Zezusihi zadawa wasuꞌuꞌwa norĩ nhimiromhuri na robꞌuiꞌéré 27 - ꞌRe Ihâimana Uꞌâsi Mono Zadawa Wasuꞌu

Paulu hã Roma u morĩ da, timorĩzém na te te isãna'ratazé wasu'u

¹ Tawamhã apito Festu hã ma tô oto tãma ropibu, Pauluhu ma, Italia na danhipti'a nho'õmo nhisi u morĩ da, rowa'u'u na uba'renem na hã. Tawamhã wa hã, Luca hã wa tô ime mo. Zuliu na da'wapéi'wa norĩ wada'uri'wa nhisi hã ma tô duré wame satõ, Pauluhu 'madâ'â'wa da hã, duré pawasisi ré isiré isi'aba'ré norĩ 'madâ'â'wa da hã. Da'wapéi'wa wada'uri'wa nhimi'ubumro norĩ hã Danhipai u, Apito te na iwaptẽrẽ hã.

² Tawamhã rowa'u'u na uba'reneb 're, wa tô oto asisi ni, Adramitiu hawi we isimizazâri na, wasi'aba'ré da. Azia u â zada'réi baba wara ré, uba'rene nhimizahârizé mono bâ te za simizahâri. Aibâ hã Aristacu na isisi hã te wame mo, Tesalonita ãma 're isãmra mono hã, Masédonia na danhipti'a nho'õmo nhisi 'remhã. Tawamhã ma tô oto waré tiwara za'ra.

³ Tawamhã awẽm na, wa tô aihutu ni, Sidõ u. Tame, Zuliu hã Pauluhu ma, ma tô tãma 'manharĩ wẽ, te te tãma iwaprosi wẽ zém na hã, tame isazei'wa norĩ u morĩ da a'â, ta norĩ hã Pauluhu ãma sime za'ra da, ihâimanazéb da na hã.

^4-5 Tawamhã Sidõ hawi ma tô oto waré wara, uba'rene hã. Wasi'aba'réi wamhã, rowa'u hã te we wawa'rãmi rowapõrĩ za'ra, sa'ẽtẽ. Tahawa, Sipri na rob'ré za'iti nhisi uwaibaba, rowa'u'u suru niwĩ, te waré wara, â poré wa'wai baba, Sirisia uwaibaba. Pãfilia na danhipti'a nho'õmo nhisi uwaibaba ma tô duré oto wara. Tawamhã wa tô aihutu ni, Miha na 'ri nho'õmo nhisi u. Risiza na danhipti'a nho'õmo nhisi ãma te za, Miha hã.

⁶ Tame da'wapéi'wa norĩ wada'uri'wa hã ma tô rowa'u'u na uba'reneb amo hã tisã, Alesãdria hawi iwara hã, Italia na danhipti'a nho'õmo nhisi u iwara da hã. Tawamhã ma tô wama 'ru za'ra, i're wanhisisi da.

⁷ Tawamhã rowa'u'u na uba'rene hã ma tô si'ãsi, waré za'ra, wara pire wa. Bâdâ ahâ na te ãma ne, si'ãsi mono ré hã. Tawamhã Sinidu na 'ri nho'õmo nhisi 'rata, ma tô waré mazazâri za'ra a'â. Tawamhã rowa'u hã te zahadu wei wawa'rãmi rowapõrĩ za'ra. Tahawa, uba'rene hã Cereta na rob'ré za'iti nhisi u ma tô waré tiwara za'ra. Tawamhã Saramona na romnhisi uwaibaba rowa'u'u suru niwĩ ma tô waré uirĩ za'ra.

⁸ Â zada'réi baba te wara u'â, wara pire wa. Wara pire nherẽ, wa tô aihutu ni, Uba're nhimizahâri wẽ zém na 'ri nho'õmo nhisi u, Raséa na 'ri nho'õmo nhisi 'ratab u.

⁹ Tamemhã wa tô asimroi hâ ni. Dawasété parizém na 're idasipo're pu'u za'ra mono zé bâtâ za'u si, te rowa'u'u wawẽ hã 're pusi, wahup sidâpâsi. Tahawa, â wa'wai baba, 're danomro mono õ di oto, rowa'u'u wawẽ nhimimnhasi te. Tahawa, Paulu hã ma tô dapo're pu'u za'ra, ãne:

¹⁰ — Aibâ norĩ, ãne wa tô waihu'u siro, za ã hawi iwasi'aba'rézé hã. Ĩma hã wasi'aba'réi waré õ di za, simimnhasi wa. Uba'rene hã te za waré aiprub za'ra. Tahawa, i're iromnhimi'wara hã te za rere za, âi ba. Duré wa norĩ hã ãté wa za ai'utõrĩ ni. Ãne wa tô waihu'u.

¹¹ Tane nherẽ, da'wapéi'wa norĩ wada'uri'wa hã Pauluhu nhimirowasu'u hã te te saze za'ra õ di. Uba'rene tede'wa norĩ mreme si ma tô siwi saze. Duré i'mapraba'wai mreme si hã ma tô siwi saze.

¹² Tame uba'rene nhimizahârizéb ãma, rowa'u'u wawẽ hã 're pusi mono ré, rowa'u'u na uba'rene hã nomro wẽ waihu'u õ di. Tahawa, da'ahâ na ma tô dasima wẽ za'ra ni, õ hawi dasi'aba'ré da, Cereta ãma Penisi na uba're nhimizahârizém nhisi u sihutu hâ, tame uba'rene hã nomro wẽ da, rowa'u'u wawẽ hã tamemhã te te 're rowapõrĩ mono õ wa.

 poré ãma rowa'u isa'ẽne hã te te irowapõrĩzé wasu'u

¹³ Tawamhã rowa'u isurure hã hâiwa nhimi'e hawi ma tô watobro. Suru na ma tô rowapõ. Tahawa, ma tô ãma rosa'rata za'ra, te te sima iwẽ za'ra zéb uwaibaba si'aba'ré da, sihutu waré da newa. Uba're tétézé hã ma tô wazere za'ra, â 'rowi isimi'wara hã. Tawamhã rowa'u'u na uba'rene hã ma tô waré wara, â zada'réi baba, Cereta na rob'ré za'iti nhisi zababa.

¹⁴ Tane nherẽ, zahadu wasina wapahâ za'ra õ ré, ma tô rowa'u'u za'ẽne hã waptu na awa'awi wei watẽme rowapõrĩ za'ra, rob'ré za'iti hawi. Rowa'u'u za'ẽne hã, Nordesti na da te 're isisi za'ra mono, bâtâ pusizém nhimire hawimhã 're pusi u'âsi mono wa.

¹⁵ Tawamhã â zada'réi baba awa'awi wara da, wa aré wa te si'oto pibu za'ra. Tane nherẽ, te wawi tiwara u'âsi za'ra. Tahawa, wa tô oto tãma 'marẽme za'ra ni, si'uihâ na wara da, rowa'u'u zarina.

^16-17 Tawamhã Cazuda na rob'ré za'iti 'rare nhisi uwaibaba ma tô wara, rowa'u'u suru niwĩ. Tamomo wara ré, uba're 'rare hã ina're na wa te wasiwi isi'u hã wa tô wasiwi wazere ni, â hawi, siprup tõ da. Pire uptabi nherẽ, ma tô uba're na romhuri'wa norĩ hã siwi sarõtõ, uba're isa'ẽtẽ 're, te te siwi sẽrẽ da. Uba're za'ẽne hã ma tô duré te te siwi wasisi, wedenhorõ rutu na sipo'o tõ da. Libia na danhipti'a nho'õmo nhisi ãma â zaihâ uwaibaba supara uwa niwĩ, wara õ'umnhasite, ma tô ãma tihâtâ'â za'ra. Tahawa, ma tô zazahâi wawẽ hã i'maprabazé hã siwi si'ra, tamomo wara tõ da. Tawamhã rowa'u'u wawẽ zababa ma tô uba'reneb za'ẽne hã wara.

^18-19 Rowa'u'u za'ẽne hã pupu'u za'ẽtẽ di. Ãhã wamhã, duré ropupu'u za'ẽtẽ uptabi di. Tawamhã wa'ãma awẽ wamhã, te te dama wede za'ra da, ãma isihâiba waptob za'ra hã ma tô siwi sãmra na'rata za'ra, âi ba, rowa'u'u na uba'rene hã wapu na waré wara za'ra da oto. Ma duré ãma ti'awẽ, rowa'u'u za'ẽtẽ na hã. Tawamhã i'mapraba'wa norĩ hã ma tô ipru hã uba're na romhurizé hã suru na siwi sãmra, âi ba.

²⁰ Awẽ sidâpâsi te ãhã wamhã hâiwarutu u'âsi. Tahawa, bâdâ hã te te urĩrĩ õ di. Wasi zama te te duré urĩrĩ za'ra õ di. Rowa'u'u wawẽ si te zahadu nomro. Tã hã pĩni za'ẽtẽ di duré. Tawamhã wasisõ'reptu za'ra zéb zô, wa te rosa'rata za'ra õ di oto. Duré niha wama iromhâimana za'ra zéb zô, wanhimipari za'ra õ di oto.

²¹ Tawamhã wasaihuri ãna wahâimana za'ra ré, wa'ãma ropsi'utõrĩ za'ra wamhã, ma tô Paulu hã hâiwi za, iwa'wab za'ra. Ãne te tãma rowasu'u za'ra: — Aibâ norĩ, ĩwapari za'ra wa'aba. E marĩ da, ĩmreme hã saze za'ra wa'aba õ di bété. Ĩmreme hã saze za'ra wa'aba 'wa'âhã, aré Cereta hawimhã wawairébé õ di. Taha 'wa'âhã, aré duré wama rowẽ za'ra di, ãhã na hã. Aré duré marĩ na ãma wasi'uba za'ra õ di.

²² Tane nherẽ, sada asib'ru za'ra wa'aba. Ni'wa hã dâ'â õ di za. Uba'renep si te za wawi aiprub za'ra.

²³ Wa hã, 'Re ihâimana u'âsi mono nhib'a'uwẽ, te tãma 're iromhuri u'âsi mono hã. Bara na, hâiwa ãma tãma iromhuri'wa hã ma tô we ĩtẽme wi.

²⁴ Te ĩma tinha, ãne: “Paulu, aipahi tõ. Tô sena Roma ãma apito Sézaha nho're te za asa, asi'uihâ na tãma asiwasu'u da. 'Re ihâimana u'âsi mono hã aima isõprubzéb zarina ma tô pisutu, aihĩni asiré isi'aba'ré norĩ hã aiwi dâ'â za'ra tõ da.” Ãne ma tô ĩma tinha.

²⁵ Tahawa, ãhã na aipahi za'ra wa'aba õ di za. Sada asib'ru za'ra wa'aba. 'Re ihâimana u'âsi mono hã ĩma umnhasi uptabi di. Uburé te te ĩma iwaihu'u zarina, te za tô wama ãma uwaimrami za'ra.

²⁶ Tazahã nimomo, rob'ré za'iti u uba'rene hã te za waré time, rowa'u hã.

²⁷ Tawamhã 14 na ma tô wa'ãma timara za'ra, rowa'u'u za'ẽne hã wawi nomro za'ra ré hã. Tahawa, te rowa'u'u na uba'rene hã zahadu waré si'ãsi za'ra siwa'ru, Mediterãniu na âporé nhisi wa'wai baba. Tawamhã mara wa'wa ma tô uba're na romhuri'wa norĩ hã waihu'u za'ra, â zada'ré u iropsi'utõrĩ na hã.

²⁸ Tahawa, wedenhorõ na ẽtẽ nhi'õmore hã ma tô siwi time, âi ba, â 'reptõ zô te te siwi ãma pibu da. Tawamhã ma tô waihu'u za'ra, 36 na â 'rehâ pibuzém na hã. Tawamhã suru na ãma ronomro pari, ma duré siwi pibu. Ãhã wamhã, 27 na â 'rehâ pibuzé hã oto.

²⁹ Tawamhã uba'rene hã ẽtẽ wa'wai baba wara õ'umnhasite, te sima simimnhasi za'ra, ẽne hã te te prub õ'umnhasite. Tahawa, ma tô ina're hawi itétézé hã maparane si'uiwa na siwi wabzu âi ba, simi'wara wa, uba're hã tiwara na te te uzusi tõ da. Tawamhã rowa'a zô ma tô oto duré te te rob'madâ'â za'ra.

³⁰ Tawamhã uba're na romhuri'wa norĩ hã ma tô sisawi za'ra, uba'renem hawi siwaprosi wairébé da. Uba're 'rare hã ma tô sisada si'ra za'ra âi ba, uba'renep tétézé hã iwata ãma zama te te siwi wabzuri da newa.

³¹ Tane nherẽ, Paulu hã ma tô da'wapéi'wa norĩ ma ãne hã waihu'u, iwada'uri'wa norĩ ma zama: — Õ norĩ hã wa'rata si'ubumroi õ wamhã, asisõ'reptui waihu'u za'ra wa'aba õ di za.

³² Tawamhã da'wapéi'wa norĩ hã ma tô wedenhorõ hã siwi sizâ, uba're 'rare nhi'õmozé hã. Baba na ma tô wawi tiwara za'ra, uba're 'rare hã.

³³ Tawamhã hâiwaza wi, ma tô Paulu hã tãma waihu'u za'ra, tisa hã te te huri da oto, siptete za'ra da. Ãne te tãma waihu'u za'ra: — Bâdâ hã 14 na ma tô ai'ãma ai'utõrĩ za'ra wa'wa, asaihuri aba ãna hã, rowa'u te te isazârizéb zô asimipari za'ra wa'aba ré hã.

³⁴ Ãhã na wa za aima waihu'u za'ra wa'wa, asaihuri aba da oto, asiptete sina aihâimana za'ra wa'aba da. Ni'wa hã dâ'â õ uptabi di za. Aihĩni te za aihâiba ré aiwairébé 'wa.

³⁵ Tawamhã mreme pari, ma tô ti'â, i'u'ẽne hã. 'Re ihâimana u'âsi mono ma, ma tô mre danho'a, isõprum na ãma wata da. Taha pari, ma tô i'u'ẽne hã sima wẽ'ẽ, te te 'rẽne da.

³⁶ Tawamhã aihĩni ma tô oto sada aptete za'ra ni. Tahawa, ma tô tisa hã tihu oto.

³⁷ 276 na wahâiba za'ra hã uba'reneb 'remhã.

³⁸ Tawamhã wasaihuri pari, uburé amnho trigu hã uba'reneb 're isimi'wara hã ma tô oto siwi sa'wa âi ba, uba'rene hã wapu na waré wara za'ra da oto.

Rob u aihĩni dahâiba ré idawairébézé wasu'u

³⁹ Tawamhã rowa'a pese wamhã, ro hã te te waihu'u za'ra õ di, uba're na romhuri'wa norĩ hã. Taré ma tô supara hã siwi tisã, ẽtẽ 'rãihâ papara inomro hã, â zaihâ na. Tawamhã ma tô ãma siwada'uri za'ra, rowa'u'u na uba'rene hã tame te te siwi hiri da.

⁴⁰ Tawamhã uba're tétézé hã â 'rowi isimi'wara hã ma tô siwi sihâri za'ra, isa'u 're simi'wara mono da oto, â 'rowi. Uba're wabzurizé hã ma tô siwi wasihu, te te siwi pi'ra da. Taha wamhã, uba're wata ãma ma tô zazahâi wa'õno hã siwi sasõ, rowa'u hã te te ãma saprõni da, supara u. Tawamhã â zaihâ u te oto waré tiwara za'ra, uba'rene hã.

⁴¹ Tazahã sitẽme â wara sitob u ma tô uba're hã ãzé, supara â 'rowi 're inomro mono u. Tahawa, supara hã ma tô iwada hã ti'â. Rési waihu'u õ di oto, uba'rene hã. Tawamhã â sisasisi za'ẽtẽ wamhã, te te nasi iwabzuri na ma tô na'rehaipo'o.

⁴² Tawamhã da'wapéi'wa norĩ hã te ãma siwada'uri za'ra, ipawasisi ré norĩ ãma, te te siwi simro da, tiwi zâribi za'ra wa, tiwi simani za'ra õ'umnhasite.

⁴³ Tane nherẽ, iwada'uri'wa hã te ãma pa'uwati za'ra, Paulu te te sõ'reptu da, te te sima wẽ wa. Tawamhã te tãma rob'ru za'ra, izâribi waihu'u pese norĩ hã âi ba rere'e da, zâribi za'ra da uimrehẽne, rob u,

⁴⁴ duré ni'wam norĩ hã, izâribi waihu'u'õ norĩ hã wede hâpâ na duré uba're isiprum na te te tété za'ra mono sina isarina zâribi za'ra da. Tawamhã aihĩni ma tô rob u wairé. Ni'wa hã dâ'â õ di. Ni'wa hã u'a õ di duré. Rowẽ na ma te uburé wairé.