1 Samuéu 17 - ꞌRe Ihâimana Uꞌâsi Mono Zadawa Wasuꞌu

Gulia, Izaraéu nhihudu norĩ zada ihâimanazé wasu'u

¹ Tawamhã filisteu norĩ hã ma tô si'rã'õtõ, 'ri'ahâ Zudaha nhihudu norĩ te Soco na isisi ãma, Izaraéu nhihudu norĩ 're ihâimana za'ra mono norĩ te te 'wapé za'ra da. Tahawa, ma tô sima 'ri nhoré za'ra 'ri'ahâ Soco na isisi norĩ wa'wa, Azeca na 'ri wa'õtõ nhisi me Epesi-Dami ãma.

² Tawamhã Sau hã Izaraéu nhihudu norĩ me ma tô si'rã'õtõ. Tahawa, ma tô sima 'ri nhoré za'ra Era na ẽtẽ siwa'aba nhisi ãma. Tame ma tô filisteu norĩ hã za te te i'wapé za'ra zéb da hã, tisi 'wapézé hã sima sa'ra pese za'ra.

³ Tawamhã filisteu norĩ hã ma tô mazahâri za'ra ẽtẽ hâiba amoi ãma. Izaraéu nhihudu norĩ hã ma tô tihâimana za'ra, ẽtẽ siwa'aba uiwada niwĩ.

⁴ Tawamhã Gulia na aibâ isisi hã 'ri'ahâ Gati hawimhã ma tô watobro, filisteu norĩ te te sima i'ri nhoré za'ra zém hawi, Izaraéu nhihudu norĩ zô hârâ wa te te siwi 'wapé da hã. Taha 'rãihâ pibuzé hã 3 metru u.

⁵ Ẽtẽ topsada brõzi 'manharĩ na te 're si'rãzaza. Ẽtẽ topsada brõzi na i'uza 'manharĩ pire pibuzé hã 60 kilu na.

⁶ Ihi ubuzé hã ẽtẽ topsada brõzi 'manharĩ na hã. Duré tinhisé te te 're imrami mono hã ẽtẽ topsada brõzi 'manharĩ na hã i'rã'wa ré hã.

⁷ Isi'uwazi 'rã'wa ite hã isa'ẽtẽ uptabi. Iwãi waré za'ẽne, ipire uptabi. Duré isi'uwazi 'manharĩ na i'rã'wa hã 7 kilu na ipire pibuzé hã. Duré isõwamhã, misi dasi'wapéi 'manharĩ'wa ma tô te te tãma 're mrami ibaihâ 'manharĩ zapoto na isimapazé hã.

⁸ Tawamhã Gulia hã morĩ wamhã, ma tô oto mazazâ. Simizazâri wamhã, ma tô 'mahârâ za'ra Izaraéu nhihudu norĩ hã ãne, hârâ 'rãihâ na: — E marĩ zô, te tame aimasabre wa'wa, asimire za'ra wa'aba sina ai'wapé za'ra wa'aba da hã. Wa hã filisteu. A norĩ wa'wa hã tarére hã Sauhu ma romhuri'waire. Ma'ãpé te te ĩ'wapé da hã aibâ asiwi 'maipisutu aba asiré wa'aba hã.

⁹ Tawamhã ta hã te te ĩ'ãma ai'uté wa, te te ĩwĩrĩ wapsi, tawapsi wa za wa norĩ hã aima romhuri'wa na 're wahâimana za'ra za, wapawa'âbâ ãna. Wa hã te ãma ai'uté wa, te wĩrĩ wapsi, te za a norĩ wa'wa hã wama romhuri'wa na hã 're aihâimana za'ra wa'aba mo.

¹⁰ Tahawa, ãhã na Izaraéu nhihudu norĩ, wa hã wa asô ĩhârâ zahi za'ra wa'wa dasi'wapéi 'manharĩ'wa norĩ hã te te ĩ'mai'wapé da hã. Tahawa, ma'ãpé we asiwi 'mazatõrĩ aba, te te ĩ'wapé da hã.

¹¹ Tawamhã ãne hã Sau, duré tite dasi'wapéi 'manharĩ'wa norĩ me te te wapari za'ra wamhã, ma tô imreme ma tipahi pese za'ra.

Sau te te sima i'ri nhorézéb ãma Dawi hã ihâimanazé wasu'u

¹² Dawi hã Zéséhé 'ra, Efrata na ti'ai wa'õtõ wa 'ri'ahâ nhisi ãma 're ihâimana mono. Zudaha nhihudu norĩ te 'ri'ahâ Belẽ 'rata. Zéséhé 'ra si aibâ norĩ hã uburé hã 8 na. Tawamhã Sau hã apito na 're hâimana mono ré hã, Zésé hã hâiba prédu pese uptabi di oto.

¹³ Tawamhã i'ra dadub'rata norĩ si'ubdatõ hã Sauhu siré dasi'wapéi u hã, ma tô 're nomro u'âsi. Ipoto'rata nhisi hã Eliabe na, isãna'remhã Abinadabi na, duré si'ubdatõ ãmamhã, Simeza na.

^14-15 Dawi hã danhobabati. Tawamhã si'ubdatõ idub'rata norĩ hã Sauhu siré hâimana za'ra ré, ma tô Dawi hã nasi neb u'â, Sau norĩ te te sima i'ri nhoré za'ra zéb u. Tawamhã te duré nasi apâ hã sina siri Belẽ u hã, timama nhimizama te te 're ab'madâ'â mono da hã.

¹⁶ Tawamhã Gulia hã 40 bâtâ 'remhã ma tô awẽ sidâpâsi duré hâiwahâ nhidâpâsi Izaraéu nhihudu norĩ zô hã, nasi tihârâ zahi za'ra.

¹⁷ Tahawa, te Zésé hã nimahã bâtâ na ti'ra Dawihi ma tinha ãne: — Ma'ãpé 'mai'âri amnho trigu 'rãzazu hã 10 na ipire pibuzém na, 10 na duré i'u'ẽtẽ wapu zama. Taha parimhã, da te dasima i'ri nhoré za'ra zéb u ai'aba'ré na asisãnawã norĩ ma duri za.

¹⁸ Tawamhã duré powawẽ hâiwa'u u'ẽtẽ 'manharĩ zama 10 na ãma duri za, dasi'wapéi 'manharĩ'wa norĩ 'madâ'â'wai ma da hã. Ma'ãpé oto aimorĩ, rowẽ zô asisãnawã norĩ sabu za'ra da, rowẽ na ihâimana za'ra zém na hã rowasu'u iwẽ hã we ĩma âri da.

¹⁹ Asisãnawã norĩ hã apito Sau norĩ me, duré uburé dasi'wapéi 'manharĩ'wa Izaraéu nhihudu norĩ me, te uburé tihâimana za'ra, ẽtẽ siwa'aba wa Era na rowamri ãma filisteu norĩ te te 'wapé za'ra da hã.

²⁰ Tawamhã ãne bâtâ na awẽm na, ma tô Dawi hã oto udu mararé. Tahawa, ma tô pone'ẽrebâ norĩ hã da te sô 'madâ'â za'ra da hã dama sa'ré. Taha pari, imama Zésé te te tãma i'ru te te iduri da hã ma tô oto ti'â. Tawamhã ma tô oto wi, da te dasima i'ri nhoré za'ra zéb u hã, Izaraéu nhihudu norĩ hã, si'wapé za'ra da hã nasi hãsi mono ré wairébé mono sina isisõré pese da hã, za isi'wapé za'ra zéb u hã.

²¹ Tawamhã dasi'wapéi 'manharĩ'wa norĩ filisteu norĩ hã duré Izaraéu nhihudu norĩ dasi'wapéi 'manharĩ'wa norĩ hã ma tô sisõ're sisada hã sõré pese na aimasa.

²² Tawamhã Dawi marĩ te te iduri hã ma tô tirẽ, rob'madâ'â'wai ma. Tahawa, ma tô sisõré pese na sisada isimasabzéb u hã wara sina wara. Tawamhã tisisãnawã norĩ tẽmemhã ma tô rosahutu oto. Tawamhã wisi wi, ma tô sadanharĩ za'ra, rowẽ zô hã.

²³ Tawamhã ãne na Dawi hã tisisãnawã norĩ ma te te tãma robzanhamri za'ra ré, ma tô duré Gulia hã sina tété za'ra, Izaraéu nhihudu norĩ zô hârâ zahi za'ra da, te te nasi iwa na hã i'manharĩ ne. Tawamhã ta hã ma tô Dawi hã wapa.

²⁴ Tawamhã Gulia, Izaraéu nhihudu norĩ te te siwi 'madâ'â wamhã, ma tô tãma aimani za'ra, pahi te.

²⁵ Tahawa, te ãne sima nharĩ za'ra: — Ni'ã õ hã aibâ hã asiwi 'madâ'â aba. Ma'ãpé wazô ihârâ zahi za'ra zé hã wapari aba. Ni'wa hã filisteu te te wĩrĩ wamhã, te za tipawa'â isa'ẽne hã ti'â. Apito te za marĩ iwa'âbâ za'ẽtẽ uptabi hã ahâ na tãma sõmri za'ra. Te za duré ti'ra sipi'õ hã ãma imro da hã tãma tisõ. Tahawa, imama sisãnawã norĩ niwamhã tite rob'uiprazé apito ma, te te dame tãma 're i'arĩ za'ra mono da hã mare di za.

²⁶ Tawamhã te Dawi hã dasi'wapéi 'manharĩ'wa norĩ, i'rata isimasam norĩ hã sadanharĩ za'ra ãne: — E marĩ te za ni'wa hã ti'â, ã hã filisteu te te wĩrĩ wa, taha zarina Izaraéu nhihudu norĩ ma te te ropese wa, te te anho'reptui wamhã. E 'wa bété ãhã, filisteu ihâimana wasédé hã. E tô ibâ 'Re ihâimana u'âsi mono te dasi'wapéi 'manharĩ 'wa norĩ zô ihârâ zahi za'ra zé hã.

²⁷ Tawamhã ãne te te ãma sadanharĩ za'ra wa, ma tô tãma wasu'u za'ra, za ni'wa Gulia te te wĩrĩ wa, marĩ te te i'ârizé hã.

²⁸ Tawamhã Eliabe dadub'rada ipoto'rada hã ma tô wapa dasi'wapéi 'manharĩ'wa norĩ te te sadanharĩ za'ra ré hã. Tahawa, ma tô tinhobabati da hã ab'ru. Tahawa, te ãne tãma tinha: — E marĩ te ãmemhã i'manha. E 'wa hã te duré asô 'madâ'â za'ra, pone'ẽrebâ norĩ, a'ubuni wi hã. A hã ma tô we aimo, dasi'wapé taré 'madâ'â da si!

²⁹ Tawamhã Dawi ma ãma tãma wa'rã ãne: — E marĩ te 'manharĩ bâ, ãhã na hã. E niha wa za bété ĩnhinharĩ ãna ĩhâiba, marĩ te waihu'u ãna, ĩhâimana da hã.

³⁰ Tawamhã te duré Dawi hã tô õhõ ãma isinharĩzém na ãma sadanha, dasi'wapéi 'manharĩ'wa ihâiba amo hã. Tawamhã tô õne ma duré wapa, te te tãma iwasu'uzéb 'rata ne.

³¹ Tawamhã ni'wam norĩ dasi'wapéi 'manharĩ'wa norĩ hã ma tô wapari za'ra Dawi te te inharĩzé hã. Tahawa, ma tô duré tãma wasu'u za'ra Sauhu ma hã. Tahawa, Sau hã ma tô sô hâ, Dawihi zô.

³² Sô hârâ wa, ma tô itẽme wi. Wisi wamhã, te ãne tãma tinha, Sauhu ma hã: — Ni'wa hã ã hã filisteu norĩ ma, ipahi da hã mare di. Tahawa, wa hã wa za 'wapé.

³³ Tane nherẽ, Sau te ãne tãma tinha: — Mare di. Ã hã filisteu, a hã 'wapéi õ di za. E marĩ wa. Zahadu a hã ai'reputure, duré õ hã si'ai'reputu hawim haré te dasi'wapéi 'manharĩ'wa na 're hâimana u'âsi.

^34-35 Tawamhã Dawi te asa tãma tinha ãne: — Ĩnhib'apito, wa hã wa ĩmama nhimizama pone'ẽrebâ hã te 're ab'madâ'â. Te 're ab'madâ'â mono ré, hu'u zérépa hã te te 'mai'âri wamhã, niha wamhã, ursu hã te te 'mai'âri wamhã, wa hã wa za isarina hã mo, te 'wapé da hã, duré apâ te tiwi âri da hã, pone'ẽrebâ hã. Duré hu'u zérépa te te ĩ'wapéi wamhã, niha wamhã duré ursu hã te te ĩ'wapéi wamhã, wa za ĩsima tété ibutu na, te 're 'wapsisi mono da hã, te ĩwĩrĩ zéb u.

³⁶ Wa hã hu'u zérépa te ipãrĩ ré hã duré ursu zama. Tane wa za duré tãma rob'manha, filisteu ihâimana wasété ma hã, 'Re ihâimana u'âsi mono te dasi'wapéi 'manharĩ'wa norĩ zô ihârâ zahi ma hã.

³⁷ Wanhib'apito 'Re ihâimana u'âsi mono hã ma tô nasi ĩnho'reptu, hu'u zérépa wi, duré ursu wi. Tane te za duré ĩnho'reptu, ã hã filisteu te 'wapéi wamhã. Tawamhã Sau ma tô ãma sada'â ãne: — Wẽ di tô. Aimorĩ. 'Re ihâimana u'âsi mono si asiré hâimana da hã wẽ di, ĩma hã.

³⁸ Tawamhã Sau ma tô tãma tisõ, tite dasi'wapé da ãma 're isi'uza mono zé ihâ tede hã, Dawihi ma. Ma duré tãma tisẽ, ti'rãzaza hâ tede ẽtẽ topsada brõzi 'manharĩ hã. Duré ma tô tãma tisẽ, danho'utu'ubuzé ihâ tede hã.

³⁹ Taha pari, ma oto Dawi hã ti'usisizém na, Sau te sib'ézé 'wapa hã tisẽ. Tawamhã te te pibu da, ma tô suru na iré mo. Tane nherẽ, iré hã morĩ waihu'u õ di, tãma pire uptabi wa. E marĩ wa. Niwamhã ãne ré hã morĩ õ wa. Tahawa, te Sauhu ma tinha ãne: — Iré hã ĩmorĩ waihu'u õ di, niwamhã iré hã ĩmorĩ õ wa. Tahawa, ma tô Dawi hã apâ uburé sani za'ra.

⁴⁰ Tawamhã Dawi hã ma tô ti'â tisiwazusizé hã. Duré panho'õmo nhipti na ẽne itopsu 're isimi'wara mono hã ma tô imrotõ na sima timra. Taha pari, ma tô oto sé, tisiwapsẽrẽ 'remhã. Tawamhã tite powawẽ hâ 'manharĩ wedenhorõ na zama ma tô duré ti'â. Taha pari, ma tô oto watobro, Gulia te te 'wapé da hã.

Dawi hã Gulia te te iwĩrĩzé wasu'u

^41-42 Tawamhã Gulia hã te oto, Dawihi nho'õmoi baba mo. Tãma isi'wapézé 'wapéi'wa hã te duré isõwamhã mo. Tawamhã Dawihi tẽme te te oto rosahutu wamhã, Gulia hã ma tô 'madâ'â pese Dawi hã. Tahawa, ma tô tãma tinha, ãma to sina. E marĩ wa. Taré Dawi hã ai'repudu da te dasiwi 're ihâiba 'madâ'â zei mono, marĩ da ne.

⁴³ Tawamhã te Dawihi ma tinha ãne: — E marĩ da hã taha wedewãi waré hã. E wa hã wapsã bâ. Tawamhã Gulia ma tô tite ihâiba'õ norĩ wi hã rowaptẽ, te te Dawihi ma hã 'manharĩ wasété za'ra da.

⁴⁴ Tahawa, te duré ãne te te 'wapé da hã sô tihârâ zahi: — Ma'ãpé we aimorĩ ãwa, aihâiba hã si norĩ ma, te tãma sõmri za'ra da wamhã, te te siwi 'rẽne da, duré abaze toro norĩ ma zama.

⁴⁵ Tahawa, Dawi hã ma tô ãma tãma wa'rã: — A hã te we ĩzô aimo, sib'ézé 'wapa ré ãma ĩ'wapé da, isi'uwazi 'rã'wa ré, duré isi'uwazi 'rã'wa i'rutu ré. Tane nherẽ, wa za Wanhib'apito iwaihu'u pese nhisi na, ai'wapé ãhã na hã wa hã, Izaraéu nhihudu norĩ dasi'wapéi 'manharĩ'wa norĩ te, 'Re ihâimana u'âsi mono zada i'aihâimana nhisi na.

⁴⁶ Tahawa, tô ã bâtâ na te za Wanhib'apito 'Re ihâimana u'âsi mono hã ĩma aihâiba nho, ĩnhib'rata. Taha zarina, wa za ai'ãma ai'uté. Wa za tawamhã ai'rã nhizâ. Tawamhã ã bâtâ na wa za asiré filisteu dasi'wapéi 'manharĩ'wa norĩ hã hâiba nhomri za'ra si norĩ ma, duré abaze norĩ ma hã. Ãne wamhã, ropâ te za uburé pese oto da te 're waihu'u za'ra misi pese Izaraéu nhihudu norĩ te, 'Re ihâimana u'âsi mono 're ihâimana mono na hã.

⁴⁷ Ãme uburé ihâimana za'ra hã te za 'Re ihâimana u'âsi mono waihu'u za'ra, sib'ézé 'wapa ãna, duré wedewãi waré 'rã'wa ãna tinhib'a'uwẽ te te isõ'reptu za'ra na hã. E marĩ wa. Dasi'wapé hã 'Re ihâimana u'âsi mono te wa. Ta hã te za wanhib'rata uburé wama aihâiba nhomri za'ra wa'wa.

⁴⁸ Tawamhã Gulia hã ma duré Dawihi u hã sina rotété prã. Tahawa, te Dawi hã sa'ẽtẽ wara filisteu norĩ isisõré nho're u hã Gulia te te 'wapé da hã.

⁴⁹ Tahawa Dawi tisiwapsẽrẽ 're ma te ẽtẽ zô hã oto api. Tawamhã ma tô 'mai'â ẽne hã. Ma tô duré sada tisẽ powawẽ hâ 'manharĩ 're 'remhã. Taha pari, ma tô ãma simri, Gulia hã. Tahawa, ma tô ãma uwaimra Gulia uihâ hã. Tahawa, ma te õne haré waptãrã, ti'ai u hã ubu niwĩ.

^50-51 Tawamhã ti'ai u waptã'ã wamhã, ma tô Dawi hã sô wara. Isisiwimhã tipara na ma tô za. Tahawa, ma tô duré oto ite sib'ézé 'wapa hã sada waze, iséme hawi. Taha na ma tô oto tiwĩ, te te i'rã nhizâri na hã. Ãne ma tô Dawi hã ãma ai'uté, Gulia ãma hã. Ma tô tiwĩ tô, ẽtẽ topsu'u na. Tawamhã filisteu norĩ hã ite da'wapéi'wa isiptede idâ'âzé hã te te 'madâ'â za'ra wamhã, ma tô õne haré aimani za'ra.

⁵² Tawamhã dasi'wapéi 'manharĩ'wa Izaraéu norĩ hã, duré Zuda norĩ dasi'wapéi 'manharĩ'wa zama ma tô isarina sisa're, hârâ sina. Tahawa, ma tô te te wano'õ 'ri'ahâ Gati na isisi u, duré 'ri'ahâ Ecrõ na isisi ãma 'ridawa za'ẽtẽ na, 're idanhisisi mono zéb u. Tawamhã Sa'ara'ĩ na 'ri'ahâ nhisi u bâdâdi inomro na te filisteu norĩ i'u'a za'ra mono hã simi'wara, 'ri'ahâ Gati na isisi tẽme, duré 'ri'ahâ Ecrõ na isisi tẽme.

⁵³ Tawamhã Izaraéu nhihudu norĩ hã filisteu norĩ te te wano'õ mono pari, apâ si'aba'réi wamhã, ma tô ite za'ra 'wamarĩ prã hã 'wasa, te te sima i'ri nhoré za'ra zém hawi.

⁵⁴ Tahawa, Dawi hã ma tô oto ti'â Guliaha 'rã hã. Te te âri wamhã, ma tô 'ri'ahâ Zeruzalẽ u duré ãwisi. Tane nherẽ, Guliaha si'wapézé hã ma tô tite romhâ 'manharĩ na 'ri 'remhã sima tihi.

Dawi da te i'ãwisizé wasu'u, Sau te te hâiba 'madâ'â da hã

⁵⁵ Dawi, Gulia na aibâ 'rãihâ nhisi te te 'wapéi pari iwatobrozém na Sau hã te te 'madâ'â wamhã, ma tô Abine dasi'wapéi 'manharĩ 'madâ'â'wa hã ãma sadanha ãne: — Abine, e 'wa hã õ hã ai'repudu. Tawamhã Abine ma ãma tãma wa'rã ãne: — Me, te waihu'u õ di. Sena na 're i'aihâimana mono ne hã wa tô duré sena aima wasu'u.

⁵⁶ Tawamhã Sau te duré tãma tinha ãne: — Tane wamhã, ma'ãpé aimorĩ, ãma asinharĩ da, waihu'u da.

⁵⁷ Tawamhã Dawi, Gulia te te wĩrĩ parimhã, da te dasima i'ri nhoré za'ra zéb u apâ morĩ wamhã, ma tô Abine hã saprõ, Sauhu u. Dawi te zahadu Guliaha 'rã hã siré ti'â.

⁵⁸ Tawamhã te Sau hã sadanha ãne: — E 'wa hã a hã. Tawamhã te tãma siwasu'u ãne: — Wa hã aima romhuri'wa Zéséhé 'ra, Belẽ ãmamhã.