1 Samuéu 11 - ꞌRe Ihâimana Uꞌâsi Mono Zadawa Wasuꞌu

Sau hã amonita norĩ ãma te te i'ai'utézé wasu'u

¹ Tawamhã misi a'amo si'utõrĩ pari, amonita norĩ nhib'apito Na'asi na isisi hã ma tô tite dasi'wapéi 'manharĩ'wa norĩ hã te te simro, 'rinho'u Zabesi na isisi ãma 're idahâimana za'ra mono norĩ zô, te te 'wapé za'ra da, Ziliadi na romnhisi ti'ai 'remhã. Tawamhã apito Na'asihi te dasi'wapéi 'manharĩ'wa norĩ hã ma tô siwi uirĩ, 'rinho'u hã. Tahawa, te Zabesi 're aibâ norĩ 're ihâimana za'ra mono norĩ hã tãma nharĩ za'ra ãne, Na'asihi ma hã: — Ma'ãpé asimiropisudu hã wama 'manharĩ za'ra na. Tawamhã wa norĩ hã wa za ãma asaze za'ra ni, wanhib'ihâ'a na wama 're i'aihâimana za'ra mono zém na hã za.

² Tawamhã apito Na'asi ma tô ãma sada'âbâ za'ra ãne: — Wa za tô aima 'manharĩ za'ra wa'wa ĩnhimiropisudu hã ãne: Aihâiba mono bâ wa'aba wa za atõmo nhimire niwĩp si atopu'u za'ra wa'wa. Tawamhã ãne wamhã, wa hã wa za uburé Izaraéu nhihudu norĩ hã ãma sisém nomri za'ra za, ĩnhimi'manharĩzém na hã.

³ Tawamhã 'rinho'u Zabesi ãma dama i'rãnho'õmo norĩ hã te asa tãma nharĩ za'ra ãne: — A'â wama sõmri za'ra na, 7 na bâdâ hã uburé Izaraéu nhihudu norĩ nhipti'ai mono bâ, wa te a'â ãma ropéi mono da, romreme na hã. Duré tane nherẽ, ni'wa hã wei morĩ õ wamhã, te te wapawaptob za'ra da hã, ãhã wapsi, wa za tô aima wasisõmri za'ra ni.

⁴ Tawamhã dama romreme 'wapéi'wa norĩ te te isatõrĩ za'ra hã ma tô oto aihutu Zibea ãma, Sau 're ihâimana mono zéb u hã. Tame te te dama rowasu'u za'ra wamhã oto, ma tô aiwa'õ za'ra ni, dawawa 'rãihâ na hã.

⁵ Tawamhã taha bâtâ 're, ma tô Sau hã we te te ubumro powawẽ hã a'ubuni hawi. Tahawa, te awa'awi anha ãne: — E marĩ ma tô watobro. E marĩ wa, te duré uburé ta'ru'ru ni. Tawamhã ma tô tãma rowasu'u za'ra, Zabesi 'ri nho'õmo nhisi hawi aibâ norĩ isi'aba'ré te te tãma irowasu'u za'ra zém na hã.

⁶ Tawamhã Sau ãne hã te te wapari wamhã, ma tô 'Re ihâimana u'âsi mono pẽ'ẽzani hã iwab ãzé. Tahawa, ma tô oto ab'rui pese.

⁷ Tahawa, ma tô maparane powawẽ iba'u hã timra, te te pãrĩ da. Te te pãrĩ wamhã, ma tô te te wa'õtõ. Tawamhã iwa'õno hã ma tô tãma sõmri za'ra, romreme 'wapéi'wa norĩ ma hã ta norĩ hã te te 'wasari da, uburé Izaraéu nhihudu norĩ nhipti'ai mono bâ ma da. Tahawa, te ãne dama sadawa wasu'u za'ra: — Ni'wa hã Sauhu siré duré Samuéu siré dasi'wapéi u morĩ õ wamhã, te za tãma rob'manharĩ za'ra, ã hã powawẽ iba'õmo norĩ ma, te te irob'manharĩ zahuré ne. Tawamhã uburé Izaraéu nhihudu norĩ hã ma tô tipahi pese za'ra, Uburé Danhib'apito hã niha za te te tãma rob'manharĩ za'ra õ'umnhasite. Tahawa, uburé ma tô Sauhu tẽmemhã ai'aba'ré, misi tinhimirosa'rata ré, isiré si oto 're nomro mono da.

⁸ Tawamhã uburé ma tô Sau hã te te 'rã'õtõ, 'rinho'u Bezequi ãma hã. 300 miu na aibâ Izaraéu nhihudu norĩ ihâiba za'ra na hã, duré 30 miu na Zudaha nhihudu norĩ ihâiba za'ra na hã.

⁹ Tawamhã ta norĩ hã te Zabesi hawi romreme 'wapéi'wa norĩ ma hã nharĩ za'ra ãne: — Ma'ãpé rowasu'u za'ra wa'aba, tame asiré norĩ aba ma, awẽmhã abzuma wana ré, za wa te i'asõ'reptu za'ra wa'aba na hã. Tawamhã ãne hã romreme Zabesi ãma 're ihâimana za'ra mono norĩ te te wapari za'ra wamhã, ma tô 're to za'ra, rowẽ te.

¹⁰ Tawamhã Zabesi ãma aibâ norĩ 're ihâimana za'ra mono norĩ hã te duré ãne tãma nharĩ za'ra, amonita norĩ ma: — Awẽmhã wa za tô aima wasisõmri za'ra wa'aba ni, marĩ hã asima iwẽ na wa'ãma 'manharĩ za'ra wa'aba da.

¹¹ Tawamhã awẽ bâtâ na ma tô Sau hã tite dasi'wapéi 'manharĩ'wa norĩ si'ubdatõ iwa'õtõ na hã upsãtã za'ra. Tawamhã awẽ wi, ma tô amonita norĩ te te sima i'ri nhoré za'ra zéb u asisi, te te 'wapé za'ra da hã. Tahawa, ma tô abzuma u hã uprosi, tinhitob'ru norĩ hã. Duré tiwi isimani za'ra norĩ hã ma tô siwi sipé misisi robzawi te.

¹² Tawamhã Izaraéu nhihudu norĩ hã te Samuéu ma nharĩ za'ra ãne: — E mahãta aibâ norĩ, Sau wama si'apito za'ra tõ da, te te inharĩ za'ra hã. We simroi aba mono ãwa, wa te wasiwi simro da.

¹³ Tane nherẽ, Sau hã te tãma nharĩ za'ra ãne: — Ni'wa hã idâ'â da hã mare di, ã bâtâ na hã. E marĩ wa. Uburé Danhib'apito hã ma tô wa te da'ãma i'ai'utézé hã wama sõmri za'ra, Izaraéu nhihudu norĩ ma hã.

¹⁴ Tawamhã Samuéu te duré dama tinha ãne: — Oto uburé wasi'aba'réi wa'aba Gilga na romnhisi u. Tawamhã tamep si wa za Sau hã wa te wasiwi ipisutu na ãma sahu za'ra ni, wanhib'apito za'ra da hã.

¹⁵ Tahawa, ma tô oto ai'aba'ré uburé Gilga u hã. Tame ma tô ro iwazéb zahi ãmamhã Sau hã siwi pisutu, tinhib'apito za'ra da hã. Tawamhã ma tô duré tinhoprubzém na hã tinhoprub za'ra, 'Re ihâimana u'âsi mono ma, danhoprubzé ãma irowẽ za'ẽtẽ na hã. Tahawa, Sau norĩ hã Izaraéu nhihudu norĩ me ma tô rowẽ te 're to za'ra, ãne na iromhâimanazém na hã.