1 Samuéu 7 - ꞌRe Ihâimana Uꞌâsi Mono Zadawa Wasuꞌu

¹ Tawamhã aibâ norĩ, 'rinho'u Zearĩ ãma 're ihâimana za'ra mono norĩ hã ma tô ai'aba'ré, Uburé Danhib'apito nhimiroti ré wedehâ're hã te te siwi âri da. Tawamhã ma tô siwi ti'â. Duré te te siwi âri wamhã, ma tô siwi tihi Abinadabi na aibâ nhisi nhorõwa ãma ẽtẽ'rãirã nhisiwi 're isa mono ãma. Tawamhã Eriazaha 'ra hã ma tô sada pisutu za'ra, 'Re ihâimana u'âsi mono nhimiroti ré wedehâ're hã te te 're i'madâ'â mono da hã.

Samuéu isi'i'rãnho'õmozé wasu'u

² Tawamhã 'Re ihâimana u'âsi mono te, wedehâ're hã ma tô 're sa'wari hâ, 'rinho'u Zearĩ ãmamhã, 20 na ãma iwahum na. Tame 're sa'wari hâ mono ré hã ma tô Izaraéu nhihudu norĩ hã tãma 're mreme zusi, Uburé Danhib'apito ma hã, te te 're pawaptob za'ra mono da.

³ Tawamhã Samuéu te Izaraéu nhihudu norĩ ma nharĩ za'ra ãne: — Uburé Danhib'apito u hã apâ aipẽ'ẽ 're itẽme aipizari za'ra wa'aba da, asima wẽ za'ra wa'aba wamhã, ma'ãpé sãmra za'ra wa'aba uburé wasiré'õ norĩ te ihâiba'õ norĩ hã, duré romhâibarĩ na pi'õi podo hã Asitaroti na isisi hã. Ma'ãpé duré 're asisõmri za'ra wa'aba mono, õhõ ãma si oto 're aiwata za'ra wa'aba mono da, Uburé Danhib'apito ãma. Tawamhã te za õ hã asõ'reptu za'ra wa'wa, filisteu norĩ nhiptetezé wi hã.

⁴ Tawamhã ãne te te tãma waihu'u za'ra wa, ma tô Izaraéu nhihudu norĩ hã romhâibarĩ Baau na isisi siwazari tãma ihâimana za'ra hã siwi sãmra. Tawamhã ma tô duré siwi time romhâibarĩ na pi'õi podo hã Uburé Danhib'apito ãma si 're wata za'ra mono da oto.

⁵ Tawamhã Samuéu hã ma tô tãma 'ru za'ra Izaraéu nhihudu norĩ ma, uburé pese si'rã'õtõ da Mispa na 'ri wa'õtõ nhisi ãma. Tawamhã ma tô duré tãma ropisutu za'ra, tame ãma 're mreme za'ra mono da, Uburé Danhib'apito ma hã.

⁶ Tawamhã ãne ma tô uburé Izaraéu nhihudu norĩ hã si'rã'õtõ, Mispa ãma. Tahawa, ma tô â hã duré siwi waze. Ta hã ma tô duré siwi sa'wa, Uburé Danhib'apito ma tinhoprubzém na hã. Tawamhã si'upari ãna ma tô bâtâ bâre tihâimana za'ra. Tahawa, te ãne tãma siwẽ'õ za'ra, 'Re ihâimana u'âsi mono ma: — Uburé Danhib'apito, wa norĩ hã wa tô wawasédé hã 'manharĩ za'ra ni aiwi. Tawamhã tame ma tô Samuéu hã Izaraéu nhihudu norĩ ma si'ĩ'rãnho'u, Mispa ãma. Tame ma tô duré da'ãma rowairébé'wa na hã 're hâimana.

⁷ Tawamhã Mispa ãma Izaraéu nhihudu norĩ isi'rã'õtõzém na filisteu norĩ te te waihu'u za'ra wamhã, ma tô imrotõ na dama i'rãnho'õmo norĩ hã wairé, tinhib'a'uwẽ norĩ ré te te 'wapé za'ra da hã. Tawamhã ãne hã Izaraéu nhihudu norĩ te te waihu'u za'ra wamhã, ma tô tãma tipahi za'ra, iwasu'u za'ra ma hã.

⁸ Tahawa, te Samuéu ma nharĩ za'ra ãne: — Wanhib'apito 'Re ihâimana u'âsi mono ma aimreme hã 're sahâri mono tõ, te te wanho'reptu za'ra da, filisteu norĩ nhiptetezé wi hã.

⁹ Tawamhã Samuéu ma tô 'maiwĩ pone'ẽrebâ 'ra hã zahadu tina hâ te te irẽme'õ hã. Tawamhã ma tô wahuré zata, ãma tãma sõprub da, Uburé Danhib'apito ma. Duré taha na ãma tãma sõpru pari, ma tô tiwi rowaptẽ, Izaraéu nhihudu norĩ te te pawaptob za'ra da. Tahawa, ma tô ãma sada'â, te te tiwi irowaptẽrẽzém na hã.

¹⁰ Tawamhã Samuéu, 'Re ihâimana u'âsi mono ma tinhimizama zata na tãma sõprub ré, ma tô filisteu norĩ hã te te sina rotété, te te 'wapé za'ra da, Izaraéu nhihudu norĩ hã. Tane nherẽ, ma tô Uburé Danhib'apito hã hâ za'ra, tãirãrã'ã ne na. Tahawa, ma tô õne haré niha tihâimana za'ra. Ma tô duré oto siwa'ru rom na sisa're.

¹¹ Tawamhã Izaraéu nhihudu norĩ hã ma tô wairé Mispa hawimhã si'aba'ré da, filisteu norĩ zarina, Bete-Ca na 'ri wa'õtõ nhisi u. Tawamhã duré oto isarina za'ra si'aba'réi wamhã, ma tô te te simro, bâdâdi na.

¹² Tawamhã Samuéu hã ma tô ti'â ẽtẽ tõmo wawẽ hã. Tawamhã ma tô tihi, Mispa na 'ri nho'õmo ro wa'wa, Sẽ na daza'ru nhisi wa'wa me. Tawamhã te ãne tinha: — Ãwap si ma tô Uburé Danhib'apito hã wapawaptob za'ra. Tahawa, ma tô sisi, Ebeneze na.

¹³ Ãne ma tô filisteu norĩ ãma hã ai'uté za'ra ni. Duré tawamhã Uburé Danhib'apito hã te te tãma sa'ré za'ra õ di, dawi isisisi da hã, Izaraéu nhihudu norĩ nhipti'ai u hã, Samuéu 're hâimana mono ré hã.

¹⁴ Ãne uburé Izaraéu nhihudu norĩ te 'rinho'u filisteu norĩ te te tiwi iwaibu za'ra norĩ hã ma tô apâ tãma sõmri za'ra, Izaraéu nhihudu norĩ ma. Ecrõ na 'ri nho'õmo nhisi hawi, Gati na 'ri nho'õmo nhisi u hã ma tô 'ri nho'õmo mono bâ tãma sõmri za'ra apâ. Tahawa, ma tô Izaraéu nhihudu norĩ hã uburé apâ ãma ate za'ra, tinhipti'a za'ra na hã. Tawamhã Izaraéu nhihudu norĩ hã duré amoreu norĩ me zama ma tô rowẽ na si siré apâ 're hâimana za'ra.

¹⁵ Samuéu hã tihâimanazéb 'rãsutu u ma tô da'ãma rowairébé'wa na hã 're hâimana, Izaraéu nhihudu norĩ ma.

¹⁶ Wahup sidâpâsi ma tô 're ne Bétéu u hã, Gilga u hã, duré Mispa u hã. Ã norĩ daza'ru ãma isõ're da te tãma 're ihâi'ré za'ra mono zéb zarina ma tô te te dama ãma 're arowairébé.

¹⁷ Taha pari, ma tô apâ 're ne, 'rinho'u Rama ãma tinhorõwa u hã, duré tameb zama da'ãma rowairébé'wa na 're hâimana mono wa, Izaraéu nhihudu norĩ ma. Tawamhã Rama ãma ma tô Samuéu hã 'manha, Uburé Danhib'apito ma, danhoprubzé zatazé wedeza 'manharĩ hã.