2 Corĩtu 4 - ꞌRe Ihâimana Uꞌâsi Mono Zadawa Wasuꞌu

Piza na zé'a 'manharĩ na romnhimiré'ézé wasu'u

¹ 'Re ihâimana u'âsi mono hã ma tô tinhimizawi pese zéb zarina wapisutu, isadawa wasu'u na wa te tãma 're romhuri mono da. Tahawa, wawi 're robzei'õ mono ãna, wa tô 're wahâimana u'âsi.

² Ni'wam norĩ hã asiré 're hâimana za'ra wa'aba mono nherẽ, ma tô wawasédé hã wa'ãma sa'ra za'ra, wahâimana nhipese sina dawi 're wahâimana mono newa. Uburé marĩ hã pi'uriwi da te 're i'manharĩ wasété za'ra mono zé hã, wa tô wa te wasiwi 're awẽ'õ. 'Re ihâimana u'âsi mono zadawa wasu'u hã, wa te dawi ãma 're 'wa'rutu mono õ di. Õhõ si, wa tô sõ'awi wa te dama 're wasu'u u'âsi, sena na, 'Re ihâimana u'âsi mono nho'a. Ãhã zarina, te za 'râwi dapẽ'ẽ na da te 're wawaihu'u za'ra, wazadawa nhipese ãna, 're iwahâimana mono zém na hã.

³ Cristuhu wasu'uwẽ hã wa te dama 're iwasu'u mono hã suwai haré te ni'wam norĩ wi zahadu 're hâimana, 'Re ihâimana u'âsi mono nhiti, 're inomro u'âsi mono norĩ wi hã.

⁴ Ta norĩ hã, Cristu te te 're saze za'ra mono õ wa, ma tô Wa'uburé hã ipo're'õ norĩ nhib'apito hã te te 're apo're nhito, tob'a ne 're hâimana za'ra mono da. Tahawa, Cristuhu wasu'uwẽ hã wẽ uptabi nherẽ, rob'uiwẽzém ne, te te dama 're rowa'a za'ra mono nherẽ, te te 're waihu'u za'ra mono õ di, ta norĩ hã. Cristu hã aiwa Timama ne 're morĩ wẽ uptabi nherẽ, ta norĩ hã te te siwi 're waihu'u za'ra mono õ di, sena na iwasu'uwẽ na hã.

⁵ Wa norĩ hã wa'ãma si 're atob'uzu za'ra wa'aba mono da, duré wanhimiroti si 're 'madâ'â za'ra wa'aba mono da, wa te ãma aima 're rowahutu za'ra wa'aba mono õ di. Zezu Cristuhu si, wa tô wa te aima 're wasu'u za'ra wa'wa, uburé Wanhib'apito na 're waihu'u za'ra wa'aba mono da si. Taré, wa wa norĩ hã aima romhuri aba 'wa na hã 're wahâimana. Zezusihi si 're isazei pese za'ra wa'aba mono zéb da si, wa tô wa norĩ hã wa te aima 're sadawa wasu'u za'ra wa'wa.

⁶ Duréihã ropoto na'rata hawimhã, 'Re ihâimana u'âsi mono ma tô tinha, ãne: “Ãhã na hã robra si 're asa'wari mono nherẽ, oto airowa'a na.” Ãne te tinha. Tane ma tô duré wapẽ'ẽ 're, te te wama 're arowa'a oto, isadawa wasu'u hã wa te oto ãma 're iwaihu'u pese za'ra mono zéb da hã. Cristu hã ma tô wama waihu'u za'ra, Imama 're imorĩ wẽ uptabi na hã.

⁷ Ãté ni'wa hã te za marĩ iwẽ uptabi hã iwa'âbâ za'ẽne hã piza na zé'a 'manharĩ 're tisẽ, piza isipo'o pese wa, i'manharĩ uwa wa. Tane duré, wa norĩ hã wahâiba nhib'uware nherẽ, wa marĩ iwẽ uptabi hã wa te dama 're wasu'u, tô Cristuhu wasu'uwẽ hã, 'Re ihâimana u'âsi mono si iwaihu'u pese na, da te 're waihu'u za'ra mono da, wawaihu'u pese newa, wa'ãma si, da te 're rosa'rata za'ra mono tõ da.

⁸ Ropire wazô 're wairébé ahâ mono nherẽ, te te wa'ãma 're ai'uté waihu'u za'ra mono õ di. Duré wa'rã 'remhã rosa'rada wama ahâ za'ra nherẽ, 're wahâtâ'â za'ẽtẽ za'ra mono õ di.

⁹ Wazada hã ahâ di wanhitob'ru norĩ hã. Tane nherẽ, da te 're iwarẽme za'ra mono na 're wahâimana za'ra mono õ di. Te duré da te 're wa'ahâri sa'ẽtẽ uptabi. Tane nherẽ, wazô 're rob'é'é waihu'u mono õ di.

^10-11 Da te dasiwi wapãrĩ da si, te da te wa'ãma 're rosa'rata u'âsi za'ra aré, Zezusi hã da te dasiwi iwĩrĩ ne da. Zezusihi wasu'uwẽ hã wa te dama 're wasu'u mono wa, wa wasina romnhimimnhasi na 're wahâimana. E marĩ te wasu'u tawamhã, da te wa'ãma 're rob'manharĩ wasété u'âsi mono nherẽ, wadâ'â'õzé hã. Cristu hã dâ'â nherẽ, apâ ihâiwa'utuzé, te wasu'u, sena na iwaihu'u pese zéb da hã.

¹² Tahawa, Cristuhu wasu'uwẽ na wa te dama 're rowasu'u mono wa, wa awẽ sidâpâsi wasina romnhimimnhasi na 're wahâimana u'âsi. Taha zarina te za oto a norĩ wa'wa hã rowẽ na 're anomro u'âsi aba mo, 'Re ihâimana u'âsi mono siré si.

¹³ Duréihã apito Dawi hã ma tô ãne na ãma rob'ui'éré: “'Re ihâimana u'âsi mono hã wa tô te ĩsina 're umnhasi, te te 're ĩpawapto mono da. Tahawa, ĩmreme ãna 're ĩhâimana waihu'u mono õ di. Wa tô te dama 're wasu'u u'âsi, isimiroti hã tô sena wa.” Ãne duréihã apito Dawihi nhimi'ui'éré, ibaihâ na hã. Tane duré wanhimirosa'rada hã. 'Re ihâimana u'âsi mono hã wa te wasina 're umnhasi pese mono wa, duré wa te 're sazei pese mono wa, wa isadawa wasu'u na wa te aima 're rowasu'u u'âsi za'ra wa'wa.

¹⁴ Wanhib'apito Zezusihi hâiwa'utu'wa hã te za duré wahâiwa'utu, Zezusihi ãma si 're wahâimana mono wa. Tawamhã asiré za'ra wa'aba te za sitẽme wazaprõ, hâiwa u. Ãne hã wama waihu'u pese za'ra di oto.

¹⁵ Wa norĩ hã ai'madâ'â sina za'ra wa'aba, wa marĩ hã ahâ na wa te 're sépata. Tawamhã Cristuhu wasu'uwẽ na daro mono bâ wa te 're da'apawapto mono wamhã, 'Re ihâimana u'âsi mono nhimizawi pese zéb zarina, da'ãma 're isiwãrĩ mono zé hã, wa za wa te dama ãma 're aropé, da'ahâ uptabi na oto iré 're dahâimana za'ra mono da. Taha zarina te za da'ahâ na ãma 're dawata za'ra oto, 'Re ihâimana u'âsi mono ãma hã, tinhoprubzéb zarina, da'ãma 're siwãrĩ mono wa, te te duré 're da'anho'reptui mono wa oto.

Datõmo na dama i'madâ'â waihu'u'õ zô, da te 're irob'ruiwapari za'ra mono zé wasu'u

¹⁶ Tahawa, niwamhã wawi 're robzei'õ waihu'u mono õ di. Tô sena ãne hã mare uptabi di. Awẽ sidâpâsi wahâiba prédubzéb u, duré wahâiba téb ré wanhiptetezé hã wawi 're si'ré u'âsi mono nherẽ, wa wapẽ'ẽ 're apâ 're wanhiptete u'âsi. Tahawa, tô wawi hã 're robzei'õ waihu'u mono õ di tô.

¹⁷ Ti'ab ré, wa za tô wa te 're robzépata a'â. Tane nherẽ, ta hã wama wapure di. E marĩ wa. Taha wa'rãmi, te za 'Re ihâimana u'âsi mono iwẽ uptabi na hã duré ipire uptabi na hã te te wama 're wa'âbâ, isi'utõrĩ'õ na. Ti'ab ré, wa te 're robzépata za'ẽtẽ mono nherẽ, taha nhipai u wẽ uptabi di za, iwẽ na te te wama iropisutu siromo zé hã.

¹⁸ Uburé marĩ hã ti'ab ré, datõmo na da te 're i'madâ'â za'ra mono si hã, si'utõrĩ pese di. Hâiwa ãma marĩ hã datõmo na da te 're i'madâ'â waihu'u za'ra mono õ si, 're si'utõrĩ waihu'u mono õ di za. Te za 're hâimana u'âsi za'ra. Tahawa, ti'ab ré datõmo na da te 're i'madâ'â za'ra mono zô si, wa te 're rob'ruiwapari mono õ di za. Datõmo na da te 're i'madâ'â waihu'u za'ra mono õ zô si, wa za wa te 're rob'ruiwapari u'âsi, wa norĩ hã.