1 Samuéu 12 - ꞌRe Ihâimana Uꞌâsi Mono Zadawa Wasuꞌu

Samuéu sisa'u timreme te te i'manharĩzé wasu'u

¹ Tawamhã Samuéu te Izaraéu nhihudu norĩ ma nharĩ za'ra ãne: — Wa hã wa tô uburé ãma aima uwaimrami za'ra wa'wa, ĩwi iwaptẽrẽ za'ra wa'aba zéb uwaibaba. Tahawa, wa tô aima sõmri za'ra wa'wa apito hã, te te 're i'ai'madâ'â za'ra wa'aba mono da hã.

² Tahawa, te oto asib'apito za'ra wa'aba na 're hâimana, te te 're i'ai'madâ'â za'ra wa'aba mono da hã. Tazahã, wa hã wa tô oto ĩhâiba prédu. Wa tô ĩnhi'a. Duré ĩ'ra norĩ hã te aime 're hâimana za'ra wa'wa, ãmemhã. Duré wa hã ĩhâiba té hawim haré wa tô aima za'ra wa'aba i'rãnho'õmo na 're ĩhâimana, zahadu ãhã bâtâ u hã.

³ Ãhãta wa hã wa ĩhâiba. Marĩ na te upai wamhã, ma'ãpé ĩwasédé hã asiwi ĩ'ãma hiri aba ãhã na awa'awi na Uburé Danhib'apito nho'a, duré apito da, te te ipisutu nho'a. E niwamhã wa tô powawẽ hã dawi 'mai'â, niha wamhã, awaru po'repore hã. E niwamhã wa tô duré dama sadawa hapese. E niwamhã wa tô dazada 're ĩhâimana. E niwamhã wa tô duré rob'uiprazé hã te 're awaibu pi'uriwi, iwa'rãmi te dama 're i'arowairébé mono wẽ da hã. Ãne hã pé wa hã te 'manharĩ wamhã, wa za apâ sõmri za'ra, itede'wa norĩ ma hã.

⁴ Tawamhã Izaraéu nhihudu norĩ hã ma tô ãma sada'âbâ za'ra ãne: — A hã wama 're aihâimana za'ra mono õ di, aihâimana nhipese na hã. Duré wazada 're aihâimana za'ra mono õ di. Duré ni'wai wi asimisaihuri sina marĩ hã âri õ di.

⁵ Tawamhã Samuéu te duré tãma nharĩ za'ra ãne: — Uburé Danhib'apito hã duré apito da, te te ipisudu ma tô ãne hã ĩwasu'u wẽ hã wapari zahuré asõ'a za'ra wa'aba, marĩ na ĩwasédé hã asiwi ĩ'ãma ihiri aba õ na hã. Taha na ma tô ĩwaihu'u zahuré. Tahawa, ma te ãma sada'âbâ za'ra ãne: — Tahata tô. Uburé Danhib'apito hã ma tô aiwasu'u wẽ hã wapa ãhã na hã.

⁶ Tawamhã Samuéu te zahadu tãma nharĩ za'ra ãne: — Wanhib'apito 'Re ihâimana u'âsi mono, ma tô pisutu zahuré Mozési norĩ hã, Arãhã me, aihi'rata norĩ Ezitu hawi te te da'awazere zahuré wa, te te idanhimro zahuré mono da hã.

⁷ Aihâimana za'ra wa'aba a'â ãme. Wanhib'apito 'Re ihâimana u'âsi mono nho're, wa za ãma aipo're pu'u za'ra wa'wa, uburé marĩ te te aima 're i'ab'manharĩ za'ra wa'aba mono zém na te te i'asõ'reptu za'ra wa'aba na hã, duré aihi'rata norĩ te te isõ'reptu za'ra zém na zama.

⁸ Zaco nimahãna ti'ra norĩ ré Ezitu u morĩ wamhã, ma tô ezipsiu norĩ hã siwi sé pawa'âbâ ãna te te tãma 're romhuri za'ra mono da. Tawamhã ã norĩ aihi'rata za'ra wa'wa hã ma tô Wanhib'apito 'Re ihâimana u'âsi mono wi te te 're rowaptẽrẽ za'ra, te te 're pawaptob za'ra mono da. Tahawa, ma tô Mozési norĩ hã satõrĩ zahuré, Arãhã me, ta norĩ hã te te sani za'ra da Ezitu hawi, ã hã ti'ai 're oto 're hâimana za'ra mono da.

⁹ Tane nherẽ, ma tô aihi'rata norĩ wa'wa hã po're ha'âri za'ra Wanhib'apito 'Re ihâimana u'âsi mono ãma hã. Tahawa, ma tô Sisera 'rinho'u Hazo na isisi ãma dasi'wapéi 'manharĩ 'madâ'â'wai ma hâiba nhomri za'ra, filisteu norĩ ma hã, duré Moabi ãma apito ma hã, te te 'wapé za'ra wa, te te duré ãma ai'uté za'ra da.

¹⁰ Tahawa, ma tô nasi tiwi rowaptẽrẽ za'ra ãne te te pawaptob za'ra da, Wanhib'apito 'Re ihâimana u'âsi mono hã: “'Re ihâimana u'âsi mono, wa norĩ hã wa tô wawasété za'ra ni. Duré wa tô rẽme za'ra ni, ai'ãma 're iwawata za'ra mono zé hã, romhâibarĩ Baau na si ãma 're wawata za'ra mono da oto, 'ri nho'õmo mono bâ. Duré Asitaroti na romhâibarĩ nhisi na zama 're wawata za'ra mono da, wa tô ai'ãma 're iwawata za'ra mono zé hã wasiwi rẽme ni. Tane nherẽ, ãhã na wanho'reptu za'ra na wanhitob'ru za'ra wi, ai'ãma si 're wawata za'ra mono da oto apâ.”

¹¹ Tahawa, ma tô Wanhib'apito 'Re ihâimana u'âsi mono hã satõrĩ za'ra Gidiã norĩ hã, Baraque hã, Zépté hã, duré wa hã Samuéu, wa te i'asõ'reptu za'ra wa'aba da hã, asitob'ru norĩ wi. Ãne wa, ma tô a norĩ wa'wa hã oto romnhimimnhasi ãna 're aihâimana za'ra wa'aba mo.

¹² Tane nherẽ, amonita norĩ te apito Na'asi hã te te ai'wapé za'ra wa'aba da, we imorĩ na asiwi 'madâ'â aba wamhã, ma tô a norĩ wa'wa hã asiwi iwẽ'õ za'ra wa'wa, Wanhib'apito 'Re ihâimana u'âsi mono hã apito na wama 're ihâimana za'ra mono hã aré. Tahawa, ma tô ãne duré ĩma inharĩ za'ra wa'wa: “Wa wasima wẽ za'ra ni, aimawi wama isi'apito za'ra da hã.”

¹³ — Tahawa, ãhãta apito asiwi ipisutu za'ra wa'wa hã. Ma tô asiwi iwaptẽrẽ za'ra wa'wa. Tahawa, Wanhib'apito 'Re ihâimana u'âsi mono ma tô ã hã apito aima sõmri za'ra wa'wa.

¹⁴ Tawamhã Wanhib'apito 'Re ihâimana u'âsi mono hã asiwi 're wazéb za'ra wa'aba mono wamhã, te za rowẽ na si 're aihâimana za'ra wa'aba mo, ãma 're aiwata za'ra wa'aba mono wamhã, 're wapari pese za'ra wa'aba mono wamhã, imreme na si 're anomro aba mono wamhã, duré asib'apito siré a norĩ wa'wa ãma 're anomro aba mono wamhã.

¹⁵ Tane nherẽ, Wanhib'apito mreme 're wapari za'ra wa'aba mono õ wamhã, duré isimiroti hã asiwi 're wẽ'õ za'ra wa'aba mono wamhã, õ hã te za asada 're hâimana za'ra wa'wa, asib'apito za'ra wa'aba da zama.

¹⁶ Ma'ãpé a'â ãme aihâimana za'ra wa'aba i'aihâimana za'ra wa'aba zéb ãma, za marĩ Wanhib'apito iwẽ te te i'manharĩzé hã 'madâ'â za'ra wa'aba da.

¹⁷ Ãhã na hã wahum na wa wahâimana za'ra ni. E amnho trigu hã da te tehâri mono õ di za bété, ãhã na hã. Tahawa, wa za mre, Wanhib'apito ma tãirãrã'ã ma, we te te rob'ru da, duré tãi ma. Tawamhã ãne hã a norĩ wa'wa hã 'madâ'â za'ra wa'aba wamhã, te za iwaihu'u za'ra wa'wa, aiwasédé sa'ẽtẽ na 'Re ihâimana u'âsi mono wi i'manharĩ za'ra wa'aba zém na hã, asima iwẽ za'ra wa'aba zarina, aimawi apito hã waptẽrẽ za'ra wa'aba wa.

¹⁸ Tawamhã Samuéu hã ma tô mre, 'Re ihâimana u'âsi mono ma. Tãma mreme wamhã, tô taha bâtâ na ma tô Wanhib'apito hã tãma rob'ru tãirãrã'ã ma, duré tãi ma hã. Tahawa, ma tô uburé Izaraéu nhihudu norĩ hã tipahi pese za'ra Wanhib'apito ma hã, duré Samuéu ma zama.

¹⁹ Tahawa, te Samuéu ma nharĩ za'ra ãne: — Ma'ãpé wa'ãma aimreme za'ra na asib'apito 'Re ihâimana u'âsi mono ma. Tawamhã wa norĩ hã wasi'utõrĩ õ di za. Uburé wawasédé hã wa te 're i'manharĩ za'ra mono zém nhisiwimhã wa tô duré ãhã na hã wawasété za'ra ni, apito aimawi wa te wasiwi iwaptẽrẽzém na hã.

²⁰ Tawamhã Samuéu ma ãma tãma wa'rãmi za'ra ãne: — Aipahi za'ra wa'aba tõ. Tô sena ma tô aiwasédé hã i'manharĩ za'ra wa'wa. Tane nherẽ, oto rẽme za'ra wa'aba õ di za, Wanhib'apito ãma 're i'aiwata za'ra wa'aba mono zé hã. Te za oto uburé aipẽ'ẽ na ãma 're anomro aba mo.

²¹ Ihâiba'õ norĩ ãma 're anomro aba mono õ di za, 'Re ihâimana u'âsi mono upana ãma 're idawata za'ra mono norĩ ãma hã. Ta norĩ hã simipawapto waihu'u õ di, duré te te asõ'reptu za'ra wa'aba dai õ di. E marĩ wa. Ta norĩ hã sena na hã 're hâimana za'ra mono õ wa.

²² Tawamhã Wanhib'apito 'Re ihâimana u'âsi mono nhisi za'ẽtẽ zarina ma tô ropisutu, te te airẽme za'ra wa'aba tõ da hã. E marĩ wa. Tãma wẽ uptabi wa, ai'ãma isib'a'uwẽ za'ra wa'aba da hã.

²³ Wa hã te ai'ãma 're irowaptẽrẽ za'ra wa'aba mono zé hã te irẽme da hã mare di. Ãnei õ wamhã, wa aré ĩwasédé hã 'manha, 'Re ihâimana u'âsi mono wi. Wa hã wa za ãma aima te 're rowasu'u za'ra wa'wa bâdâdi iwẽ na ãma 're i'anomro aba mono da hã.

²⁴ Wanhib'apito si te za asiwi 're iwazé pese aba mo. Te za õhõ ãma si 're anomro aba mo, aipẽ'ẽ 'remhã. Tawamhã te za ãma 're aipo're pu'u u'âsi za'ra wa'aba mo, marĩ ipire te te aima 're i'manharĩ za'ra wa'aba mono zém na hã.

²⁵ Tane nherẽ, marĩ 'manharĩ wasété na ãma 're uzusi za'ra wa'aba mono wamhã, te za tô ai'utõrĩ 'wa, asib'apito siré.