1 Samuéu 5 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono nhimiroti ré, wedehâ're isabzé wasu'u, Filisteu norĩ nhipti'ai ãma

¹ Tawamhã filisteu norĩ 'Re ihâimana u'âsi mono nhimiroti ré wedehâ're te te siwi âri parimhã, ma tô oto siwi ti'â Ebeneze na romnhisi hawi, 'ri nho'u Asidodi na isisi u.

² Tawamhã te te siwi ãwisi wamhã, ma tô oto siwi tisã, ta norĩ te ihâiba'õi ãma 're iwata za'ra mono zé 'ri 're, romhâiba 'manharĩ zababa, Dagõ na ihâiba'õ nhisi hã.

³ Tawamhã awẽm na mararé ma tô Asidodi ãma 're ihâimana za'ra mono norĩ hã siwi 'madâ romhâibarĩ Dagõ na isisi iwaptã hã ti'ai u ubu niwĩ, 'Re ihâimana u'âsi mono te, wedehâ're nho're. Tahawa, ma tô siwi ti'â romhâibarĩ hã apâ te te siwi sãrĩ da, isabzéb ãma.

⁴ Tane nherẽ, awẽm na mararé ma tô duré siwi 'madâ apâ iwaptã'ã na, 'Re ihâimana u'âsi mono nhimiroti ré wedehâ're nho're. Tawamhã romhâibarĩ 'rã hã duré ipaihi zahuré hã ma aiprub zahuré. 'Ridawa ãma te da'wa. Tawamhã ihâiba si te wahuré nomro oto.

⁵ Tahawa, ãhã na hã uburé sasedoti norĩ hã Dagõ na ihâiba'õ nhisi te hã, duré Asidodi ãma uburé ãma 're iwata za'ra mono norĩ hã te te 're wati'i zahu za'ra mono õ di tipara na hã, taha rob ãma iwaptã'ãzé hã.

⁶ Tawamhã Uburé Danhib'apito ma tô sa'ẽtẽ hâ za'ra oto, 'rinho'u Asidodi ãma 're ihâimana za'ra mono norĩ hã, duré taha waptoma tame 're ihâimana za'ra mono norĩ zama. Ihâ 'rowi iwa're tob'mai'ãsi na ma tô hâ za'ra.

⁷ Tawamhã ãne hã 'rinho'u Asidodi ãma 're ihâimana za'ra mono norĩ te te 'madâ'â za'ra wamhã, ma tô nharĩ za'ra, ãne: — Izaraéu nhihudu norĩ te, 'Re ihâimana u'âsi mono hã ma tô wahâ za'ra. Wate za'ra ihâiba'õ hã ma tô duré azâ, Dagõ na isisi hã. Tahawa, wa te wasiwi tété õ di za, Izaraéu nhihudu norĩ te, 'Re ihâimana u'âsi mono nhimiroti ré, wedehâ're hã ãme inomro da hã, wa'ratab za'ra.

⁸ Tahawa, ma tô sô 'mazatõrĩ za'ra romreme 'wapéi'wa norĩ hã, filisteu norĩ te 5 na dama i'rãnho'õmo norĩ zô, si'rã'õtõ da, te te siwi ãma sadanharĩ za'ra da, ãne: — E marĩ, wa za ãma 'manharĩ za'ra ni, Izaraéu nhihudu norĩ te, 'Re ihâimana u'âsi mono nhimiroti ré wedehâ're na hã. Tawamhã ma tô ãma dazada'âbâ za'ra ãne: — Asiwi âri aba, 'rinho'u Gati na isisi u! Tahawa, te oto filisteu norĩ hã tamomo siwi ti'â.

⁹ Tane nherẽ, te te siwi ãwisi parimhã, ma tô Uburé Danhib'apito hã duré tãma rob'manharĩ za'ra 'ri nho'õmo 'rem norĩ ma. Ma tô duré tapẽ'ẽwara za'ra ni, 'ri nho'õmo ãma 're idahâimana za'ra mono norĩ hã. Tawamhã uburé 'ri nho'õmo 'remhã ma tô dahâ 'rowi da'wa're tob'mai'ã hã te te daduri, dama ipire norĩ hã duré dama iwapu norĩ zama.

¹⁰ Tahawa, ma tô duré siwi tisõ 'Re ihâimana u'âsi mono te. wedehâ're hã, 'rinho'u Ecrõ na isisi u hã. Tawamhã duré tamomo te te siwi ãwisi wamhã, ma tô tame 're idahâimana za'ra mono norĩ hã dahârâ 'rãihâ na 're dahãsi, ãne: — Izaraéu nhihudu norĩ te, 'Re ihâimana u'âsi mono nhimiroti ré wedehâ're hã ma tô we dasiwi ãwisi ni ãwamhã. Ma tô õ norĩ hã sima wẽ za'ra, te te wa'uprosi da!

¹¹ Tawamhã ma tô romreme 'wapéi'wa norĩ hã 'mazatõrĩ za'ra, uburé filisteu norĩ ma i'rãnho'õmo norĩ ma, te te tãma nharĩ za'ra da, ãne: — Apâ asiwi sõmri aba, Izaraéu nhihudu norĩ te, 'Re ihâimana u'âsi mono nhimiroti ré wedehâ're hã 're isa mono zéb u, te te wa'uprosi tõ da, duré wa'ra norĩ hã te te wawi sõ'rebzâri tõ da. Ãne ma tô tãma nharĩ za'ra, tamemhã 'Re ihâimana u'âsi mono nhimihâzé ipire na da'ahâ na 'ri nho'õmo 'remhã dasi'utõrĩ wa.

¹² Tawamhã idâ'â za'ra õ norĩ ãma ma tô wairébé ihâ 'rowi i'wa're tob'mai'ãsi pe hã. Duré taha wa, 'ri nho'õmo 're, 're idahâimana za'ra mono zadari hã ma tô sina hâimo pese, hâiwa u hã.