1 Samuéu 24 - ꞌRe Ihâimana Uꞌâsi Mono Zadawa Wasuꞌu

Dawi hã, Sau te te iwĩrĩ'õzé wasu'u

¹ Tawamhã Sau, filisteu norĩ te te i'a'wapézém hawi apâ morĩ wamhã, ma tô waihu'u, Dawi a'ubuni wi Gedi na romnhisi 'rata isãmrazé hã.

² Tahawa, ma tô pisutu za'ra Izaraéu nhihudu norĩ dasi'wapéi 'manharĩ'wa iwẽ hã 3 miu na. Tawamhã ma tô ta norĩ hã isiré ai'aba'ré, Dawihi zô rĩtĩ za'ra mono da, duré isib'a'uwẽ norĩ zô zama, Pone'ẽrebâ zéré uzé si'aibâ na ẽtẽ tõmo wawẽ nhisi niwĩ bâtâ pusizém niwĩ.

³ Tawamhã Sau, ma tô oto wi ẽtẽ zahâpâ ab're 'rata, pone'ẽrebâ 'wawi wa'ra u hã bâdâdi 'ratamhã. Tawamhã tame tisai 'rada te te sa'wari da hã ma tô ãzé. Tahawa, te Dawi norĩ hã tô tame ab're 're tihâimana za'ra, ab're wa'wa u pese.

⁴ Tawamhã isiré aibâ norĩ hã ma tô tãma nharĩ za'ra ãne, Dawihi ma: — Ate hã oto bâdâ. A hã te za oto asi'madâ. Wanhib'apito 'Re ihâimana u'âsi mono ma tô tinha, asitob'ru hã te te aima sõmri da, asib'rata, a hã marĩ ãma 'manharĩ da, asima iwẽzéb uwaibaba. Tawamhã ãne wa, Dawi hã ma tô oto atãma hâire sisa'ré, Sau tisai 'rata ma isãmrazéb u. Tahawa, ma tô duré te te sina sa'rese ãna i'uza hâzada'ré hã tiwi anhizâ, suru na.

⁵ Tane nherẽ, Dawihi nhimirosa'rada hã ma tô tãma tizé na'rata, Sauhu uza hâ 'rãsudu te te tiwi sizâri wa.

⁶ Tahawa, te tite dasi'wapéi 'manharĩ'wa norĩ ma za'ra ãne: — Wa ĩsima wẽ, Uburé Danhib'apito hã te te ĩma wairébé da, marĩ iwasédé ĩnhib'apito te te ipisutu ma te 'manharĩ tõ da. Wa hã te i'wapé da hã mare uptabi di, õ hã Wanhib'apito nhimipisutu wa, si'apito da hã.

⁷ Tawamhã ãne ma tô Dawi hã timreme na tite dasi'wapéi 'manharĩ'wa norĩ wi hã ãma tiwi saprĩ za'ra isimirosa'rata za'ra na hã, te te 'wapé za'ra tõ da, Sau hã. Tahawa, Sau hã, ma tô oto wahudu. Wahutu wamhã, ma tô ẽtẽ zahâpâ na ab're hawi watobro, bâdâdi na timorĩ na hã te te ãma uzusi da.

⁸ Tahawa, ma tô Dawi hã isarina watobro. Tawamhã te ãne duré 'mahâ: — Apito Sau! Ãne wa, ma tô Sau hã aipi'ra sibabarãi u. Tawamhã Dawi hã te te iwazéb zarina ma tô hi'rãtitõ tãma nhamra. Ma tô duré ti'ubu na tãma ropto, ti'ai u.

⁹ Tawamhã te Dawi tãma tinha ãne: — E marĩ da, ma tô iwapa danhimirowasu'u hã wa hã te ĩsima iwẽ na za marĩ iwasédé te aima i'manharĩ na hã.

¹⁰ Ãhã na te za a hã iwaihu, Wanhib'apito 'Re ihâimana u'âsi mono te te ĩma i'asõmrizé hã ĩnhib'rata. Ni'wam norĩ hã ma tô ĩma nharĩ za'ra, aré te aiwĩrĩ da. Tane nherẽ, te ĩsima wẽ õ di, ãne hã te i'manharĩ da hã. Tahawa, wa tinha ãne: “Ĩnhib'rada te isarõtõ da hã mare di ĩnhib'apito da hã, õ hã Wanhib'apito te te ipisutu wa, si'apito da.”

¹¹ Ĩnhib'apito, ma'ãpé ai'uza nhizâri hâiwa'õno hã 'madâ'â ĩnhib'ratamhã. Wa hã wa tô aiwi anhizâ, ai'uza hâ 'rãsudu hã. Tane nherẽ, wa hã te aiwĩrĩ õ di. Ã hã te za iwaihu, wa hã te rosa'rata õ di, asada ĩhâimana da hã, duré ĩwasédé te ai'ãma i'manharĩ da hã. A hã ĩzô 're airĩtĩ mono zé hã ĩwĩrĩ da, te waihu'u pese nherẽ, tane nherẽ, wa hã te ai'wapéi õ di tô.

¹² Tahawa, te za Wanhib'apito si wawaihu'u, marĩ na wa te ãma i'upa na hã. E a hã e wa hã. Tahawa ĩma iwẽ õhõ si te te aima rob'manharĩ da, ĩzada aihâimanazéb zarina. Tane nherẽ, wa hã te i'ai'wapé da hã mare di.

¹³ Duréihã wahi'rata norĩ te te sima 're inharĩ za'ra mono zé hã ãne: “Iwasété norĩ hawip si rowasété pusizé hã.” Tane nherẽ, wa hã ĩwasédé hã te aima i'manharĩ da hã mare di.

¹⁴ Izaraéu nhihudu norĩ nhib'apito, ma'ãpé ãma rosa'rata, za iwĩrĩ da ãma, duré sô i'aba mono ãma, wapsã idâ'â ne zô, duré wapsã'u hã taré pese ihâimana ne zô.

¹⁵ Tahawa, te za Wanhib'apito 'Re ihâimana u'âsi mono si wawaihu'u, nimahã wa te i'upazém na hã, e a hã e wa hã. Wa tiwi waptẽ, te te ĩwaihu'uzéb zarina, ĩ'ãma sisaprĩ da, duré taha zarina te te aiwi ĩnho'reptu da hã.

¹⁶ Tawamhã Dawi ãne na te te tãma nharĩ mono pari, ma tô Sau hã tãma tinha ãne: — E tô a hã Dawi, ĩ'ra. Tahawa, ma tô oto ãma amnhihâ wawa 'rãihâ na, Sau hã.

¹⁷ Tawamhã te duré tãma tinha ãne, Dawihi ma: — A hã i'uwaibaba na si te aihâimana mo. Ĩwétési wa tô ĩwasété na hã ĩhâimana. A hã ma tô iwẽ na si ĩma aihâimana mo, wa hã ĩwasédé te aima 'manharĩ mono ré hã.

¹⁸ Ã bâtâ na ma tô ĩma asihâimanazé hâi'ré, iwẽ ĩma i'manharĩzém na hã. E marĩ wa. Ĩwĩrĩ õ wa, Wanhib'apito hã te te aima ĩhâiba nhomri nherẽ, asib'rata.

¹⁹ E ni'wa hã te aré tinhitob'ru hã satõ, dâ'â ãna morĩ da hã, te te âri parimhã asine. Mare di. Tahawa, te za Wanhib'apito hã iwẽ na hã aipawapto, ã bâtâ na ĩma i'manharĩ wẽ zé wa'rãmi.

²⁰ Tahawa, ãhã na hã tô sena wa tô waihu'u, za asi'apito da, Izaraéu nhihudu norĩ ma hã, duré za asiptete na i'rãnho'õmo na 're aihâimana mono ré 're ida'a'madâ'â mono na hã.

²¹ Tahawa, te za Wanhib'apito 'Re ihâimana u'âsi mono nhisi na ĩma iropisu, ĩnhihudu norĩ hã ĩwi uprosi tõ da. Ãne wamhã, ĩnhisi na duré ĩte a'uwẽ norĩ nhisi na hã 're dapo're si'âri za'ra mono õ di za.

²² Tawamhã Dawi ma tô tãma ropisudu hã 'manha, te te tiwi iwaptẽrẽzéb zarina. Taha pari, ma tô oto mo Sau hã, tinhorõwa u. Tane nherẽ, Dawi hã tite dasi'wapéi 'manharĩ'wa norĩ me, ma tô tisimanizéb u hã apâ ai'aba'ré.