1 Samuéu 4 - ꞌRe Ihâimana Uꞌâsi Mono Zadawa Wasuꞌu

Filisteu norĩ te te siwi i'ârizé wasu'u, 'Re ihâimana u'âsi mono te, wedehâ're 'manharĩ hã

¹ Tawamhã Izaraéu nhihudu norĩ hã taha bâtâ na hã ma tô wairé, filisteu norĩ te te 'wapé za'ra da hã. Tawamhã ma tô sima 'ri nhoré za'ra, Ebeneze na romnhisi ãma. Duré ma tô filisteu norĩ hã sima 'ri nhoré za'ra, Afeca na 'ri nho'õmo nhisi ãma.

² Tawamhã filisteu norĩ hã ma tô oto sisõré pese za'ra, sisisi da, si'wapé za'ra da hã. Tawamhã oto si'wapé za'ra wamhã, ma tô ãma ai'uté za'ra, Izaraéu nhihudu norĩ ãmamhã. Tahawa, dasi'wapéi 'manharĩ'wa norĩ hã ma tô 4 miu na ihâiba za'ra na hã siwi uprosi.

³ Tawamhã Izaraéu nhihudu norĩ dawi isimani za'ra hã ma tô apâ aihutu, te te sima i'ri nhoré mono zéb u hã. Tahawa, te Izaraéu nhihudu norĩ ma i'rãnho'õmo za'ra hã nharĩ za'ra ãne: — E marĩ wa, ma tô Uburé Danhib'apito hã waza'ré za'ra, filisteu norĩ te te wa'ãma ai'uté za'ra da, ãhã na hã. Oto wa te we wasiwi âri aba, Uburé Danhib'apito nhimiroti ré, wedehâ're 'manharĩ hã Silo hawimhã. Ãne wamhã, te za wawa'wab za'ra tihâiba. Tawamhã te za duré wanho'reptu za'ra, wanhitob'ru norĩ wi hã.

⁴ Tahawa, ma tô sô da'mazatõrĩ za'ra, Silo hawi da te dasiwi âri da hã Uburé Danhib'apito iwaihu'u pese te, wedehâ're 'manharĩ hã, ropoto paihi papo wa'wa 're isãmra mono ré hã. Tawamhã Hopini norĩ hã Finéaha me maparane Eri 'ra norĩ hã ma tô ime tineb zahuré, wedehâ're 'manharĩ siré hã.

⁵ Tawamhã te te duré oto siwi ãwisi wamhã, 'Re ihâimana u'âsi mono nhimiroti ré wedehâ're 'manharĩ hã, ma tô nasi hã, hârâ 'rãihâ na Izaraéu nhihudu norĩ hã. Tahawa, ma tô nasi ãma siwi ti'a sãsã'ã, te te sitẽme ãwisi za'ra wẽ te.

⁶ Tawamhã filisteu norĩ, Izaraéu nhihudu norĩ hârâ te te wapari za'ra wamhã, ma tô sima 'mahârâ za'ra, ãne: — Ma'ãpé wapari za'ra wa'aba, hebreu norĩ hârâ hã te te sima i'ri nhoré mono zéb ãmamhã. E marĩ wa merẽ. Tawamhã hebreu norĩ hã Uburé Danhib'apito te, wedehâ're 'manharĩ hã te te sima i'ri nhoré mono zéb u te te sitẽme i'ãwisi za'ra na te te oto waihu'u za'ra wamhã,

⁷ ma tô filisteu norĩ hã oto tipahi za'ra. Tahawa, te ãne sima nharĩ za'ra: — Ihâiba'õ hã ma tô 'maiwi, Izaraéu nhihudu norĩ te te sima i'ri nhoré za'ra zéb u hã. Wa za ai'utõrĩ ni! Niwamhã ãne hã wama romhâimana za'ra õ di!

⁸ Wa za ai'utõrĩ ni! E 'wa te za bété wa'anho'reptu, ihâiba'õ isiptete norĩ wi hã. Ihâiba'õ norĩ hã ezipsiu norĩ ma tô te te a'wapé a'ubuni wimhã, sipu'u pese na rob'manharĩ wasété na hã.

⁹ Tane nherẽ, ma'ãpé filisteu norĩ, asiptete za'ra wa'aba! Duré aibâ na te za i'wapé za'ra wa'wa. Ãnei õ wamhã, wapawa'âbâ ãna wa za hebreu norĩ ma, wa te 're romhuri za'ra za, õ norĩ hã pawa'âbâ ãna te te wama 're iromhuri za'ra mono ne. Tahawa, te za tô sada asi'aibâ za'ra wa'wa, 'wapé za'ra wa'aba da hã.

¹⁰ Tawamhã filisteu norĩ hã ma tô oto 'wapé za'ra, Izaraéu nhihudu norĩ hã. Tawamhã Izaraéu nhihudu norĩ ãma ma tô ai'uté za'ra. Tahawa, ma tô duré aimani za'ra, sisa'rei mono da, tinhorõwa u. Tawamhã ahâ uptabi na ma tô ai'utõ, Izaraéu nhihudu norĩ hã. 30 miu na ihâiba za'rata na ma tô uprosi ni.

¹¹ Tahawa, ma tô filisteu norĩ hã siwi ti'â, 'Re ihâimana u'âsi mono nhimiroti ré wedehâ're 'manharĩ hã. Tawamhã ma tô dame tidâ'â zahuré Erihi 'ra norĩ Hopini norĩ Finéaha me hã.

Erihi dâ'âzé wasu'u

¹² Tawamhã taha bâtâ na ma tô aibâ Bẽzamihĩ nhihudu hã wara dasi'wapézém hawi Silo u hã. Tawamhã tô bâtâ na ma tô wi. Duré robzei õ na da te waihu'u za'ra da hã ma tô uza hâsi wazui ré wi, duré ti'a na 'rãzazub ré.

¹³ Tahawa, te Eri hã nhamra tinhamrazém na bâdâdi 'rata simipari sina. Tawamhã duré hâtâ'â uptabi di, 'Re ihâimana u'âsi mono te, wedehâ're 'manharĩ ãmamhã. Tawamhã aibâ hã te te oto dama rowasu'u wamhã, uburé 'ri nho'õmo 're, 're idahâimana za'ra mono norĩ hã ma tô tapahi pese za'ra ni. Ma tô duré ta'ru'ru ni, dawawa 'rãihâ na hã.

¹⁴ Tawamhã Eri hã ma tô wapa, ida'ru'ruzé hã. Tahawa, te anha ãne: — E marĩ te ropupu'u. Tahawa, te aibâ hã itẽme wara, te te tãma rowasu'u da, Erihi ma.

¹⁵ Tawamhã Erihi ãma 98 na ãma iwahu hã. Tahawa, ma tô oto titob'a. Tahawa, te te oto rob'madâ'â waihu'u õ uptabi di.

¹⁶ Tawamhã te tãma siwasu'u, aibâ hã ãne: — Wa hã dasi'wapéi hawi, wa tô we aimani, ã bâtâ na hã. Duré tahawim haré wa we wara ãwa. Tawamhã Eri te sadanha, ãne: — E marĩ ma tô watobro, ĩ'ra.

¹⁷ Tawamhã romreme 'wapéi'wa hã ma tô ãma sada'â, ãne: — Izaraéu nhihudu norĩ hã ma tô tãma sisa're, filisteu norĩ ma. Duré da te wa'ãma i'ai'uté za'ra zé hã wasété uptabi di. Tawamhã ma tô duré ai'ra norĩ hã dazu tidâ'â zahuré, Hopini norĩ hã Finéaha me. Tawamhã filisteu norĩ hã ma tô siwi ti'â, 'Re ihâimana u'âsi mono te, wedehâ're hã.

¹⁸ Tawamhã Eri, 'Re ihâimana u'âsi mono nhimiroti ré wedehâ're te te siwi i'âri na te te wapari wamhã, ma tô waptãrã tinhamrazém hawi ba niwĩ, 'ridawa za'ẽne 'ri nho'õmo u 're idanhisisi mono zéb 'rata. Tawamhã oto ihi pese wa, duré hâipese wa, waptã'ã wamhã, ma tô butuhaihâ. Ma tô ai'utõ, õne haré. Eri hã ma tô i'rãnho'õmo na 're hâimana, Izaraéu nhihudu norĩ ma 40 na ãma iwahum na hã.

Finezaha mro dâ'âzé wasu'u

¹⁹ Tawamhã Erihi sani'wa, Finéaha mro wasã ré te nhamra. Duré oto tãma ipoto da si. Tawamhã ma tô waihu'u 'Re ihâimana u'âsi mono nhimiroti ré wedehâ're hã filisteu norĩ te te siwi i'âri na hã. Ma tô duré waihu'u, imaprewa Eri idâ'âzé hã duré imro zama idâ'âzé hã. Tahawa, ma tô ãma sépu, iwasã hã. Ma tô tãma podo oto, ai'uté hã.

²⁰ Tahawa, oto idâ'â da si, Finezaha mro hã. Tahawa, pi'õ ai'uté te te isapari za'ra norĩ hã te ãne tãma nharĩ za'ra: — Ma'ãpé asiptete! Ai'uté ma aima podo, 'watébrémi na. Tane nherẽ, imreme za'ra zô hã sipi'rai õ di. Duré te te sada'âbâ za'ra õ di ãma.

²¹ Tahawa, ma tô ina hã sisi 'watébrémi hã, Icabô na. Ãma isaprĩ hã ãne: “Izaraéu nhihudu norĩ nhipti'ai hawi 'Re ihâimana u'âsi mono nhamrazé iwatobrozém na hã.” Ãne ma tô pi'õ hã tinha, 'Re ihâimana u'âsi mono nhimiroti ré wedehâ're da te dasiwi i'âri na hã duré imaprebaba norĩ hã tiwi idâ'â zahuré na hã imro me.

²² Tawamhã te pi'õ hã tinha, ãne: — 'Re ihâimana u'âsi mono nhamrazé hã ma tô watobro, Izaraéu nhihudu norĩ nhipti'ai hawimhã. E tihai wa. 'Re ihâimana u'âsi mono nhimiroti ré wedehâ're hã wanhitob'ru norĩ te te siwi âri wa.