tihâiba. Tawamhã Paulu hã ma tô itẽme ãzé, te te sabu da. Ãhã wamhã, 'Re ihâimana u'âsi mono ma, ma tô ãma mre. Ãma mreme pari, ma tô tinhib'rada hã ãma tino. Tahawa, ma tô séptârâ.

⁹ Taha parimhã, uburé ihâzé ré norĩ hã ma tô Pauluhu tẽme we si'ré. Tawamhã ma tô uburé apese.

¹⁰ Ãne hã Paulu te te apese pari, ma tô wama tinhoprub za'ra, marĩ hã ahâ na. Tame wasi'ubumroi ré, a'amo si'ubdatõ ma tô wa'ãma ai'utõrĩ za'ra, rob'ré za'iti ãma hã. Tawamhã wasi'aba'ré da wamhã, ma tô wasazéb da hã te te wama sé, uba'reneb 're.

Roma u iwasihutuzé wasu'u

¹¹ Tawamhã tame a'amo si'ubdatõ wa'ãma si'utõrĩ za'ra pari, wa tô uba'reneb 're asisi ni oto, ta hawi ãma wasi'aba'ré da. Ihâiba'õ si'ubza na uba're nhisi hã. Alesãdria hawi ma tô wei mazazâ, rob'ré za'iti u, tame nomro da a'â, rowa'u'u wahâ 're sa'wari mono ré.

¹² Tawamhã Siracusa na 'ri nho'õmo nhisi u wa tô aihutu ni uimrehẽne. Tame wasi'ubumroi ré, bâdâ si'ubdatõ ma te wa'ãma tineb za'ra.

¹³ Ta hawi, ma tô waré si'ãsi rowa'u'u na uba'rene hã, rowa'u'u wa'rãmi. Tawamhã Reziu na 'ri nho'õmo nhisi u, wa tô aihutu ni. Awẽm na si, rowa'u ma tô we rowapõ, hâiwa nhimi'e hawi, wasi'aba'rézéb zarina. Tawamhã bâdâ maparane wa'ãma ne parip si, wa tô duré aihutu ni, Pozu'ori na 'ri nho'õmo nhisi u. Tame uba'rene hã wa tô rẽme za'ra ni.

¹⁴ Tame wa tô duré tawamhã sõpẽtẽ za'ra ni, isazei'wa norĩ hã. Ma tô wahâiba waptẽrẽ za'ra, misi romhuri na i'rata wahâimana za'ra da a'â. Taha parip si, wa tô Roma u ai'aba'ré ni, wapara na.

¹⁵ Tawamhã isazei'wa norĩ hã, Roma ãma 're isi'ubumroi mono norĩ hã ma tô wawasu'u hã wapari za'ra. Tahawa, Apiu ãma rowedezém na 'ri wa'õtõ nhisi u wasihutu wamhã, Roma hawi isazei'wa norĩ me wa tô wasi'uzusi za'ra ni. Duré, Si'ubdatõ Daza'warizém na 'ri wa'õtõ nhisi u wasihutu wamhã, isazei'wa hâiba amo norĩ hã ma tô duré isa'u hã wa'uzusi za'ra, Roma hawi. Tawamhã Paulu hã te te dazabui wamhã, 'Re ihâimana u'âsi mono ãma te tiwata, isõprum na. Ma tô duré ãhã wamhã tãma rowẽ watobro.

Paulu hã, Roma ãma oto 're isãmra mono zé wasu'u

¹⁶ Tawamhã Roma u wasihutu wamhã, da'wapéi'wa norĩ wada'uri'wa hã ma tô Pauluhu ma pisutu, hâiba pisutu 're hâimana mono da, danhorõwa ãma. Da'wapéi'wa si te za i'rata 're hâimana, te te 're 'madâ'â mono da.

¹⁷ Tawamhã bâdâ si'ubdatõ ãma ne pari, ma tô dazô hâ Paulu hã, zudeu norĩ ma ipire norĩ zô, itẽme si'rã'õtõ da. Itẽme si'rã'õtõ wamhã, te tãma nharĩ za'ra, ãne: — Wasiré Izaraéu nhihudu norĩ, ĩwapari pese za'ra wa'aba za. Wasiré norĩ ma, ĩwasédé hã te 'manharĩ õ nherẽ, duré wahi'rata norĩ nhimiroti zarina 're iwahâimana za'ra mono zéb ãma ĩsipai õ nherẽ, ma tô Zeruzalẽ ãma siwi ĩ'â, wasiré norĩ hã. Romanu norĩ ma, ma tô ĩnhomri za'ra.

¹⁸ Tawamhã romanu norĩ hã ĩwasété zô ma tô siwi ĩzadanha. Tane nherẽ, ĩwasédé hã te te ĩ'ãma sãmri za'ra õ di, da te dasiwi ĩwĩrĩzéb da hã. Tahawa, dazazém hawi te te ĩwazere za'ra da, te sima ĩ'ru za'ra.

¹⁹ Tane nherẽ, zudeu norĩ hã ĩwatobro tõ da, ma tô siwi ĩ'ãma sawi dazazé hã. Tahawa, wa tô rowaptẽ, we ĩmorĩ da, apito Sézaha nho're ĩzab da, tãma ĩsiwasu'u da. Tane nherẽ, apito Sézaha ma, ĩsiré norĩ wasété na te inharĩ da hã, we ĩmorĩ õ di.

²⁰ Tahawa, wa tô asô ĩhârâ za'ra wa'wa, te asabu za'ra wa'aba da, aima ĩsiwasu'u za'ra wa'aba da. Izaraéu nhihudu norĩ hã sô isimipari za'ra ãma te sasõmri wa, wa ĩpawasisi ré 're ĩnhamra.

²¹ Tawamhã te asa tãma nharĩ za'ra, Pauluhu ma, ãne: — Zudéa hawi rob'ui'éré na aiwasu'u hã da te wei watẽme 'mai'ãwisi za'ra õ di. Duré wasiré norĩ hã we watẽme nasi sihutu nherẽ, aiwasu'u wasédé hã we te te siwi 'mai'ãwisi õ di.

²² Tane nherẽ, wa tô wasima aiwẽ za'ra ni, asimirosa'rada hã wa te wapari za'ra da, duré wa te waihu'u za'ra da. A hã dasima idasipo'ozép tém niwĩ, te 're aihâimana mo. Ta niwĩ 're idahâimana za'ra mono hã, te iwasété na da te dasima 're rowasu'u za'ra, daro mono bâ. Ãne hã wa te waihu'u za'ra wa, wa tô wasima aiwẽ za'ra ni, wa te aiwapari za'ra da.

²³ Tawamhã ma tô sima pisutu za'ra, nimahã bâtâ na itẽme dasi'rã'õtõ da. Tahawa, ma tô da'ahâ na itẽme tasi'rã'õtõ ni, Paulu hã isãmrazéb u. Bâtâ bâ ma tô dama romhu, 'Re ihâimana u'âsi mono, da'ãma 're isib'a'uwẽ mono zé wasu'u na. Mozésihi nhimi'ui'éré zarina, duré 'Re ihâimana u'âsi mono zadawa 'mahârâ'wa norĩ nhimi'ui'éré 'rata zarina, ma tô tãma ãma rowasu'u pese za'ra, Zezusi hã Danho'reptui'wa da, 'Re ihâimana u'âsi mono te te ipisutu na da te saze za'ra da.

²⁴ Tawamhã imreme da te wapari za'ra wamhã, ni'wam norĩ hã ma tô saze za'ra. Aimawi norĩ hã te te ãma saze za'ra õ di.

²⁵ Tawamhã tiwi si'aba'réi õ ré, ma tô Paulu hã duré tãma nharĩ za'ra, ãne: — Duréihã 'Re ihâimana u'âsi mono pẽ'ẽzani hã ma tô tizadawa wasu'u'wai ma waihu'u, Izaiaha ma, aihi'rata norĩ ma, te te sadawa wasu'u za'ra da.

²⁶ Ãne ma tô Izaiaha ma waihu'u, 'Re ihâimana u'âsi mono hã: “Aimorĩ oto, asiré norĩ tẽme, tãma ĩzadawa wasu'u za'ra da. Ãne te za tãma ĩzadawa wasu'u za'ra: ‘Ĩnhimiroti hã aipo're na 're wapari u'âsi za'ra wa'aba mono nherẽ, taré te za 're iwapari za'ra wa'aba mo, ãma 're waihu'u za'ra wa'aba mono ãna. Duré ĩnhimiromhuri hã atõmo na 're 'madâ'â u'âsi za'ra wa'aba mono nherẽ, taré te za 're i'madâ'â za'ra wa'aba mo, ãma 're waihu'u za'ra wa'aba mono ãna.’ Ãne te za tãma ĩzadawa wasu'u za'ra.

²⁷ E marĩ wa, te za ãne hã tãma ĩzadawa wasu'u za'ra. Ta norĩ hã tipẽ'ẽ 're, te te 're irosa'rata za'ra mono zé hã te sitom haré iré 're hâimana u'âsi za'ra, te te ĩ'ãma 're rosa'rata wẽ za'ra mono õ wa. Po're nhitom haré, te duré 're hâimana za'ra, ĩnhimiroti hã te te 're wapari ze za'ra mono õ wa. Duré tõmo sitom haré te 're hâimana za'ra, ĩnhimiromhuri hã tãma 'madâ'â ze za'ra õ wa. Ãnei õ 'wa'âhã, te aré ĩnhimiromhuri hã te te 're 'madâ'â ze za'ra, titõmo na. Te aré duré te te 're wapari ze za'ra, ĩnhimiroti hã. Te aré duré te te 're ĩwaihu'u pese za'ra, tipẽ'ẽ 're, te te ĩ'ãma 're rosa'rata wẽ za'ra mono wa. Taha zarina si, te aré duré ĩtẽme 're sipizari za'ra, tiwasété wi hã. Tawamhã dahâzé wa, da te 're idapese za'ra mono ne, wa aré iwasédé hã te tãma 're apari, te ãma 're ab'madâ'â tõ mono da oto.”

²⁸ Tawamhã Paulu te duré tãma rowasu'u za'ra, ãne: — Tahawa, ma'ãpé waihu'u pese za'ra wa'aba. 'Re ihâimana u'âsi mono hã te za oto zudeu'õ norĩ ma waihu'u, tinhiminho'reptuzé wasu'u hã. Ta norĩ hã te za oto te te 're wapari za'ra.

²⁹ Tawamhã ãne na te te tãma rowasu'u za'ra pari, zudeu norĩ hã ma wairé, si'aba'ré da oto. Tawamhã si'aba'ré sina, ma tô Pauluhu mreme na sa'ẽtẽ sisada'rãmi za'ra.

³⁰ Tawamhã maparane ma tô ãma tiwahu, Pauluhu ãma, danhorõwa hã taré te te sima iwa'âbâ mono zéb 'remhã. Tame, da'ahâ na ma tô itẽme 're dasihutu. Dasihutu sidâpâsi, ma tô te te 're da'awaibui wẽ, itẽme 're danhisisi mono da.

³¹ Pahi ãna, duré da te tiwi 're sadawa uwati za'ra mono ãna, ma tô te te dama 're rowasu'u, 'Re ihâimana u'âsi mono, da'ãma 're isib'a'uwẽ mono zé wasu'u na hã, duré Wanhib'apito Zezu Cristuhu wasu'u na zama.