1 Samuéu 19 - ꞌRe Ihâimana Uꞌâsi Mono Zadawa Wasuꞌu

Sau hã Dawi te te wĩrĩ da, sada ihâimanazé wasu'u

¹ Tawamhã Sau ma tô ti'ra Zonataha ma wasu'u, uburé tãma romhuri'wa norĩ ma zama, Dawi te te wĩrĩ da, te te sima irosa'ratazém na hã. Tane nherẽ, Dawi hã Zonataha siwaihu'u uptabi na te tãma tihâiba.

² Tahawa, te ãne timama hã tãma wasu'u, Dawihi ma: — Ĩmama te ai'ãma sima rosa'rata, te te aiwĩrĩ da. Tahawa, awẽ mararé hã asipibui pese za. Nima niwĩ pi'uriwi aima'uri za, tame a'â asãmra da.

³ Tawamhã wa hã wa za ĩmama zô mapa, a'ubuni wi aima'uri ré nimame, te tãma nharĩ da, aihâiba na hã. Tawamhã marĩ te tiwi upsibi mei wamhã, wa za aipo're pu'u.

⁴ Tawamhã Zonata, timama ma, ma tô Dawi hã tãma wasu'u wẽ ãne: — Ĩmama, marĩ iwasédé hã tãma 'manharĩ tõ, aima romhuri'wa Dawihi ma hã. E marĩ wa. Niwamhã õ hã marĩ iwasédé hã te te aiwi 'manharĩ õ di. Iwẽ na si uburé ma tô te te 're aipawapto.

⁵ Õ hã sĩrĩtĩ zawi õ di. Gulia simimnhasi nherẽ, ma tô tiwĩ. Tahawa, Wanhib'apito 'Re ihâimana u'âsi mono nhisi na ma tô ãma ai'uté, Izaraéu nhihudu norĩ te te anho'reptu da hã. Duré te te ãma ai'uté ré hã a hã ma tô asi'uihâ na i'madâ. Tahawa, aima rowẽ di. Ĩmama, e marĩ wa, te za bété ãne nherẽ, iwasédé hã tãma i'manha. E marĩ te te 'manharĩ bâ te za Dawi hã iwĩ.

⁶ Tawamhã ãne te te tãma waihu'u wa, ma tô Sau ti'ra Zonataha mreme hã saze. Tahawa, ma tô ropisutu, Uburé Danhib'apito idâ'â'õ nhisi na, Dawi hã te te wĩrĩ tõ da.

⁷ Tawamhã Zonata ma tô oto sô hâ, Dawihi zô. Tahawa, ma tô uburé tãma wasu'u, imama te te tãma iwaihu'uzé hã. Tawamhã te te tãma rowasu'u pari, ma tô apâ saprõ Sauhu u hã. Tahawa, ma tô Dawi hã apâ te te tãma 're romhuri apito ma, iwana te te tãma 're iromhuri mono ne.

⁸ Tawamhã dasi'wapé hã ma duré watobro, filisteu norĩ da hã. Tahawa, Dawi hã ma tô sô tiwatobro za'ra, te te 'wapé za'ra da. Tawamhã ma tô ãma ai'uté pese za'ra. Ma tô tãma sisa're, Dawihi ma hã.

⁹ Tawamhã nimahã bâtâ na ma tô Uburé Danhib'apito wa'uburé hã itẽme satõ, Sauhu u hã, iwap sébré da. Tahawa, tinhorõwa ãma te nhamra tite isi'uwazi 'rã'wa ré tinhib'rata. Dawi hã te tame i'rata nhamra, tinhipta'azé hã te te ta'a sina.

¹⁰ Tawamhã Sau Dawihi ãma te te 'ri na'rata nhiptâ'â pibu da, ma tô aré ãma simri tite isi'uwazi 'rã'wa na hã. Tane nherẽ, ma tô tiwi tiwa'a. Tahawa, ma tô 'ri na'rata si i'upana ãma siptâ'â. Tahawa, Dawi hã ma tô duré tiwi aimani, sina isõwẽ hawi.

¹¹ Tawamhã tô taha marabâre Dawihi nhorõwa te te nasi siwi sô sabu da hã, ma tô Sau nima norĩ aibâ ma hã tãma rob'ru za'ra, awẽm na ãne mararé te te siwi wĩrĩ da oto. Tane nherẽ, Dawihi mro Micau ma tô po'repu'u ãne: — Ã mara na aimani õ wamhã, awẽmhã te za oto atâ.

¹² Tawamhã imro ma tô ãma si'ra Dawihi ãma, zanela 'ri zadazâri na. Tahawa, ma tô dawi aimani.

¹³ Tawamhã te te oto ãma si'rai pari, ma tô Micau hã ti'â romhâibarĩ isõrõwa 're, 're isa mono hã. Tawamhã ma tô tihi, tiza'wari zahuré zéb ãma. I'rã ãma ma duré tihi, pone'ẽrebâ hâ zéré hã. Taha pari, ma suwa.

¹⁴ Tawamhã Sauhu nhib'a'uwẽ norĩ, tô Dawi te te siwi âri da si'aba'réi wamhã, ma tô Micau hã tãma wasu'u za'ra ihâzé na hã.

¹⁵ Tawamhã Sau te duré apâ satõrĩ za'ra isib'a'uwẽ norĩ hã, Dawi te te siwi 'madâ'â da titõmo na. Te duré ãne tãma nharĩ za'ra: — Dawi hã waptâ wa nomro ré, te za we asiwi isaprõni 'wa, te wĩrĩ da za, wa hã.

¹⁶ Tawamhã ma tô oto asisi 'ri para u. Tane nherẽ, ma tô romhâiba si siwi tisã waptâ wamhã, pone'ẽrebâ hâ zéré na 'rã'ubu ré inomro hã.

¹⁷ Tahawa, te Sau hã ti'ra Micau hã sadanha ãne: — E marĩ da, ma tô ãne na ĩma asadawa nhipese sina hã irob'manha tô simani da ĩnhitob'ru hã. Tawamhã ma tô ãma tãma wa'rã ãne, timama ma hã: — Simani da, te pawaptob õ wamhã, te aré u ĩwĩ. Ãne ma tô ĩma tinha.

¹⁸ Tawamhã Dawi hã ma tô oto aimani. Tahawa, ma tô mo Rama u. Tamomo wisi wamhã, ma tô uburé Samuéu ma hã wasu'u, Sau sada hâimana mono wa, te te tãma irob'manharĩ mono zé hã. Taha pari, ma tô oto tineb zahuré, 'Re ihâimana u'âsi mono zadawa 'mahârâ'wa norĩ nhorõwa u, tame simasisi da.

¹⁹ Tawamhã Sau ma tô waihu'u, Dawi Rama ãma ihâimana na hã.

²⁰ Tahawa, ma tô aibâ norĩ hã sô satõrĩ za'ra, te te siwi âri da hã. Tawamhã oto sihutu wamhã, ma tô 'Re ihâimana u'âsi mono zadawa 'mahârâ'wa norĩ imreme na te te dama rowasu'u za'ra mono ré hã 'madâ'â za'ra. Tahawa, te Samuéu hã romhuri'wa nhib'ihâ'a na hã tihâiba. Tahawa, ma tô duré 'Re ihâimana u'âsi mono pẽ'ẽzani hã iwab asisi Sau aibâ norĩ te te isatõrĩ za'ra 'remhã. Tahawa, ta norĩ zama ma tô 'Re ihâimana u'âsi mono mreme na duré dapawaptom na hã da'ãma sasõmri za'ra.

²¹ Tawamhã Sau ãne hã te te waihu'u wamhã, ma tô duré aimawi rowasu'u'wa norĩ hã satõrĩ za'ra. Tane nherẽ, ta norĩ zama ma tô duré 'Re ihâimana u'âsi mono mreme na dapawaptom na hã da'ãma sasõmri za'ra. Tahawa, ma tô duré si'ubdatõ ãmamhã satõrĩ za'ra, aibâ norĩ hã. Tane nherẽ, tô õne si ma tô tãma tiromhâimana za'ra.

²² Tawamhã Sau si'uihâ na te oto mo, Rama u. Tawamhã Seco na 'ri'ahâ isa'ẽtẽ nhisi ãma â zô ab're u oto wisi wamhã, ma tô da'mazadanha ãne: — E mame te Samuéu norĩ, Dawihi me hã tihâimana zahuré. Tawamhã ãma sinharĩ zahuré wa, te ãne tãma wasu'u zahuré ni: — 'Re ihâimana u'âsi mono zadawa 'mahârâ'wa norĩ nhorõwa ãma te tihâimana zahuré.

²³ Tawamhã Sau tamomo morĩ ré, ma tô 'Re ihâimana u'âsi mono pẽ'ẽzani hã iwamhã ãzé. Tahawa, te õhõ zama 'Re ihâimana u'âsi mono mreme na hã bâdâdi na te te dama rowasu'u, isadawa wasu'u'wa norĩ nhorõwa u iwisizéb u.

²⁴ Tahawa, oto wisi wamhã, ma tô ti'uzazé hã waze. Tawamhã Samuéu nho'a 'Re ihâimana u'âsi mono mreme na te duré dama rowasu'u. Tawamhã ma tô ai'uréiwi ti'ai wamhã nomro, bâtâ wahuré na, duré mara wahuré na. Tahawa ãne, da te dasima inharĩ za'ra zé hã, ma tô tihâiba: “Pra! E Sauhu zama ma tô 'Re ihâimana u'âsi mono mreme na rowasu'u 'wai u hã aipi'ra.”