1 Samuéu 20 - ꞌRe Ihâimana Uꞌâsi Mono Zadawa Wasuꞌu

Zonata hã Dawi te te ipawaptobzé wasu'u

¹ Tawamhã Dawi ma tô aimani Rama ãma 'Re ihâimana u'âsi mono zadawa 'mahârâ'wa norĩ nhorõwa hawimhã. Tahawa, ma tô Zonata 're ihâimana mono zéb u hã mo. Itẽme wisi wamhã, te ãne tãma tinha: — E marĩ te 'manharĩ bâ. E marĩ na wa tô ĩwasédé hã 'manha aimama wi hã, te te ĩwĩrĩ da, te te sima iwẽ hã.

² Tawamhã Zonata ma te ãma sada'â ãne: — Wa ĩsima wẽ wa hã, atâ'â tõ da 'Re ihâimana u'âsi mono te te ai'madâ'â pese da. Ĩmama hã te uburé marĩ hã te te ĩma 're awasu'u, te te 're i'ab'manharĩ mono zé hã ipire hã duré ipire'õ hã. Marĩ hã te te ĩwi simi'uri õ di aré. Ãhã wa, tô marĩ hã hâimana õ di.

³ Tawamhã Dawi ma ãma tãma wa'rã ãne: — Aimama ma hã waihu'u pese di, aima ĩwẽ za'ẽtẽ na hã. Tahawa, te te ĩ'ãma sima irosa'ratazé hã te te aima wasu'u õ di, waihu'u da hã, robzépata tõ da, aiwi irobzei'õzém na. Ãhã na wa za Wanhib'apito 'Re ihâimana u'âsi mono sena na 're ihâimana mono ne, a hã duré sena na 're aihâimana mono ne ropisudu hã aima 'manha. Tô sena ĩdâ'â da hã romnhimimnhasi wa oto.

⁴ Tahawa, te Zonata sadanha ãne, Dawi hã: — E marĩ te asima iwẽ, wa hã te i'manharĩ da hã.

⁵ Tawamhã Dawi ma ãma sada'â ãne: — Awẽmhã a'amo itém na dato ihâiba, aré te simini ãna apito me ĩsa da hã ĩmorĩ da si. Tane nherẽ, aima wẽ wamhã, wa za aima'u tô, a'ubuni wimhã, awẽ amoi u, hâiwahâ tẽme.

⁶ Tawamhã aimama hã ĩzô robaba wa, ĩzô simrami wamhã, tãma ĩwasu'u na za ãne: Wa hã te aiwi irowaptẽrẽ zarina ĩzatõrĩ na hã ĩmorĩ da, marĩ zarina waptu na Belẽ u hã. E marĩ wa. Ãhã na hã te za uburé ĩsiré norĩ hã tame tinhoprubzém na tinhoprub za'ra za, 'Re ihâimana u'âsi mono ma, bâdâ iwa waptã'ã wa tãma 're isõprub za'ra mono zé hã.

⁷ Tahawa, ãne te te nharĩ wamhã: “Wẽ di, marĩ õ di”, ĩma simimnhasi õ di. Tane nherẽ, sahi na hâimana wamhã, te za iwaihu, za marĩ te te ĩ'ãma i'manharĩ wasété zém na hã.

⁸ Ãne wa aiwi waptẽ, 'Re ihâimana u'âsi mono nhisi na ropisudu iwazéb zahi, te te ĩma i'manharĩzéb zarina, ĩma ãma uwaimrami da. Tane nherẽ, tô wa hã marĩ na te upai wamhã, a hã te za pé tô ĩwĩ, aimama hã te te ĩma rob'manharĩ tõ da pé.

⁹ Tawamhã Zonata ma te ãma tãma wa'rã ãne: — Tane na hã asina rosa'rata tõ! Ĩmama te te aiwĩrĩ da, te te sima irowairébézé wa hã te waihu'u 'wa'âhã, e aré te aipo're pu'u õ di. Wa aré tô aipo're pu'u.

¹⁰ Tawamhã Dawi te duré sadanha ãne: — Bété aimama hã sahi na te te aima ãma wa'rãmi wamhã, e 'wa te za ĩpo're pu'u za taha na.

¹¹ Tahawa, Zonata ma te ãma tãma wa'rã ãne: — Oto we ĩsiré aimorĩ, waneb da a'ubuni u. Tawamhã te oto siré tineb zahuré.

¹² Tawamhã Zonata te duré tãma tinha, Dawihi ma: — Wanhib'apito Izaraéu nhihudu norĩ te 'Re ihâimana u'âsi mono nho'a si wa za ropisutu ni ãhã na hã. Awẽmhã duré niha wamhã, awẽ amo na ãne bâtâ na wa za ĩmama hã sadanha. Tawamhã iwẽ na te te aihâiba na ĩzada'âbâ wamhã, wa za duré romreme hã ãma aima tisõ, waihu'u da.

¹³ Ĩmama, marĩ aihâiba na te te 'manharĩ wasété da wamhã, taha zarina apâ rowasu'u na te ãma aima siri õ wamhã, duré wẽ na aiwatobro da, te dawi ai'madâ'â wẽ õ wamhã, wa za ĩsi'ru 'Re ihâimana u'âsi mono te te ĩwĩrĩ da hã. Ĩmama siré 're ihâimana mono ne, asiré 're hâimana mono neza 'Re ihâimana u'âsi mono hã.

¹⁴ Ãhã na awa'awi na ĩdâ'â ãna ĩhâimanazém na te uzusi wamhã, ma'ãpé asimiropisutuzé hã sena na ãma ĩma uwaimrami za. Duré ĩdâ'â wamhã,

¹⁵ ma'ãpé õne u'â ĩsisãnawã norĩ hã iwẽ na 're apawapto mono za. Duré nimahã na Wanhib'apito wanhitob'ru norĩ hã uburé te te uprosi wamhã,

¹⁶ wa norĩ hã wa te wasima iropisutuzém na hã wa te ãma wasima upa tõ da. Tawamhã ãma upai wamhã a hã, te za 'Re ihâimana u'âsi mono aima rob'manha.

¹⁷ Tawamhã Zonata, Dawihi zawizém na te duré tãma 'manha, tinhimiropisudu hã. E marĩ wa, 'râwi 're isisawi pese mono ne, Dawi hã tãma sawi uptabi wa.

¹⁸ Tahawa, te ãne tinha, Dawihi ma: — Awẽmhã a'amo itém na datoi wa, asô robaba wamhã, te za asô amrami za'ra ni, asãmrazé hã wedeza baba wa.

¹⁹ Awẽ amo na asô robaba wamhã, te za duré asô amrami za'ra ni. Ãne wa, te za aimo, a'ubuni ãma aré i'aima'urizéb u a'â tame asãmra da, ẽtẽ tõmo wawẽ babarã na.

²⁰ Tawamhã wa za ti'i na hã si'ubdatõ ãma romnhimri za ẽtẽ tõmo wawẽ nho'õmoi baba marĩ isa te ãma isimrimi ne hã.

²¹ Tawamhã wa za ĩma romhuri'wai ma tinha, te te waibu da sô morĩ da hã. Tawamhã ãne te tãma nharĩ wamhã: “Õhõta ti te we ã niwĩ aimasa. Ma'ãpé sô aimorĩ, waibu da”, tawamhã ã hã te wasu'u, za rowẽ na i'aihâimanazé hã. Tahawa, rowẽ na te za aiwato, i'aima'urizém hawi. Wa hã Uburé Danhib'apito nhisi na wa ropisutu, taha zarina marĩ hã ai'ãma ihâimana'õ ãna hã za.

²² Tane nherẽ, duré ãne te tãma nharĩ wamhã, “Ti'i norĩ hã õhõta te romhâ na aimasa”, ãne wamhã, a hã aimani na za, Wanhib'apito hã te aima rob'rui wa, aimorĩ da.

²³ Ropisudu hã wa te wasima i'manharĩ mono hã Wanhib'apito 'Re ihâimana u'âsi mono te za te te 're wapawapto, wa te wasima ãma 're uwaimrami u'âsi mono da hã.

²⁴ Tawamhã ãne te te tãma nharĩ pari, ma tô oto Dawi hã aima'u a'ubuni wi. Tawamhã apito Sau ma tô oto wi, a'amo itém na datoi u hã.

²⁵ Tawamhã ma tô oto nhamra 'ri na'rata ãma, 're isimasisi u'âsi mono zéb ãma. Abine hã ma tô isababamhã nhamra, Zonata isõwamhã duré ma tô nhamra. Tane nherẽ, Dawihi nhamrazéb da si te baba na tihâiba.

²⁶ Tane nherẽ, tô taha bâtâ na Sau hã te te nharĩ õ di, te te taré rosa'rata wa ãne: “Ãté marĩ hã sô watobro. Tahawa te te tô dame 'manharĩ õ di, datoi wa 're idasihâiba upsõ za'ra mono zé hã.”

²⁷ Tawamhã maparane ãma dato a'amo itém na hâimana wamhã, ma tô duré Dawihi nhamrazé hã baba na tihâiba. Tahawa, te Sau Zonata hã sadanha ãne: — E marĩ wa, Dawi hã we morĩ õ di ahâmhâ dame sa da hã, duré ã bâtâ na dame sa da hã.

²⁸ Tawamhã i'ra Zonata ma ãma sada'â ãne: — Ma tô ĩwi rowaptẽ, morĩ da Belẽ u.

²⁹ Te ĩma tinha ãne: “Ĩma rob'ru na ĩmorĩ da Belẽ u. E marĩ wa. Tame a'uwẽ norĩ hã te za dato isa'ẽne hã siwi 'manha 'Re ihâimana u'âsi mono ma danhimizama zata na tãma 're idanhoprub za'ra mono zém na hã. Tahawa, ma tô ĩsisãnawã hã sitẽme ĩzô hâ, ĩzama dame ĩhâimana da hã. Tahawa, a hã sena na ĩsiwaihu'u wamhã, ma'ãpé ĩma rowairébé ĩmorĩ da, ĩsisãnawã norĩ te sabu za'ra da.” Tawamhã te duré tãma tinha ãne: — Tahawa, ãhã na hã hâimana õ di, tinhamrazéb ãma hã.

³⁰ Tawamhã Sau ma tô sada ab'rui pese, ti'ra Zonataha da hã. Tahawa, te tãma tinha ãne: — Pi'õi wasété 'ra, a hã! Wa tô aiwaihu'u ãhã na hã, saprĩ wa Dawihi niwĩ i'aihâimana na hã. Taha na ma tô asi'upto wasé. Ana zama ma tô duré i'upto wasé.

³¹ Dawi hã zahadu hâiba ré 're hâimana mono ré hã, i'asi'apito da hã mare di za a hã, ã hã ti'ai wa'õtõ nho'õmo 'remhã. Tahawa, ma'ãpé sô aimorĩ, we saprõni da ãwa. Dâ'â hâ!

³² Tawamhã Zonata te timama sadanha ãne: — E marĩ wa, te za dârâ. E marĩ te te 'manharĩ bâ.

³³ Tawamhã ãne te te tãma nharĩ wa, ma tô Sau Zonata hã tite isi'uwazi 'rã'wa na hã ãma simri te te ãma wĩrĩ da. Ãne wa tawamhã, Zonata ma tô oto timama hâimanazé hã waihu'u, tô aré Dawi te te wĩrĩ da, te te sima irosa'rata na hã.

³⁴ Tahawa, Zonata hã sahi na ma tô tisazém hawimhã wahudu. Tahawa, tô taha bâtâ na hã sai õ di, maparane bâtâ ãma dato a'amo itém na ihâimana na hã. Tãma robzei õ uptabi di, imama Sau hã Dawihi ãma te te wasété mono wa.

³⁵ Tawamhã awẽm na ma tô a'ubuni u mo, Dawi te te sõpẽtẽ da hã, te te sima iwaihu'u zahuré zéb zarina. Morĩ wamhã, ma tô ai'repudu hã siré saprõ.

³⁶ Tawamhã taha ma, te ãne tãma tinha: — Sô aiwara, ti te ime zô. Tawamhã ai'repudu hã ma tô oto sô wara. Taha ré, ma tô Zonata hã ti hã time, ai'reputu nhipai.

³⁷ Tawamhã oto ai'repudu hã ti iwaptã'ãzéb u wisi wamhã, ma tô Zonata hã hâ, hârâ 'rãihâ na ãne: — Ti hã ma tô waptãrã ãma asipai u.

³⁸ Aimorĩ su'u, asimizazâri ãna! Tawamhã ai'repudu hã ma tô ti hã oto ti'â. Taha pari, te apâ tinhib'ihâ'a u hã mo oto,

³⁹ te te waihu'u ãna, marĩ te te iwasu'uzé hã. Zonata norĩ si Dawihi me hã, ma tô waihu'u zahuré.

⁴⁰ Tawamhã Zonata tite umnhi'ã ai'reputu ma, ma tô tisõ, ti'i zama. Taha pari, te oto apâ iré satõ, te te âri da, 'ri'ahâ u.

⁴¹ Tawamhã ai'repudu hã morĩ pari, ma tô oto Dawi hã watobro, ẽtẽ tõmo wawẽ babarãi ãma isima'urizém hawimhã. Tahawa, ti'ai u waptã'ã wamhã, ma tô si'ubdatõ ti'ubu na hã ropto, ti'ai u hã. Tawamhã wawa sina ma tô sisawi zahuré, sitob'rata hârâ na hã. Tawamhã robzei'õ hã sa'ẽtẽ uptabi di Dawihi ma hã, Zonataha nhipai u.

⁴² Tawamhã Zonata te Dawihi ma tinha ãne: — Ĩma wẽ di, 'Re ihâimana u'âsi mono hã asiré 're hâimana u'âsi mono da hã. Ĩma wẽ di duré Uburé Danhib'apito te te 're wapawapto mono da, wanhihudu norĩ zama te te duré 're pawaptob za'ra mono da, ropisudu wa te i'manharĩzé hã wa te ãma wasima 're uwaimrami u'âsi mono da si. Ãne te te tãma waihu'u pari, ma tô Dawi hã oto mo. Duré Zonata hã ma tô apâ mo, 'ri'ahâ u hã.