1 Samuéu 18 - ꞌRe Ihâimana Uꞌâsi Mono Zadawa Wasuꞌu

¹ Tawamhã Sau norĩ hã Dawihi me ma tô oto sima robzanhamri pari zahuré. Tahawa, Zonata, Sauhu 'ra pẽ'ẽ 'remhã, ma tô Dawihi zawi hã iwab ãzé. Tahawa, ipẽ'ẽ 'remhã tãma sawi uptabi di oto, 'râwi tihâiba te te 're isisawi pese mono ne.

² Tawamhã taha hawim haré ma tô Sau hã te te 're 'madâ'â Dawi hã, isiré 're hâimana mono da oto, isõrõwa ãma. Timama nhorõwa u, apâ morĩ da hã, te te tãma waprosi õ di.

³ Tawamhã Zonata norĩ hã Dawihi me, ma tô sena na ropisutu zahi hã sima 'manharĩ zahuré, tinhimizawi zahuré zém na hã. E marĩ wa. Zonata Dawihi ãma ipẽ'ẽzézé hã sa'ẽtẽ uptabi wa.

⁴ Tahawa, ma tô tisi'uzazé ihâpa hã waze, te te tãma sõmri da, Dawihi ma. Tite dasi'wapéi 'manharĩ'wai uza zama ma tãma tisõ, sib'ézé 'wapa hã, umnhi'ã hã duré ti'usisizé hã.

⁵ Tawamhã Dawi uburé daza'rui mono bâ Sau te te 're isatõrĩzé mono sidâpâsi, ma tô wẽ na hã 're pusi. Tahawa, Sau hã ma tô oto pisutu, ite dasi'wapéi 'manharĩ'wa norĩ nhib'ihâ'a da hã. Ãne wa, ma tô uburé dasi'wapéi 'manharĩ'wa norĩ ma tirowẽ za'ra, duré ta norĩ 'madâ'â'wa norĩ ma zama.

Sau, Dawi te te i'ruiwaparizé wasu'u

⁶ Dawi, Gulia te te wĩrĩ pari, dasi'wapéi 'manharĩ'wa norĩ apâ si'aba'réi wamhã, ma tô uburé 'ri'ahâ mono bâ Izaraéu nhihudu norĩ nhipti'ai ãma pi'õ norĩ hã wairé, apito Sau te te siwi sõpẽtẽ da, sõ're za'ra sina rowẽ te, si'rẽne za'ra mono sina, piza baihâ 'manharĩ na te te ropta'a za'ra mono sina, duré rowamremezé te te siwi sõrõta'a mono sina.

⁷ Tahawa, te pi'õ norĩ hã ãne tinho're za'ra, rowẽ te: “Sau ma tô miu na hã dapã. Duré Dawi ma tô 10 miu na hã dapã!”

⁸ Tawamhã ãne hã te te wapari wamhã, Sauhu ma te te rowẽ õ di. Tahawa, ma tô iwa aimei pese. Iwa simei pese wa, te tawamhã tinha ãne: — Pi'õ norĩ ma tô ĩ'ãma tinho're za'ra miu na te ida'uprosi na hã. Tane nherẽ, Dawihi ãma ma tô ĩnhipai u ãma tinho're za'ra 10 miu na te te ida'uprosi na hã. Pra! Isi'apito da si te oto tawamhã tiwi sô rowaptâ, ãhã na hã.

⁹ Tawamhã taha bâtâ hawim haré ma tô Sau hã Dawi te te 're 'ruiwapari u'âsi.

¹⁰ Tawamhã ãma awẽ wamhã, ma tô wa'uburé itẽme satõ, 'Re ihâimana u'âsi mono hã Sauhu wa, iwap sébré da. Tahawa, ma tô 'rãihaiwamna, 'ri paramhã. Dawi hã te ropta'a tinhipta'azém na hã, awẽ sidâpâsi te te nasi iropta'azém ne. Taha ré te Sau hã tinhib'rata na tété, isi'uwazi 'rã'wa hã.

¹¹ Tahawa, te Sau hã ãne sima rosa'rata: — Wa za Dawihi ãma 'ri na'rata nhiptâ'âre, te ãma tétére da. Tawamhã isi'uwazi 'rã'wa na ma tô maparane ãma simri, te te ãma wa'ré da aré. Tane nherẽ, ma tô Dawi hã duré maparane tiwi tiwa'a.

¹² Wanhib'apito te Dawihi siré 're hâimana oto. Sauhu si ma tô tirẽ. Tahawa, Sau hã Dawihi ma pahi uptabi di oto.

¹³ Tahawa, ma tô Sau hã oto sihawi ai'ré, Dawi hã, miu na dasi'wapéi 'manharĩ'wa norĩ 'madâ'â'wa na si 're hâimana mono da oto. Tahawa, Dawi ma tô ite dasi'wapéi 'manharĩ'wa norĩ hã te te 're ab'madâ'â, dasi'wapéi wamhã.

¹⁴ Tawamhã uburé marĩ hã te te 're ab'manharĩ mono wamhã, ma tô iwẽ na si 're pusi, te te 're i'ab'manharĩ mono da hã. E marĩ wa. Wanhib'apito ime 're hâimana mono wa.

¹⁵ Tawamhã Sau hã ma tô te 're 'madâ'â, Dawi hã tinhimi'manharĩzém na te te ãma 're i'a'uwaimrami wẽ mono zé hã. Tahawa, ma tô tãma tipahi pese oto.

¹⁶ Tane nherẽ, Izaraéu nhihudu norĩ nhipti'ai ãma hã, duré uburé Zudaha nhihudu norĩ nhipti'ai ãma a'uwẽ hã, ma tô Dawi te te siwi 're sawi pese. E marĩ wa. Õ hã dama i'rãnho'u isiptete uptabi 're hâimana mono wa.

Dawi hã Sauhu 'ra na imrozé wasu'u

¹⁷ Tawamhã Sau te Dawihi ma tinha ãne: — Ãhãta ĩ'ra ipoto'rada, Merabe na isisi hã. Ã hã wa za aima tisõ, ãma aimro da hã. Tawamhã a hã dasi'wapéi 'manharĩ'wa asiptete na te za ĩma 're aihâimana mo za ĩma ai'umnhasi na, duré Uburé Danhib'apito te dasi'wapé na ãma 're ai'wapéi mono da. Sau te rosa'rata ãne: “Te iwĩrĩ da hã mare di wa hã. Ĩma wẽ di filisteu norĩ si ĩ'upana te te siwi iwĩrĩ da hã.”

¹⁸ Tawamhã Dawi ma tô ãma tãma wa'rã ãne: — Pra! E 'wa hã wa hã, apito sa'õmo na 're ĩhâimana mono da hã. Duré e 'wam norĩ ĩmama norĩ Izaraéu nhihudu norĩ nhipti'ai 'remhã, wa hã apito sa'õmo na 're ĩhâimana mono da hã. Tarére hã wa hã.

¹⁹ Tawamhã Sauhu 'ra Merabe hã Dawihi ãma imrozéb da hã, oto iwa waptã'ã wamhã, ma tô Sau hã Dawihi upana Adri'éhé ma hã tisõ, 'ri'ahâ Me'ora na isisi na 're ihâimana mono ãmap si mro da.

²⁰ Tane nherẽ, Sauhu 'ra hâiba amo Micau na isisi hã ma tô sima wẽ pese, Dawi hã. Tahawa, ãne na hã Sau te te waihu'u wamhã, ma tô apâ pẽ'ẽ nomro tahawa apâ tãma rowẽ di.

²¹ Tahawa, te ãne rosa'rata: “Micau si wa za tãma tisõ, Dawihi ma hã, taha na si mro da. Tawamhã ta hã te za isimiza'repese norĩ nhimirob'manharĩzém na ãma sô tihâiba za, filisteu norĩ te te siwi iwĩrĩ da hã.” Tahawa, Sau maparane ãmam na te duré tãma tinha ãne, Dawihi ma hã: — A hã za tô ĩsa'õmo.

²² Tawamhã Sau tite romhuri'wa norĩ ma, ma tô tãma waihu'u za'ra, Dawihi ma hâiba si te te tãma robzanhamri za'ra da. Tahawa, te ãne tãma rowasu'u za'ra: — Apito ma hã aiwẽ di. Duré uburé ite romhuri'wa norĩ ma zama aiwẽ za'ra di. Ãhã wa, i'ra na aimro da hã wẽ di ãhã na hã.

²³ Tawamhã ãne te te tãma rowasu'u za'ra wa, ma te Dawi hã ãma tãma wa'rãmi za'ra ãne: — E wapu bâ, apito sa'õmo na 're ĩhâimana mono da hã pire di. Wa hã tarére hã, aibâ ĩnhimarĩ ãna 're ĩhâimana mono.

²⁴ Tawamhã Sauhu ma, ma tô tãma wasu'u za'ra, tãma iromhuri'wa norĩ hã, Dawi te te tãma inharĩ za'ra zé hã.

²⁵ Tahawa, ma duré tãma waihu'u za'ra, Dawihi ma, te te tãma nharĩ za'ra da ãne: — Ãhã si te apito hã sima wẽ, aimro ãma iwa'âbâ da hã, filisteu isi'utõrĩ nhihâiwata nhihâri hã 100 na, taha na te te siwi sé nhi'ra da, isitob'ru hã. Taha si. Marĩ aimawi hã te te waptẽrẽ õ di aiwi. Ãne ma tô Sau hã rosa'rada hã, Dawihi ãma 'manha filisteu norĩ si te te siwi wĩrĩ da.

²⁶ Tawamhã Dawihi ma, ma tô duré tãma rowasu'u za'ra, Sauhu ma romhuri'wa norĩ hã, Sau te te tãma iwaihu'u za'ra zém na hã. Tawamhã ma tô oto sina simirosa'rata wẽsã, za apito sa'õmo na 're ihâimana mono zém na hã. Tawamhã i'ra na za imrozéb da bâdâdi wana ré,

²⁷ ma tô Dawi tite dasi'wapéi 'manharĩ'wa norĩ me hã ai'aba'ré. Tahawa, ma tô filisteu norĩ hã siwi uprosi 200 na. Tawamhã Dawi ma tô tãma tidu, Sauhu ma, filisteu norĩ idâ'â za'ra nhihâiwada te te isihâri za'ra hã. Isõ'a ma tô duré sa'rata za'ra isihâiwata za'ra hã, taha zarina isa'õmo na oto 're hâimana mono da. Tahawa, Sau hã ma tô oto ti'ra Micau hã tãma tisõ, Dawihi ma, ãma mro da.

²⁸ Tawamhã Sau ma tô oto ãma po'repuru, Uburé Danhib'apito Dawihi siré 're ihâimana mono zém na hã, duré i'ra Micau hã Dawi te te 're isawi pese mono na hã.

²⁹ Tahawa, Dawihi ma hã pahi uptabi di oto. Tawamhã idâ'âzéb u Sau hã, ma tô Dawihi nhitob'ru na hã 're hâimana u'âsi oto.

³⁰ Tawamhã filisteu dasi'wapéi 'manharĩ'wa norĩ hã Izaraéu nhihudu norĩ te te 're 'wapé za'ra mono da, sô 're pusi mono sidâpâsi ma tô Dawi hã te te ãma 're ai'uté za'ra, uburé Sauhu ma romhuri'wa norĩ nhipai u hã. Tawamhã ãne wa, Dawi hã dama wasu'u za'ẽtẽ di oto, daza'rui mono bâ hã.