1 Samuéu 15 - ꞌRe Ihâimana Uꞌâsi Mono Zadawa Wasuꞌu

Izaraéu nhihudu norĩ, amalequita norĩ te te i'wapé za'ra zé wasu'u

¹ Tawamhã Samuéu te Sauhu ma tinha ãne: — Wanhib'apito 'Re ihâimana u'âsi mono ma tô ĩma ai'ru, te ai'rãti'i da hã, isib'a'uwẽ Izaraéu nhihudu norĩ ma asi'apito da. Tahawa, te za iwapa ãhã na hã, Wanhib'apito Iwaihu'u pe te te inharĩzé hã.

² Amalequita norĩ ma, te za rob'manharĩ wasété za'ra. E marĩ wa. Izaraéu nhihudu norĩ hã, Ezitu hawi we si'aba'réi ré te te 'wapé za'ra wa.

³ Tahawa, te za aimo ãhã na hã, amalequita norĩ a'wapé da. Te za uburé pese isimarĩ za'ra marĩ hã tiwi i'a'upro za, ãma aipẽ'ẽzé za'ra ãna, duré ãma aiwamri za'ra ãna. Uburé pese te za i'upro za aibâ norĩ hã, pi'õ norĩ, ai'uté norĩ, ai'utépré norĩ, powawẽ norĩ, pone'ẽrebâ norĩ, awaru ba'õmore norĩ hã, duré awaru po'repore norĩ zama.

⁴ Tawamhã Tera'ĩ na 'ri nho'õmo nhisi ãma ma tô Sau hã, tite dasi'wapéi 'manharĩ'wa norĩ hã oto awaibu, te te aza'rata da. Tawamhã Izaraéu nhihudu norĩ dasi'wapéi 'manharĩ'wa hã para na isi'aba'ré norĩ hã, 200 miu na ihâiba za'ra hã. Duré Zuda hawimhã 10 miu na dasi'wapéi 'manharĩ'wa norĩ hã.

⁵ Tawamhã Sau norĩ hã ma tô ai'aba'ré, tite dasi'wapéi 'manharĩ'wa norĩ me, 'ri'ahâ Amalequi na isisi u. Tame te dazô sima'uri sina pa're 'ré wa mapari za'ra.

⁶ Tahawa, Sau ma tô po're pu'u siromo za'ra queneu norĩ hã ãne: — Ma'ãpé aiwairébé aba, amalequita norĩ hawimhã, isu wa hã te ai'uprosi aba tõ da. E marĩ wa. A norĩ wa'wa hã Izaraéu nhihudu norĩ Ezitu hawi we wairébé wamhã, ma tô tãma i'manharĩ wẽ za'ra wa'wa iwẽ hã. Tawamhã ãne te te po're pu'u za'ra wa, ma tô wairé, queneu norĩ hã.

⁷ Tawamhã Sau te te 'wapé za'ra wamhã, ma tô ãma ai'uté za'ra amalequita norĩ ãma hã Havira na romnhisi hawi Su na romnhisi u hã, Ezitu niwĩ bâtâ pusizém niwĩb u hã.

⁸ Tahawa, amalequita norĩ te apito Adadi na isisi hã ma tô ti'â te te wĩrĩ ãna. Tane nherẽ, ma tô uburé isib'a'uwẽ norĩ hã uprosi.

⁹ Sau tite dasi'wapéi 'manharĩ'wa norĩ me hã te te siwi wĩrĩ õ di, apito Adadi hã. Duré pone'ẽrebâ iwẽ norĩ zama te te siwi simroi õ di, duré powawẽ iba'u iwẽ norĩ hã, powawẽ zapu iwẽ norĩ hã, pone'ẽrebâ zéré mapure si'aibâ iwẽ norĩ hã, duré uburé marĩ iwẽ norĩ hã. Marĩ iwasété norĩ si ma tô siwi uprosi pese, marĩ dai õ wa, ta hã oto.

'Re ihâimana u'âsi mono, Sau te te iwẽ'õzé wasu'u

¹⁰ Tawamhã Uburé Danhib'apito te Samuéu ma tinha:

¹¹ — Sau hã, ma tô ĩrẽ. Duré te tãma iwaihu'uzé hã ma tô ĩmreme rẽ. Tahawa, ma tô ĩwi tirobzei'õ wa hã apito te te i'manharĩzé zabâdâmhã. Tawamhã ãne te te tãma waihu'u wa, ma tô Samuéu wi hã tirobzei'õ duré. Tahawa, mara bâre ma tô mreme 'rãihâ na Sauhu ãma hã mre, Uburé Danhib'apito ma.

¹² Tawamhã ma tô awẽm na Samuéu mararé uptabi watobro, sô rĩtĩ mono da, Sauhu zô. 'Ri'ahâ Carmeru na isisi u imorĩ na hã ma tô waihu'u, isiptete na ãma 're dawata za'ra mono da ẽne hâiwi te te sima isãrĩzéb u, duré taha pari, Gilga u imorĩ na hã ma tô waihu'u.

¹³ Tawamhã Samuéu ma tô Sau hã sõpẽtẽ. Tahawa, Sau hã te te sawi sina, te Samuéu ma tãma tinha ãne: — Samuéu, wa ĩsima wẽ Wanhib'apito 'Re ihâimana u'âsi mono si iwẽ hã te te aima 're sõmri mono da! Wa hã wa tô Wanhib'apito nhimiroti hã te 're wapari pese u'âsi.

¹⁴ Tawamhã te Samuéu sadanha ãne: — E marĩ wamhã, wa bété wapa, powawẽ norĩ hârâ hã, duré pone'ẽrebâ norĩ hârâ zama.

¹⁵ Sau hã ma tô ãma tãma wa'rã ãne: — Ĩte dasi'wapéi 'manharĩ'wa norĩ, ta hã te te siwi iwaibu, amalequita norĩ wi. Ma tô pone'ẽrebâ iwẽ norĩ hã siwi waibu, duré powawẽ iwẽ norĩ hã, ate 'Re ihâimana u'âsi mono ma ãma tãma iwanhoprub za'ra zéb da hã. Isi'atarẽme norĩ hã wa tô uburé pese wasiwi uprosi ni.

¹⁶ Tawamhã Samuéu ma tô Sauhu mreme nhizâ ãne: — Ari'iwi asãmra! Wa za aima wasu'u, Wanhib'apito 'Re ihâimana u'âsi mono te te ĩma inharĩzé hã ã mara isi'utõrĩ na hã. Tawamhã Sau ma ãma sada'â ãne: — Ma'ãpé wasu'u na ĩma.

¹⁷ Tawamhã Samuéu te tãma tinha ãne: — Oro a hã Izaraéu nhihudu norĩ nhib'ihâ'a na aihâimana za hã te taré ne hã asi'ãma irosa'ra. Tane nherẽ, a hã Wanhib'apito 'Re ihâimana u'âsi mono hã ma tô ai'rãti'i, Izaraéu nhihudu norĩ nhib'apito na 're aihâimana mono da.

¹⁸ Ma tô duré aima ti'ru, amalequita norĩ uprosi da hã, a'uwẽ iwasédé hã. Duré ma tô aima hâiba 'ru za'ra 'wapé za'ra da hã uburé i'uprosi pese zéb u.

¹⁹ E marĩ wa, bété wapari õ di, te te aima iwaihu'uzé hã. E marĩ wa, te duré bété sa'ẽtẽ tãma aihâiba asitob'ru norĩ nhimarĩ ma hã asima 'mairẽme da. Ãne 'manharĩ wa, 'Re ihâimana u'âsi mono ma hã upa ti.

²⁰ Tawamhã Sau ma tô ãma tãma wa'rã ãne: — Tane nherẽ, wa hã wa tô te 're wapari pese, Wanhib'apito 'Re ihâimana u'âsi mono nhimiroti hã. Taha wab zama, wa tô watobro, te te ĩma iwaihu'uzéb zarina. Tawamhã wa tô we ãwisi, apito Adadi, amalequita norĩ te hã. Wa tô duré uburé uprosi, amalequita norĩ hã.

²¹ Tane nherẽ, ĩte dasi'wapéi 'manharĩ'wa norĩ, powawẽ iwẽ norĩ hã te te siwi simroi õ di, duré pone'ẽrebâ iwẽ norĩ hã, uburé te te siwi uprosi za'ra da nherẽ. Ãne da nherẽ, ma tô Gilga u hã ãwamhã, we te te siwi simro, 'Re ihâimana u'âsi mono ma, ãma tãma iwanhoprub za'ra zéb da hã, Asib'apito ma.

²² Tawamhã Samuéu ma duré ãma tãma wa'rã ãne: — E ma hã tawamhã tãma iwẽ, Wanhib'apito 'Re ihâimana u'âsi mono ma hã. E dapo're pe. E abaze da te tãma 're izata za'ra mono na tãma danhoprubzé. 'Re ihâimana u'âsi mono, da te 're iwapari pese za'ra mono zé hã iwẽ uptabi, pone'ẽrebâ zéré mapure si'aibâ iwẽ na tãma 're idanhoprub za'ra mono zém nhipai u.

²³ Wanhib'apito wi tiwi 're idasipizari za'ra mono hã pire uptabi di, aiwa simi'â na da te 're iromhuri za'ra mono ne. Duré 'râwi 're idasi'madâ'â ze za'ra mono hã tô dawasédé, romhâibarĩ na 're idawata za'ra mono zém ne. Tahawa, ma tô Wanhib'apito siwi aiwẽ'õ. E marĩ wa. Aima isimirotizé hã, asiwi wẽ'õ wa, a hã.

²⁴ Tawamhã Sau ma tô ãma tãma wa'rã ãne: — Wa tô ĩwasédé hã 'manha tô. 'Re ihâimana u'âsi mono Wanhib'apito nhimiroti hã te wapari õ di, a hã duré ĩma iwaihu'uzéb zama te wapari õ di. Izaraéu nhihudu norĩ ma hã wa tô ĩpahi. Tahawa, wa tô 'manha, te te sima iwẽ za'ra zé hã.

²⁵ Tane nherẽ, ãhã na Samuéu, ĩwasédé te i'manharĩzé hã, ĩ'ãma 're 'madâ'â u'âsi mono tõ da, wa za aiwi waptẽ, duré apâ ãma ĩsiré aimorĩ da, Wanhib'apito ãma ĩwata da hã.

²⁶ Tawamhã Samuéu ma ãma tãma wa'rã ãne: — Ãma asiré ĩmorĩ õ di za. A hã ma tô iwẽ'õ Wanhib'apito 'Re ihâimana u'âsi mono te te aima irotizé hã. Taha zarina, ma tô duré aiwẽ'õ, Izaraéu nhihudu norĩ nhib'apito na i'aihâimanazém na hã.

²⁷ Tawamhã Samuéu hã ãne te te tãma nharĩ pari, ma tô aipi'ra, morĩ da oto. Tahawa, Sau ti'uza ihâpa zarébé ãma ma tô hâ tété tinhib'rata na hã. Tawamhã ma tô õne haré ti'uza hã hâiwazu.

²⁸ Tawamhã Samuéu te duré tinha ãne: — Ã bâtâ na ma tô 'Re ihâimana u'âsi mono hã aiwi hâiwazu, Izaraéu nhihudu norĩ 'madâ'âzé hã. Tahawa, ma tô oto tisõ, asipai u iwẽ ma, Izaraéu nhihudu norĩ nhib'ihâ'a da ma.

²⁹ Izaraéu nhihudu norĩ nhib'apito, 'Re ihâimana u'âsi mono hã sadawa nhipese waihu'u õ di, duré te te ãma saprĩ waihu'u õ di, tinhimirosa'rata na hã. E marĩ wa. Õ hã ti'ai ãma a'uwẽ ne hãi õ di. Tahawa, tinhimirosa'rata na te te saprĩ õ di.

³⁰ Tawamhã Sau timreme na hã ma tô duré ãma sahu ãne: — Wa hã wa tô ĩwasédé hã 'manha. Tane nherẽ, ma'ãpé ĩwazé na za, uburé danhib'ihâ'a norĩ nho'remhã, duré uburé Izaraéu nhihudu norĩ nho'remhã. Apâ ãma ĩsiré aimorĩ, Asib'apito 'Re ihâimana u'âsi mono ãma, ãma ĩwata da.

³¹ Ãne wa ma tô Samuéu hã isiré hã mo. Tahawa, ma tô oto Sau hã ãma tiwata, Uburé Danhib'apito ãmamhã.

³² Tawamhã Samuéu ma tô dasi'wapéi 'manharĩ'wa norĩ ma 'ru za'ra ãne: — Ma'ãpé we ãwa saprõni aba, apito Adadi hã. Tawamhã apito Adadi hã ma tô rẽrẽ'ẽ sina itẽme mo, Sauhu tẽme. 'Râwi te sima rosa'rata ãne: “E pipa ã bâ wa za isé na hã dârâ.”

³³ Tawamhã te Samuéu hã tãma tinha ãne: — Asi'wa hã dana norĩ 'ra ãna 're hâimana za'ra mono da, te te tãma 're i'manharĩ za'ra mono ne, te za ãhã na hã ana zama oto 'ra ãna tihâiba. Taha pari, ma tô oto Samuéu hã ãma aiwã õne haré, Gilga ãma, danhoprubzéb da, ẽtẽ za'ra nho're.

³⁴ Taha pari Samuéu hã, Rama na 'ri nho'õmo nhisi u ma tô oto mo. Sau hã te duré tinhorõwa u oto mo, 'ri'ahâ Zibea u.

³⁵ Tawamhã niwamhã Samuéu te te oto 'madâ'â na sitéb õ di Sau hã. Tane nherẽ, ma tô ipẽ hã ãma wĩrĩ pese. Duré Uburé Danhib'apito wi hã ma tô tiwi tirobzei'õ, Izaraéu nhihudu norĩ nhib'ihâ'a da, marĩ da Sau hã te te sẽrẽ wa.