1 Samuéu 13 - ꞌRe Ihâimana Uꞌâsi Mono Zadawa Wasuꞌu

Izaraéu nhihudu norĩ, Filisteu norĩ te te i'wapé za'ra zé wasu'u

¹ Tawamhã Sau, 30 na ãma iwahubzéb ãma ma tô si'apito. Tahawa, Izaraéu nhihudu norĩ ma apito na 're hâimana mono ré hã, ma tô 42 na ãma tiwahu.

² Tawamhã ma tô pisutu za'ra 3 miu na aibâ hã Izaraéu nhihudu norĩ hã. 2 miu na ime ihâimana za'ra hã 'rinho'u Mitima ãma, duré Bétéu ti'a niwĩ ẽtẽ ãma hã. Duré miu na Zonataha me ihâimana za'ra hã, Zibea 'ri nho'õmo ãma Bẽzamihĩ nhihudu norĩ nhipti'ai wa'õtõ ãma hã. Tawamhã tinhorõwa u aibâ isi'mairẽme norĩ hã, ma tô satõrĩ za'ra apâ si'aba'ré da.

³ Tawamhã Zonata hã, ma tô tiwĩ filisteu da'wapéi'wa norĩ wada'uri'wa hã, 'rinho'u Zeba na isisi ãma. Ãne hã ma tô filisteu norĩ waihu'u za'ra. Tawamhã Sau, ma tô aibâ norĩ hã satõrĩ za'ra, te te dapo're pu'u za'ra mono da, uburé ti'ai wa'õtõ nho'õmo mono bâ da te ihãsi mono da hã ihârâre hã, ãma sô simnhihãsi za'ra da hebreu norĩ zô isi'wapé za'ra da hã.

⁴ Tawamhã ã hã uburé Izaraéu nhihudu norĩ hã ma tô wapari za'ra, rowasu'u hã: “Sau hã, filisteu norĩ te dasi'wapéi'wa norĩ 'madâ'â'wa hã ma tô tiwĩ. Tahawa, ma tô Izaraéu nhihudu norĩ hã oto 'ru 'manharĩ za'ra.” Tawamhã sô idahãsizé te te wapari za'ra wa, ma tô Gilga ãma Sauhu tẽme si'rã'õtõ da hã ai'aba'ré.

⁵ Tawamhã filisteu norĩ hã ma tô duré si'rã'õtõ, Izaraéu nhihudu norĩ te te isahu da hã. Tahawa, ite za'ra 30 miu na wedewara zapore na dasi'wapézé hã duré 6 miu na awaru na da'wapéi'wa norĩ hã. Duré ahâ uptabi di dasi'wapéi 'manharĩ'wa norĩ hã â zaihâ na supara 'ré 're ihâimana za'ra mono ne. Tawamhã ma tô oto ai'aba'ré Mitima u, Bete-Awé na 'ri nho'õmo nhisi bâtâ pusizém niwĩ. Tame ma tô sima 'ri nhoré za'ra.

⁶ Tawamhã Izaraéu nhihudu norĩ ma tô sina waihu'u za'ra, dapusizéb da iwaihu'u'õ na hã, duré tãma iromnhimimnhasi za'ra zé hã. Tahawa, ma tô ni'wam norĩ hã aima'uri za'ra ẽtẽ 'rãihâ zahâpâ ẽtẽ're 're, duré ab're 're. Duré ni'wam norĩ hã, ma tô aima'uri za'ra ẽtẽ nhi'riti 're ab're wa, duré ẽtẽ na ab're 're, duré â zô ab're 're.

⁷ Ni'wam norĩ hã ma tô saprĩ za'ra panho'u Zodã pa na si'aba'ré da, Gadihi nhipti'ai u, duré Ziliadi na romnhisi u. Sauhu si ma tô Gilga ãma hã nhamra. Tame 're idahâimana za'ra mono norĩ hã, ma tô tapahi pese za'ra ni.

⁸ Tahawa, Sau hã ma tô a'â mapa, 7 bâtâ 'remhã, Samuéu te te tãma ipisutuzéb zarina. Tane nherẽ, Samuéu hã morĩ õ di itẽme. Tahawa, a'uwẽ norĩ, Sau te te siwi rẽme da hã, re na ihawi si'aba'ré da, te oto tiwi asama.

⁹ Tawamhã Sau te tãma nharĩ za'ra ãne: — We ĩma 'mai'âri aba abaze hã ãwa, 'Re ihâimana u'âsi mono ma, te zata da, duré tãma danhoprubzé ãma irowẽ za'ẽtẽ zama. Tawamhã ma tô oto ãma tinhopru.

¹⁰ Tawamhã te te zata pari, ma tô Samuéu hã oto wi itẽmemhã. Tahawa, Sau hã ma tô sina uzusi te te sawi da hã.

¹¹ Tane nherẽ, Samuéu hã te sadanha ãne: — E marĩ ma tô i'manha. Tawamhã Sau ma ãma sada'â ãne: — Ĩnhib'a'uwẽ norĩ te te siwi ĩrẽme da, nasi apâ isi'aba'ré na hã, wa tô waihu'u za'ra. A zama ãwamhã bété duré we aimorĩ õ di, ĩma ropisutu nherẽ. Filisteu norĩ hã ma tô si'rã'õtõ duré, Mitima ãma hã.

¹² Tahawa wa tô rosa'rata ãne: “Filisteu norĩ hã te za we ai'aba'ré ãwa, Gilga u, te te siwi ĩ'wapé da. Tane nherẽ, zahadu te pibui õ di, Wanhib'apito 'Re ihâimana u'âsi mono nhimipawaptobzéb hã.” Tawamhã wa tô oto tisã, ãma tãma ĩnhoprubzéb da hã.

¹³ Tawamhã Samuéu ma ãma sada'â ãne: — A hã asimiza'rese õ ne ma tô marĩ hã i'manha. Wapari õ di, Wanhib'apito 'Re ihâimana u'âsi mono te te aima i'ruzé hã. Wapari 'wa'âhã, te aré Izaraéu nhihudu norĩ ma i'rãnho'õmo na tãma 're aihâimana u'âsi za'ra mo. Asihudu norĩ zama te aré dama i'rãnho'õmo na dama 're hâimana u'âsi za'ra.

¹⁴ Tazahã, ãhã na a hã dama i'rãnho'õmo na 're aihâimana mono na ãma uzusi õ di za. E marĩ wa. A hã wapari õ wa, Wanhib'apito te te aima i'ruzé hã. Tahawa, te za aibâ zô, rĩtĩ te te 'mazabu da, te te sima iwẽzéb zarina te te pisutu da Izaraéu nhihudu norĩ ma isi'apito da hã.

¹⁵ Tawamhã Samuéu ma tô oto watobro Gilga hawi, morĩ da oto. Tahawa, Sau a'uwẽ norĩ siré Gilga hawimhã ma tô mo, Bẽzamihĩ nhihudu norĩ nhipti'ai 're tite dasi'wapéi 'manharĩ'wa norĩ tẽme Zibea u morĩ da. Tawamhã tame ma tô tite dasi'wapéi 'manharĩ'wa norĩ hã aza'rata. Tawamhã ma tô aibâ norĩ uburé hã watobro 600 na.

¹⁶ Tawamhã Sau, ti'ra Zonataha me ma tô tite dasi'wapéi 'manharĩ'wa norĩ ré hã tihâimana zahuré, Bẽzamihĩ nhihudu norĩ te ti'ai 're Zeba na 'ri nho'õmo nhisi ãma. Tahawa, Mitima ãma filisteu norĩ te te sima i'ri mono 'remhã te tihâimana za'ra.

¹⁷ Tawamhã dasi'wapéi 'manharĩ'wa filisteu norĩ hã ma tô oto dazô wairé si'ubdatõ iwa'õtõ na, isi'wapé za'ra da hã. Tahawa, misi iwa'õno hã ma tô ai'aba'ré, Opra na 'ri nho'õmo nhisi Su'aha nhipti'a niwĩ.

¹⁸ Iwa'õtõ hâiba amo hã, Bete-Horõ na 'ri wa'õtõ nhisi niwĩ, ma tô ai'aba'ré. Si'ubdatõ ãma iwa'õno hã sa'a nho'õmo u ma tô ai'aba'ré, Zebo'ĩ na ẽtẽ siwa'aba nhisi i'madâ'â pese niwĩ, duré a'ubuni wi rop si 're isa'wari mono i'madâ'â pese niwĩb zama.

¹⁹ Filisteu norĩ hã ma tô aré te te tiwi 're sawi za'ra hebreu norĩ wi, te te 're 'manharĩ za'ra mono tõ da, sib'ézé 'wapa hã, duré isi'uwazi 'rã'wa hã. Tahawa, tame Izaraéu nhihudu norĩ nhipti'ai ãma dama 're hâimana za'ra mono õ di, isi'uwazi na rob'manharĩ'wa hã.

²⁰ Tahawa, ti'ai hâipo'o'wa norĩ hã, hâtâra 'rãpo hã, hâtâra hã, popanone hã, Izaraéu nhihudu norĩ wi 're 'wa'õ za'ra mono wamhã, ma tô filisteu norĩ tẽmemhã te te 're 'wasari te te 're 'wa za'ra mono da.

²¹ Tawamhã ã hã Izaraéu nhihudu norĩ te te sima 're 'wa za'ra mono da wamhã, ma tô te te tãma 're wa'âbâ za'ẽtẽ za'ra filisteu norĩ ma, hâtâra hã duré powawẽ zusizéb da hã. Tane nherẽ, ti'ai hâipo'ozém norĩ hã hâtâra 'rãpo me hã, danhipai u i'wa da hã iwa'âbâ za'ẽtẽ zahuré.

²² Tahawa, bâtâ na oto dasi'wapé da wamhã, dasi'wapéi 'manharĩ'wa Izaraéu nhihudu norĩ te hã hâimana õ di, sib'ézé 'wapa hã, duré isi'uwazi 'rã'wa hã. Tahawa, Sauhu norĩ te si i'ra Zonataha me hã te tãma tihâimana zahuré.

²³ Tawamhã filisteu norĩ ma tô dasi'wapéi 'manharĩ'wa misi iwa'õtõ norĩ hã satõrĩ za'ra, Mitima 'rata ẽtẽ nhi'riti na bâdâdi inomro hã te te siwi bâdâdi simri da.