2 Timotiu 3 - ꞌRe Ihâimana Uꞌâsi Mono Zadawa Wasuꞌu

Rob'rãsutu u, za 're idahâimana wasété za'ra mono zém na rowasu'u

¹ Wa za oto marĩ na aima rowasu'u, ãma 're rosa'rata u'âsi mono da hã. Nimahã na rob'rãsutu u hã oto ro'rutu wamhã, dama mono hã ropire di za.

² Ãne dahâimanazé hã za: Dasima si te za marĩ zô 're danhopré. Duré rob'uiprazéb zô si te za da te dasima 're rob'ruiwapari za'ra. Duré 'râwi dapẽ'ẽ na, te za marĩ na dasina 're dawata za'ra. Duré te za da te dasima 're nharĩ wasété za'ra. Duré marĩ na dama 're danhoprub za'ra mono nherẽ, danhoprum na da'ãma 're dawata za'ra mono õ di za. Duré damama norĩ nhimiroti hã da te 're wapari za'ra mono õ di za. Duré 'Re ihâimana u'âsi mono nhimiroti hã da te 're wazéb za'ra mono õ di za.

³ Duré 're idasisawi pese za'ra mono zé hã dama 're hâimana mono õ di za, dapẽ'ẽ 'remhã. Duré da'ãma dapẽ'ẽzézé hã dama 're hâimana za'ra mono õ di za. Duré taré te za dawasédé hã da te da'ãma 're sa'ra za'ra. Duré dawasété wi dasina 're danhiptete za'ra mono õ di za. Duré dazahi u'âsi te za 're dahâimana za'ra. Duré 're idahâimana wẽ za'ra mono norĩ hã te za taré dasi'upana da te 're 'ruiwapari za'ra.

⁴ Duré dasiré nherẽ, te za 'râwi dasisada 're dahâimana za'ra. Duré dapẽ'ẽ 're, rosa'rata waptu na, marĩ iwasédé hã te za da te 're 'manharĩ za'ra. Duré danhipai u dawaihu'u pese newa, te za 'râwi dapẽ'ẽ na dasina 're dawata za'ra. Duré 'Re ihâimana u'âsi mono zawi'wa, 're danomro mono õ di za. Taha upana, te za ti'ai ãma marĩ da te dasima 're iwẽ za'ra mono zô si dasima 're darĩtĩ za'ra.

⁵ 'Re ihâimana u'âsi mono nhimiroti na 're dahâimana wẽ za'ra mono da, da te dasima 're wẽ pese za'ra mono newa, te za 're dasiwasu'u za'ra. Tazahã, i'uptabi na hã da te dasima 're wẽ za'ra mono õ di za, tiwaihu'u pese na te te 're da'apawapto mono wa, ãma 're idahâimana wẽ za'ra mono zéb da hã. Tahawa, te za ta norĩ nhiti romhâ na 're aihâimana mo.

⁶ Ta norĩ hã hâimana nhipese na danhorõwa u te za datẽme 're sihutu. Te za duré pi'õ norĩ hã tizadawa nhipese na te te 're 'rãmi za'ra. Tawamhã sib'uwa na 're hâimana za'ra mono wamhã, te za te te ãma 're sasõmri za'ra. Ãhã wamhã, pi'õ norĩ marĩ ahâ na te te 're 'manharĩ wasété za'ra mono wa, te za robzei'õ na 're hâimana za'ra. Siwa'ru te za ta norĩ hã duré 're hâimana za'ra, te te sima 're iwẽ za'ra mono zéb uwaibaba.

⁷ Pi'õ norĩ hã, ni'wam norĩ nhimirowasu'u te te 're wapari ze za'ra mono nherẽ, roti tô sena hã niwa te te iwaihu'u za'ra da hã, mare di za.

⁸ Duréihã ma tô aibâ norĩ hã Mozésihi nhimiroti da, sada 're hâimana zahuré, Zanesi norĩ hã Zãbri me. Tane ãhã na senai'õ na rowasu'u'wa norĩ hã te tô sena roti zada 're hâimana za'ra. Ta norĩ nhimirosa'rata wẽ za'ra hã hâimana õ di. Duré Wanhib'apito ãma isimirowasu'u za'ra hã tô senai õ di. Tahawa, te za 'Re ihâimana u'âsi mono hã ta norĩ hã te te siwi 're awẽ'õ.

⁹ Zanesi norĩ hã Zãbrihi me, ma tô dasiwi waihu'u zahuré ni, isimiza'rese'õ na. Tane te za duré oto isimiza'rese'õ za'ra na hã dasiwi waihu'u za'ra ni, senai'õ na dama rowasu'u'wa norĩ hã. Tawamhã ta norĩ nhimirowasu'u hã da te 're wapari hâ za'ra mono õ di za oto.

Pauluhu nhimiroti 'rãsutu na rowasu'u

^10-11 A hã ma tô ĩwaihu, ĩnhimiroti na, duré ĩhâimanazém na, duré dapawaptom na ĩnhimiromhuri na te ĩsina 're iroti mono zém na, duré Wanhib'apito umnhasi sina 're ĩhâimana mono zém na, duré da'ãma ĩwa'a su'u õ na 're ĩhâimana mono zém na, duré te 're ida'azawi pese mono zém na, duré marĩ ahâ na ĩzada 're hâimana mono nherẽ, Wanhib'apito ãma ĩsina ĩnhiptete sina 're ĩhâimana mono zém na zama. Ma tô duré iwaihu, da te ĩma 're irob'manharĩ wasété za'ra mono zém na hã, duré te 're irobzépata mono zém na hã. Ma tô duré iwaihu, marĩ hã ĩzô 're iwairébé mono zém na hã, Ãtioquia na 'ri nho'õmo nhisi ãma, duré Iconizu ãma, duré Risitira ãma. Ipipa na da te ĩ'ãma 're rob'manharĩ wasété za'ra mono wa, wa tô te 're robzépata za'ẽtẽ. Tane nherẽ, ĩdâ'â tõ da, ma tô Wanhib'apito hã nasi a'â ĩnho'reptu.

¹² Cristu Zezusihi ãma 're dahâimana wẽ za'ra mono da, da te dasima 're wẽ za'ra mono 'ru te, dasi'uihâ na te za tô isazei'wa norĩ ma, da te 're rob'manharĩ wasété za'ra.

¹³ Iwasété norĩ hã, duré ihâimana nhipese norĩ hã te za 're siwasété pese za'ra. Isadawa nhipese na te za da te ãma 're sasõmri za'ra. Te za duré dapẽ'ẽ 're dasima 're dazadawa nhipese za'ra.

¹⁴ Tane nherẽ, ta norĩ ne 're aihâimana mono õ di za. Tô sena roti hã ma tô dawi 're i'awaihu'u mo. Taha na si te za 're aihâimana u'âsi mo. Roti hã tô sena hã ma tô asina 're isazei mo. Tô sena roti na aima rowaihu'u'wa norĩ hã, aima waihu'u pese za'ra di.

¹⁵ 'Watébrémi na 're aihâimana mono zém hawi, aima waihu'u pese di, 'Re ihâimana u'âsi mono nhimiroti 'rata na rob'ui'éré hã. Taha zarina hâiwa hawi rowaihu hã te aima 're hâimana, asõ'reptuzé hã asina i'uwaimramizéb da hã, Cristu Zezusihi zazei'wa 're aimorĩ wa.

¹⁶ Uburé isimiroti wẽ na rob'ui'éré hã, 'Re ihâimana u'âsi mono te te dama 're i'awaihu'u mono zéb zarina si, te dama 're hâimana za'ra. Ãne wa, isimiroti mono bâ wẽ di, roti tô sena na, da te ãma 're idapawaptob za'ra mono zéb da hã. Duré wẽ di, isimiroti hã, danhimiroti tô senai'õ na, da te dama ãma 're irowaihu'u za'ra mono zéb da hã. Duré wẽ di, isimiroti hã, dahâimanazém na da te 're upa za'ra mono wamhã, da te dama ãma 're iroti za'ra mono zéb da hã, ãma 're idahâimana wẽ za'ra mono da hã oto.

¹⁷ Taha da, te dama 're hâimana, 'Re ihâimana u'âsi mono nhimiroti hã, tãma iromhuri'wa norĩ ma iwaihu'u pese zéb zarina, iwẽ na te te tãma ãma 're idapawaptob za'ra mono zéb da hã.