1 Samuéu 27 - ꞌRe Ihâimana Uꞌâsi Mono Zadawa Wasuꞌu

Dawi hã Filisteu norĩ wa'wa, 're ihâimana mono zé wasu'u

¹ Tawamhã te Dawi hã ãne sima rosa'rata: — Nimahã bâtâ na Sau hã te za ĩwi. Tahawa, ĩma wẽ di za ĩmorĩ da hã, ĩsimani da, filisteu norĩ nhipti'ai u. Tawamhã te za Sau hã taré ĩzô 're rĩtĩ, uburé Izaraéu nhihudu norĩ nhipti'ai mono na hã. Ãne wamhã, wa za ĩsima iwẽ na nhamra, te ĩsima romnhimimnhasi ãna.

² Tahawa, ma tô oto Dawi hã mo, ãne te te sima rosa'rata wi, tite aibâ norĩ 600 na ihâiba za'ra norĩ ré, Aqui hã Ma'oquihi 'ra 're ihâimana mono zéb u, Gati na 'ri nho'õmo nhisi ãma danhib'ihâ'a hã.

³ Tawamhã Dawi norĩ hã tite aibâ norĩ me ma tô oto tame 're hâimana za'ra, Gati ãma 'ra ré, duré mro ré. Dawihi me ma tô imro norĩ hã 're hâimana zahuré, ãne isisi zahuré hã: Aino'ã, Zezereu na isa'ru nhisi hã, duré imrotõ hã Abigaiu, Nabau na i'amo'aba nhisi hã aré Carmeru na isa'ru nhisi ãma hã.

⁴ Tawamhã Sau, Gati u Dawi isimanizé te te waihu'u wamhã, ma tô oto sazâ, te te sô 're i'aba mono zé hã.

⁵ Tawamhã te Dawi hã Aquihi ma tinha ãne: — A hã ĩ'ãma asiwaihu'u wamhã, te za ĩma isõ, 'ri'ahâ isurure hã iwa 're ĩhâimana mono zéb da hã. E marĩ wa. Ĩma hã tô i'uwaibaba õ wa, aime 're ĩhâimana u'âsi mono da hã, 'ri'ahâ isa'ẽtẽ wamhã.

⁶ Tawamhã Aqui hã ma tô tãma tisõ, 'ri'ahâ Zicradi na isisi hã, Dawihi ma. Tawamhã tahawim haré ãhã na zama Zicradi, Zudaha nhihudu norĩ nhib'apito te hã.

⁷ Tawamhã Dawi hã ma tô iwa 're hâimana, misi wahu pari maparane si'uiwa na a'amo ãma isi'utõrĩ na, filisteu norĩ za'rui 'remhã.

⁸ Tawamhã Dawi, tite aibâ norĩ me, daza'rui wa duréi a'uwẽ 're ihâimana za'ra mono norĩ te te 're i'wapé za'ra mono na hã ma tô ãma romhõsi za'ra, a'uwẽ Gezuri na iwamri norĩ na hã, a'uwẽ Zirzi na iwamri norĩ na hã, duré a'uwẽ amalequita na iwamri norĩ na hã. Tahawa, ma tô isipti'a za'ra 'remhã te te 'wapé za'ra, Su na rowamri hawi, Ezitu u.

⁹ Tawamhã uburé aibâ norĩ hã ma tô te te siwi 're uprosi, pi'õ norĩ hã duré. Tawamhã isimizama pone'ẽrebâ zama, powawẽ zama, awaru po'repore zama, duré awaru ba'õmore zama hã ma tô te te tiwi 're waibu za'ra. Ma tô i'uza za'ra zama duré te te tiwi 're waibu za'ra. Tahawa, Dawi hã Gati u apâ 're ne mono sidâpâsi,

¹⁰ ma tô Aqui hã te te 're sadanharĩ ãne: — E ma hã ma tô i'a'wapé ã bâtâ na hã. Tawamhã Dawi hã ma tô te te ãma 're sada'âbâ Zuda ti'a niwĩ hâiwa nhimi'e niwĩmhã ro 're ihâimana mono ãma te te 're ida'a'wapéi mono na hã, niha wamhã zerameu na a'uwẽ wamri norĩ ãma hã, niha wamhã duré queneu norĩ nhipti'ai ãma hã.

¹¹ Tawamhã Dawi hã uburé pese ma tô te te a'uprosi aibâ norĩ hã pi'õ norĩ zama, ni'wa hã apâ Gati u hã wisi tõ da, tite aibâ norĩ me marĩ te te i'manharĩ za'ra zém na dama ipire ma te te i'mairowasu'u da hã. Ãne Dawi hã, ma tô filisteu norĩ siré 're hâimana mono ré hã te te 're 'manharĩ.

¹² Tahawa, Aqui hã ma tô te te 're umnhasi, Dawi hã. Tahawa, te ãne te te dama 're wasu'u wẽ: — Ã hã ma tô isiré Izaraéu nhihudu norĩ hã, te te siwi 're wẽ'õ pese. Tahawa, te õne u'âsi za te te ĩma 're romhuri.