2 Corĩtu 3 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono hã te te dama iropisutuzép té wasu'u

¹ Ãne na aima wasiwasu'u za'ra wa'aba wa, te za duré wa'ãma irosa'rata za'ra wa'wa ãté, 'râwi wasina iwawatazém na hã. E wanhimiromhuri na wawasu'u na rob'ui'éré ré, wa tô wasi'uihâ na hã ãma atẽme za'ra wa'aba iré hã wanem ni, sena na 'Re ihâimana u'âsi mono zadawa 'mahârâ'wa na, wa te dama 're iromhuri mono zé wasu'u na rob'ui'éré ré hã. Mare di. Ni'wam norĩ si te za atẽme 're sihutu 'wa, nima hawimhã, isimiromhuri wasu'u na rob'ui'éré ré hã. Duré aihawi wa'aba hã, isimiromhuri na dama 're iwasu'u za'ra wa'aba mono zéb ré, te za ta norĩ hã 're nomro, nimomo. Tane hãi õ di, wa norĩ hã.

² Darob amoi u, 're wane mono wamhã, asimirob'ui'éré za'ra wa'aba ré, 're wane mono õ di, da te dasiwi 're iwawaihu'u mono zéb da hã. Mare di. Cristuhu wasu'uwẽ na wanhimiromhuri zarina 're saze za'ra wa'aba mono wa, 'Re ihâimana u'âsi mono ãma si 're anomro wẽ wa'aba mono zém na, da te 're aiwaihu'u za'ra wa'aba mono wamhã, taha zarina si te za da te dasiwi 're wawaihu'u, sena na 'Re ihâimana u'âsi mono zadawa 'mahârâ'wa na dama 're iwahâimana mono na hã.

³ Wanhimiromhuri zarina si, Cristu hã 're saze za'ra wa'aba mono wa, te taha na si da te 're wawaihu'u, Cristuhu zadawa para si, wa te dama 're iromhuri mono zém na hã, danhimirob'ui'éré hã da te 're sõré za'ra mono wa, marĩ hã da te ãma 're iwaihu'u za'ra mono ne. Tane nherẽ, marĩ na da te 're irob'ui'éré za'ra mono zéb zarina, 're saze za'ra wa'aba mono õ di, a norĩ wa'wa hã. 'Re ihâimana u'âsi mono hã isi'utõrĩ'õ pẽ'ẽzani nhimipawaptobzéb zarina si, ma tô 're isaze za'ra wa'aba mo. E ẽtẽ tõmo baihâ na rob'ui'éré zarina, ma tô 're isaze za'ra wa'aba mo. Mare di. 'Re ihâimana u'âsi mono pẽ'ẽzani hã marĩ hã aipẽ'ẽ 're te te aima 're iwaihu'u za'ra wa'aba mono zéb zarina si, ma tô oto 're isaze za'ra wa'aba mo, Cristu hã.

⁴ A norĩ wa'wa hã wanhimiromhuri zarina, ma tô oto 're isaze za'ra wa'aba mo. Taha zarina te za oto asiwi iwawaihu'u za'ra wa'wa, sena na Cristuhu zadawa para si, wa te dama 're iromhuri mono na hã. Cristuhu nhimipawaptobzéb zarina si, wa tô wa norĩ hã sena na wasina waihu'u ni, 'Re ihâimana u'âsi mono nho'a.

⁵ E wa norĩ hã wasi'uihâ na wama waihu'u pese di ãne hã, Cristuhu wasu'uwẽ na wa te dama 're irowasu'u mono zéb da hã. Mare di. 'Re ihâimana u'âsi mono te te 're iwapawapto mono zéb zarina si, wama waihu'u pese di, iwasu'uwẽ na, wa te dama 're iromhuri mono zéb da hã, taha zarina, da te 're saze za'ra mono da.

⁶ Taha si ma tô te te 're wapawapto, te te dama iropisutuzép téb zarina, wa te dama 're romhuri wẽ mono da. E niha tawamhã, 'Re ihâimana u'âsi mono te te dama iropisutuzép té hã. E 'Re ihâimana u'âsi mono nhimiroti 'rata na Mozésihi nhimi'ui'éré, te wasu'u, ã hã. Mare di. 'Re ihâimana u'âsi mono pẽ'ẽzani nhimipawaptobzéb zarina 're idanomro mono zép té, te wasu'u, ã hã. Mozésihi nhimi'ui'éré zarina 're danomro mono nherẽ, e taha zarina te za 're dasisõ'reptu za'ra, ropipa hawimhã. Mare di. Ni'wa hã te te sina uwaimrami waihu'u õ di, Mozésihi nhimi'ui'éré hã. 'Re ihâimana u'âsi mono te te dama iropisutuzép té hã da te 're saze za'ra mono wapsi, te za Ipẽ'ẽzani hã te te 're da'anho'reptu ropipa hawimhã, rowẽ na isiré 're dahâimana u'âsi za'ra mono da oto.

^7-8 Duréihã 'Re ihâimana u'âsi mono hã ma tô tinhimiroti na rob'ui'éré, ẽtẽ tõmo baihâ na, Mozésihi ma, te te sõmri da. Rowa'a za'ẽtẽ na ma tô 'Re ihâimana u'âsi mono hã itẽme wi, Mozésihi u hã. Tawamhã Mozési hã ẽtẽ tõmo baihâ na rob'ui'éré te te mrami pari, Izaraéu nhihudu norĩ u sa'a hawi apâ te te itẽme iré si'ra za'ra wamhã, i'ubu na hã rowa'a hã sa'ẽtẽ di. Sa'a hawi, morĩ ré, i'ubu na rowa'a hã suru na sipari nherẽ, tawamhã, Izaraéu nhihudu norĩ hã titõmo na te te 'madâ'â waihu'u za'ra õ di, Mozési hã. E marĩ wa. 'Re ihâimana u'âsi mono hawi wa, rowa'a hã. 'Re ihâimana u'âsi mono nhimiroti 'rada hã ẽtẽ tõmo baihâ na rob'ui'éré hã, isimirowa'a ré, Mozési hã te te datẽme ãwisi nherẽ, wẽ nherẽ, taha si, da te 're i'madâ'â za'ra mono zéb zarina, 're dasisõ'reptu waihu'u za'ra mono õ di. Isimiroti 'rada hã wẽ nherẽ, taha nhipai u wẽ uptabi di, Ipẽ'ẽzani nhimipawaptobzé hã, taha zarina, 'Re ihâimana u'âsi mono 'rata 're idanomro u'âsi mono zéb da hã, rowẽ uptabi ãma hã.

⁹ 'Re ihâimana u'âsi mono hã tinhimiroti 'rata na ẽtẽ tõmo baihâ na rob'ui'éré hã Mozésihi ma, te te isõmri hã wẽ nherẽ, da te dasina 're uwaimrami waihu'u za'ra mono õ wa, ma tô 'Re ihâimana u'âsi mono hã te te siwi 're da'awẽ'õ. Tane nherẽ, te te oto dama iropisutuzép tép si hã iwẽ uptabi. E marĩ wa. Taha zarina, 'Re ihâimana u'âsi mono hã te te oto 're wa'awẽsãmri mono wa, duré taha zarina, wawasédé hã te te oto wa'ãma 're ab'madâ'â mono õ wa, Wamama hã.

¹⁰ Duréihã Mozési hã 'Re ihâimana u'âsi mono nhimiroti na rob'ui'éré ré ẽtẽ tõmo baihâi ré, te te si'rai wamhã, 'Re ihâimana u'âsi mono te, rowa'a na te iré mo, wẽ wa, isimiroti hã. Tane nherẽ, rowa'a hã ma tô ai'utõ. 'Re ihâimana u'âsi mono te te dama iropisutuzép tép si, wẽ uptabi di oto, Cristuhu wasu'uwẽ na hã.

¹¹ 'Re ihâimana u'âsi mono nhimiroti 'rada hã wẽ wa, ma tô Mozésihi hâiba na tirowa'a, ẽtẽ tõmo baihâ na rob'ui'éré hã te te mrami ré hã. Tane nherẽ, ãma ronomro hâ õ di, rowa'a na hã. 'Re ihâimana u'âsi mono te te dama iropisutuzép tép si wẽ uptabi di, taha si 're si'utõrĩ waihu'u mono õ wa za, te te 're ida'anho'reptui mono zé wasu'u wẽ hã.

¹² 'Re ihâimana u'âsi mono te te dama iropisutuzép té hã, niwamhã wawi 're si'utõrĩ za'ra mono dai õ wa, wa taha umnhasi sina, wa te 're 'madâ'â u'âsi. Tahawa, wapahi ãna, wa tô wa te dama 're wasu'u u'âsi.

¹³ Tawamhã Mozési hã ma tô 'rã ubu ré datẽme simasisi, i'ubu na rowa'a hã tiwi isi'utõrĩ na te te siwi waihu'u za'ra tõ da, Izaraéu nhihudu norĩ hã. Tanei õ di, wa norĩ hã. Cristuhu wasu'uwẽ hã wa te dama 're wasu'u za'ra mono wamhã, wanhiséb ãna, wa za tô wa te dama ãma 're rowasu'u za'ra, niwamhã ta hã dawi 're si'utõrĩ mono dai õ wa za.

^14-15 Duréihã Izaraéu nhihudu norĩ hã ma tô 'rãihatob za'ra. Tahawa, 'Re ihâimana u'âsi mono nhimiroti hã te te 're waihu'u za'ra mono õ di, niha te te sina tãma 're i'uwaimrami za'ra mono zéb da hã. Ta hawim haré, te zahadu da'rã ubu ré 're idahâimana za'ra mono ne, 'Re ihâimana u'âsi mono te te tãma iropisutu za'ra zéb 'rata na rob'ui'éré hã te te sima 're sõré u'âsi za'ra, rowahutuzéb ãma, isimiroti 'rada hã te te 're i'madâ'â pese za'ra mono zéb zarina, te te 're sõ'reptu za'ra mono da newa, ta norĩ hã. Tane nherẽ, ni'wam norĩ hã Cristuhu ãma 're nomro mono wapsi, te za da'rã ubu ãna 're idahâimana za'ra mono ne 're hâimana za'ra, ta norĩ hã.

¹⁶ Ni'wam norĩ hã Wanhib'apito wasu'uwẽ u 're sipizari za'ra mono wapsi, te za da'rã ubu ãna 're idahâimana za'ra mono ne, 're hâimana u'âsi za'ra, ta norĩ ma si, oto waihu'u pese za'ra wa za.

¹⁷ Wanhib'apito si, wa te 're saze za'ra mono wamhã, Tipẽ'ẽzani ma, te za te te 're wa'apisutu, taha si te te 're wa'apawapto mono da, rowẽ na ãma 're wanomro mono da, marĩ na wasi'uihâ na wa te wasina tãma ãma 're i'uwaimrami za'ra mono zém na, 'râwi 're wasi'madâ'â za'ra mono tõ da, duré taha zarina, 'Re ihâimana u'âsi mono hã te te 're wa'anho'reptui mono da newa.

¹⁸ Wa norĩ hã wasiré isazei'wa norĩ hã da'rã ubu ãna ne, wa oto 're wahâimana za'ra. Tahawa, Wanhib'apito 're imorĩ wẽ uptabi zé hã wama waihu'u pese za'ra di oto. Ipẽ'ẽzani te te 're iwa'apawapto mono zéb zarina, wa za oto 're iwanomro wẽ mono zém na, wa te wasima ãma 're sa'ẽtẽ za'ra, isine ãma 're iwahâimana za'ra mono zéb da hã.