1 Samuéu 14 - ꞌRe Ihâimana Uꞌâsi Mono Zadawa Wasuꞌu

Zonata, Filisteu norĩ te te a'wapéi wa, te te ãma i'ai'uté za'ra zé wasu'u

¹ Tawamhã nimahã bâtâ na te Zonata hã tãma tinha, tisi'wapézé âri'wai ma ãne: — Oto wane na ẽtẽ nhi'riti na bâdâdi uiwada niwĩ, filisteu norĩ te te sima i'ri nhoré za'ra zéb u. Tane nherẽ, Zonata, timama ma, te te wasu'u õ di, za marĩ te te i'manharĩzé hã.

² Tahawa, Sau hã te tihâiba, Midrõ na romnhisi ãma, Zibea na 'ri nho'õmo nhisi 'rata, roma na rowede nhisi zahâpâ te te sima i'ri nhoré wa. Tawamhã isiré hã 600 na dasi'wapéi 'manharĩ'wa norĩ hã, te tihâimana za'ra.

³ Tawamhã sasedoti si'uzazém na ãma 're isi'uza mono hã, Ai'asi na isisi, Aitubihi 'ra, Icabôhô 'ra wapté hã. (Icabô hã Finéaha 'ra, Erihi nhihudu. Eri hã, aré Silo ãma Wanhib'apito 'Re ihâimana u'âsi mono ma 're ihâimana mono sasedoti na hã.) Tawamhã aibâ norĩ te te siwi waihu'u õ di, 'ri nhorézém hawi Zonata iwatobrozé hã.

⁴ Tawamhã Zonata, filisteu norĩ te te sima i'ri nhoré za'ra zéb u morĩ da wamhã, ẽtẽ nhi'riti bâdâdi na isaprĩzé hã. Tame te ẽtẽ tõmo wawẽ Bosesi na isisi hã, ihâiba amo Sene na isisi me hã, si'uiwada pese na tiza'wari zahuré.

⁵ Ẽtẽ tõmo wawẽ imorĩ'rada Bosesi na isisi hã te hâiwa nhimi'e niwĩ, Mitima nho're niwĩ nomro. Duré ihâiba amo Sene na isisi hã, te Zeba na 'ri nho'õmo nhisi niwĩmhã isõ're nomro.

⁶ Tawamhã Zonata te aibâ iprédupté isi'wapézé âri'wai ma tinha ãne: — Oto wane na, filisteu norĩ, ihâiba'õ 'Re ihâimana u'âsi mono upa na ãma 're iwata za'ra mono norĩ 're ihâimana wasété za'ra mono te te sima i'ri nhoré za'ra zéb u. Ãté te za Wanhib'apito wapawapto. Te te wapawaptob da hã wamhã, wa te ãma i'ai'uté za'ra zéb da hã wa'umro nherẽ marĩ hã te te wawi sawi waihu'u za'ra õ di za.

⁷ Tawamhã aibâ iprédupté ime imorĩ hã ma ãma sada'â ãne: — Niha hã iwẽ isãmrizéb zarina 'manharĩ tô. Wa ãma ai'uze tô, aime ĩhâimana zarina.

⁸ Tawamhã ma tô duré ãma sada'â ãne, Zonata hã: — Wẽ di tô. I'uiwada u wa te saprĩ na pé oto, ihâimana za'ra zéb u, te te tô wa'madâ'â za'ra da, dasi'wapéi 'manharĩ'wa norĩ hã.

⁹ Tawamhã 'râwi watẽme sihutu da, a'â sô wanhimizahâri za'ra da, te te wama nharĩ za'ra wamhã, wa za a'â tô 'mazahâri za'ra ni za.

¹⁰ Tane nherẽ, ihâimana za'ra zéb u waneb da, te te wama nharĩ za'ra wamhã, wa za tô duré a'â wanem ni. E marĩ wa. Ãne wamhã, Wanhib'apito 'Re ihâimana u'âsi mono, wanhib'rata za te te wama ihâiba nhomri za'ra zé hã te wasu'u, za wa te duré ãma i'ai'uté za'ra zéb da hã.

¹¹ Tawamhã sõ'awi ma tô oto tineb zahuré, filisteu norĩ te te siwi 'madâ'â za'ra da hã. Tawamhã ãne te sima 'mahârâ za'ra, te te siwi 'madâ'â za'ra wamhã: — Ma'ãpé asiwi 'madâ'â aba! Ni'wam norĩ hebreu norĩ hã ma tô tipusi zahuré, ab're wa isima'uri za'ra zém hawi.

¹² Tahawa, filisteu dasi'wapéi 'manharĩ'wa norĩ hã ma tô siwi 'mahârâ zahuré, Zonata norĩ hã ãne: — We ãwa sai'uri waré aba! Marĩ hã wa te aima hâi'ré aba da hã, wa wasima wẽ za'ra ni. Tawamhã Zonata te tisiré aibâ iprédupté ma hã tinha ãne: — We ĩzarina aimorĩ. E marĩ wa. Wanhib'apito 'Re ihâimana u'âsi mono hã, filisteu norĩ, ma tô Izaraéu nhihudu norĩ ma hâiba nhomri za'ra te te ãma i'ai'uté za'ra da hã.

¹³ Tawamhã Zonata, ma tô tinhib'rata na te te romrami mono sina oto sai'u. Aibâ iprédupté hã te duré sai'u isarina. Tahawa, Zonata te te a'wapéi mono wamhã, duré te te a'marõpãrĩ mono wamhã, isi'wapézé âri 'wa hã ma tô õne haré isarina te te 'mapãrĩ.

¹⁴ Tawamhã imorĩ'rata na te te a'wapéi wamhã, ma tô uprosi 20 na aibâ norĩ hã, duré 1.200 metru na ti'ai pibuzé zapoto 'remhã.

¹⁵ Tahawa, ma tô filisteu norĩ uburé te te sima i'ri nhoré za'ra zéb ãma ihâimana za'ra hã tipẽ'ẽwara pese za'ra. Dasi'wapéi 'manharĩ'wa norĩ, pahi wa te duré tirẽrẽ'ẽ za'ra. Tawamhã ti'a zama te duré sa'ẽtẽ popo. Tahawa, rowaihu'u'õ na hã, ma tô tiromhâiba.

Filisteu norĩ ãma da te i'ai'uté za'ra zé wasu'u

¹⁶ Tawamhã Sauhu te wapsãi'a'wa norĩ, Bẽzamihĩ nhihudu norĩ te ti'ai ãma, Zibea na 'ri wa'õtõ nhisi wa ihâimana za'ra norĩ hã, ma tô filisteu norĩ, uihâ idi'iti za'ra wa siwa'rãmi 're isisa'rei mono hã 'madâ'â za'ra.

¹⁷ Tawamhã te Sau tite dasi'wapéi 'manharĩ'wa 'madâ'â'wa norĩ ma nharĩ za'ra ãne: — Ma'ãpé wa te dasi'wapéi 'manharĩ'wa norĩ hã, sa'rata za'ra wa'aba, sô 'mairo'wanhi'riti zô. Tawamhã te te sa'rata za'ra wamhã, ma tô siwi upsibi me, Zonata norĩ zô irobaba zahuré zé hã, ite isi'wapézé mrami'wai me.

¹⁸ Tawamhã Sau te sasedoti Ai'asihi ma tinha ãne: — We âri ãwa, 'Re ihâimana u'âsi mono te, wedehâ're hã. Ãne ma tô tãma tinha. E marĩ wa. A'uwẽ Izaraéu nhihudu norĩ, 're nomro mono sidâpâsi ma tô wedehâ're ne hã da te dasiwi 're mrami isõwab za'ra hã.

¹⁹ Tawamhã Sau ãne na sasedoti ma te te nharĩ mono ré, ma tô filisteu norĩ te te sima i'ri nhoré za'ra zéb ãmamhã rowaihu'u'õ hã te te sina hâimo mono. Tawamhã te duré Sau tãma tinha ãne, sacedotihi ma: — Wanhib'apito hã, Sadanharĩ zahu õ di za.

²⁰ Tawamhã Sau tite aibâ norĩ me ma tô õne haré asisi, filisteu norĩ te te 'wapé za'ra da hã. Tawamhã ta norĩ hã tõmoi hu'u õ na hâimana za'ra wa, ma tô tisiré norĩ me hã 'râwi si'wapé za'ra.

²¹ Tawamhã ni'wam norĩ hebreu norĩ siré hã filisteu niwĩ aré te te isaprĩ za'ra hã, duré filisteu norĩ te te sima i'ri nhoré za'ra zéb u isi'aba'ré hã ma tô oto apâ saprĩ za'ra, Sauhu niwĩ duré Zonataha niwĩ hâimana za'ra da.

²² Tawamhã Izaraéu nhihudu norĩ, Efraĩ na romnhisi ãma ẽne ihâimana ãma isima'uri za'ra zama, ma tô filisteu norĩ pahi te siwa'ru dawi isisa'rei mono zé hã waihu'u za'ra. Tahawa, apâ sada si'rã'õtõ pari wamhã, ma tô Filisteu hã bâdâdi na te te 'wapéi u'âsi za'ra.

²³ Bete-Awé na romnhisi inomro nhipai u bâdâdi na ma tô duré te te 'wapéi u'âsi za'ra. Tawamhã Danhib'apito 'Re ihâimana u'âsi mono hã tô taha bâtâ na ma tô Izaraéu nhihudu norĩ ma sõmri za'ra, za te te da'ãma i'ai'uté za'ra zéb da hã.

Izaraéu nhihudu norĩ si'wapé za'ra pari, Sau te te iropisutuzé wasu'u

²⁴ Tawamhã tô taha bâtâ na ma tô ab'uwa za'ra Izaraéu nhihudu norĩ hã mrap te. E marĩ wa. Sau hã ropisudu te te 'manharĩ wa, ãne: “Ni'wa hã ĩnhitob'ru norĩ hâiba na te 'ruiwa'âbâ za'ra wana ré, ã bâtâ na marĩ hã te te 'rẽne wamhã, ta hã te za dârâ.” Tahawa, ni'wa hã marĩ hã te te 'rẽne õ di, bâtâ wahuré na hã.

²⁵ Tawamhã marãi u, ma tô uburé aihutu. Sihutu wamhã, tame ma tô ropĩ hã uburé wede mono bâ te te sõpẽtẽ za'ra.

²⁶ Wede mono na te ropĩni si tihâimana za'ra. Tane nherẽ, ni'wa hã te te 'mai'upsõmri õ di. E marĩ wa. Pahi za'ra wa, Sau te te iropisutuzé ma hã.

²⁷ Tane nherẽ, Zonata hã te te wapari õ di, imama Izaraéu nhihudu norĩ ma te te iwaihu'uzé hã. Tahawa, ma tô tinhib'rata wedehu te te 're i'âri hã, ropĩni zadawa u hã sô wẽ, te te ãma 'rãsutu di'i da, ropĩni na hã. Tawamhã ma tô oto upsõ suru na. Te te upsõmri wamhã, ma tô awa'awi niha na hã siwaihu'u tãma irowẽzém na hã.

²⁸ Tane nherẽ, te aibâ hã tãma tinha ãne: — Uburé mrap te wa norĩ hã wa tô ab'uwa za'ra ni, aimama hã te te wama amhâzépata za'ra wa, ãne: “Ni'wa hã ã bâtâ na hã marĩ te te 'rẽne wamhã, wa za ropipa hã tãma pisutu za!”

²⁹ Tawamhã Zonata ma ãma sada'â ãne: — Ĩmama hã ma tô rob'manharĩ wasété, wanhib'a'uwẽ norĩ ma hã. Ma'ãpé asiwi ĩ'madâ'â aba. Ĩma rowẽ di wa hã suru na te 'mai'upsõmri parimhã, ã hã ropĩ hã.

³⁰ Tahawa, ã bâtâ na wẽ di aré wanhib'a'uwẽ norĩ te te huri 'wa'âhã, wanhitob'ru norĩ ãma wa te ai'uté za'ra wa, dasa te te iduri mono hã. Pra! E ãhãre aré sadawa nhiptete za'ra wa, filisteu norĩ wa te i'uprosizé hã.

³¹ Tawamhã taha bâtâ na Mitima hawi Aizarõ na 'ri wa'õtõ nhisi u filisteu norĩ ãma te te ai'uté za'ra parimhã, ma tô Izaraéu nhihudu norĩ hã ab'uwa pese za'ra, mrap te.

³² Tahawa, tinhitob'ru norĩ wi pone'ẽrebâ, powawẽ, duré powawẽ zapu te te iwaibu za'ra zô hã, ma tô oto wairé. Tahawa, iwapru zô te te sima sõnhi're hipãrĩ za'ra ãna tame te te sima 'maiwĩrĩ za'ra wamhã, ma tô tihu waprui ré.

³³ Ãne wa, ma tô Sau u hã 'maimo, te te tãma 'mairowasu'u da hã ãne: — Ma'ãpé 'madâ'â za'ra na! Izaraéu nhihudu norĩ hã ma tô tiwasédé hã 'Re ihâimana u'âsi mono wi hã 'manharĩ za'ra. Imorĩ'rata na abaze te te sima iwapru pu'u õ za'ra nhi hã ma tô siwi ti'rẽ, wapru pu'u õ nherẽ. Tahawa Sau, mreme 'rãihâ na ma tô tinha ãne: — E niha ma tô aiwasété za'ra wa'wa. Ẽtẽ tõmo wawẽ, we ĩma asiwi pizari aba mono ãwa.

³⁴ Tahawa, te duré Sau hã tãma rob'ru za'ra ãne: — Ma'ãpé Izaraéu nhihudu norĩ tẽme, ai'aba'réi wa'aba, tãma nharĩ za'ra wa'aba da, hâiba mono bâ we te te ĩma simroi mono da powawẽ hã, duré pone'ẽrebâ hã. Tawamhã ãmep si te za siwi simro za te te ihuri da hã. 'Re ihâimana u'âsi mono wi, tiwasédé te te 'manharĩ za'ra tõ da, romnhi hã waprui ré te te ihuri da hã mare di. Tahawa, ãne te te tãma waihu'u za'ra wa, ma tô taha mara na uburé hâiba mono bâ hã te te simro powawẽ hã, duré pone'ẽrebâ hã tame te te siwi simro da.

³⁵ Tawamhã Sau hã ma tô oto ẽne hã sa'ra sisiwipsi, Uburé Danhib'apito ma, ãma tãma 're idanhoprub za'ra mono zéb da hã. Ãne hã imorĩ'rata na ma tô ẽtẽ za'ra sisiwipsi hã 'manha.

Izaraéu nhihudu norĩ, Zonata te te siwi isõ'reptuzé wasu'u

³⁶ Tawamhã Sau, te tite dasi'wapéi 'manharĩ'wa norĩ ma nharĩ za'ra ãne: — Filisteu norĩ wa te 'wapé za'ra da hã, bara na ã hã ẽtẽ hawimhã wa te si'ra za'ra wa'aba za. Tawamhã wa te ãma awẽ u pré za'ra wamhã, wa za uburé marĩ tãma ihâimana za'ra hã wa te duri. Tawamhã filisteu norĩ hâiba ré wa te wasiwi i'mairẽme za'ra da hã mare di za. Tawamhã ma ãma sada'âbâ za'ra ãne: — 'Manharĩ tô nimahã asima iwẽzéb zarina. Tane nherẽ, te sasedoti tãma nharĩ za'ra ãne: — Imorĩ'rata na a'â 'Re ihâimana u'âsi mono hã wa te wasiwi sadawa pibui wa'aba, marĩ wa te a'â waihu'u za'ra da.

³⁷ Tawamhã Sau, 'Re ihâimana u'âsi mono hã ma te a'â sadawa pibu ãne: — E filisteu norĩ zô wa za wazahutu za'ra, wa te susi za'ra da hã. E te za duré a hã ihâiba nhomri za'ra, Izaraéu nhihudu norĩ te te ãma ai'uté za'ra da hã. Tane nherẽ, tô taha bâtâ na te te ãma sada'âbâ õ di, 'Re ihâimana u'âsi mono hã.

³⁸ Tahawa, te Sau hã danhib'ihâ'a norĩ ma nharĩ za'ra ãne: — We ai'aba'réi wa'aba ãwa, ã bâtâ na danhimi'manharĩ wasété zé hã wa te wasiwi upsibi me da.

³⁹ Ãhã na wa hã wa ropisutu, Wanhib'apito 'Re ihâimana u'âsi mono ma hã, Izaraéu nhihudu norĩ nho'reptui'wai ma hã marĩ 'manharĩ wasété 'wa hã te iwĩrĩ da hã. Tô ĩ'ra Zonata te te upai hã wamhã, wa za tô tiwĩ ta hã. Tane nherẽ, ni'wa hã te te ãma sada'âbâ õ di, ãne te te nharĩ wamhã.

⁴⁰ Tawamhã Sau ma duré tãma waihu'u za'ra ãne: — Õ niwĩ uburé te za aimasa wa'wa. Tawamhã wa norĩ hã wa za ã niwĩ ĩ'ra Zonataha me wasiwaprosi aima'wara ni za. Tahawa, ma tô ãma sada'âbâ za'ra ãne: — Iwẽzéb uwaibaba, marĩ hã tô 'manharĩ.

⁴¹ Tawamhã Sau hã te Uburé Danhib'apito Izaraéu nhihudu norĩ te, 'Re ihâimana u'âsi mono ma tinha ãne: — 'Re ihâimana u'âsi mono, e marĩ wa, ã bâtâ na hã ĩzada'âbâ õ di. Wanhib'apito, Izaraéu nhihudu norĩ te 'Re ihâimana u'âsi mono, ma'ãpé ẽne sasedoti te, wa te wasima ime za'ra zém na hã ãma ĩzada'âbâ za. Wa hã marĩ na te upai wamhã, niha wamhã duré Zonata marĩ na te te upai wamhã, ma'ãpé ãma ĩzada'âbâ, ẽne Urĩ na isisi hã ipisutuzéb ãma. Duré asib'a'uwẽ Izaraéu nhihudu norĩ, marĩ na te te upa za'ra wamhã, ma'ãpé ãma ĩzada'âbâ, ẽne Tumi na isisi hã ipisutuzéb ãma. Tahawa, õ norĩ na si ma tô oto ãma sada'â Zonataha norĩ na si, Sau me hã. Mare di, Izaraéu nhihudu norĩ dasi'wapéi 'manharĩ'wai ãmamhã.

⁴² Tahawa, te Sau duré tãma nharĩ za'ra ãne, Izaraéu nhihudu norĩ ma hã: — Ma'ãpé ẽtẽ ui'éré hã asiwi wabzuri aba, wa hã te upa zô, niha wamhã duré ĩ'ra te te upa zô, wa hã te waihu'u da. Tawamhã ẽtẽ ui'éré te te siwi iwabzuri hâiba amo hã ma tô Zonata hã wasu'u.

⁴³ Tawamhã te Sau sadanha ãne: — E marĩ ma tô i'manha. Tawamhã Zonata ma asa ãma sada'â ãne: — Wa tô ropĩ hã suru na upsõ wedehu ĩnhib'rata te 're i'âri 'rãsutu na te ãma ĩsima idi hã. Tahawa, ãhãta wa ĩhâiba, tô ĩdâ'â da hã.

⁴⁴ Tawamhã Sau te tinha ãne: — Tô a hã da te aiwĩrĩ dai õ wamhã, 'Re ihâimana u'âsi mono hã te te ĩwĩrĩ tô.

⁴⁵ Tane nherẽ, dasi'wapéi 'manharĩ'wa norĩ hã ma tô ãma sada'âbâ za'ra ãne: — Tô'ã. Zonata idâ'â da hã mare di za. Taha nhimipawaptobzéb zarina wa tô Izaraéu nhihudu norĩ hã da'ãma ai'uté za'ra ni. Wa norĩ hã wa tô, Wanhib'apito 'Re ihâimana u'âsi mono ma hã ropisutu za'ra ni i'rãi hawimhã iséré hã da te tiwi 'matari tõ da. Ã bâtâ na marĩ hã te te i'manharĩ na hã 'Re ihâimana u'âsi mono nhimipawaptobzém na si ma tô 'manha. Ãne ma tô dasi'wapéi 'manharĩ'wa norĩ hã siwi sõ'reptu Zonata hã, idâ'âzé wi.

⁴⁶ Tawamhã Sau, filisteu norĩ te te i'wapé za'ra zém na hã ma tô õne haré mazazâ. Tahawa, ma tô tinhipti'ai u apâ ai'aba'ré.

Sauhu 'ra norĩ wasu'u

⁴⁷ Tawamhã Sau Izaraéu nhihudu norĩ ma si'i'rãnho'õmo parimhã, ma tô iwaptoma isitob'ru norĩ uburé 're isi'ubumroi mono norĩ hã a'wapé, Moabi na romnhisi ãma 're ihâimana za'ra mono norĩ hã, Amo na romnhisi ãma 're ihâimana za'ra mono norĩ hã, Edõ na romnhisi ãma 're ihâimana za'ra mono norĩ hã, Zoba na romnhisi ãma danhib'ihâ'a 're ihâimana za'ra mono norĩ hã, duré filisteu norĩ hã. Tawamhã ã norĩ hã te te a'wapéi mono wamhã, ma tô uburé ãma ai'uté za'ra.

⁴⁸ Sau hã pẽ'ẽwara ãna te te a'wapéi wa, ma tô duré ãma ai'uté za'ra amalequita norĩ ãma hã. Tawamhã 're si'wapé za'ra mono sidâpâsi ma tô õne u'â Izaraéu nhihudu norĩ 'wawimhã 're simapa u'âsi.

⁴⁹ Sau hã si'ubdatõ i'ra si'aibâ hã: Zonata, Isiwi, duré Ma'uquisua. Duré i'ra sipi'õ dub'rata nhisi hã Merabe na, duré ino nhisi hã Micau na.

⁵⁰ Imro nhisi hã Aino'ã na, Aima'asihi 'ra hã. Duré dasi'wapéi 'manharĩ'wa norĩ nhib'ihâ'a hã Sauhu sisãnawã, Abine na isisi hã, imama amo Nehe 'ra.

⁵¹ Quisi hã Sauhu mama, duré Ne hã Abinehe mama, ta norĩ hã Abi'éhé 'ra zahuré.

⁵² Tawamhã Sau, 're hâimana mono ré ti'ai ãmab ré hã, ma tô filisteu norĩ hã sahi sina hã te te 're a'wapéi u'âsi. Duré ma tô õne u'â aibâ isiptete si duré isib'ru si te te 're awaibu, te te 're anheme mono da hã, dasi'wapéi 'manharĩ'wa norĩ zu, ime 're nomro mono da.