1 Samuéu 22 - ꞌRe Ihâimana Uꞌâsi Mono Zadawa Wasuꞌu

Sasedoti norĩ, da te dasiwi i'uprosizé wasu'u

¹ Tawamhã Dawi ma tô aimani 'ri'ahâ Gati na isisi hawimhã. Tahawa, ma tô mo, 'ri'ahâ Adurã na isisi 'rata ẽtẽ zahâpâ na ab're 're ihâimana mono u. Tawamhã isisãnawã norĩ, õme ihâimana na te te waihu'u za'ra wamhã, ma tô itẽme ai'aba'ré i'rata a'â hâimana za'ra da isiré.

² Uburé aibâ norĩ tãma iropire za'ra hã, dama rowa'âbâ su'u õ 'wa norĩ, duré robzei ãna 're ihâimana za'ra mono norĩ hã ma tô uburé ai'rã'õtõ Dawi ihâimanazéb u hã. Tawamhã uburé ta norĩ ma, ma tô Dawi hã si'ĩ'rãnho'u, 400 na aibâ norĩ ihâimana za'ra ma.

³ Tawamhã Dawi, ta hawi watobro wamhã, ma tô mo, Mispa na 'ri'ahâ nhisi u, Moabi na romnhisi 'remhã. Tamomo wisi wamhã, ma tô tame ti'ai wa'õtõ nho'õmo 're, apito ma tinha ãne: — Ma'ãpé ĩmama ma duré ĩna ma rowairébé, we ãwa neb da, suru na a'â aime hâimana zahuré da ãme, 'Re ihâimana u'âsi mono za marĩ te te ĩma i'manharĩzé hã za te iwaihu'uzéb u.

⁴ Tawamhã ãne te te ãma sadanharĩ wa, ma tô Dawihi ma sa'ré, Moabi ãma apito hã. Tahawa, ma tô oto ime tihâimana zahuré imama norĩ hã ina me, Dawi hã ẽtẽ zahâpâ na ab're ãma sima'uri ré.

⁵ Tawamhã 'Re ihâimana u'âsi mono zadawa 'mahârâ'wa Gadi hã ma tô Dawihi hâimanazéb u itẽme mo. Tawamhã te ãne tãma tinha: — Ãmemhã aihâimana õ di za. Te za aimorĩ su, Zuda ti'ai u hã. Tahawa, ma tô Dawi hã watobro oto ta hawimhã. Ma tô mo, Hereti na marã nhisi u hã.

⁶ Tawamhã Sau hã te tihâiba, Zibea ãma. Ẽtẽ nhisiwi te nhamra wede zahâpâ, isib'ratamhã isi'uwazi 'rã'wa ré. Uburé ite dama ipire norĩ hã te i'wawimhã asimro. Tawamhã ta norĩ hã ma tô tãma rowasu'u za'ra, Dawi hã tisiré aibâ norĩ ré ihâimana na hã nimame.

⁷ Tahawa, te Sau hã tite dama ipire norĩ ma nharĩ za'ra ãne: — Bẽzamihĩ nhihudu norĩ, ĩwapari za'ra wa'aba! E Dawi hã, buru duré rob're uwa'ru hã, te te aima sõmri za'ra wa'aba da bâ, ma tô irosa'rata za'ra wa'wa. Duré e ite dasi'wapéi 'manharĩ'wa norĩ nhib'ihâ'a da, te te aima pisutu aba da bâ, ma tô irosa'rata za'ra wa'wa.

⁸ E taha wa, te a norĩ wa'wa hã asima irosa'rata za'ra wa'wa, ĩzada aihâimana za'ra wa'aba da. Ni'wa hã te te ĩma wasu'u õ di, ĩ'ra hã, Dawihi me tinhimiropisudu te te sima i'manharĩ zahuré zé hã. Duré ni'wa hã ĩ'ãma hâtâ'â waihu'u õ di. Ni'wa hã te te duré ĩma rowasu'u õ di, Dawi ĩnhib'a'uwẽ siré nherẽ, te te ĩwĩrĩ da, ĩzô 're irĩtĩ mono zém na hã. Duré tô ĩ'ra, ĩzada ihâimanazém na zama ni'wa te te ĩma wasu'u õ di.

⁹ Tawamhã Doedi, Edõ ti'ai wa'õtõ nho'õmo hawimhã te Sauhu ma rob'madâ'â'wa norĩ siré tihâiba. Ta hã ma tô ãne tãma wasu'u za'ra: — Wa hã wa tô 'madâ Dawi, Aimereti Aitubihi 'ra ma, te te robzanhamri ré hã, Nobi ãma.

¹⁰ Tahawa, Aimereti hã ma tô Dawihi ãma hã Wanhib'apito 'Re ihâimana u'âsi mono hã sadanha ãne: “E marĩ te za Dawi i'uwaibaba hã 'manha.” Tawamhã ãne pari, ma tô isa hã tãma tisõ, Dawihi ma. Tahawa, Guliaha nhi'wa zama ma tô duré tãma tisõ.

¹¹ Tawamhã apito Sau ma tô sô hâ, Aimeretihi zô. Duré uburé isisãnawã siwadi norĩ zô zama, Nobi ãma sasedoti na 're ihâimana za'ra mono norĩ zô zama ma tô hâ. Ãne wa, ma tô itẽme ai'aba'ré, apito u.

¹² Tawamhã oto itẽme sihutu wamhã, ma tô Sau hã tãma tinha ãne, Aimeretihi ma: — Aimereti, ĩwapari! Tawamhã asa ma sada'â ãne: — Ma'ãpé tô marĩ na hã wamhã.

¹³ Tawamhã Sau te sadanha ãne: — E marĩ da, ma tô Dawihi me ĩzada asihâiba wapto wa'wa, rosa'rada hã ĩzada 'manharĩ aba da. Duré e marĩ da, ma tô isa hã tãma isõ, duré sib'ézé 'wapa hã. E marĩ da, ma tô duré 'Re ihâimana u'âsi mono hã ãma isadanha, Dawi hã za marĩ te te i'manharĩzéb da hã. Tahawa, ma tô ãhã na awa'awi na hã Dawi ĩzada tiwasété. Tahawa, te oto duré ĩzada mare, te te ĩwĩrĩ da hã.

¹⁴ Tawamhã Aimereti ma tô ãma tãma wa'rã ãne: — Dawi hã aima da'madâ'â'wa norĩ nhipai u, aima i'umnha te 're hâimana. Duré õ hã asa'õmo uptabi, danhib'ihâ'a uburé ti'ai wa'õtõ nho'õmo mono bâ isimiwazéb za'ẽne te 're ihâimana.

¹⁵ E imorĩ'rata na 'Re ihâimana u'âsi mono hã te sadanharĩ bâ, Dawi za marĩ te te i'manharĩzéb da hã. Imorĩ'rata na hã te sadanharĩ õ di. Tahawa, ĩwasédé hã ĩ'ãma hiri õ di za, duré ĩsisãnawã siwadi norĩ ãmab zama iwasédé hã sa'ra õ di za, asada wahâimana za'ra da, rosa'rada hã wa te wasima i'manharĩ za'ra na hã. Tahawa, tane na hã ĩma waihu'u õ di.

¹⁶ Tane nherẽ, te apito Sau hã ãne tãma tinha: — Aimereti, uburé te za asisãnawã siwadi norĩ me ai'utõrĩ 'wa.

¹⁷ Taha pari, te da'madâ'â'wa 'râwi i'rata isimasam norĩ ma 'ru za'ra ãne: — Mo oto simroi wa'aba, 'Re ihâimana u'âsi mono te sasedoti norĩ hã. Õ norĩ hã, Dawihi me ma tô ĩzada si'rã'õtõ. Isimanizé hã te te ĩma wasu'u za'ra õ di, tãma waihu'u pese za'ra nherẽ. Tane nherẽ, da'madâ'â'wa norĩ, Uburé Danhib'apito te sasedoti, te te siwi uprosi tõ da, ma tô siwi sisisi za'ra.

¹⁸ Tawamhã te Sau, Doedihi ma tinha ãne: — A hã pé, tane wamhã simro na. Tahawa, imreme zarina ma tô Doedi hã simro. Taha bâtâ na hã 85 na ma simro 'Re ihâimana u'âsi mono te sasedoti hã.

¹⁹ Tawamhã Sau ma tô duré 'ru za'ra, uburé Nobi ãma 're ihâimana za'ra mono norĩ zama da te uprosi da hã, 'ri'ahâ sasedoti norĩ te ãmamhã, aibâ norĩ hã, pi'õ norĩ hã, 'watébrémi norĩ hã, ba'õtõ norĩ hã, ai'uté norĩ hã, powawẽ norĩ hã, awaru po'repore norĩ hã, duré pone'ẽrebâ norĩ hã, uburé pese si'utõrĩ pese da hã, ma tô dama ti'ru.

²⁰ Tane nherẽ, Abiata, Aimeretihi 'ra hã ma tô aimani. Tahawa, ma tô mo Dawi ihâimanazéb u hã.

²¹ Itẽme wisi wamhã, ma tô tãma wasu'u, Sau, Uburé Danhib'apito te sasedoti norĩ te te i'uprosi na hã.

²² Tahawa, te Dawi hã Abiataha ma tinha ãne: — Taha bâtâ na Doedi õme hâimana ré te 'madâ'â wamhã, wa tô waihu'u, Sauhu ma te te uburé tãma irowasu'uzé te te i'mairẽme õ zé hã. Ãne wa, wa hã wa tô duré ãma upa tô, asisãnawã norĩ isi'utõrĩzém na hã.

²³ Tahawa, ãme ĩsiré aihâimana u'âsi. Aipahi tõ. Sau hã te sima wẽ, wa norĩ, wa zahuré te te wapãrĩ da. Tane nherẽ, te za ĩme ropipa hawimhã asisõ'reptu.