1 Samuéu 26 - ꞌRe Ihâimana Uꞌâsi Mono Zadawa Wasuꞌu

Dawi hã Sau te te aré duré iwĩrĩzé wasu'u

¹ Tawamhã ni'wam norĩ Zipe na romnhisi ãma 're isi'ubumroi mono norĩ hã ma tô ai'aba'ré, Zibea na romnhisi u, Sauhu ma te te rowasu'u za'ra da, Dawi hã tiwi isima'uri na hã Haquira na ẽtẽ nhisi ãma, Zézimo na romnhisi nho're.

² Tawamhã ãne te te tãma rowasu'u za'ra wi, ma tô Sau hã awa'awi mo, Zipe na rop si 're irosa'wari mono nhisi u. Dasi'wapéi 'manharĩ'wa norĩ iwẽ uptabi hã 3 miu na ihâiba na ma tô te te simro siré, sô sõpré mono da, Dawihi zô.

³ Tawamhã ma tô sima 'ri nhoré za'ra Haquira na ẽtẽ nhisi ãma, Zézimo na romnhisi nho're. Tahawa, Dawi hã te nhamra a'ubuni wi supara'ré ãma. Taha ré, ma tô Sauhu wasu'u hã wapa isarina imorĩzém na hã.

⁴ Tahawa, ma tô Dawi hã tite aibâ norĩ hã 'mazatõ, te te 'maiwapsãi'a mono da, Sau tô sena õme ihâimanazé hã te te waihu'u da.

⁵ Tawamhã Dawi hã ma tô õne haré mo. Morĩ wamhã, ma tô sõpẽtẽ, Sau norĩ te te sima i'ri nhoré za'ra zé hã. Tahawa, ma duré tisã Sau norĩ isõtõ zahuré zé hã Abinehe me. Ta hã dasi'wapéi 'manharĩ'wa norĩ wada'uri'wa, Nehe 'ra. Sau hã te te sima i'ri nhoré za'ra zéb 'remhã te nhono. Ite dasi'wapéi 'manharĩ'wa norĩ hã te te sima i'ri nhoré za'ra mono na, ma tô ãma siwi uirĩ.

⁶ Tawamhã Dawi te hitita na a'uwẽ iwamri hã sadanha Aimereti duré Abisai, Zeru'iza na ina nhisi hã, Zoabihi sisãnawã hã ãne: — E 'wa hã te za ĩme mo, Sau norĩ te te sima i'ri nhoré za'ra zéb u hã. Tawamhã Abisai ma ãma sada'â ãne: — Wa hã wa za ãma mo asiré.

⁷ Ãne ma tô taha mara na hã tizasi zahuré Dawi norĩ hã Abisaihi me hã, Sau norĩ te te sima i'ri nhoré za'ra zéb u. Tawamhã ma tô Sau hã sõtõ ré sõpẽtẽ zahuré, 'ri nho'õmo wa'wa, duré te te ãma romnhiptâ'â haré i'rãihâ na sab ré ite isi'uwazi 'rã'wa hã. Abine norĩ hã te Sau manawawimhã tinhotõ za'ra, dasi'wapéi 'manharĩ'wa norĩ me.

⁸ Tawamhã te Abisai Dawihi ma tinha ãne: — Ã mara na hã 'Re ihâimana u'âsi mono ma tô asitob'ru hã asib'rata aima tisõ. Ma'ãpé ĩma rowairébé, Sauhu ãma sa'ẽtẽ ite isi'uwazi 'rã'wa na te ãma romnhiptâ'â da. Ãhã wamhã te ãma isahu da hã mare di za ihâiba zapu'u na ti'ai u hã.

⁹ Tane nherẽ, ma tô Dawi hã ãma tãma wa'rã ãne: — Tô'ã. Wĩrĩ tõ. E marĩ wa. Ni'wa hã 'Re ihâimana u'âsi mono apito da, te te ipisudu hã te te wĩrĩ da, tipa te te sarõtõ wamhã, te za Wanhib'apito hã tãma rob'manha.

¹⁰ Sena na 're ihâimana u'âsi mono ne Wanhib'apito, tô sena te za tô taha si tiwĩ Sau hã, ite bâdâ hã tãma wisi wapsi, idâ'âzéb da hã, niha wamhã tô, dasi'wapéi u.

¹¹ Tahawa, wa tô waptẽ, Wanhib'apito wi, te te ĩpatété da, te sada sarõtõ tõ da apito da, te te ipisutu da hã. Tahawa, oto ub'rẽ si wa te tiwi âri, duré ite isi'uwazi 'rã'wa zama. Taha parimhã, õne haré wa za oto apâ wanem ni.

¹² Tawamhã Dawi hã ma tô tiwi ti'â, isi'uwazi 'rã'wa si, duré ub'rẽ si, Sauhu 'rã ãma isima'wara norĩ si. Taha pari, ma tô oto ne, Abisaihi me hã. Taha ré hã ni'wa hã te te 'madâ'â zahuré õ di. Duré ni'wa hã te te waihu'u zahuré õ di, marĩ te te i'manharĩ zahuré zém na hã. Ni'wa hã duré topo'o õ di. Uburé ma tô tinhotõ pese za'ra. E marĩ wa. Uburé Danhib'apito te te hâ za'ra wa, aptâ'â uptabi na hã.

¹³ Tawamhã Dawi hã ma tô saprĩ ẽtẽ siwa'aba na zara u, te te sai'uri da, ẽtẽ na isisi u, Sau norĩ ma hã tãma romhâ uptabi za'ra da.

¹⁴ Tahawa, ma tô oto hâ, hârâ 'rãihâ na Abinehe ma, duré Sauhu te dasi'wapéi 'manharĩ'wa norĩ ma, ãne: — Abine, e ma tô ĩhârâ wapa. Ãhã wamhã, te Abine hã anha ãne: — E 'wa te hâ, apito ma hã.

¹⁵ Tahawa, Dawi ma sada'â ãne: — Oro a hã aibâ za. E Izaraéu nhihudu norĩ nhipti'ai 're danhipai u dasi'wapéi 'manharĩ'wa asiptete õ di duré. Asiptete di. Tane nherẽ, e niha bâ bété asib'ihâ'a 'wawimhã aimapa õ di. Awa'awi na hã ma tô ni'wa hã ãzé 'ri asima isõré za'ra wa'aba zéb u apito asib'ihâ'a hã te te wĩrĩ da.

¹⁶ Abine, ma tô ãma i'upa, asib'ihâ'a 'madâ'â na hã. Wanhib'apito sena na 're ihâimana mono ne, te za tô sena uburé a norĩ wa'wa hã ai'utõrĩ 'wa, asib'ihâ'a za'ra wa'wa hã Wanhib'apito 'Re ihâimana u'âsi mono, si'apito da, te te ipisutu 'wawimhã aimapa za'ra wa'aba õ wa. Duré ĩwapari! E mahãta apito te isi'uwazi 'rã'wa hã. E mahãta duré ub'rẽ, i'rãihâ na isa hã.

¹⁷ Tawamhã Sau hã ma tô mreme waihu'u, Dawi hã. Tahawa, te ãne sadanha: — E a hã Dawi, ĩ'ra. Tawamhã Dawi ma tô sada'â ãne: — Ĩnhib'apito, ĩhe, wa hã.

¹⁸ Te duré tãma tinha ãne: — E marĩ da, te bété asib'a'uwẽ nherẽ, we ĩzarina aimorĩ na hã i'uzusi mo. E marĩ te 'manharĩ bâ, iwasédé hã.

¹⁹ Apito, te za ĩwapa, za te aima inharĩzém na hã. 'Re ihâimana u'âsi mono, ĩzada aihâimana da, te te ai'rãi pi'rai wamhã, te za õ hã danhoprubzém na tãma asõpru wamhã tinhimirosa'rata na hã ai'ãma saprĩ za. Tane nherẽ, duré, ãne na hã nima norĩ aibâ te te siwi 'manharĩ wamhã, tô za ibâre 'Re ihâimana u'âsi mono nhimihâzé isisiwi waptã'ã za'ra da hã. E marĩ wa. Õ norĩ hã ma tô siwi ĩwaze, Wanhib'apito 'Re ihâimana u'âsi mono nhipti'a nhiti, wasiré a'uwẽ'õ norĩ nhipti'ai u, ro hã romhâibarĩ na si 're idawata za'ra mono zéb u.

²⁰ Tahawa, Wanhib'apito 'Re ihâimana u'âsi mono nhiti, romhâ na wasiré a'uwẽ'õ norĩ nhipti'ai 're da te ĩwĩrĩ tõ da hã ma'ãpé ĩpawapto na. E marĩ da, ma tô Izaraéu nhihudu norĩ nhib'apito we aimo ãwamhã, ĩzô 're airĩtĩ mono da. Wa hã wapsã'u ne hã marĩ dai õre di. E marĩ da, te we ĩzô 're i'aba mo wi'i zô ẽtẽ na da te 're i'aba za'ra mono ne.

²¹ Tawamhã Sau ma te ãma tãma wa'rã ãne: — Wa hã wa tô ãma upa. Tahawa, apâ te za aimo. Niwamhã te aima 'manharĩ wasété zahu õ di za, ã mara na hã a hã ĩwazé wa. Tahawa, wa tô ĩnhimiza'rese'õ ne ĩhâimana. Wa tô duré ãma aima upa za'ẽtẽ.

²² Tawamhã Dawi ma ãma tãma wa'rã ãne: — Apito, ãhãta isi'uwazi 'rã'wa, te ate hã za. Ate aibâ norĩ hã we sô 'maimorĩ.

²³ Wanhib'apito 'Re ihâimana u'âsi mono hã te 're inomro wẽ mono norĩ ma si te te 're awa'âbâ iwẽ na hã, te te sina 're i'umnhasi za'ra mono norĩ ma hã, duré sena na i'uwaibaba na si ãma 're inomro mono norĩ ma hã. Ã bâtâ na ma tô aré ĩma aihâiba nho ĩnhib'ratamhã. Tane nherẽ, ĩnhib'rada te sarõtõ õ di, 'Re ihâimana u'âsi mono, apito da, te te i'aipisudu te i'aiwĩrĩ da hã.

²⁴ Ã bâtâ na wa hã te aiwazém ne, tane da hã wa Wanhib'apito wi waptẽ, te te ĩpawaptob da, uburé marĩ ipire hã te te ĩma 're ba'a mono da.

²⁵ Tawamhã Sau ma tô ãma tãma wa'rã ãne, Dawihi ma: — Ĩ'ra, wa ĩsima aiwẽ, 'Re ihâimana u'âsi mono hã iwẽ si te te aima 're apisutu mono da. Uburé marĩ hã 're i'manharĩ mono hã te za wẽ na 're wairébé. Tahawa, Dawi hã ma tô oto apâ mo. Sauhu zama ma tô apâ mo, tinhorõwa u.