1 Samuéu 16 - ꞌRe Ihâimana Uꞌâsi Mono Zadawa Wasuꞌu

Samuéu, Dawi te te i'rãti'izé wasu'u, Izaraéu nhihudu norĩ nhib'apito da

¹ Tawamhã Uburé Danhib'apito te Samuéu ma tinha ãne: — E momo te za Sauhu ãma aipẽ'ẽzézé hã i'rãsu. Wa hã te ĩsima wẽ zahu õ di, Izaraéu nhihudu norĩ nhib'apito na 're ihâimana mono da hã. Tahawa, ma'ãpé azeitona 'rãi wa'u hã 'masisi abazei õmo 're, asiré âri da. Taha parimhã te za aimo, Belẽ na 'ri'ahâ nhisi u aibâ Zésé na isisi nhorõwa u. E marĩ wa. Wa hã i'ra norĩ wa tô 'maipisutu, i'masi'apito da hã.

² Tawamhã Samuéu ma tô ãma sada'â ãne: — E niha wa za 'manha. Sau hã bété za ãne hã te te waihu'u wamhã, te za ĩwĩ! Tawamhã Uburé Danhib'apito ma ãma tãma wa'rã ãne: — Te za powawẽ zapu hã ãma i'mazaprõ. Tawamhã te za tãma asiwasu'u, 'Re ihâimana u'âsi mono ma abaze zata na tãma asõprub da, õwa i'aimorĩ na hã.

³ Tahawa, Zésé hã te za iwaptẽ, ĩma danhoprubzéb ãma aime hâimana da hã. Tawamhã wa za wa hã aima hâi'ré, marĩ i'manharĩzéb da hã. Ãhã wamhã, te za a hã i'rãti, apito da, wa hã te ipisudu hã.

⁴ Tawamhã Samuéu hã ma tô 'manha, Uburé Danhib'apito te te tãma i'ruzéb uwaibaba. Taha pari, ma tô Belẽ u hã mo. Tawamhã oto wisi wamhã, 'ri'ahâ ãma dama i'rãnho'õmo norĩ hã ma tô pahi te rẽrẽ'ẽ sina, sina uzusi za'ra. Tawamhã te ãne siwi sadanha: — E aiwaimri na te we aimo, ã wamhã.

⁵ Tawamhã Samuéu ma ãma tãma wa'rãmi za'ra ãne: — Ĩhe. 'Re ihâimana u'âsi mono ma ĩnhoprub da si wa we rob'upa ã wamhã. Tahawa, we ĩme ai'aba'réi wa'aba da hã, ma'ãpé 'Re ihâimana u'âsi mono ma asimirosa'rata na asisõmri za'ra wa'aba. Tawamhã Zéséhé ma, ma tô duré tãma ti'ru i'ra norĩ zama a'â tinhimirosa'rata na sisõmri za'ra da. Taha pari, ma tô oto sô hâ ime si'aba'ré da, 'Re ihâimana u'âsi mono ma danhoprubzéb u hã.

⁶ Tawamhã oto itẽme sihutu wamhã, ma tô Samuéu hã 'madâ Eliabe na isisi Zéséhé 'ra hã. Tahawa, ma tô rosa'rata ãne: “Ã hã aibâ Wanhib'apito 'Re ihâimana u'âsi mono nho're isa hã tô sena, Wanhib'apito te te ipisudu.”

⁷ Tane nherẽ, te Uburé Danhib'apito tãma tinha ãne: — Ihâiba mana wawi iwẽ na hã duré i'rãihâ na hã, 'madâ'â ze tõ, ã hã aibâ hã. Wa tô wẽ'õ wa hã. E marĩ wa. Dahâiba wẽ zéb zarina da te 're idapisutu za'ra mono ne hãi õ wa, ĩnhimipisutuzé hã. Dapẽ'ẽ 're dahâimana wẽ zéb zarina si ĩnhimi'madâ'âzé hã, wa hã.

⁸ Tawamhã Zésé ma tô sô hâ, ti'ra Abinadabi na isisi zô. Tawamhã ma tô duré saprõ Samuéu u hã. Tahawa, Samuéu te duré ãma tãma tinha ãne: — Ãhã zama Wanhib'apito 'Re ihâimana u'âsi mono hã te te pisutu õ di.

⁹ Tawamhã Zésé te duré itẽme saprõ, ti'ra Simeza na isisi hã. Taha na te duré tãma tinha ãne: — Taha zama te te duré pisutu õ di, Wanhib'apito 'Re ihâimana u'âsi mono hã.

¹⁰ Ãne ma tô Zésé hã ti'ra 7 na ihâiba za'ra norĩ hã te te nasi anhimro, Samuéu u hã. Tahawa, te Zéséhé ma tinha ãne: — Ã norĩ hã te te 'maipisutu õ di, Wanhib'apito 'Re ihâimana u'âsi mono hã.

¹¹ Tahawa, te Zésé sadanha ãne: — E aimawi hã ai'ra 'maihâimana õ di duré. Tawamhã Zésé ma ãma sada'â ãne: — Iré hã danhobabati hã. Tane nherẽ, a'ubuni wi te ta hã pone'ẽrebâ hã te te 're ab'madâ'â. Tawamhã te Samuéu tãma tinha, ãne: — Ma'ãpé sô da'mazatõrĩ, we da te saprõni da. We wisi õ nherẽ, wasaihuri da, a'â wasi'ubumroi õ di za.

¹² Tawamhã Zésé ma tô oto sô da'mazatõ. Ta hã ai'repudu iwẽ, ihâiba 'madâ'â ze, duré itõmo 'madâ'â ze. Tawamhã Uburé Danhib'apito te Samuéu ma tinha ãne: — Ĩhe ta hã. Ma'ãpé 'rãti'i.

¹³ Tawamhã Samuéu ma tô oto ti'â abazei u azeitona 'rãi wa'ui ré hã. Taha na ma tô oto 'rãti'i Dawi hã, isisãnawã norĩ nho're. Tahawa, 'Re ihâimana u'âsi mono pẽ'ẽzani hã ma tô Dawihi wamhã oto iwab ãzé siptete na ãma 're ihâimana mono zéb da hã. Tawamhã ta hawim haré ma tô ipẽ'ẽ 'remhã 're hâimana. Tawamhã Samuéu Rama u te oto apâ mo.

Dawi norĩ wasu'u, Sauhu me

¹⁴ Tawamhã Uburé Danhib'apito pẽ'ẽzani hã ma tô oto watobro, Sauhu hâiba hawimhã. Tahawa, ma tô oto iwa'rãmi iwab ãzé, wa'uburé hã, 'Re ihâimana u'âsi mono te te itẽme tãma irob'ru hã. Tahawa, te oto wa'uburé hã wasutu.

¹⁵ Tawamhã te Sauhu ma romhuri'wa norĩ hã tãma nharĩ za'ra ãne: — Wa norĩ hã wa tô waihu'u za'ra ni, 'Re ihâimana u'âsi mono wa'uburé we te te atẽme isatõrĩ te te i'aiwasutu na hã.

¹⁶ Ma'ãpé tahawa wasi'aba'ré da hã wazatõrĩ za'ra na, aibâ rowamreme waihu'u pese 'wa zô 're wanhopré mono da. Tawamhã duré wa'uburé aiwap sébré da, we atẽme morĩ wamhã, aibâ te za rowamremezé hã ta'a. Ãhã wamhã, apâ aima rowẽ di za.

¹⁷ Tawamhã Sau ma tô tãma waihu'u za'ra ãne: — Ma'ãpé aibâ rowamreme wẽ 'wa zô asõpré wa'aba mono da ai'aba'réi wa'aba. Tawamhã asiwi 'manhopẽtẽ aba wamhã, we ãwa asiwi saprõni aba za.

¹⁸ Tawamhã tãma romhuri'wa ma tô ãma 'mazada'â ãne: — Wa hã ĩma waihu'u pese di, 'ri'ahâ Belẽ na isisi ãma Zésé 're isãmra mono 'ra hã. Ta hã rowamreme wẽ 'wai uptabi. Ta hã duré ipahi waihu'u õ, isiptede, duré dasi'wapéi 'manharĩ'wa iwẽ, imreme wẽ, duré ihâiba wẽ. Uburé Danhib'apito hã te duré ime 're hâimana.

¹⁹ Tahawa, ma tô oto Sau hã aibâ norĩ hã satõrĩ za'ra ãne na romreme ré, Zéséhé u hã: — Ai'ra Dawi hã we ĩtẽme satõrĩ, pone'ẽrebâ te te 're i'ab'madâ'â mono hã.

²⁰ Tawamhã Zésé ma tô ti'ra Dawi hã tãma satõ, Sauhu ma. Tahawa, Dawi hã ma tô tinhibzari te te tãma isõmri da hã tãma ti'â, abazei hâ na ub'rẽ 'manharĩ i'masi hã uwa 'rãi wa'u isé na. Ma tô duré tãma saprõ, pone'ẽrebâ zéré uzé 'ra hã. Tawamhã i'u'ẽtẽ wapu ré hã ma tô duré tãma iré saprõ, awaru po'repore hã.

²¹ Tawamhã Dawi hã ma tô oto mo. Morĩ wamhã, ma tô nasi tãma romhu, Sauhu ma hã. Tahawa, Sauhu ma hã wẽ uptabi di Dawi hã. Tawamhã ma tô oto pisutu isi'wapézé hã te te tãma 're mrami mono da.

²² Tahawa, ma tô imama Zéséhé ma romreme tãma tisõ ãne: — Ĩma hã wẽ uptabi di, ai'ra Dawi hã. Tahawa, e we tãma waprosi õ di za, ãme 're hâimana mono da, ĩnhimiromhurizéb ãma.

²³ Tawamhã 'Re ihâimana u'âsi mono, wa'uburé te te isatõrĩ, 're zasi mono sidâpâsi, Sauhu wamhã, ma tô Dawi hã tinhipta'azé hã te te 're mrami, te te 're ta'a mono da hã. Tahawa, Sauhu hawimhã ma tô duré 're pusi, wa'uburé hã. Tahawa, ma tô duré apâ tãma 're rowẽ, Sauhu ma hã.