Zezusihi zadawa wasuꞌuꞌwa norĩ nhimiromhuri na robꞌuiꞌéré 11 - ꞌRe Ihâimana Uꞌâsi Mono Zadawa Wasuꞌu

Pedru hã zudeu'õ norĩ u timorĩzém na isiwasu'uzé

¹ Tawamhã isazei'wa norĩ hã, Zudéa ãma 're ihâimana za'ra mono norĩ hã, Zezusihi zadawa wasu'u'wa norĩ me, ma tô wapari za'ra, ãne: “Zudeu'õ norĩ zama ma tô, u, 'Re ihâimana u'âsi mono zadawa wasu'u hã saze za'ra, Zezusihi wasu'uwẽ hã.” Ãne ma tô isazei'wa norĩ hã rowasu'u hã wapari za'ra, daza'rui mono bâ.

² Tawamhã Pedru hã ma tô apâ mo, Zeruzalẽ u. Wisi wamhã, ni'wam norĩ hã ma tô tãma nharĩ za'ra. Zudeu'õ norĩ ãma te ãne sima rosa'rata za'ra, ta norĩ hã: “Zezusi hã da te saze za'ra nherẽ, danhihâiwata nhihâri õ wamhã, 'Re ihâimana u'âsi mono te te 're da'anho'reptui mono õ di za.”

³ Tahawa, ma tô tãma nharĩ za'ra, Pedruhu ma, ãne: — Zudeu'õ norĩ ãma te nasi asõ, isihâiwata nhihâri'õ norĩ nhorõwa ãma. Ma tô duré nasi isiré asa za'ra.

⁴ Tawamhã Pedru hã ma tô tãma siwasu'u za'ra, isãna'rata hawi uburé ãma iromhâimana mono zém na hã. Ãne te tãma siwasu'u za'ra:

⁵ — Zopi ãma ĩnhamra ré, wa tô marĩ hã 'madâ, ĩnhotõ 'rowim ne. 'Re ihâimana u'âsi mono ma, ĩmreme ré, wa tô 'madâ. Zazahâ hâi wa'õtõ waré wawẽ hã ma tô we ĩtẽme si'ra, hâiwa hawi. Ihâ nhipti wahuré na ma tô we ãma wasisi. Tawamhã ĩnho're ma tô nomro.

⁶ I'remhã te 'madâ'â wa, wa tô ropodo hã ab'madâ, ipoto mono bâ. Abaze hã siwazari, wa tô ab'madâ, isahi zama. Ti'ai baba di'i na 're inomro mono norĩ zama, duré hâiwi 're isisa'rei mono zama, si hã wa tô ab'madâ, siwazari.

⁷ Ni'wai mreme hã wa tô duré wapa. Te ĩma tinha, ãne: “Pedru, aiwahutu. Asima 'maiwĩrĩ da, asai hâ.” Ãne ma tô ĩma tinha.

⁸ Tawamhã wa asa duré tãma tinha, ãne: “Ĩnhib'apito, mare di. Marĩ hã iwasétére hã te 're 'masi mono õ di, wahi'rada Mozési hã te te wawi isawi hã.” Ãne wa tô asa tãma tinha.

⁹ Tawamhã hâiwa hawi te we duré ĩma tinha, ãne: “'Re ihâimana u'âsi mono, marĩ hã iwẽ na te te aima wasu'u wamhã, wasété õ nherẽ, asiwi wẽ'õ õ di za.”

¹⁰ Tô õhõ na si si'ubdatõ ma tô ĩma tinha. Tawamhã apâ ma tô ti'â, hâiwa u.

¹¹ Apâ te te âri parip si, aibâ norĩ hã si'ubdatõ ma tô ĩzô 'maihaihutu, ĩza'warizéb u hã. Sézaréa hawi da te ãma ĩtẽme isatõrĩ za'ra hã ma tô ĩzô aihutu.

¹² Tawamhã 'Re ihâimana u'âsi mono pẽ'ẽzani hã ma tô ĩma waihu'u, awa'awi ime ĩmorĩ za'ra da. Tahawa, wa tô ime ĩmorĩ za'ra. Isazei'wa norĩ hã, Zopi hawi ĩsiré we isi'aba'ré norĩ hã 6 na ihâiba hã, ta norĩ hã ma tô duré ĩsiré ai'aba'ré, Sézaréa u. Wasihutu wamhã, aibâ hã ĩzô ihârâ nhorõwa u wa tô asisi ni, 'ri para u, Coneliuhu nhorõwa u.

¹³ Ta hã ma tô wama rowasu'u za'ra, hâiwa ãma 'Re ihâimana u'âsi mono ma, romhuri'wa 'ri para u itẽme isihâi'ré na. Itẽme wisi wamhã, ma tô ãne tãma rowasu'u: “Ma'ãpé, da'mazatõrĩ, Zopi u da'maimorĩ da, Sima Pedruhu zô.

¹⁴ Ta hã te za Zezusihi wasu'uwẽ na aima rowasu'u za'ra wa'wa, taha zarina 'Re ihâimana u'âsi mono hã te te asõ'reptu za'ra wa'aba da, aihĩni asõrõwa ãma 're isi'ubumroi mono norĩ zama.”

¹⁵ — Tawamhã wa hã wa tô tãma rowasu'u na sãna'rata oto. Te rowasu'u ré, 'Re ihâimana u'âsi mono hã ma tô Tipẽ'ẽzani hã tãma sõmri za'ra, isãna'rata hawi te te wama isõmri za'ra ne hã.

¹⁶ Tawamhã Wanhib'apito mreme na wa tô po're puru, iwana te te wama irowasu'u za'ra hã, ãne: “Zuwã Batista hã ma tô â uptabi na si te te 're da'ahâiba ubu, â dawabzuri te te dama 're ab'manharĩ mono wamhã. Tanei õ di za oto. 'Re ihâimana u'âsi mono hã te za oto Tipẽ'ẽzani na te te 're aihâiba ubu za'ra wa'wa, iré 're anomro u'âsi aba mono da.” Ãne ma tô wama rowasu'u.

¹⁷ Wanhib'apito Zezu Cristu, wa te 're saze za'ra mono wamhã, 'Re ihâimana u'âsi mono hã ma tô Tipẽ'ẽzani hã wama sõmri za'ra. Misire õhõ si we te te wama isõmri za'ra ne, ma tô tãma sõmri za'ra, ta norĩ ma. E marĩ, wa za tawamhã wa hã 'manha. E 'Re ihâimana u'âsi mono te te i'manharĩ, wa za ĩsiwi wẽ'õ. E wa za ĩsiwi da'awẽ'õ, 'Re ihâimana u'âsi mono, te te sima dawẽ nherẽ. Mare di. Te da'awẽ'õ õ di za.

¹⁸ Ãne hã te te wapari za'ra wamhã, asa te te tãma nharĩ waihu'u za'ra õ di oto. Tahawa, ma tô ãma tiwata za'ra, 'Re ihâimana u'âsi mono ãma. Tawamhã te oto sima rowasu'u za'ra, ãne: — 'Re ihâimana u'âsi mono hã ma tô zudeu'õ norĩ zama pisutu za'ra, tiwasété wi 're sipizari za'ra mono da, 'Re ihâimana u'âsi mono siré, rowẽ na 're hâimana u'âsi za'ra mono da.

Ãtioquia ãma Zezusihi zazei'wa norĩ 're ihâimana za'ra mono zé wasu'u

¹⁹ Tawamhã Estewã da te dasiwi iwĩrĩzéb zarina, isazei'wa norĩ ãma da te rowasété za'ra wa, ma tô da te ropé, isazei'wa norĩ hã Zeruzalẽ hawi. Penisiza na danhipti'a nho'õmo nhisi u, ma tô da te ropé, duré Sipri na danhipti'a nho'õmo nhisi u, duré Ãtioquia na 'ri nho'õmo nhisi u zama. Si'aba'réi ré, zudeu norĩ ma si ma tô 'Re ihâimana u'âsi mono zadawa wasu'u na rowasu'u za'ra, Zezusihi wasu'uwẽ na. Zudeu'õ norĩ ma, zahadu te te ãma rowasu'u za'ra õ di.

²⁰ Tane nherẽ, ihâiba amo norĩ hã, Sipri na danhipti'a nho'õmo nhisi ãma aré 're ihâimana za'ra mono norĩ hã, duré Sireni ãma danhipti'a nho'õmo amoi ãma aré 're ihâimana za'ra mono norĩ hã, ma tô ai'aba'ré, Ãtioquia u. Ta norĩ hã zudeu norĩ ma si, te te rowasu'u za'ra õ di, Wanhib'apito Zezusihi wasu'uwẽ na hã. Zudeu'õ norĩ ma zama, ma tô ãma rowasu'u za'ra.

²¹ Tawamhã Wanhib'apito hã ma tô õ norĩ hã pawaptob za'ra, tiwaihu'u pese na. Tahawa, da'ahâ na ma tô saze za'ra ni oto, Wanhib'apito niwĩ 're dahâimana za'ra mono da oto.

²² Tawamhã taha wasu'u hã ma tô isazei'wa norĩ hã wapari za'ra, Zeruzalẽ ãma siré 're isi'rã'õtõ mono norĩ hã. Te te wapari za'ra wamhã, Banabé hã ma tô satõrĩ za'ra, Ãtioquia u morĩ da.

²³ Tamomo wisi wamhã, ma tô waihu'u, 'Re ihâimana u'âsi mono hã iwẽ na dama 're isõpru mono zém na hã tame. Tahawa, toi uptabi di, Banabé hã. Tawamhã ma tô dama roti, ãne: — Aihĩni, aipẽ'ẽ na sada 're asimi'ẽ za'ra wa'aba mono, Wanhib'apito niwĩp si 're aihâimana u'âsi za'ra wa'aba mono da.

²⁴ Banabé hã, aibâ iwẽ. 'Re ihâimana u'âsi mono pẽ'ẽzani na si 're imorĩ u'â ta hã. Wanhib'apito te te sina 're i'umnhasi u'âsi mono. Tahawa, ma tô Wanhib'apito zazei'wa hã dasina tahâ'â ni, Banabéhé nhimirowasu'u zarina.

²⁵ Banabé hã te oto mo Tasu u, Sauluhu zô te te robzabu da.

²⁶ Tawamhã tamomo wisi wamhã, ma tô sõpẽtẽ. Ta hawi, ma tô apâ saprõ, Ãtioquia u. Tame te aimasisi zahuré oto. Isazei'wa norĩ, siré 're isi'rã'õtõ mono norĩ 'rata te 're simasisi zahuré, te te dama 're rowahutu zahuré mono da. Misi ma tô ãma tiwahub zahuré, te te 're da'apawaptob zahuré mono ré hã. Tame ma tô Cristuhu nhib'a'uwẽ na da te 're sisi na'rata za'ra, Zezusihi nhirã zarina 're inomro mono norĩ hã, Ãtioquia ãma hã.

²⁷ Tawamhã 'Re ihâimana u'âsi mono zadawa 'mahârâ'wa norĩ, ni'wam norĩ hã te ai'aba'ré, Zeruzalẽ hawi, Ãtioquia u.

²⁸ Agabu na aibâ nhisi hã te ime timorĩ za'ra, tisiré isadawa wasu'u'wa norĩ me. Tawamhã Ãtioquia u sihutu wamhã, Agabu hã ma tô hâiwi za. 'Re ihâimana u'âsi mono pẽ'ẽzani te te tãma iwaihu'uzéb zarina, ma tô dama waihu'u siro romhâ ré, amnho hã daro mono bâ za dawi isi'utõrĩ mono na hã. (Roma ãma danhib'apito Claudiu hã te te dama 're roti mono ré, ma tô ãne hã tô da'ãma tiromhâiba, amnho õ na hã.)

²⁹ Tahawa, Zezusihi zazei'wa norĩ hã ma tô sima roti za'ra, isibro hã ihâiba mono bâ tãma 're ihâimana za'ra mono zéb zarina, te te po'o mono da, Zudéa ãma isazei'wa norĩ ma, te te tãma sõmri za'ra da.

³⁰ Tawamhã ma tô te te tãma po'o. Tawamhã Banabé norĩ hã ma tô iré satõrĩ zahuré ni Zeruzalẽ u, Sauluhu me, tame da'madâ'â'wa norĩ ma, te te sõmri zahuré da, isibzari za'ra hã.