1 Timotiu 5 - ꞌRe Ihâimana Uꞌâsi Mono Zadawa Wasuꞌu

Isazei'wa norĩ pawaptobzém na rowasu'u

¹ Ãté aibâ ihâiba prédu hã te za tihâimanazém na 'mai'upa. Ãhã wamhã, aimreme ipire na tãma hã nharĩ õ di za. Aimama ma, aimreme wẽ na 're inharĩ mono ne, te za duré aimreme wẽ na hã 're ipawapto mo, 're morĩ wẽ da oto apâ. Duré ipréduptém norĩ hã te za aimreme wẽ na 're i'apawapto mo, aimreme wẽ na ano norĩ hã 're i'apawapto mono ne.

² Duré pi'õ iprédum norĩ hã te za aimreme wẽ na 're i'apawapto mo, aimreme wẽ na ana hã 're ipawapto mono ne. Duré pi'õ ipréduptém norĩ hã te za aimreme wẽ na 're i'apawapto mo, aimreme wẽ na si aihidiba norĩ hã 're i'apawapto mono ne. Aiprédup sina te za ta norĩ ma hã 're aihâimana mo.

³ Pi'õi mrotõ norĩ pawapto'wa da hã ni'wa hâimana õ wamhã, te za marĩ na 're i'apawapto pese mo.

⁴ Pi'õi mrotõ 'ra norĩ hã 're hâimana za'ra mono wamhã, tiwarahuzé wa'rãmi, te za tina hã marĩ na te te 're pawapto pese za'ra. Duré pi'õi mrotõ nhihudu norĩ hã 're hâimana za'ra mono wamhã, tiwarahuzé wa'rãmi, te za ti'rata norĩ hã marĩ na te te 're pawapto pese za'ra. Ãne te za 'Re ihâimana u'âsi mono nhimiroti zarina te te tãma ãma 're uwaimrami za'ra, ãne si tãma wẽ wa.

⁵ Pi'õi mrotõ ma, sena na danhimipawaptobzé tãma ihâimana'õ hã te za 'Re ihâimana u'âsi mono zô si 're simnhasi, marĩ na te te 're pawapto mono da. Bâtâ na te za tãma 're mreme u'âsi, bara na zama, marĩ na te te 're pawapto mono da.

⁶ Pi'õi mrotõ hã, ãté ãne 're 'maihâimana mono õ di za. Ãté marĩ zô si te za sina 're simnhasi u'âsi. Ãne wamhã, ipẽ'ẽ 're dâ'â u'âsi ne, te za oto 're 'maimo.

⁷ Tahawa, te za tãma 're iroti pese za'ra mo, isazei'wa norĩ ma, imrotõ norĩ ãma te aima iroti mono zé hã te te siwi 're 'madâ'â pese za'ra mono da. Tawamhã isazei'wa norĩ hã damreme hã te te sina 're 'rã'õtõ za'ra mono õ di za.

⁸ Ãté ni'wam norĩ tisisãnawã tinhimarĩ na hã te te 're pawapto pese za'ra mono õ di za. Ãté isõrõwa 're, 're ihâimana za'ra mono norĩ zama, te te 're pawaptob za'ra mono õ di za. Ãne wamhã, Wanhib'apito nhimiroti zarina te te 're pawapto pese za'ra mono õ wamhã, te aré isazei'õ'wa ne oto 're nomro. Ãne wamhã, te te 're ipawaptob za'ra mono õ na, te aré isazei'õ'wa norĩ hã 'rãnhipa za'ra, tihâimana wasété na hã.

^9-10 Pi'õi mrotõ hâiba tém norĩ nhisi na 're rob'ui'éré za'ra mono õ di za, pi'õi mrotõ si'ihi norĩ nhisi zu hã. 60 na ãma 're wahub za'ra mono parip si, te za isisi na da te 're rob'ui'éré za'ra, ti'amo'aba si te te 're 'madâ'â pese za'ra mono wamhã, duré ti'ra norĩ hã te te 're warahu wẽ za'ra mono wamhã, duré te te 're da'mazasi su'u za'ra mono wamhã, duré dawi 're sipa zawi za'ra mono ãna, isazei'wa norĩ ma, te te 're romhuri za'ra mono wamhã, dapara upsõ na zama, duré robzei'õ na 're idanomro mono norĩ hã te te 're pawaptob za'ra mono wamhã, duré simi'ẽ na te te dama 're 'manharĩ wẽ u'âsi za'ra mono wamhã. Ãne wamhã, pi'õi mrotõ norĩ hã dama waihu'u pese za'ra di za, siwaptom na te te 're idapawaptob za'ra mono zém na hã. Tawapsi, te za isisi na da te 're rob'ui'éré za'ra, pi'õi mrotõ si'ihi norĩ nhisi zu.

¹¹ Pi'õi mrotõ hâiba tém norĩ nhisi na ihi norĩ nhisi zu, ãma 're rob'ui'éré za'ra mono õ di za. E marĩ wa. Ãté hâiba téb uptabi ré, 're mrotõ za'ra mono wa, te za te te sima 're wẽ za'ra, timro na te te 're sahu za'ra mono da. Ãté Cristuhu ma si te te 're romhuri za'ra mono da, te te sima 're wẽ za'ra mono õ di za oto.

¹² Tawamhã timro na te te ãma 're sahu za'ra mono wamhã, Cristuhu ma, te te sina 're iroti za'ra mono zé hã ãma 're sapa'a za'ra mono õ di za. Tahawa, ãté te za oto da te dasiwi 're wẽ'õ za'ra, ãma 're sõpré u'âsi mono õ wa.

¹³ Duré pi'õi mrotõ hâiba tém norĩ nhisi na ihi norĩ nhisi zu, 're rob'ui'éré za'ra mono wamhã, ãté dawaptom na te za dama 're wa'a za'ra. Ãté sihâiwi na te za 'ri babap si oto 're nomro, mro õ wẽ te. Ãté marĩ te te wapari wamhã, te za te te dama 're rowasu'u za'ra. Ãté aimawi timreme na te za te te dawi ãma 're ro'wa'rutu za'ra. Ãté marĩ taré te te 're wapari za'ra mono ãna, te za te te dama 're rowasu'u za'ra.

¹⁴ Tahawa, wa tô ĩsima wẽ za'ra, duré apâ timro na te te 're sahu za'ra mono da, pi'õi mrotõ hâiba tém norĩ hã. Te za duré apâ 're 'ra za'ra. Tawamhã tinhorõwa ãma te za ti'ra norĩ hã te te 're 'madâ'â pese za'ra. Ãne dama 're hâimana wẽ za'ra mono wamhã, damreme hã te te sina 're 'rã'õtõ za'ra mono õ di za, wazawi'õ'wa norĩ mreme hã.

¹⁵ Ãne wa tô aima waihu'u. E marĩ wa. Ni'wam norĩ hã ma tô wairé, pi'õi mrotõ norĩ hã, Wanhib'apito nhimiroti wẽ nhiti, Satanasihi nhimiroti si te te oto 're 'madâ'â za'ra mono da. Tahawa, wa tô ãne na aima waihu'u.

¹⁶ Pi'õ hã isazei'wa 're 'maimorĩ wamhã, te za pi'õi mrotõ hã marĩ na te te 're 'maipawaptob u'âsi, tina wamhã, ti'rata wamhã. Ãne wamhã, rosa'rata pire hã pi'õi mrotõ norĩ ãma te te ãma 're sépata za'ra mono õ di za, isazei'wa norĩ hã. Tãma waihu'u pese za'ra di za, pi'õi mrotõ hã 'ra ãna 're ihâimana za'ra mono norĩ si te te 're ipawaptob za'ra mono da hã.

Isazei'wa norĩ 'madâ'â'wai wasu'u

^17-18 Aibâ norĩ hã isazei'wa te te 're 'madâ'â wẽ za'ra mono wamhã, te za iwa'rãmi marĩ iwẽ hã te te tãma 're sõmri za'ra, isazei'wa norĩ, siré 're isi'rã'õtõ mono norĩ hã. Cristuhu wasu'uwẽ na te te tãma 're rowasu'u za'ra mono wamhã, duré isimiroti wasu'u na te te 're pawaptob za'ra mono wamhã, marĩ hã iwẽ hã sa'ẽtẽ na te te tãma 're isõmri za'ra mono da hã, wẽ di. Ãne hã wa tô waihu'u za'ra ni, 'Re ihâimana u'âsi mono nhimiroti 'rata hawimhã, ãne: “Powawẽ hã amnho trigu 'rã, tipara na dasazéb da, te te aima 're sub za'ra wa'aba mono ré hã, 're wata wasisi za'ra wa'aba mono õ di za, 're saihuri tõ mono da.” Duré isimiroti hâiba amo hã ãne: “Romhuri'wa norĩ hã te te dama 're romhuri za'ra mono wamhã, tô i'uwaibaba te za da te 're pawa'âbâ za'ra.” Taha zarina te za isazei'wa norĩ hã da'madâ'â'wa norĩ hã te te 're pawaptob za'ra asa, marĩ na.

¹⁹ Ãté da'madâ'â'wai ãma te za ni'wa hã iwasédé hã ãma tihi. Tawamhã siwaprosi te te ãma hiri wamhã, wapari õ di za, imreme hã. Ãté si'ubdatõ te za ãma sisadawa waptob za'ra, ãma i'madâ'â'wa norĩ hã. Ãté maparane te za ãma sisadawa waptob zahuré. Ãne wamhã, da'madâ'â'wa zô te za aihâ, ihâimanazém na sadawa pibu da.

²⁰ Tawamhã tô sena tiwasédé hã te te 'manharĩ wamhã, te za isazei'wa norĩ nho'a tãma iroti, tiwasété na te te ãma sahu tõ da. Danho'a te za tãma iroti, isipai u da'madâ'â'wa hâiba amo norĩ hã sina 're hâtâ'â za'ra mono wa, isine tiwasédé hã te te 're 'manharĩ za'ra mono tõ da, ta norĩ hã.

²¹ Da'madâ'â'wa hã aima sawi uptabi nherẽ, te za danho'a tãma iroti, tiwasété na te te ãma sahu tõ da. Asimiroti na 're da'mairẽme mono õ di za. 'Re ihâimana u'âsi mono hã te we te te 're wa'ab'madâ'â, Cristu Zezusihi me. Hâiwa ãma romhuri'wa, 'Re ihâimana u'âsi mono te te ipisutu za'ra norĩ zama, te duré te te we 're wa'madâ'â za'ra. Tahawa, ta norĩ nho'a 're wanomro mono wa, da'madâ'â'wa norĩ ãma te aima iroti mono zé hã te za 're i'madâ'â pese mo.

^22-25 Ãne wa za duré aima waihu'u. Isazei'wa norĩ 'madâ'â'wa da, da'maipisutu da wamhã, asapa'abâ da'maipisutu õ di za, aiwara sina. Asapa'abâ duré asib'rada hã da'rã nhisiwi 're aza'ra mono õ di za, Wanhib'apito ma, romhuri'wa da, 're da'apisutu mono da. E marĩ wa, wa ãne aima waihu'u. Asimipisudu hã dama 're hâimana wẽ prã za'ra mono wamhã, isabâdâ da te dasiwi 're aiwẽ'õ za'ra mono õ'umnhasite. Te za 'râwi 're asi'madâ'â u'âsi mo, asimiroti na duré aihâimanazém na 're upa tõ mono da. Wa za a'â aima waihu'u, asi'ãma waihu'u da. Â si 're hâsi mono nherẽ, te za oto uwa 'rãi wa'u isé hã suru na 're ihâsi mo, ãma 're asiwede mono da. E marĩ da. 'Re asai mono wa, 're adi'izé u'âsi tõ mono da. Aihâzé hã te te aimrami siwapto wa, asib'uwa na 're aimorĩ wa, te za 're ihâsi u'âsi mo, suru na. Ãne wa za duré aima waihu'u, da'madâ'â'wa da, asapa'abâ 're ida'apisutu mono õ zém na hã za. Ãté ni'wam norĩ hã sõ'awi tiwasédé hã te te 're 'manharĩ za'ra mono wamhã, iwasété na dama waihu'u pese za'ra di za, 'Re ihâimana u'âsi mono hã bâtâ na dahâimanazém na te te da'awaihu'u õ ré hã. Ãté nimahã na si te za ta norĩ hã iwasété na da te 're waihu'u za'ra. Ãté ni'wam norĩ hã te te dama 're i'manharĩ wẽ za'ra mono zém na, dama waihu'u pese za'ra di za. Ãté nimahã na si te za ta norĩ hã da te 're waihu'u za'ra, te te dama 're i'manharĩ wẽ za'ra mono zém na. Ãne wa, wa tô ãne na hã aima roti, asapa'abâ 're da'apisutu tõ mono da, da'madâ'â'wa da hã.