Zezusihi zadawa wasuꞌuꞌwa norĩ nhimiromhuri na robꞌuiꞌéré 23 - ꞌRe Ihâimana Uꞌâsi Mono Zadawa Wasuꞌu

¹ Tawamhã zudeu norĩ ma roti'wa norĩ tẽme, te rob'madâ'â pese, Paulu hã. Tahawa te tãma nharĩ za'ra, ãne: — Wasiré Izaraéu nhihudu norĩ, wa hã wa tô 're ĩsi'madâ'â u'âsi, 're ĩmorĩ wẽ u'âsi da, 'Re ihâimana u'âsi mono nho'a. Tahawa, ĩpẽ'ẽ wapu na wa 'râwi ĩsi'remhã 're ĩsi'madâ'â u'âsi.

² Tawamhã Anania hã sasedoti tisiré norĩ nhipai u ipire uptabi hã ma tô ti'ru, i'rata isimasam norĩ ma, te te siwi sadawa pré'é da, Paulu hã.

³ Tahawa, te Paulu hã asa tãma tinha, ãne: — Oro wama roti'wa za a hã, ma aiwasédé hã ĩ'ãma i'manha. A hã ãme te asã, ĩpibu da, 'Re ihâimana u'âsi mono nhimiroti 'rata na rob'ui'éré zarina 're ĩmorĩzéb zô. Tane nherẽ, isimiroti hã ma tô i'upa. Da te ĩzadawa pré'é da, ma tô dama ĩ'ru. Ta hã 'Re ihâimana u'âsi mono nhimiroti zarinai õ di. Tahawa, te za ai'azâ za.

⁴ Tawamhã i'rata isimasam norĩ hã te tãma nharĩ za'ra, ãne: — E marĩ da, ma tô sasedoti ipire uptabi ãma iwasé.

⁵ Tawamhã Paulu te asa tãma nharĩ za'ra, ãne: — E nare ta hã sasedoti dama ipire. Te waihu'u õ di. Te waihu'u 'wa'âhã, te tãma nharĩ õ di aré. 'Re ihâimana u'âsi mono mreme ui'éré 'rata na wa tô ãne hã waihu'u za'ra ni: “Ni'wa hã dama pire wamhã, tãma 're aimreme wasété za'ra wa'aba mono õ di za.” Ãne ma tô wama waihu'u za'ra.

⁶ Tawamhã Paulu hã ma tô waihu'u, dama roti'wa norĩ, sina isipo'o za'ra zé hã. Ni'wam norĩ hã saduseu, duré ni'wam norĩ hã farizeu. Tawamhã ma tô dama si'mahâ, ãne: — Wasiré Izaraéu nhihudu norĩ, ĩwapari za'ra wa'aba. Wa hã farizeu. Ĩmama norĩ zama farizeu. Dadâ'â nherẽ, apâ dahâiwa'utuzé wasu'u hã te sazei wa, wa asõ're ĩzab za'ra wa'wa, asiwi ĩwaihu'u za'ra wa'aba da, taha zô si 're ĩnhimipari u'âsi mono wa.

⁷ Tawamhã mreme pari, tame isi'rã'õtõ norĩ hã ma tô sina isipo'ozéb zarina sima nharĩ za'ra, farizeu norĩ hã, saduseu norĩ me.

^8-9 Farizeu norĩ nhimizazezé hã, ãne: 'Re dadâ'â za'ra mono nherẽ, apâ 're idahâiwa'utu za'ra mono na, duré hâiwa ãma 'Re ihâimana u'âsi mono ma, romhuri'wa norĩ hã tô sena na 're ihâimana za'ra mono na, duré dapẽ'ẽzani hã dawi 're wairébé mono wamhã, nimomo 're idanomro mono na. Ãne farizeu norĩ nhimizazezé hã. Tane nherẽ, saduseu norĩ hã ãne na simizaze za'ra õ di. 'Re idahâiwa'utu za'ra mono zé hã, mare di, u. Duré hâiwa ãma 'Re ihâimana u'âsi mono ma, romhuri'wa norĩ hã, mare di, u. Duré dapẽ'ẽzani, dawi 're wairébé mono wamhã, nimomo 're danomro mono õ di za, u. Ãne saduseu norĩ nhimizazezé hã. Tahawa, ma tô 're sisadawa 'rui u'âsi za'ra, farizeu norĩ hã, saduseu norĩ me. Tawamhã 'Re ihâimana u'âsi mono nhimiroti 'rata na dama rowahutu'wa norĩ hã, farizeu na 're ihâimana za'ra mono norĩ hã hâiwi ma tô aimasa, Paulu, da te dasiwi i'ârizé hã te te siwi wẽ'õ wa. Ãne te mreme 'rãihâ na nasi ãma si'mahârâ za'ra: — Aibâ hã, õ hã wa tô waihu'u za'ra ni. Tiwasédé hã te te âri õ di. Ãté hâiwa ãma 'Re ihâimana u'âsi mono ma romhuri'wa, ma tô tãma rowasu'u. Ãté ni'wai pẽ'ẽzani, ma tô nima hawi tãma rowasu'u.

¹⁰ Tawamhã damreme tete na dasi'wapé za'ra wa, da'wapéi'wa norĩ nhib'apito hã ma tô ãma hâtârâ, Pauluhu ãma, da te dasiwi hâiba'ẽi mono õ'umnhasite. Tahawa, ma tô da'wapéi'wa norĩ ma 'ru za'ra: — Sô ai'aba'réi wa'aba, asiwi wazere aba da, dawa'wa hawi. Tawamhã wanhorõwa u te za we asiwi isaprõni 'wa apâ.

¹¹ Tawamhã taha mara na Wanhib'apito hã ma tô tãma sihâi'ré, Pauluhu ma. Te tãma tinha, ãne: — Aipahi tõ. Ãme Zeruzalẽ ãma ma tô dama ĩwasu'u pa. Roma ãma te za duré õhõ na si dama ĩwasu'u, niwamhã.

Zudeu norĩ hã Paulu te te sima i'ru za'ra zé wasu'u

¹² Tawamhã awẽm na rowa'a wi, zudeu norĩ hã ma tô pi'uriwi si'rã'õtõ. Te sima 'ru za'ra, Paulu hã te te siwi wĩrĩ da. Ãne te tawamhã sima ãma roti za'ra: — Paulu hã wa te wasiwi wĩrĩ aba. Tawamhã 'Re ihâimana u'âsi mono ma, wa za wasi'ru za'ra ni, wa te wasiwi wĩrĩ õ wamhã, te te wa'uprosi da, wa te wasima i'ruzé hã wa te ãma uwaimrami za'ra õ wamhã. Wa te wasima i'ruzé hã wa te ãma uwaimrami za'ra õ ré, wasaihuri õ di za. Duré wa te âhuri õ di za.

¹³ Aibâ hã 40 nhipai u ihâiba hã ma tô ãne sima 'ru za'ra.

¹⁴ Tawamhã zudeu norĩ hã ma tô ai'aba'ré, 'Re ihâimana u'âsi mono ma, da'ãma romhuri'wa ipire norĩ u, dama ipire norĩ u zama. Te tãma nharĩ za'ra, ãne: — Paulu hã wa tô wasima 'ru za'ra ni, wa te wasiwi wĩrĩ da. 'Re ihâimana u'âsi mono ma, wa tô duré wasi'ru za'ra ni, te te wa'uprosi da, Paulu hã wa te wasiwi wĩrĩ õ wamhã. Tawamhã wa te wasiwi wĩrĩ õ ré hã, wasaihuri õ di za.

¹⁵ Ãhã na, ma'ãpé da'wapéi'wa norĩ nhib'apito ma, waihu'u za'ra wa'aba, asi'rã'õtõ aba zém na. Dama roti'wa norĩ me, uburé asi'rã'õtõ aba zém na tãma waihu'u za'ra wa'aba, Paulu te te i'manharĩzé hã waihu'u pese za'ra wa'aba da newa, Paulu hã te te we atẽme saprõni za'ra wa'aba da. Tawamhã wa norĩ hã bâdâdi wãi wa, wa za sô asimro ni, atẽme wisi za'ra wa'aba õ ré, wa te wasiwi wĩrĩ da.

¹⁶ Tawamhã 'ritéi'wa hã ma tô wapari za'ra, sô idanhimipari za'ra na hã. 'Ritéi'wa hã Pauluhu 'ra wapté, ihidiba 'ra. Tahawa, te Pauluhu u mo, da'wapéi'wa norĩ nhorõwa u te te po're pu'u da.

¹⁷ Tawamhã Paulu hã ma tô sô hâ, da'wapéi'wa norĩ wada'uri'wa zô. Taha wamhã, te tãma tinha, ãne: — Ã hã 'ritéi'wa hã ãma saprõni, asib'apito u te te tãma rowasu'u da. Marĩ hã te te iwaihu'uzém na te za tãma rowasu'u.

¹⁸ Tawamhã iwada'uri'wa hã ma tô saprõ, apito u. Te tãma tinha, ãne apito ma: — Paulu hã da'wapéi'wa norĩ te te 'madâ'â za'ra da, wanhorõwa ãma isa hã ma tô ĩzô hâ. Ta hã ma tô ĩma tinha, 'ritéi'wa hã te we atẽme saprõni da. Ta hã, marĩ hã te te iwaihu'uzém na te te aima rowasu'u da, ma tô ĩma tinha, te we atẽme saprõni da.

¹⁹ Tawamhã da'wapéi'wa norĩ nhib'apito hã ma tô 'ritéi'wa hã pa'â. Danhiti ma tô saprõ, te te tãma rowasu'u da, ãne: — E marĩ te za bété ĩma iwasu'u.

²⁰ Tawamhã ma tô tãma rowasu'u, ãne: — Zudeu norĩ hã ma tô sima 'ru za'ra, Paulu hã awẽpsi te te aiwi waptẽrẽ za'ra da, dama roti'wa norĩ nho're sab da, itẽme satõrĩ za'ra da. Paulu te te i'manharĩzé hã te te waihu'u pese za'ra da newa, te za aiwi waptẽrẽ za'ra.

²¹ Tawamhã itẽme satõrĩ za'ra da, saze za'ra õ di za. Tô'ã. Aibâ norĩ hã 40 nhipai u ihâiba hã ma tô sima 'ru za'ra, te te siwi wĩrĩ da. Te te siwi wĩrĩ õ ré hã, saihuri õ di za, u. Duré â hã te te âhuri õ di za, u. 'Re ihâimana u'âsi mono ma, ma tô duré si'ru za'ra, te te uprosi da, te te sima i'ru za'ra zé hã te te ãma uwaimrami za'ra õ wamhã. Te za, u, sô aima'uri za'ra. Asa tãma irowaihu'u za'ra zéb zô si, te ãhã na hã mapari za'ra.

²² Tawamhã apito hã te sadawa uwati, 'ritéi'wa hã, ãne: — Ni'wai ma, ĩma irowasu'uzém na hã rowasu'u tõ za. Taha pari, te tãma rob'ru, morĩ da.

Apito Peresihi u, Paulu da te isaprõnizé wasu'u

²³ Tawamhã da'wapéi'wa norĩ nhib'apito hã te oto sô tihârâ zahuré, tizapari da'wapéi'wa wada'uri'wa norĩ zô. Ãne te tãma rob'ru zahuré: — Ma'ãpé sô aihârâ aba, da'wapéi'wa norĩ zô, para na 're inomro mono hã 200 na ihâiba norĩ zô, duré awaru na 're inomro mono hã 70 na ihâiba norĩ zô, duré isi'uwazi'wa na dapãrĩ'wa norĩ hã 200 na ihâiba norĩ zô. Mara sime na te za aiwairébé 'wa, Sézaréa u ai'aba'réi wa'aba da.

²⁴ Awaru hã te za i'ubumroi wa'wa, Paulu hã ãma imorĩzéb da. Awaru na te za asiwi isaprõni waré wa'wa, Peresi na danhib'apito nhisi u, asiwi ãwisi wẽ wa'aba da.

²⁵ Tawamhã da'wapéi'wa norĩ nhib'apito hã Zeruzalẽ ãma 're isãmra mono hã ma tô Peresihi ma rob'ui'éré. Ãne isimi'ui'éré hã:

²⁶ “Peresi, wanhib'apito, uburé na da'madâ'â'wa, wa ãma asawi. “Wa hã, Claudiu Risia.

²⁷ “Ã hã aibâ hã ma tô zudeu norĩ hã siwi ti'â. Te aré siwi tiwĩ. Tawamhã wa hã wa tô itẽme wi, da'wapéi'wa norĩ me. Wa tô dawi ãma wasisaprĩ za'ra ni, romanu na 're ihâimana mono na te waihu'u wa oto.

²⁸ Wa tô ĩsima wẽ, iwasédé hã da te ãma isa'razé hã te waihu'u da. Tahawa, wa tô saprõ, zudeu norĩ ma roti'wa norĩ tẽme.

²⁹ Tahawa, wa tô waihu'u oto. Marĩ iwasédé hã te ãma waihu'u õ di, da te iwĩrĩzéb da hã, duré dazazéb 're, da te dasiwi isẽrẽzéb da hã. Mare di. Zudeu norĩ 're ihâimana za'ra mono zé wa'rãmi, 're ihâimana mono zém na si ma tô iwasédé hã siwi ãma sa'ra.

³⁰ Zudeu norĩ hã te te siwi wĩrĩ da, te te sima i'ru za'ra zé hã ma tô duré ĩma waihu'u ni. Te waihu'u wi, wa tô ãma atẽme satõ, sa'ẽtẽ. Iwasété na tãma inharĩ'wa norĩ ma, wa tô duré ãma rob'ru za'ra, ãma atẽme si'aba'ré da, asõ'a te te iwasédé hã ãma sa'ra da. Ãne si, wa ãma aima rob'ui'éré.”

³¹ Tawamhã da'wapéi'wa norĩ hã te te tãma i'ru za'ra zém na ma tô ãma uwaimrami za'ra. Paulu hã ma tô siwi saprõ. Tawamhã tô ã mara na ma tô aihutu, Ãtipatiridi na 'ri nho'õmo nhisi u.

³² Tawamhã awẽm na si, da'wapéi'wa norĩ, para na isi'aba'ré norĩ hã ma tô apâ ai'aba'ré, tinhorõwa u. Paulu hã ma tô rẽme za'ra, awaru na 're inomro mono norĩ si te te siwi saprõni da oto.

³³ Tawamhã ta norĩ hã ma tô siwi saprõ, Sézaréa u. Tamomo sihutu wi, ma tô awa'awi siwi saprõ Paulu hã, apito u. Tawamhã ma tô apito ma rob'ui'éré hã sõmri za'ra.

³⁴ Ta hã Apito, ma tô sõré, rob'ui'éré hã. Te te sõré parip si, ma tô Paulu sadanha oto ãne: — E niha asipti'a nhisi hã. Tawamhã te asa tãma siwasu'u ãne: — Sirisia na ĩnhipti'a nhisi hã.

³⁵ Tawamhã te te waihu'u wamhã, apito hã te tãma tinha, duré ãne: — Aiwasédé hã te te ai'ãma isa'ra norĩ hã we sihutu wapsi, wa za aiwapa, ta norĩ siré. Tawamhã ma tô da'wapéi'wa norĩ ma Paulu hã 'ru za'ra, Erodihi nhorõwa ãma te te siwi sẽrẽ da. Te te duré siwi 'madâ'â pese da zama, te tãma 'ru za'ra.