Zezusihi zadawa wasuꞌuꞌwa norĩ nhimiromhuri na robꞌuiꞌéré 22 - ꞌRe Ihâimana Uꞌâsi Mono Zadawa Wasuꞌu

¹ Ãne te Paulu hã dama siwasu'u: — Ĩsiré norĩ, duré wamama norĩ, ma'ãpé ĩwapari pese za'ra wa'aba za. Wa za oto aima ĩsiwasu'u za'ra wa'wa, 're ĩhâimana mono zém na hã ĩwaihu'u za'ra wa'aba da.

² Tawamhã hebreu norĩ mreme na te te dama irowasu'u za'ra zé hã da te wapari za'ra wamhã, ma tô tãma tawarõtâ'â pese za'ra ni oto. Tawamhã te duré tãma siwasu'u za'ra, ãne:

³ — Wa hã, zudeu. Tasu na 'ri nho'õmo nhisi ãma ĩpotozé hã, Sirisia 'remhã. Ãme Zeruzalẽ ãma wa tô ĩprédu. Gamaliéu hã ma tô te te ĩma 're rowahutu, wahi'rata norĩ nhimiroti na hã. Ĩnhimi'ẽ na wa tô te 're romhuri pese, 'Re ihâimana u'âsi mono ma. A norĩ wa'wa hã asimi'ẽ na tãma 're iromhuri za'ra wa'aba mono ne, wa tô õhõ ma si 're ĩsisõmri u'âsi, ĩnhimi'ẽ na te tãma 're romhuri pese mono da, asine wa'aba.

⁴ Wa tô te da'ãma 're rowasété aré, 're idanomro mono zép tém na 're idanomro mono norĩ ãma hã. Ĩzadawa para ma tô aibâ norĩ hã da te 're pawasisi za'ra, pi'õ norĩ zama. Ĩzadawa para, ma tô duré da te 're simro, dazazéb u hã. 'Re dâ'â za'ra mono da, wa tô ãne hã te tãma 're 'manharĩ za'ra, Zezusihi zazei'wa norĩ ma hã.

⁵ 'Re ihâimana u'âsi mono ma, sasedoti da'ãma romhuri'wa tisiré norĩ nhipai u ipire uptabi hã ma tô ãne na hã ĩwaihu'u, duré uburé zudeu norĩ ma roti'wa norĩ zama. Ta norĩ hã ĩ'ãma sadanharĩ za'ra wa'aba wamhã, te za ãne na hã aima ĩwasu'u za'ra wa'wa, sena na. Ta norĩ hã ma tô tinhimi'ui'éré hã ĩma sõmri za'ra, Damascu u te âri da, isiré dama ipire norĩ ma. Taha zarina, wa tô mo, Damascu u te we simroi mono da, isazei'wa norĩ hã. Isi'uwazi nhorõ rutu na pawasisi ré, Zeruzalẽ u we te simroi mono da, wa tô sô ĩmorĩ za'ra, ãme da te hâ za'ra da.

⁶ — Tawamhã Damascu u te rosahutu wapsi, abzuma wa'wa ma tô hâiwa hawi rowa'a za'ẽne hã ĩma ai'ubuzi, waptu na ĩhâiba nho'õmoi baba.

⁷ Tahawa, wa tô waptãrã, ti'ai u. Ni'wai mreme hã ãhã wamhã wa tô duré wapa. Ãne te ĩ'mahâ: “Saulu. Saulu. E marĩ wa, te ĩwi 're irowasutu u'âsi mo.”

⁸ — Tawamhã wa tô wa hã asa sada'â, ãne: “Apito, e 'wa hã, a hã.” — Tawamhã te duré asa ĩma tinha: “Wa hã Zezusi, Nazaré ãma aré 're ĩnhamra mono. Te ĩwi 're irowasutu u'âsi mo.”

⁹ — Rowa'a za'ẽne hã ĩma si'ubuzi wamhã, ĩsiré aibâ norĩ isi'aba'ré norĩ hã ma tô 'madâ'â za'ra, rowa'a hã. Tane nherẽ, ta norĩ imreme hã te te wapari waihu'u za'ra õ di, ĩma inharĩ'wai mreme hã.

¹⁰ Tawamhã wa tô duré 'mahâ, ãne: “Apito, e marĩ, wa za 'manha.” — Tawamhã Wanhib'apito te ĩma tinha, ãne: “Aiwahutu, Damascu u aimorĩ da. Tame te za ni'wa hã aima roti, uburé 'Re ihâimana u'âsi mono te te aima ipisutuzé hã 'manharĩ da.”

¹¹ — Tawamhã rowa'a za'ẽne hã ma tô ĩtob'a. Tahawa, ĩsiré isi'aba'ré norĩ hã ma tô ĩpano na siwi ĩzaprõ. Taré ta norĩ hã te te siwi ĩzaprõni na wa tô wi, Damascu u.

¹² Tame aibâ hã te 're hâimana, Anania na isisi hã. Ta hã 'Re ihâimana u'âsi mono nhimiroti 'rata wapari pese 'wa. Zudeu norĩ hã tame 're isi'ubumroi mono hã ma tô Anania hã te te 're wẽsãmri za'ra.

¹³ Ta hã ma tô we ĩzô rĩtĩ. Tawamhã ĩtẽme wisi wamhã, ma tô ĩma tinha, ãne: “Ĩsisãnawã Saulu, apâ rob'madâ'â.” — Tawamhã awa'awi, wa tô duré apâ rob'madâ. Tahawa, Anania hã wa oto 'madâ.

¹⁴ Tawamhã ta hã te duré ĩma tinha, ãne: “'Re ihâimana u'âsi mono hã wahi'rata norĩ nhib'apito hã ma tô sima aipisutu, te te ai'ãma sima 're iroti mono zé hã waihu'u da. Ma tô duré aima pisutu, Wanhib'apito Zezusi hã iwẽ uptabi 'manharĩ'wa hã bâdâdi wa, 'madâ'â da, duré imreme hã wapari da.

¹⁵ A hã te za dama 're isadawa wasu'u mo, dahâiba mono bâ. Ta hã atõmo na i'madâ hã, duré aipo're na imreme iwapari hã te za dama 're iwasu'u mo.

¹⁶ E marĩ zô te bété asimipa, ãhã na hã. Ma'ãpé aiwahutu, â dawabzuri hã da te aima 'manharĩ da, duré Wanhib'apito wi rowaptẽrẽ da, te te asõ'reptu da. Tawamhã aiwasédé hã te za aima tipa.” Tawamhã Paulu hã dama siwasu'u 'rãsutu da, ma tô ãne dama rowasu'u:

'Re ihâimana u'âsi mono hã Pauluhu ma, romhuri te te ipisutuzé wasu'u

^17-18 — Tawamhã Zeruzalẽ u apâ ĩwisi wamhã, 'Re ihâimana u'âsi mono nhorõwa 'ri u, wa tô mo, tãma ĩmreme da. Tawamhã tãma ĩmreme sina, ĩnhotõ 'rowim ne, wa tô Wanhib'apito hã 'madâ. Imreme hã wa tô duré wapa. Te ĩma tinha, ãne: “Ai'aba'ré na aiwatobro Zeruzalẽ hawi, ãmemhã da te aiwapari za'ra õ wa za, ĩwasu'u na hã.”

¹⁹ — Tawamhã wa tô asa tãma ĩsiwasu'u, ãne: “Ãme 're isi'ubumroi mono norĩ hã ma tô ĩhâimanazém na siwi ĩwaihu'u. Rowahutuzé mono bâ wa tô asazei'wa norĩ zô 're ĩzasi, dazazéb 're te 're 'mazai mono da, duré te 're ahâ za'ra mono da.

²⁰ Duré Estewã, dama aiwasu'u'wa hã da te dasiwi wĩrĩ wamhã, wa tô dasiré ĩhâiba. Wa hã wa tô ãma da'ab'madâ. Taha wamhã, ĩma wẽ di, idâ'âzé hã. Iwĩrĩ'wa norĩ uza, isisiwimhã i'ubuzé hã, wa tô sa 'madâ'â za'ra.”

²¹ — Ãne na Wanhib'apito ma, ĩsiwasu'u wamhã, ma tô ĩma rob'ru, ãne: “Mo oto aimorĩ. Zudeu'õ norĩ tẽme, wa za asatõ, romhâ na.”

²² Tawamhã Paulu hã zudeu'õ norĩ hã te te sisi wamhã, ma tô sada tizahi za'ra, zudeu norĩ hã zudeu'õ norĩ te te sisi õ ré hã te te aré wapari ze za'ra nherẽ. Tahawa, te sa'ẽtẽ sima 'mahârâ za'ra, zudeu norĩ hã, ãne: — Wĩrĩ aba. Õ hã wasétére di. Dâ'âre hâ.

²³ Ãne ma tô zudeu norĩ hã ãma si'mahârâ za'ra, hârâ 'rãihâ na, isisiwimhã ti'ubuzé hâimo te te 're wanarĩ za'ra mono sina. Ropru te duré hâimo sãmra za'ra, sada siti'ru za'ra wa.

Paulu hã da'wapéi'wa norĩ nhib'apito ma, isiwasu'uzé

²⁴ Tawamhã romanu da'wapéi'wa norĩ nhib'apito hã ma tô da'wapéi'wa norĩ ma 'ru za'ra, 'ri para u te te siwi 'mazébré da, Paulu hã. Te duré taha wamhã tãma 'ru za'ra, te te siwi 're pré'é mono da, siwasu'u da, zudeu norĩ te te sima i'ruzém na te te waihu'u da.

²⁵ Tawamhã ma tô siwi hiwasisi, isi'uwazi nhorõ rutu na te te siwi 're pré'é mono da hã. Ãhã wamhã, Paulu hã ma tô da'wapéi'wa norĩ nhib'apito zadawa para dawada'uri'wai ma tinha, ãne: — E ĩwasété na asiwi ĩwaihu'u aba wa, ma tô asiwi 're ĩpré'é aba mo. E tô i'uwaibaba ãne hã, wa hã romanu na ĩwamri nherẽ.

²⁶ Tawamhã Pauluhu mreme te te wapari wamhã, da'wapéi'wa norĩ wada'uri'wa hã ma tô tinhib'apito ma wasu'u, ãne: — E marĩ ãma 'manharĩ da bâ. Ni'ã. Õ hã romanu.

²⁷ Tahawa, apito hã ma tô mo Pauluhu u, te te sadanharĩ da. Tawamhã ãne te sadanha: — Ĩma asiwasu'u na, te waihu'u da. E nare a hã romanu. — Ĩhe. Wa hã, romanu.

²⁸ Tawamhã apito hã te duré tãma siwasu'u, ãne: — Wa hã duré, romanu. Ĩpoto'wa hã romanu õ nherẽ, wa'âbâ za'ẽtẽ uptabi na wa tô ĩsiwa'â romanu norĩ ma, ĩsiromanu da hã. Tawamhã Paulu te asa duré tãma tinha, ãne: — Tazahã ĩpoto'wa hã romanu wa, wa hã duré romanu u'â.

²⁹ Tawamhã Paulu hã romanu na siwasu'u wa, awa'awi ma tô da'wapéi'wa norĩ hã tãma ai'ré za'ra, te te siwi sadanharĩ za'ra ãna. Duré da'wapéi'wa norĩ nhib'apito hã ãne na te te waihu'u wamhã, ma tô pẽ'ẽwara, isimiwada'uri zarina, te te siwi hiwasisi wa.

Paulu hã dama roti'wa norĩ nho're isiwasu'uzé

³⁰ Tawamhã da'wapéi'wa norĩ nhib'apito hã ma tô sima wẽ, zudeu norĩ hã Pauluhu ãma iwasédé hã te te siwi ãma ihirizé hã sena na te te waihu'u da. Tahawa, awẽm na si ma tô 'Re ihâimana u'âsi mono ma, da'ãma romhuri'wa ipire norĩ ma 'ru za'ra, uburé zudeu norĩ ma roti'wa norĩ ma zama, Pauluhu zada si'rã'õtõ da. Da'wapéi'wa norĩ ma, ma tô duré 'ru za'ra, Pauluhu pawasisizé hã te te tãma wasihu za'ra da, dama ipire norĩ nho're sab da.