1 Samuéu 30 - ꞌRe Ihâimana Uꞌâsi Mono Zadawa Wasuꞌu

Dawi hã amalequita norĩ te te i'a'wapézé wasu'u

¹ Tawamhã maparane bâdâ ãma neb za'ra pari, ma tô Dawi norĩ hã 'ri'ahâ Zicradi na ite za'ra nhisi u hã aihutu. Dawi hã 'ri'ahâ nhiti 're hâimana mono ré, ma tô amalequita norĩ, Zuda u hã asisi, hâiwa nhimi'e niwĩmhã. Tahawa, ma tô 'ri'ahâ Zicradi ãma, 're idahâimana za'ra mono norĩ hã 'wapé za'ra. Tawamhã ma tô 'ri'ahâ ãma hã te te sazu za'ra.

² Ma tô uburé pese pi'õ norĩ hã waibu za'ra. Tane nherẽ, ta hã te te siwi 'maiwĩrĩ õ di. Tahawa, apâ oto si'aba'réi wamhã, ma tô uburé pese taré te te siwi simro.

³ Tawamhã Dawi tite aibâ norĩ me, tamomo apâ sihutu wamhã, ma tô 'ri'ahâ Zicradi ãma da te ãma isazu za'ra mono zé hã 'madâ'â za'ra. Duré ite pi'õ norĩ hã da te isimroi mono zé hã ma tô duré waihu'u za'ra, i'ra si'aibâ norĩ hã, duré i'ra sipi'õ norĩ hã.

⁴ Tawamhã Dawi hã tite aibâ norĩ me, ma tô ti'ru'ru, isiptete si'utõrĩ za'ra zéb u.

⁵ Tawamhã Dawihi mro pi'õ norĩ hã ma tô dazu tiwi saprõni zahuré ni, Aino'ã na isisi hã Zezereu na isa'ru nhisi hã, duré Abigaiu imrotõ, Nabau na i'amo'aba nhisi hã tiwi idâ 'ri'ahâ Carmeru na isisi ãmamhã.

⁶ Tawamhã Dawihi ma hã ropire uptabi di. E marĩ wa. Ite aibâ norĩ hã 'ra ãna oto hâimana za'ra wa, ma te oto isé pire hã sô tiwatobro za'ra. Tahawa, Dawi hã ẽtẽ na te te siwi wĩrĩ da te ãma sima robzanhamri pibu za'ra. Tane nherẽ, ma tô Uburé Danhib'apito ite 'Re ihâimana u'âsi mono nhimipawaptobzém na hã ipẽ'ẽ 'remhã aptete.

⁷ Tahawa, ma tô sasedoti Abiata, Aimeretihi 'ra ma hã tãma tinha ãne: — We ãwa ĩma âri, sasedoti norĩ si'uzazé hã, 'Re ihâimana u'âsi mono te iré ãma sadanharĩ da. Tawamhã Abiata ma tô tãma ti'â.

⁸ Tahawa, ma tô Dawi hã Uburé Danhib'apito hã sadanha ãne: — E we ãwa pi'uriwi waro wamnarĩ'wa norĩ zarina hã wa za mo. E tawamhã te sasãmri waihu'u pese za'ra di duré, te iwaibu da hã. Tawamhã ma ãne 'Re ihâimana u'âsi mono hã ãma sada'â: — Aimorĩ tô isarina za'ra hã. Tawamhã sasimri za'ra wamhã, da te isimroi mono norĩ hã te za isõ'reptu za'ra.

⁹ Tawamhã Dawi, tite 600 na aibâ norĩ me hã ma tô oto wairé. Tawamhã panho'õmo ãma Bezo na isisi u sihutu wamhã, ma tô ni'wam norĩ tame a'â daza'u tihâimana za'ra.

¹⁰ Dawi hã ma tô ta hawi duré mo, 400 na aibâ norĩ ré. Tawamhã isiré norĩ 200 na ihâiba za'ra norĩ hã ma tô daza'u asimro sadâ'â zé te, panho'õmo na te te isaprĩ za'ra da hã. Tahawa, te daza'u hã tihâimana za'ra.

¹¹ Tahawa, Dawihi te aibâ norĩ hã ma tô a'ubuni wimhã siwi sõpẽtẽ, aibâ iprédupté ezipsiu hã. Ta hã ma tô siwi saprõ, Dawihi u hã. Tawamhã ma tô isa hã tãma sõmri za'ra, duré â hã,

¹² figuera 'rã i'ré hã, duré maparane i'ru 'ré na uwa 'rãi'ré prã 'manharĩ na i'u'ẽne hã. Si'ubdatõ mara na duré si'ubdatõ bâtâ na ma tô sai ãna tihâiba, iprédupté hã, duré â te te hâ'rẽne ãna hã. Tane nherẽ, sai parimhã, ma tô apâ isiptede hã tãma wi.

¹³ Tawamhã te Dawi ãne sadanha: — E 'wa hã asib'apito. E ma hawimhã a hã. — Wa hã ezipsiu norĩ siré, amalequita na a'uwẽ wamri ma romhuri'wa ĩpawa'âbâ ãna. — Ãne ma te ãma tãma wa'rã, aibâ iprédupté, ezipsiu hã. Te duré tãma siwasu'u ãne: — Ĩnhib'apito hã si'ubdatõ bâdâ imorĩ 'remhã ma tô ĩrẽ ãmemhã, ĩhâzé wa.

¹⁴ Wa norĩ hã wa te da'wapé za'ra da, wa tô asisi ni, quereti norĩ nhipti'ai u hã, duré Zuda na ti'a nhisi hâiwa nhimi'e niwĩb u hã, duré Calebihi nhihudu norĩ nhipti'ai u. Wa tô duré tawamhã ãma sazu za'ra ni, 'ri'ahâ Zicradi na isisi ãmamhã.

¹⁵ Tawamhã Dawi te tãma tinha ãne: — E tawamhã ĩzaprõni õ di za, amalequita norĩ ihâimana za'ra zéb u hã. Tawamhã aibâ iprédupté ma ãma tãma wa'rã ãne: — Marĩ õ di. Wa za tô asaprõ, a hã, 'Re ihâimana u'âsi mono nhisi na ĩwĩrĩ tõ da hã, duré ĩnhib'apito ma ĩhâiba nhomri tõ da hã, ĩma ropisutu wamhã.

¹⁶ Tawamhã ma tô oto saprõ, Dawi hã. Te te saprõni wamhã, amalequita norĩ hã ti'ai mono bâ te te ropéi mono haré ma tô sõpẽtẽ za'ra. Filisteu norĩ wi, duré Zuda ti'ai ãma marĩ ahâ na te te dawi waibu za'ra wẽ te, te dato isa'ẽne hã sima 'manharĩ za'ra, mra te te ihuri na hã, duré â sipãrĩ te te i'âhuri na zama.

¹⁷ Tawamhã ãma awẽ wamhã, rowa'a wi ma tô Dawi hã a'wapé marazéb u. Tahawa, ni'wa hã simani õ di. 400 na aibâ ipréduptém norĩ, awaru ba'õmore te te sima ibazadâ za'ra na si, ma tô tawamhã ãma aimani za'ra.

¹⁸ Tawamhã Dawi hã ma tô uburé sõ'reptu za'ra, da te isimroi mono norĩ hã, duré timro norĩ zama. Isibrob za'ra hã ma tô duré uburé apâ 'wasa, amalequita norĩ te te siwi iwaibu hã.

¹⁹ Sô 'mairobaba õ di. Dawi hã ma tô apâ uburé te te simro, isib'a'uwẽ 'ra si'aibâ norĩ hã, i'ra sipi'õ norĩ hã, uburé marĩ isa'ẽtẽ norĩ hã, duré isurure norĩ hã, amalequita norĩ te te aré siwi iwaibu hã, tiwi za'ra.

²⁰ Uburé pone'ẽrebâ norĩ hã ma tô apâ te te simro, powawẽ norĩ zama. Tahawa, te Dawihi te aibâ norĩ hã danhimizama te te tãma simro Dawihi ma hã. Tawamhã te ãne tãma nharĩ za'ra: — Ã hã asimizama da hã.

²¹ Tawamhã Dawi hã ma tô apâ mo, 200 na aibâ norĩ sadâ'â uptabi za'ra wa, ime isi'aba'réi õ norĩ u, Bezo na panho'õmo nhisi ãma isa'u isi'ubumroi u hã. Tawamhã ma tô aibâ norĩ hã wairé, Dawi norĩ hã, ite aibâ norĩ me, te te sõpẽtẽ za'ra da hã. Tawamhã Dawi ma tô 'râwi itẽme tiwisi za'ra. Tahawa, ma tô õne haré azawi, tinhib'a'uwẽ norĩ hã.

²² Tane nherẽ, ni'wam norĩ hã aibâ hã iwasédé Dawihi siré isi'aba'ré hã ma tô tãma nharĩ za'ra ãne: — Õ norĩ hã wame si'aba'réi õ di. Tahawa, marĩ we wa te i'wasari hã wa te tãma i'manhomri za'ra da hã mare di za. Timro norĩ si, duré ti'ra norĩ si te za tite mono bâ apâ hã te te waibu. Taha pari te za õne haré duré siré oto te te simro.

²³ Tane nherẽ, ma Dawi hã ãma tãma wa'rãmi za'ra ãne: — Ĩsisãnawã norĩ, ãne hã 'manharĩ za'ra wa'aba õ di za, Wanhib'apito 'Re ihâimana u'âsi mono te te wama isõmri za'ra na hã. Õ hã ma tô wanho'reptu za'ra. Ma tô duré wapawaptob za'ra, wanhitob'ru norĩ ãma wa te ãma ai'uté za'ra da hã.

²⁴ Ni'wa hã te te ãma asaze za'ra wa'aba dai õ di, iwaihu'u za'ra wa'aba zém na hã. Tahawa, wa za uburé wasima ãma wasipé za'ra, aiwapsi da. Tawamhã ni'wam norĩ daza'u danhimarĩ 'rata isi'ubumro norĩ hã te za duré aiwa ãma sima aipé za'ra, dasi'wapéi u isi'aba'ré norĩ me hã.

²⁵ Ãne Dawi ma tô ti'ru tinhimiroti hã, da te oto 're 'madâ'â u'âsi za'ra mono da ãma. Taha zarina te Izaraéu nhihudu norĩ hã roti õne u'â oto siwi 're sama.

²⁶ Tawamhã Dawi Zicradi u apâ wisi wamhã, ma tô marĩ hã tinhitob'ru norĩ wi te te iwaibu za'ra hã, tisiwaihu'u norĩ ma sõmri za'ra, Zuda ti'ai ãma dama i'rãnho'õmo norĩ ma. Tawamhã ãne rob'ui'éré na hã ma tô tãma nharĩ za'ra: — Ã hã ate za'ra wa'aba da, wa ãma aima sõmri za'ra wa'wa, Wanhib'apito 'Re ihâimana u'âsi mono nhitob'ru norĩ wi, wa te irowaibu te aima ãma ipo'o za'ra wa'wa hã.

²⁷ Tawamhã Dawi hã ma tô tinhoprubzé hã sõmri za'ra, ãne 'ri'ahâ nhisi norĩ ãma dama i'rãnho'õmo norĩ ma hã: Bétéu, Rama hâiwa nhimi'e niwĩ Zuda ti'ai ãma, duré Zati,

²⁸ Aro'e, Simote, duré Estemoa,

^29-31 Raca'u, Horma, Borasã, Atasi, duré Hebrõ. Duré 'ri'ahâ zerameu norĩ 're ihâimana za'ra mono zéb u zama ma tô duré sõmri za'ra tinhoprubzé hã, duré queneu norĩ u zama, uburé daza'ru na Dawi hã tisiré aibâ norĩ ré, 're imorĩ u hã.