2 Corĩtu 8 - ꞌRe Ihâimana Uꞌâsi Mono Zadawa Wasuꞌu

Isibrob'õ norĩ ma, 're idanhoprub za'ẽtẽ za'ra mono zé wasu'u

¹ Wasisãnawã norĩ, wa wasima aiwẽ za'ra wa'aba ni, 'Re ihâimana u'âsi mono hã tinhimizawi pese zéb zarina, isazei'wa norĩ ma, 're isõpru mono zé wasu'u hã, waihu'u za'ra wa'aba da, Masédonia ãma rowahutu u, siré 're isi'rã'õtõ mono norĩ ma, 're isõpru mono zé wasu'u hã.

² Ta norĩ hã da te ãma 're irowasété za'ra mono na, te te 're robzépata za'ẽtẽ za'ra mono nherẽ, duré sibrob ãna 're hâimana za'ra mono nherẽ, ma tô to sina, dama tinhoprub za'ẽtẽ za'ra, tite rob'uiprazém na hã.

^3-4 Marĩ hã sa hâimana za'ra õ nherẽ, ma tô sa'ẽtẽ na dama sõmri za'ra, tinhoprubzém na te te ãma dazawi za'ra da. Si'uihâ na ma tô sima pisutu za'ra, ãne na wa te ãma saze za'ra wa, Zeruzalẽ ãma 'Re ihâimana u'âsi mono nhib'a'uwẽ norĩ te te siwi ãma pawaptob za'ra da, te te sima iwẽ uptabi za'ra zéb zarina. Tahawa, wẽ di ãne hã, dama ãma isõprub za'ra zé hã, Masédonia ãma isazei'wa norĩ nhoprubzé hã.

⁵ Wa norĩ hã ãne zô, wanhimipari õ nherẽ, ma tô Wanhib'apito ma uimrehẽne sisõmri za'ra ta norĩ hã, taha ma si 're hâimana za'ra mono da. Taha zarina, ma tô duré wama sisõmri za'ra, te te wapawaptob za'ra da, 'Re ihâimana u'âsi mono te te tãma ipisutu za'ra zéb zarina hã.

⁶ Titu hã ãma atẽme morĩ 'rata aba wamhã, ma tô rob'uiprazé ubumro na sãna'rata, asõprub za'ra wa'aba zém na hã. Tahawa, wa tô tãma roti pese ni, duré ãma atẽme morĩ aba wamhã, rob'uiprazé ubumro na te te ãma sizusi da, romhuri hã wẽ uptabi na te te uprosi da.

⁷ A norĩ wa'wa hã te Cristu hã aima umnhasi za'ra wa'aba wa, ãma 're isasõmri pese za'ra wa'aba mo. 'Re ihâimana u'âsi mono nhimiroti na, te aimreme wẽ na dama 're irowasu'u za'ra wa'aba mo. Isimiroti hã ma tô duré 're iwaihu'u pese za'ra wa'aba mo. Tahawa, asimi'ẽ na te 're iromhuri pese za'ra wa'aba mo, 'Re ihâimana u'âsi mono hã te te aima 're iwẽ za'ra wa'aba mono zéb zarina. Te duré asiwi 're iwazawi pese za'ra wa'aba mo. Ãne hã aima sa'ẽtẽ uptabi za'ra wa'aba di, 're aihâimana za'ra wa'aba mono zém na hã. Tahawa, te za sa'ẽtẽ na dama asõprub za'ra wa'wa duré.

⁸ Ãne hã wa hã te ãma aima 'ru za'ra wa'aba õ di. Taré wa aima ãma roti za'ra wa'wa, ĩnhimiroti zarina, 'manharĩ za'ra wa'aba wamhã, 're idazawi pese za'ra wa'aba mono zém na, sena na da te 're aiwaihu'u za'ra wa'aba mono da. Masédonia ãma isazei'wa norĩ hã simi'ẽ na te te 're idapawaptob za'ra mono ne zô pé, wa ãne na taré ãma aipibu za'ra wa'wa.

⁹ Wanhib'apito Zezu Cristuhu nhimizawi pese zé hã aima waihu'u pese za'ra wa'aba di oto. Ta hã Timama siré robze na 're hâimana u'âsi mono nherẽ, ma tô hâiwa ãma tihâimanazé hã we tirẽ a'â, ti'ai ãma si'a'uwẽ da, te te a'â dame 're robzépata mono da. Asada za'ra wa'aba, ma tô dawazari si'a'uwẽ, taha zarina, a norĩ wa'aba zama 'Re ihâimana u'âsi mono 'rata 're asimroi u'âsi aba mono da, hâiwa ãma hã. Tahawa, Wanhib'apito hã sisawi ãna 're ihâimana mono ne, te za asisawi ãna dama asõprub za'ra wa'wa, ate rob'uiprazé wa'aba na hã.

^10-11 Ĩnhimirosa'rada hã wa za oto aima waihu'u za'ra wa'wa, rob'uiprazé asiwi i'ubumroi wa'aba zém na hã. Wahub 'rata na ma tô dawana asima ipisutu za'ra wa'wa, rob'uiprazé hã asiwi i'rã'õtõ aba zéb da hã. Dawana ma tô duré rob'uiprazé ubumro na ãma isãna'rata za'ra wa'wa. Tahawa, ma'ãpé asiwi uprosi wẽ wa'aba, rob'uiprazé ubumro hã. Ato sina, ãma asisaze za'ra wa'aba ne, te za oto ãhã na hã ãma i'uwaimrami za'ra wa'wa duré, rob'uiprazém na hã, aihâiba mono bâ aima 're ihâimana za'ra wa'aba mono zéb zarina, niha wamhã, isa'ẽtẽ zarina, niha wamhã, duré isuru zarina.

¹² Ato sina, ãma asõprub za'ra wa'aba wamhã, 'Re ihâimana u'âsi mono si te za asõprubzém na aiwẽsãmri za'ra wa'wa. Asimarĩ aba õ wa, tô suru na isõmri za'ra wa'aba zéb zarina, te za duré ãma aiwẽsãmri za'ra wa'wa, ato sina ãma asõprub za'ra wa'aba wa.

^13-14 E a norĩ wa'aba si, sa'ẽtẽ na isõmri za'ra wa'aba na, da'upana ãma robzépata za'ra wa'aba da, wa ãne na aima roti za'ra wa'wa. Mare di. Taré ãhã na hã sa'ẽtẽ na aima hâimana za'ra wa'aba wa, te za ãma ipawaptob za'ra wa'wa, Zeruzalẽ ãma isazei'wa norĩ hã, marĩ zô tiwi 're rowaptâ'â za'ra mono wa. Tawamhã nimahã na marĩ zô, aiwi 're rowaptâ'â za'ra wa'aba mono wamhã, te za duré ta norĩ hã marĩ na te te 're aipawaptob za'ra wa'wa, asa, sa'ẽtẽ na tãma hâimana za'ra wamhã. Ãne wamhã, aiwa te za asõprubzém na asima ãma 're iwa'rãmi za'ra wa'aba mo.

¹⁵ Duréihã Mozési ma tô ãne na ãma rob'ui'éré, Izaraéu nhihudu norĩ hã a'ubuni wi simizahâri mono sidâpâsi, mana na dasazém nhisi hã te te siwi i'ubumroi mono na hã: “Ni'wam norĩ hã sa'ẽtẽ uptabi na te te sima ubumro za'ra mono nherẽ, tãma si'atarẽme za'ra mono õ di, tisiré norĩ hã te te ãma pawaptob za'ra mono wa. Tahawa, ni'wam norĩ hã suru na te te sima ubumro za'ra nherẽ, ta norĩ wi hã tiwi sô rowaptâ'â za'ra õ di, isazéb zô hã.”

Titu hã to sina datẽme imorĩzé wasu'u

¹⁶ 'Re ihâimana u'âsi mono, ma tô Tituhu ma pisutu, tãma asawi pese za'ra wa'aba zéb zarina, te te aipawaptob za'ra wa'aba da, wa norĩ hã wa te duré 're i'asawi pese za'ra wa'aba mono ne. Tahawa, wa tô ãma wawata ni, 'Re ihâimana u'âsi mono ãma hã, tô sena wa, õ hã.

¹⁷ Tawamhã õne haré ma tô Titu hã sina wazaze, ãma atẽme imorĩ aba zém na da hã. Tahawa, si'uihâ na te te ãma sima irowẽzéb zarina, to sina te za tô ãma atẽme timorĩ za'ra wa'wa ãhã na hã, atẽme za'ra wa'aba.

¹⁸ Wasisãnawã hã wa za duré isiré ãma atẽme satõrĩ za'ra wa'aba ni, aibâ hã. Ãme isazei'wa norĩ hã ma tô te te sima 're wasu'u wẽ za'ra, Cristuhu wasu'uwẽ na simiromhuri wẽ uptabi wa, ta hã.

¹⁹ Duré dama simiromhuri wẽ uptabi wa, ma tô isazei'wa norĩ hã siwi pisutu, Zeruzalẽ u isazei'wa norĩ nhoprubzéb ré, za iwasi'aba'ré siré, ãma wasiré morĩ da. Tawamhã Wanhib'apito ãma wawatazéb da, wa za tô ãne hã 'manharĩ ni, duré wato sina, wa te 're ida'apawapto mono zém na, da te wawaihu'u za'ra da.

²⁰ Wanhimisaihuri hã da te wa'ãma nomri tõ da, wa za asõprub za'ra wa'aba zé hã wasitẽme wa te wasiwi 'madâ'â pese za'ra, wasi'aba'réi wamhã.

²¹ I'uwaibaba, wa te ãma i'uwaimrami za'ra da si, wa tô iré wasima rob'madâ'â za'ra ni, Wanhib'apito nho'a, duré uburé danho'a zama.

²² Wasisãnawã hâiba amo hã wa za duré ãma atẽme satõrĩ za'ra wa'aba ni, Titu norĩ siré, ãma morĩ da. Ta hã wa tô nasi pibu za'ra ni, simi'ẽ na te te 're romhuri mono zô, Wanhib'apito ma. Tahawa, wa tô waihu'u za'ra ni, tô sena isimi'ẽ na hã, duré to sina te te 're iromhuri mono na hã. Ta hã aiwasu'u wẽ za'ra wa'wa hã te te wapari wa, tãma ai'umnhasi uptabi za'ra wa'aba di, za rob'uiprazém na dama i'asõprub za'ra wa'aba zéb da na hã. Tahawa, toi uptabi di ãhã na hã, rob'uiprazé ubumro na za te te ãma aipawaptob za'ra wa'aba wa.

²³ Titu hã bété. Ta hã ĩsiré Wanhib'apito ma romhuri'wa te 're hâimana, Cristuhu wasu'uwẽ na ĩsiré te te 're i'aipawaptob za'ra wa'aba mono. Duré wasisãnawã hâiba amo norĩ hã za isiré ãma ineb zahuré da hã, ta norĩ hã te za tisiré isazei'wa norĩ zadawa para, ãma atẽme ine wa'aba na siwasu'u zahuré, aima za'ra wa'aba hã. Ta norĩ hã simiromhuri wẽ uptabi wa, te za Cristuhu ãma si 're dawata za'ra.

²⁴ Tahawa, ma'ãpé iwẽ na si uburé marĩ na hã ãma tãma uwaimrami za'ra wa'aba za, asimizawi pese za'ra wa'aba zém na te te aiwaihu'u za'ra wa'aba da, duré sena na, wa te dama 're i'aiwasu'u wẽ za'ra wa'aba mono zém na, te te aiwaihu'u za'ra wa'aba da. Duré ãme isazei'wa norĩ, siré 're isi'rã'õtõ mono norĩ hã, ãne na te te aiwaihu'u za'ra wa'aba da, te za iwẽ na si tãma ãma i'uwaimrami za'ra wa'wa za.