1 Samuéu 3 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, Samuéu te te i'mahârâzé wasu'u

¹ Tawamhã Samuéu hã zahadure nherẽ, ma tô Eri hã te te 're pawapto, 'Re ihâimana u'âsi mono Uburé Danhib'apito ma romhurizém na hã. Tawamhã tô taha bâtâ mono na Uburé Danhib'apito zadawa wasu'u hã suru na ma tô dama 're simasisi. Ma tô duré suru na marĩ hã da te 're 'madâ'â za'ra, danhotõ 'rowim ne.

² Eri hã te te rob'madâ'â pibui prã ti oto. Tahawa, nimahã mara na hã te oto nhono, tinhimiwaptâ ãmamhã.

³ Tawamhã Samuéu hã, romhâ 'manharĩ na 'ri iwazéb zahi 're, te nhono, 'Re ihâimana u'âsi mono nhimiroti ui'éré wedehâ're 'manharĩ 're isa mono zéb ãma. Duré taha ré hã, te zahadu ãro, 'Re ihâimana u'âsi mono te rob'uiwẽzé hã.

⁴ Tawamhã te Uburé Danhib'apito 'mahâ ãne: — Samuéu, Samuéu! Tawamhã ma tô sada'â ãne, Samuéu hã: — E marĩ. Ãhãta ãme wa nhamra.

⁵ Tawamhã wara sina te wara Samuéu hã, Erihi za'warizéb u. Ãne te sadanha: — Ĩnhib'apito, e te ĩ'mahâ. Ĩ'mahârâ wamhã, ãhãta wa za, ai'rata. Tane nherẽ, Eri ma tô ãma tãma wa'rã, ãne: — Wa hã te ai'mahârâ õ di. Aimorĩ apâ, asimiwaptâ u. Tawamhã ãne te te tãma nharĩ wa, ma tô apâ mo, Samuéu hã.

⁶ Tawamhã Uburé Danhib'apito te duré 'mahârâ zahu, Samuéu hã. Tahawa, ma tô duré udu. Ma tô duré mo, Erihi za'warizéb u. Ãne te sadanharĩ na sahu duré: — Ĩnhib'apito, e te ĩ'mahâ. Ĩ'mahârâ wamhã, ãhãta wa za, ai'rata. Tane nherẽ, ma duré ãma sada'â, ãne: — Ĩ'ra, te ai'mahârâ õ di. Mo oto apâ aimorĩ, asimiwaptâ u.

⁷ Tawamhã Samuéu hã zahadu te te waihu'u õ di, Uburé Danhib'apito hã. E marĩ wa. Zahadu 'Re ihâimana u'âsi mono niwamhã te te tãma nharĩ õ wa.

⁸ Tawamhã Uburé Danhib'apito te duré 'mahâ, Samuéu hã si'ubdatõ ãmamhã. Tahawa, ma tô duré udu wara sina. Tawamhã ma tô mo duré, Erihi za'warizéb u hã. Tahawa, te duré sadanha, ãne: — Ĩnhib'apito, e te ĩ'mahâ. Ĩ'mahârâ wamhã, ãhãta wa za, ai'rata. Tawamhã Eri ma tô oto waihu'u, Uburé Danhib'apito te te nasi i'mahârâ na hã, Samuéu hã.

⁹ Tahawa, te ãne tãma tinha: — Apâ te za aimo asimiwaptâ u. Te te duré ai'mahârâ na sahu wamhã, ãne sada'âbâ za: “E marĩ, Uburé Danhib'apito. Asib'a'uwẽ, ãhãta wa aiwapa.” Ãne ma tô Eri hã ãma tãma asanho, za te te tãma ãma iwa'rãmizém na hã. Taha pari, ma tô oto mo apâ, Samuéu hã tinhimiwaptâ u.

¹⁰ Tawamhã Uburé Danhib'apito ma tô oto itẽme mo. Tahawa, te oto i'rata za. Tawamhã iwana nasi te te i'mahârâ ne, ma tô duré 'mahâ, ãne: — Samuéu! Samuéu! Tawamhã Samuéu ma sada'â oto ãne: — E marĩ! Asib'a'uwẽ ãhãta wa aiwapa.

¹¹ Tawamhã te Uburé Danhib'apito hã tãma tinha ãne, Samuéu ma: — Wa hã wa za tãma rob'manharĩ za'ra, marĩ iwasété uptabi na, Izaraéu nhihudu norĩ ma. Tahawa, ãne hã uburé za te tãma irob'manharĩ za'ra zé te te sina wapari za'ra wamhã, te za tãma tipahi pese za'ra.

¹² Taha bâtâ na hã wa hã wa za tãma rob'manha, Erihi ma, uburé i'ra norĩ hâiba na te tãma iropisutuzéb zarina, isãna'rata hawimhã duré i'rãsutu u hã.

¹³ Wa tô tãma tinha, za i'ra norĩ te 're i'ahâri u'âsi mono na hã. E marĩ wa. I'ra norĩ hã ĩhâiba na te te 're nharĩ wasété zahuré mono wa. Tawamhã ãne za te tãma i'manharĩ zahuré zé hã, Eri hã te te waihu'u pese di. Tane nherẽ, ti'ra norĩ wi te te sawi zahuré õ di, te te 're i'manharĩ wasété zahuré mono zé hã te te isahâri da hã.

¹⁴ Tahawa, sena na wa tãma waihu'u za'ra, Eri norĩ ma hã i'ra norĩ hâiba na hã za niwamhã 'Re ihâimana u'âsi mono ma tinhoprubzém na hã tiwasédé te te sima ãma 're ipari waihu'u za'ra mono õ na hã.

¹⁵ Tawamhã ãne te te tãma nharĩ pari, ma tô oto nhono Samuéu hã, ãma i'awẽzéb u. Tawamhã ma tô oto udu. Utu wamhã, ma tô duré oto 'ridawa, 'ridawa za'ẽne hã romhâ 'manharĩ na 'ri iwazéb zahi u, 're idanhisisi mono zéb 'ridawa za'ẽne hã. Tawamhã duré pahi di, Erihi ma, te te tãma iwasu'u da hã, sõtõ 'rowim ne marĩ te te i'madâ'âzé hã.

¹⁶ Tane nherẽ, te Eri hã 'mahâ, ãne: — Ĩ'ra Samuéu! Tahawa ma sada'â ãne: — E marĩ. Ãhãta ãme wa nhamra.

¹⁷ Tawamhã te Eri sadanha ãne: — E niha ma tô 'Re ihâimana u'âsi mono hã aima rowaihu'u. Ĩwi udâ tõ. Tawamhã 'Re ihâimana u'âsi mono te za aima rob'manha, uburé te te aima inharĩzé, ĩma wasu'u õ wamhã.

¹⁸ Tahawa, Samuéu ma tô uburé tãma wasu'u, te te tiwi udâ ãna, te te tãma inharĩzé hã. Tawamhã te Eri tinha, ãne: — Õ hã tô 'Re ihâimana u'âsi mono, Uburé Danhib'apito. Ĩma wẽ di tô, marĩ te te 're i'ab'manharĩ mono da hã, tãma iwẽzéb zarina si!

¹⁹ Tawamhã Samuéu hã ma tô oto tiprédu. Prédu wamhã, ma tô Uburé Danhib'apito hã ime 're hâimana. Uburé marĩ hã te te 're ab'manharĩ mono da, te te tãma inharĩzéb zarina, ma tô ãma uwaimra, 'Re ihâimana u'âsi mono hã.

²⁰ Ãne wa, ma tô uburé Izaraéu nhihudu norĩ hã ti'ai wa'õtõ nho'õmo 're ropâ 're ihâimana za'ra mono hã waihu'u za'ra, Dã bâtâ pusizém hawi Beseba bâtâ zasizéb u, Samuéu tô sena na Uburé Danhib'apito zadawa 'mahârâ'wa na hã.

²¹ Tawamhã Uburé Danhib'apito ma tô duré Silo u hã nasi itẽme aimasisi, Samuéu u, imorĩ'rata na tãma isihâi'rézéb u, duré te te tãma inharĩzéb u. Tahawa, ma tô uburé Izaraéu nhihudu norĩ hã Samuéu mreme hã te te siwi 're wazé pese.