1 Samuéu 2 - ꞌRe Ihâimana Uꞌâsi Mono Zadawa Wasuꞌu

Ãna imremezé wasu'u, 'Re ihâimana u'âsi mono ma

¹ Tawamhã Ãna te ãne mre: Uburé Danhib'apito hã rowẽ za'ẽne hã ĩpẽ'ẽ 'remhã ma tô ĩma tisõ, sa'ẽtẽ na. Te te ĩma i'manharĩzéb u'âbâ, wa nasi ĩ'rãiwahutu haré ne. Wa nasi ĩnhitob'ru norĩ na hã aihâ za'ra. Duré ĩpẽ'ẽ 'remhã ĩma rowẽ uptabi di, 'Re ihâimana u'âsi mono te te ĩpawaptobzém na hã.

² Ni'wa Uburé Danhib'apito sine iwẽ uptabi iwasété'õ hã hâimana õ di. Tawamhã duré aimawi ihâiba'õ hã hâimana õ di, tô õhõ si wa. Duré ni'wa hã hâimana õ di isine, da'wawi rowasété wa 're isimapa mono hã, 'Re ihâimana u'âsi mono ne hã.

³ Aimreme na asina 're aiwata za'ra wa'aba mono tõ, duré 're asi'madâ'â ze za'ra wa'aba mono zarina, asima 're rowasu'u za'ra wa'aba mono tõ. E tihai wa. Uburé Danhib'apito 'Re ihâimana u'âsi mono ma, tiha hã tãma waihu'u pese di. Ta hã te uburé te te da'ãma 're arowairébé, da te 're i'manharĩ za'ra mono zém na te te 're ida'awaihu'u mono zéb zarina.

⁴ Dasi'wapéi 'manharĩ'wa norĩ te umnhi'ã iwã tede hã sihâri za'ra di. Tane nherẽ, dasi'wapéi 'manharĩ'wa norĩ isib'uware norĩ hã te iwa'rãmi 're siptete za'ra.

⁵ Aré isai ahâ norĩ hã te oto te te 're romhuri za'ra, tisazéb da hã. Tane nherẽ, mram na te te 're irobzépata za'ra mono norĩ hã ãhã na hã tãma za'ra hã mrab õ di oto, iwa'rãmib za'ra. Pi'õ i'ra waihu'u'õ norĩ ma hã ma tô 7 na i'ra hã tãma tipoto za'ra. Tane nherẽ, i'ra ahâ norĩ ma hã, i'ra hã tãma 're hâimana za'ra mono õ di oto, iwa'rãmib za'ra.

⁶ Uburé Danhib'apito si dahâimanazé 'rãsutu pisutu'wa hã, duré dahâimana na'rata zé pisutu'wa hã. Ta hã te te 're da'azatõrĩ, adâ 're ihâimana za'ra mono zéb u hã. Ta hã te duré te te 're da'azani, ta hawimhã.

⁷ Wanhib'apito hã te duré te te dama 're apisutu, danhiptihai ãna 're dahâimana za'ra mono da hã, duré danhibro pese na 're idahâimana za'ra mono zéb da hã. Õhõ si te te dama 're apisutu, dawapu na 're idahâimana za'ra mono zéb da hã, duré dapire na 're idahâimana za'ra mono zéb da hã.

⁸ 'Re ihâimana u'âsi mono hã te robzaprum hawi te te 're awahutu, isiptihai õ norĩ hã. Te duré tihai õ zarina robzépata hawi, te te 're azani, tiha zô tiwi 're iro'wanhi'riti u'âsi za'ra mono norĩ hã. Ta hã te duré isiptihai õ norĩ ma hã te te 're apisutu, dama ipire norĩ siré 're idahâimana za'ra mono zéb da hã. Te duré te te 're da'a'maza, dawazém na 're idahâimana za'ra mono zéb u hã. Ti'a na'rada hã Uburé Danhib'apito te hã. Ta hã ma tô ti'a hã isisiwimhã 'manha.

⁹ Õ hã te i'wawi 're simapa u'âsi za'ra, sena na ãma 're inomro mono norĩ 'wawimhã. Tane nherẽ, wasété na 're inomro mono norĩ wi si te tiwi 're sipizari za'ra, 're simani za'ra mono da si'uihâ na, robra u hã. E tihai wa. Ni'wa hã tinhiptete hawim na 'râwi te te da'ãma ai'uté õ wa.

¹⁰ Uburé Danhib'apito nhitob'ru norĩ hã te za 're si'utõrĩ. Tãiwapsa'a na ne, te za sada 're hâimana za'ra, hâiwa hawimhã. Uburé Danhib'apito hã te za dapoto mono bâ te te dama 're arowairébé, dahâimanazém na te te 're ida'awaihu'u mono zéb zarina. Duré tinhiptetezé hã te za tãma tisõ, Danhib'apito da, te te ipisutu ma hã. Te za duré tãma tisõ, te te da'ãma i'ai'utézéb da hã, Danhib'apito te te ipisutu ma hã.

¹¹ Tawamhã ma tô oto mo Eucana hã apâ, Rama ãma tinhorõwa u hã. Tane nherẽ, te 'watébrémi Samuéu si nhamra isa'u, Silo ãma hã, Uburé Danhib'apito ma romhuri'wa na 're hâimana mono da, sasedoti Erihi pawapto'wa na.

Erihi 'ra norĩ wasu'u

¹² Tawamhã sasedoti Erihi 'ra norĩ hã wasété uptabi za'ra di. Tahawa, Uburé Danhib'apito ãma te te ãma rosa'rata zahuré õ di, te te sima iwẽ'õ zahuré zarina.

¹³ Ta norĩ hã te te 're 'madâ'â zahuré mono õ di, sasedoti norĩ nhimiromhurizém na roti hã te te duré dawi 're irowaptẽrẽ za'ra mono zém na hã. Tawamhã aibâ danhimizama zata na 'Re ihâimana u'âsi mono ma 're sõpru mono wamhã, ma tô sasedoti pawapto'wa hã 're ne, isihâparahi 'wa si'ubdatõ ré hã. Tawamhã romnhi hã 're sebre za'ra mono ré,

¹⁴ ma tô piza'a 're za'ẽtẽ wa, isihâ para hi za'ẽne hã te te sô 're za, romnhi zô. Tawamhã duré te te ãma 're isani za'ra mono hã tô sasedoti norĩ ma da hã. Tawamhã ãne ma tô Izaraéu nhihudu norĩ hã te te sima 're 'manharĩ u'âsi za'ra, Silo u 're nomro mono sidâpâsi hâiba pisutu, danhimizama zata na 'Re ihâimana u'âsi mono ma, 're sõprub za'ra mono da.

¹⁵ Tawamhã romnhi wa, te te 're sazari mono wana ré hã, duré te te 're zata za'ra mono õ ré hã, ma tô sasedoti Erihi 'ra norĩ hã te te tãma 're 'ru zahuré, sasedoti pawapto'wai ma hã, tinhoprubzé te te izata ma, te te tãma 're nharĩ za'ra mono da, ãne: “Ma'ãpé we ĩma sõmri, inhi wa'õno hã sasedoti te te isebre da hã. Ta hã te te sima wẽ õ di za, isebre siro hã. Inhi tép si te za sima wẽ.”

¹⁶ Tawamhã duré aibâ hã ãne te te tãma ãma 're wa'rãmi mono wamhã: “A'â imorĩ'rata na te te zata romnhi wa hã. Taha parip si te za asima iwẽ na asima i'maiwaze za”, tawamhã sasedoti pawapto'wa ma tô ãne te te tãma 're anharĩ: “Mare di. Sõmri su'u, ta romnhi hã. Duré sõmri su'u õ wamhã, wa za ti'â, ĩnhiptete sina.”

¹⁷ Tawamhã ãne Erihi 'ra norĩ hã ma tô siwi te te 're wazéb'õ zahuré, Uburé Danhib'apito ma danhoprubzé da te 're i'ãwisi za'ra mono hã. Tahawa, Uburé Danhib'apito ma hã ai'reputu norĩ wasété zahuré zé hã pire uptabi di.

Samuéu, Silo ãma ihâimanazé wasu'u

¹⁸ Tawamhã Samuéu te oto te te 're romhuri, 'Re ihâimana u'âsi mono Uburé Danhib'apito ma hã. Tawamhã zahadu 'watébrémi nherẽ, ma tô 're si'uza, sasedoti norĩ si'uzazé ipanoi'õ abazi 'manharĩ na hã.

¹⁹ Tawamhã Ãna ina hã wahup sidâpâsi ma tô i'uzazé ihâpa hã te te sada 're ab'manharĩ. Tawamhã duré 'Re ihâimana u'âsi mono ma, tinhimizama zata na 're sõpru mono da, 're ne mono wamhã, ma tô timro siré te te tãma 're 'wapé, i'uzazé hã.

²⁰ Tawamhã Eri hã, Eucana norĩ ãma imro me ma tô iwẽ na te te ãma 're rowaptẽrẽ zahuré, 'Re ihâimana u'âsi mono wi. Ãne ma tô te te tãma 're rowasu'u zahuré: — Wa aima wẽ wa'wa, Uburé Danhib'apito hã te te aima sõmri aba da hã, ai'ra norĩ hâiba amo hã, 'Re ihâimana u'âsi mono ma isõmri aba nhowa're'reb da hã. Tawamhã taha parip si, ma tô apâ 're neb zahuré, tinhorõwa u hã.

²¹ Tawamhã Uburé Danhib'apito hã ma tô duré pawapto iwẽ na, Ãna hã. Tahawa, ma tô si'ubdatõ i'ra si'aibâ tãma tipoto za'ra, duré maparane pi'õ hã. Tawamhã taha ré ma tô 'watébrémi Samuéu hã oto tiprédu, Uburé Danhib'apito ma, te te 're romhuri mono ré.

Erihi wasu'u, duré i'ra norĩ wasu'u me

²² Tawamhã Eri hã ma tô oto tihâiba prédu pese. Tawamhã ma tô te te 're wapari, i'ra norĩ uburé marĩ te te 're i'a'manharĩ zahuré mono zé hã Izaraéu nhihudu norĩ ma. Ma tô duré te te 're wapari, pi'õ norĩ ãma 're ihâimana wasété zahuré mono zém na hã, romhâ 'manharĩ na 'ri iwazéb zahi wa, 're idanhisisi mono zéb ãma, te te 're iromhuri za'ra mono norĩ ãmamhã.

²³ Tahawa, te Eri imama hã tãma nharĩ zahuré ãne: — E marĩ da, te ãne hã 're i'manharĩ aba mo. Uburé ma tô ĩma da te 're aiwasu'u wa'wa, asimirob'manharĩ wasété aba zém na hã.

²⁴ Tahawa, ãne hã sahâri aba, i'ra norĩ! Wa hã nasi te iwapari hã wasété uptabi di, Uburé Danhib'apito nhib'a'uwẽ norĩ nhimirowasu'u hã, aihâiba na wa'aba.

²⁵ Ni'wa hã tisiré hâiba amo da, wasété wamhã, te za Uburé Danhib'apito hã mreme wapto. Tane nherẽ, oto ni'wa hã 'Re ihâimana u'âsi mono zada hâimana wamhã, ni'wa te te mreme wapto waihu'u õ di. Tane nherẽ, Erihi 'ra norĩ hã timama te te wapari zahuré õ di. E marĩ wa. Uburé Danhib'apito hã te te ãma sima rowairébé zahuré wa aré, te te ipãrĩ da hã.

²⁶ Tawamhã 'watébrémi Samuéu hã simiza'rese si'réi mono sidâpâsi ma tô da te dasiwi 're wẽsãmri. Duré Uburé Danhib'apito zama ma tô te te 're wẽsãmri.

'Re ihâimana u'âsi mono te te ihâi'ré zé wasu'u, Erihi 'ra norĩ wasété zé hã

²⁷ Tawamhã 'Re ihâimana u'âsi mono zadawa 'mahârâ'wa hã te Erihi u mo, te te tãma sadawa wasu'u da, 'Re ihâimana u'âsi mono hã ãne: — Aihi'rada Arãhã ma, wa tô wa hã ĩsihâi'ré, Ezitu na romnhisi ãma pawa'âbâ ãna te te dama 're romhuri mono ré hã, timro me duré ti'ra norĩ me.

²⁸ Ãne na hã aima waihu'u pese di, wa hã te ipisutu za'ra na hã uburé Izaraéu nhihudu norĩ 'remhã, ĩte sasedoti da hã, duré wedeza ne 'manharĩ ãma danhoprubzé te te ĩma 're zata za'ra mono da, duré wedewa'u zadaze te te ĩma 're iro'o za'ra mono da hã, sasedoti si'uzazé ipanoi'õ na 're si'uza za'ra mono da, ĩnho'remhã. Tawamhã duré wa hã wa tô tãma pisutu za'ra, ĩma danhoprubzé hã wedeza ne 'manharĩ ãma te te ĩma 're izata za'ra mono hã te te sima 're po'o za'ra mono da.

²⁹ E marĩ da, ma tô ãne nherẽ, danhoprubzéb zô 're irob'ruiwapari za'ra wa'aba mo, wa hã te dama iwaihu'uzéb zarina danhoprubzé da te ĩma 're i'manharĩ za'ra mono zô. Eri, e marĩ da, te ai'ra norĩ hã iwazéb za'ra ĩnhipai u, taré hâipese za'ra da si. Ta norĩ hã ĩma danhoprubzé romnhi wa'õno danhipai u iwẽ uptabi si te te dawi 're huri mono nherẽ, a hã tiwi sawi za'ra õ di.

³⁰ Wa hã Izaraéu nhihudu norĩ te, 'Re ihâimana u'âsi mono Uburé Danhib'apito hã wa tô ropisutu duréihã aihi'rata norĩ ma hã za isihudu norĩ hã õne u'â te te ĩma 're iromhuri za'ra mono na hã sasedoti na. Tane nherẽ, ãhã na hã wa za tinha, õne u'â 're ihâimana mono õ na hã za oto. E marĩ wa. Wa hã za oto te 're da'awazé mono dâ'âsina, da te 're ĩwazéb za'ra mono norĩ hã, duré za oto te 're da'awazé mono õ dâ'âsina, da te 're ĩwazéb za'ra mono õ norĩ hã.

³¹ Ma'ãpé rob'madâ'â mono! Bâdâ iwa iwaptã'ãzé hã romhuture di oto wa hã za uburé ai'ra norĩ te isimrozéb da hã, duré aimama 'ra norĩ si'aibâ hã te isimrozéb da hã 'masi'ĩhi tõ da.

³² Ãne wa, te za aiwi tirowaihu'u'õ za nimahã na hã. Tawamhã te za taré duré ãma i'ruiwapari za'ra, Izaraéu nhihudu norĩ ma, za marĩ iwẽ te isõmri za'ra zém na hã. E marĩ wa. Ai'ra norĩ hã duré asihudu norĩ hã za 'masi'ĩhi õ wa.

³³ Tawamhã wa hã asihudu norĩ hã uburé te uprosi õ di za. Misi te za 're 'maihâimana, ĩte sasedoti na 're ihâimana mono da hã. Tane nherẽ, te za si'rã na te te rob'madâ'â waihu'u ãna 're hâimana. Duré asihudu hâiba amo norĩ si te za siptete ré uburé pese ai'utõ.

³⁴ Hopini norĩ hã Finéaha me maparane ai'ra norĩ hã te za siré tidâ'â zahuré, tô taha bâtâ na aipibuzém na sena na wa hã te nharĩ dâ'âsina.

³⁵ Tawamhã wa hã wa za duré 'maipisutu ĩte sasedoti ĩma romhuri'wa da hã, duré uburé marĩ za te te 're i'manharĩ mono da hã te ĩsima 're i'awẽ mono zéb zarina. Duré wa za wa hã õhõ ma te tãma 're sõmri za'ra isihudu hã. Ta norĩ hã te za õne u'âsi apito ma te te 're romhuri za'ra za, apito te ipisutu ma hã.

³⁶ Tawamhã uburé asihudu hâiba amo norĩ hã 're ihâimana za'ra mono hã te za tãma 're siwẽ'ẽ za'ra apito ma, rob'uiprazé te te tiwi 're waptẽrẽ za'ra mono da hã, duré mra hã. Te za duré sasedoti norĩ pawapto'wa na te te 're romhuri za'ra mono da, sa'ẽtẽ te te 're rowaptẽrẽ za'ra, tisazéb da.