2 Corĩtu 10 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono zadawa para, Paulu te te dama 're isadawa wasu'u mono zé wasu'u

¹ Ni'wam norĩ hã asiré wa'aba, 're ihâimana za'ra mono norĩ hã te ãne te te sima 're ĩbâsi za'ra: “Paulu hã wa'rata sãmra ré hã, waimri na ihâimana, duré wama za'ra hã isasi õ. Wanhiti romhâ na 're hâimana mono wapsi, te mreme pahi ãna te te wama 're anharĩ, tinhimi'ui'éré na si.” E ãne hã ĩma 're hâimana mono bâ. Mare di. Wa hã Paulu, wa za oto aima ãma roti za'ra wa'wa. Ĩwapari pese za'ra wa'aba za. Cristuhu nhisi na, wa za ãma aima roti za'ra wa'wa ãhã na hã, ta hã simizawi pese wa, duré atãma na 're hâimana u'âsi mono wa. Marĩ da, 're sisapẽtẽ waihu'u mono õ di, ta hã.

² Ni'wam norĩ hã ma tô ãne na ĩma nharĩ za'ra, ĩhâiba na: “Paulu hã isazei'õ'wa norĩ ne, te 're hâimana.” Ãne te ni'wam norĩ hã te te ĩ'ãma 're rosa'rata upa za'ra. Tahawa, apâ ãma atẽme ĩmorĩ aba wamhã, ãté ĩmreme tete na, wa za tô oto aima roti za'ra wa'wa, ĩpahi ãna, ãne hã te ĩsima wẽ õ nherẽ. Tahawa, ĩwasu'u wasédé hã wapari za'ra wa'aba õ di za, ãne na te aima nharĩ za'ra wa'aba tõ da, asõ'a za'ra wa'aba.

³ Wa norĩ hã ti'ai ãma, wa dawazari 're wahâimana tô, uburé isazei'õ'wa norĩ wazari. Tane nherẽ, ti'ai ãma 're idahâimana za'ra mono zéb zarina, wa te 're a'wapéi mono õ di, 'Re ihâimana u'âsi mono nhitob'ru norĩ hã. Mare di.

⁴ Ti'ai ãma 're idasi'wapé za'ra mono zém na danhimnhi'ãsi na, wa te 're a'wapéi mono õ di duré. 'Re ihâimana u'âsi mono nhimnhi'ãsi na si, wa tô wa te 're a'wapéi u'âsi, iwaihu'u pese zarina. Isitob'ru norĩ nhiptetezé hã wa te tiwi ãma 're i'a'uprosi mono zéb da hã, wa ãhã na si wa te 're a'wapéi u'âsi, ta norĩ hã, 'Re ihâimana u'âsi mono nhimnhi'ãsi na si.

⁵ Taha na si, wa duré danhimiroti tô senai'õ hã wa te dawi 're a'uprosi. Ni'wam norĩ hã tiwẽ na sina 're wata za'ra mono wa, te 'Re ihâimana u'âsi mono hã tãma waihu'u ãna, 're hâimana za'ra. Ãne na danhimirosa'rata wasédé hã, wa duré wa te dawi 're a'uprosi u'âsi, 'Re ihâimana u'âsi mono nhimnhi'ãsi na, iwaihu'u pese zarina. Uburé Cristuhu nhitob'ru norĩ nhimirosa'rata wasédé hã wa duré wa te tiwi 're awaibui u'âsi, Cristuhu nhimiroti zarina si, te te oto 're rosa'rata za'ra mono da, ta norĩ hã iwẽ na si.

⁶ A norĩ wa'wa hã te oto Cristuhu ãma 're isasõmri pese za'ra wa'aba mo. Tane nherẽ, ni'wam norĩ hã asiré 're hâimana za'ra wa'aba mono nherẽ, Cristuhu wi, apâ tihâimana wasété zô 're sipizari za'ra mono wa, wa za ta norĩ zada 're wahâimana, wa te wasiwi iwẽ'õ za'ra zéb zarina, niha wa te dama ãma roti za'ra da, ta norĩ hâiba na hã.

⁷ Atõmo na wahâiba mana wawi, asiwi 're iwa'madâ'â za'ra wa'aba mono zéb zarina si, ma tô asiwi 're iwawẽ'õ za'ra wa'aba mo. Ni'wam norĩ hã asiré wa'aba, 're ihâimana za'ra mono norĩ hã te ãne na te te si'ãma 're rosa'rata upa za'ra 'râwi: “Wa norĩ si, wa Cristuhu zadawa para, wa te 're romhuri za'ra.” Ãne na asi'ãma rosa'rata za'ra wa'aba ze te bâ, ma'ãpé apâ asi'ãma rosa'rata pese za'ra wa'aba. E marĩ wa. Wa norĩ zama, Cristuhu zadawa para dama romhuri'wai wa.

⁸ Wanhib'apito hã ma tô wapisutu, isadawa para, wa te 're aipawaptob za'ra wa'aba mono da. E tawamhã, wanhimipawaptobzéb zarina, ãma 're anomro wẽ wa'aba mono zé hã, wa te aiwi 're uprosi za'ra wa'aba mono da, ma tô ãne hã wama pisutu. Mare di. Isadawa para, wa te 're i'aipawaptob za'ra wa'aba mono zéb zarina, asiptete sina ãma 're anomro aba mono da si, ma tô wapisutu, Wanhib'apito hã. Ãhã zarina si, aima 're ĩsiwasu'u za'ra wa'aba mono wa, ãma 're ĩnhisé mono õ di, tô sena aima 're ĩsiwasu'u za'ra wa'aba mono wa, ãne na hã.

⁹ Ĩnhimi'ui'éré na te aima ãma iroti za'ra wa'aba zé ma, aipahi za'ra wa'aba da, te ãma ĩsima aiwẽ za'ra wa'aba õ di.

¹⁰ Ni'wam norĩ hã te duré te te sima 're ĩwasu'u za'ra, ãne: “Pauluhu nhimiroti hã pire uptabi di, tinhimi'ui'éré na si te te wama 're iroti za'ra mono zém na hã. Mreme tete sina, te za duré ãma wama roti pese za'ra, tinhimi'ui'éré na hã. Tane nherẽ, wa'rata sãmra wamhã, marĩ dai õ di. Wama mreme wapu za'rare di.” Ãne te ni'wam norĩ hã te te sima 're ĩbâsi za'ra, ĩza'rerap si.

¹¹ Tane nherẽ, asiti wahâimana za'ra wa'aba ré, wanhimi'ui'éré na wamreme tete sina, wa te aima ãma iroti za'ra wa'aba zéb zarina, wa za duré wahâimana pire na hã ai'rata wahâimana za'ra wa'aba ni, apâ ãma atẽme za'ra wa'aba wane wamhã. Ãne hã ma'ãpé wa'ãma waihu'u za'ra wa'aba, rosa'rata na wa'ãma i'upa za'ra wa'aba norĩ hã.

¹² Ta norĩ hã danhipai u 're ihâimana wẽ za'ra mono na, ma tô 're si'madâ'â ze za'ra. Tane nherẽ, wa norĩ hã isine za'ra da hã, wa te wasina rosa'rata waihu'u õ di, wawẽ na hã. Tane nherẽ, te ta norĩ hã isimiza'rese'õ ne 're hâimana za'ra. Tihâimana wẽ zéb zô si, te ta norĩ hã 'râwi sina 're sõpré, taha na si danhipai u 're hâimana wẽ za'ra mono da newa.

¹³ Tane nherẽ, wa norĩ hã tô ibâre, wa aima wasiwasu'u za'ra wa'aba ni. 'Re ihâimana u'âsi mono te te wama ipisutuzém nhipai u, aima wasiwasu'u za'ra wa'aba õ di. Romhuri hã, 'Re ihâimana u'âsi mono te te wama ipisutuzéb zarina si, wa tô wa te dama 're romhuri, a norĩ wa'aba ma zama. Taha na si, wa aima wasiwasu'u za'ra wa'aba ni, wa te dama 're iromhuri wẽ mono zém na si.

¹⁴ 'Re ihâimana u'âsi mono te te wama ipisutuzéb zarina si, wa tô ãma wanem ni, atẽme za'ra wa'aba, dawana isadawa para, wa te aipawaptob za'ra wa'aba da. Te te wama ipisutuzém nhipai u, wa te duré tiwi ãma upai õ di, Cristuhu wasu'uwẽ na hã wa te aima iwasu'u 'rata za'ra wa'aba na.

¹⁵ Duré, danhimiromhuri na nherẽ, taré wa norĩ hã da'upana wazadawa nhipese na 're wasiwasu'u mono õ di, aima za'ra wa'aba hã. Taré, wa wa norĩ hã wa te wasima 're aiwẽ za'ra wa'wa, Cristuhu ãma 're isasõmri za'ra wa'aba mono zém na, asima ãma 're sa'ẽtẽ za'ra wa'aba mono da, taha zarina, wa te aima 're iromhuri za'ra wa'aba mono zém na si, wa te aima ãma 're sa'ẽtẽ za'ra wa'aba mono da, 'Re ihâimana u'âsi mono te te wama ipisutuzéb zarina si.

¹⁶ Tawapsi, wa za datẽme 're wane, darob amoi u, airom nhiti za'ra wa'aba 're idahâimana za'ra mono norĩ ma, iwasu'uwẽ hã wa te dama 're wasu'u mono da. Cristuhu wasu'uwẽ na ni'wa hã te te dama 're iromhuri mono õ zéb u si, wa za tô oto 're wane, darob amoi u hã, iwasu'uwẽ na, da te dama ãma 're romhuri za'ra mono nherẽ, taré wazadawa nhipese na, da'upana dama 're wasiwasu'u tõ mono da.

¹⁷ Ãne na ma tô duréihã ni'wa hã ibaihâ na ãma rob'ui'éré, 'Re ihâimana u'âsi mono mreme na: “Ni'wam norĩ hã to sina oto 're hâimana za'ra mono wamhã, Danhib'apito te te 're ipawapto wẽ za'ra mono zém na si, te za tô dama 're siwasu'u wẽ za'ra, to sina oto ãma 're ihâimana za'ra mono zém na hã.”

¹⁸ Ni'wam norĩ hã tiwẽ na 'râwi 're isi'madâ'â ze za'ra mono norĩ hã, Wanhib'apito te te 're wẽsãmri za'ra mono õ di, ta norĩ hã. E marĩ wa. Te te sima 're i'awasu'u wẽ mono norĩ si, te za te te 're awẽsãmri, Wanhib'apito hã.