2 Corĩtu 5 - ꞌRe Ihâimana Uꞌâsi Mono Zadawa Wasuꞌu

¹ Wahâiba hã 'ri na, wa za oto ãma aima simiré'é za'ra wa'wa. A'ubuni wi 're dazâmorĩ mono ré hã, romhâ 'manharĩ na 'ri hã iwa 're dasi'ubumroi hutu mono pari, te za dasisa'u da te dasiwi 're 'ri nhamra. Tane duré, wa norĩ hã. Ti'ai ãma 're wahâimana hutu za'ra mono ré, te za wahâiba hã wawi 're si'utõrĩ za'ra. 'Ri iwẽ uptabi hã dama 're simasam hâ mono da, te za duré iwẽ na da te dasima 're 'ri za'ra. Tane te za duré 'Re ihâimana u'âsi mono hã wahâiba té hã te te wama 're ab'manharĩ, iwẽ uptabi hã, hâiwa ãma za wawi 're isi'utõrĩ waihu'u za'ra mono õ hã, taha ré si oto i'rata 're wahâimana u'âsi za'ra mono da. Ãne hã wama waihu'u pese za'ra di oto, wa norĩ ma hã.

² Ti'ai ãma wahâiba ré, wa wa te sô 're rob'ruiwapari u'âsi za'ra, hâiwa ãma wahâiba itém na za oto 're iwahâimana za'ra mono zéb zô, ãme ti'ai ãma da'uza ihâ tém na 're dasi'uza za'ra mono da, da te sô 're irob'ruiwapari za'ra mono ne.

³ Ai'uréiwi 're danomro mono wa, dama 're idanhiséb za'ra mono ne, hâiwa ãma hã wahâiba ãna 're wahâimana za'ra mono õ di za. Wahâiba téb ré si, wa za oto 're wahâimana u'âsi za'ra.

⁴ Ti'ai ãma wahâiba ré u'âsi 're wahâimana za'ra mono õ di za. Ti'ab ré, wa za tô 're wawazidi za'ra, wa te 're robzépata za'ẽtẽ za'ra mono wa, wahâiba na hã. E tawamhã wa za wa te wasima 're rosa'rata za'ra, 're wadâ'â su'u za'ra mono da, wahâiba zô 're rob'é'é za'ra mono hâ. Mare di. Ãne na hã wa te wasina 're rosa'rata za'ra mono õ di za, wa norĩ hã. Tane nherẽ, wa za tô sô 're watob'uzu u'âsi za'ra, 'Re ihâimana u'âsi mono hã wahâiba itém na isi'utõrĩ waihu'u'õ na, za te te wama ãma 're i'azaprĩ mono zéb zô. Ãne wamhã, ti'ab ré aré wahâiba hã wawi 're si'utõrĩ za'ra mono da nherẽ, wa za taha wa'rãmi isi'utõrĩ'õ ré 're wahâimana u'âsi za'ra.

⁵ 'Re ihâimana u'âsi mono si, ma tô te te wama 're apisutu siro, ãne hã. Tipẽ'ẽzani hã ma tô te te wama 're anhomri, sena na wahâiba ité hã za te te wama 're i'anhomri mono na, wa te wasina 're waihu'u za'ra mono da.

⁶ Tahawa, wa za 'Re ihâimana u'âsi mono umnhasi sina 're wahâimana za'ra a'â, wato sina. Wahâiba hã ti'ab ré, za wawi 're isi'utõrĩ za'ra mono ré, 're wanomro mono wa, wa a'â hâiwa ãma Wanhib'apito 're isãmra mono zém nhiti 're wahâimana za'ra, za 're iwahâimana u'âsi za'ra mono zém nhiti zama.

⁷ Wa norĩ hã, uburé marĩ hã hâiwa ãma 'Re ihâimana u'âsi mono, za te te wama 're i'anhomri mono hã, ti'ab ré watõmo na romhâ ré, wa te 're i'madâ'â za'ra mono zéb zarina, 're wahâimana za'ra mono õ di. Uburé te te sima wa'ãma 're i'aropisutu mono zém na, wa te 're isaze za'ra mono zéb zarina si, wa ãma 're wahâimana za'ra, watõmo na wa te wasisõwa 're 'madâ'â za'ra mono õ nherẽ, romhâ ré.

⁸ Wa norĩ hã wato sina, wa oto 're wahâimana u'âsi za'ra. E marĩ wa. Ti'ab ré, wahâiba hã wawi 're si'utõrĩ pese za'ra mono nherẽ, wẽ uptabi di za, taha nhowa're're, hâiwa ãma Wanhib'apito 'rata 're iwahâimana u'âsi za'ra mono zé hã.

⁹ Tane nherẽ, 'Re ihâimana u'âsi mono hã 're iwahâimana za'ra mono zém na, wa'ãma 're toi u'âsi mono da si, wa za 'râwi 're wasi'madâ'â za'ra, ti'ai ãma wahâiba i'ratare ré, duré hâiwa ãma wahâiba itéb ré.

¹⁰ E marĩ wa, wa za ãhã zô si, wa te 're rob'ruiwapari u'âsi za'ra, ti'ab ré hã. Niwapsi, wa za tô uburé Cristuhu nho're aimasam ni, te te wa'awaihu'u da, wahâimana wẽ na, duré wahâimana wasété na zama. Tame te za oto niha te te wama 're arowairébé, ti'ai ãma uburé marĩ, wa te 're i'manharĩ za'ra mono zéb zarina, iwẽ na, duré iwasété na.

'Re ihâimana u'âsi mono hã da'ãma 're isiwadi mono zé wasu'u

¹¹ Wa norĩ hã Zezusihi zadawa wasu'u'wa norĩ hã, wa tô Wanhib'apito hã wa te wasiwi 're wazé. Taha zarina, wa tô duré wa te 're dapawaptob za'ra, 'Re ihâimana u'âsi mono u si, 're dasipizari za'ra mono da. Wa norĩ hã marĩ zô si, wa te 're dapawaptob za'ra mono õ di. Mare di. 'Re ihâimana u'âsi mono ma si, wawaihu'u pese za'ra di, uburé 're iwahâimana za'ra mono zém na hã. Tahawa, iwẽ si, wa te 're i'manharĩ za'ra mono zé hã, tãma waihu'u pese di duré. Ãne na hã sena na aipẽ'ẽ 're, ãté aima waihu'u pese za'ra wa'aba di duré.

^12-13 Ni'wam norĩ hã zudeu norĩ hâimanazéb uwaibaba, danho'a dama 're hâimana za'ra mono wẽ te, te sina 're wata za'ra. Ta norĩ hã ma tô wanhimiromhuri hã te te 're 'madâ'â za'ra. Tane nherẽ, wapẽ'ẽ 're wanhimirosa'rada hã, ta norĩ hã te te wawi 're waihu'u za'ra mono õ di. Tahawa, te ta norĩ hã te te wa'ãma dama 're romnomri za'ra, ãne: “Paulu norĩ hã simiza'rese ãna, te 're hâimana za'ra. Ma tô duré 'rãihaiwamnarĩ za'ra.” Wẽ di. Tane nherẽ, wa norĩ hã wa za tô 'Re ihâimana u'âsi mono ma si, wa te 're romhuri u'âsi za'ra, wanhimiromhuri na ãma 're wawata za'ra mono da. Ta norĩ hã te duré ãne te te wa'ãma dama 're romnomri za'ra: “Paulu norĩ hã te simirosa'rata nhipese na te te dama 're rowasu'u za'ra, isimiroti hã sena newa, da te ãma 're saze za'ra mono da.” Wẽ di. Wa'ãma romnomri wasétézé 're hâimana mono nherẽ, wa tô wa te aima 're romhuri u'âsi za'ra wa'wa, wanhimi'ẽ na. E wasina 're wawata za'ra mono da, wa ãne hã aima wasiwasu'u za'ra wa'aba ni. Mare di. Dama 're wawasu'u wẽ za'ra wa'aba mono da, wa ãne na aima wasiwasu'u za'ra wa'aba ni, 'râwi wanhimirosa'rada iwẽ hã da te wa'ãma 're iwaihu'u za'ra mono da si, iré 're iwahâimana za'ra mono hã 'râwi.

¹⁴ Cristu hã te te 're wa'azawi pese mono wa, wa wanhimi'ẽ na, wa te tãma 're romhuri za'ra, da'ãma. Wa norĩ hã wasima si, 'râwi 're wasi'madâ'â za'ra mono õ di za. Dawasété wa'âbâzéb da, ma tô Cristu hã uburé dazada dârâ da'upana, dawasété wi 'râwi 're dasiwa'âbâ za'ra mono da, dasi'uihâ na dasisada 're dadâ'â waihu'u za'ra mono õ wa.

¹⁵ Ãma 're inomro té mono norĩ hã, sima si ãma 're hâimana za'ra mono tõ da, ma tô dazada dârâ, Cristu hã. Taha zarina, te za sada idâ'â za'ra ma si, duré sada ihâiwa'utu za'ra ma si hã 're hâimana za'ra, Cristuhu ma.

¹⁶ Ãne wa, ti'ai ãma isazei'õ'wa norĩ nhimirosa'rata zarina, wa te da'ãma 're rosa'rata za'ra mono õ di za oto, 're idahâimana za'ra mono zém na hã. Wa hã bété. Isazei'õ'wa norĩ nhimirosa'rata zarina, wa tô aré te 're rosa'rata, Cristu 're ihâimana mono zém na hã, taré newa. Tane nherẽ, taha zarina, te ãma 're rosa'rata mono õ di oto, wa hã.

¹⁷ Ni'wam norĩ hã Cristu te te 're saze za'ra mono wa, simisutu tihâiba na sina 're sitob za'ra mono wamhã, 're idapoto téb za'ra mono zéb ré si, te za oto 're hâimana za'ra. Tahawa, te za 're inomro 'rata mono zé hã tãma 're si'utõrĩ za'ra. Ãhã wamhã, 're ihâimana 'rata za'ra mono zé hã tâibâ za oto. Taha wa'rãmi, te za oto 're idahâimana téb za'ra mono zém na si 're hâimana za'ra, iwẽ na si.

¹⁸ Ãne hã ma tô iwẽ si te te wama 're ab'manharĩ, 'Re ihâimana u'âsi mono hã, ãma 're iwanomro mono zép téb da hã. Isitob'ru na, wa tô aré tãma 're wahâimana za'ra. Tane nherẽ, Cristuhu dâ'âzém na, ma tô wa'ãma 're siwadi za'ra oto. Wa norĩ hã dama isadawa wasu'u'wa norĩ hã ma tô duré wama pisutu za'ra, wa te da'ãma 're iromhuri za'ra mono zéb da hã, taha zarina, da'ãma zama 're siwadi mono da duré, wasine.

¹⁹ Cristuhu dâ'âzém na 'Re ihâimana u'âsi mono, da'ãma 're isiwadi mono zé wasu'u na, wa wa te dama 're rowasu'u za'ra, dawasété na oto da'ãma 're ipo're pu'u mono õ zéb zarina hã. Ma tô oto wama pisutu za'ra, ãne na, wa te dama 're rowasu'u za'ra mono da.

²⁰ Tahawa, ma tô Cristu hã datẽme wazatõrĩ za'ra, isadawa para, wa te dama 're sadawa wasu'u za'ra mono da. Ãne, wa wa te dama 're roti pese za'ra, Cristuhu nhisi na: “Ma'ãpé, 'râwi asi'madâ'â za'ra wa'aba, 'Re ihâimana u'âsi mono hã ai'ãma siwadi za'ra wa'aba da oto.” Ãne na ma tô wa'u'âbâ te te dama 're aroti pese, 'Re ihâimana u'âsi mono hã.

²¹ Cristu hã ti'ai ãma 're morĩ ré, ma tô wasété ãna 're hâimana u'âsi. Tiwasédé hã te te 'manharĩ õ nherẽ, 'Re ihâimana u'âsi mono hã ma tô uburé wawasédé, wa te 're i'manharĩ za'ra mono zém na hâiba wati'i, wa'upana za'ra, Cristuhu ãma 're wanomro mono wa, te te oto 're iwa'awẽsãmri mono da hã.