1 Samuéu 6 - ꞌRe Ihâimana Uꞌâsi Mono Zadawa Wasuꞌu

Filisteu norĩ, wedehâ're hã apâ te te siwi isõmrizé wasu'u

¹ Tawamhã 'Re ihâimana u'âsi mono nhimiroti ré wedehâ're na hã ma tô a'amo hã 7 na ãma ai'utõ oto, filisteu norĩ nhipti'ai ãma hã.

² Tahawa, ma tô tite sasedoti norĩ zô tihârâ za'ra, duré marĩ 'manharĩ waihu'u nhipese'wa norĩ zô zama. Tawamhã sô hârâ za'ra wa, itẽme sihutu wamhã, te ãne ãma sadanharĩ za'ra: — E marĩ wa za ãma 'manharĩ za'ra ni, Uburé Danhib'apito te, wedehâ're na hã. Duré apâ ihâimanazéb u wa te wasiwi sõmri da wamhã, e marĩ, wa za isiré wasiwi sõmri ni.

³ Tawamhã ma ãma dazada'âbâ za'ra ãne, sasedoti norĩ hã, marĩ 'manharĩ waihu'u nhipese'wa norĩ me: — Izaraéu nhihudu norĩ te, 'Re ihâimana u'âsi mono nhimiroti ré wedehâ're hã, apâ asiwi sõmri aba da wamhã, taha si asiwi isõmri aba da hã mare di za. Danhoprubzé te za duré isiré hã asiwi isõmri 'wa, aiwasété za'ra wa'wa hã ãma asiwi iwa'âbâ aba zéb da hã. Duré ãne wamhã, te za aima apari za'ra wa'wa, dahâ 'rowi da'wa're tob'mai'ã hã. Tawamhã te za duré iwaihu'u za'ra wa'wa, marĩ 're i'manharĩ za'ra wa'aba mono zéb zarina, 'Re ihâimana u'âsi mono hã tinhimihâzém na te te aima iba'a za'ra wa'aba mono õ na hã.

⁴ Tawamhã filisteu norĩ hã te ãma sadanharĩ za'ra ãne, danhoprubzém na hã: — E marĩ wa za wanhoprubzé wasiwi sõmri ni, wawasété wa'âbâzéb da hã. Tawamhã ma ãma dazada'âbâ za'ra ãne sasedoti norĩ hã, marĩ 'manharĩ waihu'u nhipese'wa norĩ me hã: — Te za asiwi isõmri 'wa, imrotõ na dahâ 'rowi da'wa're tob'mai'ã si na ẽtẽ waipo pré oru na i'manharĩ hã, duré imrotõ na 'rure oru na i'manharĩ hã, filisteu norĩ te i'rãnho'õmo hâiba za'rata zarina. E marĩ wa. Imrotõ na i'rãnho'õmo norĩ hâiba zô marĩ ipipa hã watobro wa, asô iwatobro za'ra wa'aba ne hã.

⁵ Tahawa, te za isizusi za'ra wa'wa, da'wa're tob'mai'ãsi na hã, duré 'rure na hã, wanhipti'ai 're te te iwa'awamnarĩ mono hã. Ã norĩ hã te za tãma isõmri za'ra wa'wa, Izaraéu nhihudu norĩ te, 'Re ihâimana u'âsi mono wazézéb da hã. Ãne wamhã, te za ãté sazâ, te te aima irob'manharĩ wasété za'ra wa'aba zé hã, ate za'ra wa'wa ihâiba'õ norĩ ma hã, duré asipti'a za'ra wa'aba ma hã.

⁶ E marĩ wa, te aipẽ'ẽ tete na aihâimana za'ra wa'wa, Ezitu ãma apito pẽ'ẽ tete ne hã, duré ezipsiu norĩ pẽ'ẽ tete za'ra ne zama. Ma'ãpé taha wa, ãma aipo're si'âri za'ra wa'aba tõ, Ezitu 're, 're ihâimana za'ra mono norĩ ma, 'Re ihâimana u'âsi mono te te nasi irob'manharĩzém na hã, apito Fara'o hã Izaraéu nhihudu norĩ ma, te te tãma irowairébé za'ra zéb u, Ezitu hawi wairébé da.

⁷ Tahawa, te za duré ãne i'manharĩ za'ra wa'wa za: Ma'ãpé powawẽ maparane asiwi mrami aba zahadu wedewara zapore te te i'masari zahuré õ hã, ãma 'maiwasisi zahuré aba da, wedewara zapore itém na te te sari zahuré da. Taha parip si te za isiré powawẽ zapu norĩ hã tiwi isimroi wa'aba mo za, wa'ra u hã.

⁸ Tawamhã taha parip si te za oto Uburé Danhib'apito nhimiroti ré wedehâ're hã asiwi i'âri 'wa za, asiwi sẽrẽ aba da, wedewara zapore 'remhã. Tawamhã te za duré isababa oru 'manharĩ na isizusi za'ra wa'aba zéb ré wedehâ're hã asiwi isẽrẽ 'wa za, Izaraéu nhihudu norĩ te 'Re ihâimana u'âsi mono ma, za asiwi isõmri aba da hã aiwasété wa'âbâ za'ra wa'aba zéb da hã. Tawamhã te za asiwi izusi 'wa, si'uihâ na sisamro da, te te sima iwẽ zahuré zéb uwaibaba.

⁹ Ma'ãpé aipo're pese za'ra wa'aba. Powawẽ norĩ wedewara zapore hã 'rinho'u Bete-Semesi nho'õmo te te sari zahuré wamhã, ã hã te wasu'u, Izaraéu nhihudu norĩ te, 'Re ihâimana u'âsi mono hã ipire na te te iwahâ za'ra zé. Duré ãnei õ wamhã, te te isari zahuré zé hã, wa za wa norĩ hã waihu'u za'ra ni, õhõ nhimihâzéb õ na hã, da'wa're na hã, tô sapa'abâ wa'ãma iwairébé mono na hã.

¹⁰ Tawamhã filisteu norĩ hã ma tô ãne hã siwi 'manha, sasedoti norĩ te te tãma iwaihu'u za'ra zéb zarina, marĩ 'manharĩ waihu'u'wa norĩ me. Tahawa, powawẽ hã te te siwi imrami hã ma tô ãma wasisi za'ra, wedewara zapore na. Tawamhã isapure norĩ hã ma tô siwi sé, wa'ra 're.

¹¹ Tawamhã ma tô siwi tisẽ wedewara zapore 'remhã, Uburé Danhib'apito nhimiroti ré wedehâ're hã. Tawamhã isiré da hã ma tô duré siwi tisẽ isababa wedehâ're hã oru na 'rure 'manharĩ ré hã, duré da'wa're tob'mai'ãsi na romhâibarĩ ré hã.

¹² Tawamhã powawẽ norĩ hã awa'awi na ma tô wedewara zapore hã sari zahuré, iré za'ra, 'rinho'u Bete-Semesi na isisi u bâdâdi hã inomro na. Tawamhã hârâ sina te sa praba zahuré, sipa zahuré ãna bâdâdi nhiti. Tawamhã imrotõ na filisteu norĩ te, i'rãnho'õmo norĩ hã ma tô isarina ai'aba'ré, 'rinho'u Bete-Semesi ti'a zada'ré u si.

¹³ Tahawa, Bete-Semesi ãma 're idahâimana za'ra mono norĩ hã ma tô amnho trigu hã te te tehâri, ẽtẽ siwa'aba wa buru ãma. Tawamhã taha ré 'Re ihâimana u'âsi mono te, wedehâ're hã te te siwi 'madâ'â wamhã, ma tô 're to za'ra, iwẽ te.

¹⁴ Tawamhã powawẽ norĩ wedewara zapore te te iré isari zahuré hã ma tô ãwisi zahuré, Zozué Bete-Semesi ãma 're isãmra mono te te irob'rezéb u hã. Tahawa, tame ma tô 'mazahâri zahuré, ẽtẽ tõmo wawẽ 'rata. Tawamhã tame 're idahâimana za'ra mono norĩ hã, ma tô wedewara zapore 'manharĩzém na wede hã sihâri za'ra. Taha pari, ma tô siwi tipã powawẽ hã, te te siwi zata da, Uburé Danhib'apito ma.

¹⁵ Tahawa, ma tô levita norĩ hã siwi ti'â Uburé Danhib'apito nhimiroti ré wedehâ're hã. Duré wedehâ're amo zama ma tô siwi ti'â, ẽtẽ waipo pré oru na romhâibarĩ 'manharĩ ré hã. Tawamhã ma tô siwi tino, ẽtẽ tõmo wawẽ nhisiwi. Duré te te siwi nomri pari, taha bâtâ na ma tô 'rinho'u Bete-Semesi ãma 're ihâimana za'ra mono norĩ hã tinho na tinhoprubzé hã tãma zata pese za'ra, Uburé Danhib'apito ma hã. Tinhimizama zata na zama ma duré tãma tinhoprub za'ra.

¹⁶ Tawamhã imrotõ na filisteu norĩ te, i'rãnho'õmo norĩ hã ma tô ãne hã uburé marĩ hã 'madâ'â za'ra, Bete-Semesi ãma 're ihâimana za'ra mono norĩ te te i'manharĩ za'ra zé hã. Taha pari, ma tô oto ai'aba'ré apâ, taha bâtâ na, Ecrõ u hã.

¹⁷ Ãne ma tô filisteu norĩ hã siwi tisõ, Uburé Danhib'apito, tãma 're idanhoprub za'ra mono ne, tiwasédé te te ãma siwi iwa'âbâzéb da hã, romhâibarĩ ẽtẽ waipo pré oru 'manharĩ na dahâ 'rowi da'wa're tob'mai'ãsi na hã. Tawamhã danhoprubzé ẽtẽ waipo pré oru hã 'ri nho'õmo mono bâ misi si te te siwi isõmri za'ra norĩ hã ãne; Asidodi, Gaza, Asquerõ, Gati, duré Ecrõ.

¹⁸ Tawamhã ma tô duré siwi tisõ imrotõ na ẽtẽ waipo pré oru na 'rure 'manharĩ zama, 'ri nho'õmo 're filisteu norĩ te, i'rãnho'õmo norĩ za'rata zarina. 'Rinho'u hã imrotõ na i'wawi wa'ra 'rãihâ hã duré 'ri wa'õno hã 'ri nho'õmo mana wawi 're ihâimana za'ra mono hã. Tawamhã Zozué Bete-Semesi ãma 're ihâimana mono te te irob're ãma ma tô 'Re ihâimana u'âsi mono nhimiroti ré wedehâ're hã siwi tihi, ẽtẽ tõmo wawẽ nhisiwimhã. Tawamhã ta hã te zahadu 're sa'wari, ẽtẽ tõmo wawẽ hã tame rob'manharĩzém na ãma 're idasipo're pu'u za'ra mono zéb da hã.

¹⁹ Tawamhã 70 na aibâ norĩ Bete-Semesi ãma 're ihâimana za'ra mono norĩ hã ma tô 'madâ'â za'ra, 'Re ihâimana u'âsi mono te, wedehâ're 'remhã. Ãne wa ma te Uburé Danhib'apito hã simro, aibâ norĩ hã. Taha wa, ma tô ta'ru'ru ni, ahâ na te te uprosi wa, 'Re ihâimana u'âsi mono hã.

Wedehâ're hã iwisizé wasu'u, Zearĩ u hã

²⁰ Tawamhã aibâ norĩ Bete-Semesi ãma 're ihâimana za'ra mono norĩ hã te sima nharĩ za'ra ãne: — E 'wa hã te za Uburé Danhib'apito 'Re ihâimana u'âsi mono nho'remhã tihâiba, iwasété'õ iwẽ uptabi nho'remhã. Mare di. Ni'wa hã ihâimana da hã waihu'u õ di. Duré isimiroti ré, wedehâ're hã e momo wa za wasiwi sõmri ni, wanhiti za'ra 're ihâimana mono da hã.

²¹ Tahawa, ma tô romreme 'wapéi'wa hã satõrĩ za'ra, Zearĩ ãma 're idahâimana za'ra mono norĩ ma, te te rowasu'u za'ra da, ãne: — Filisteu norĩ hã ma tô we apâ siwi tisõ Uburé Danhib'apito te, wedehâ're hã. Tahawa, we ai'aba'réi wa'aba ãwa, wedehâ're hã asiwi âri aba da.